Filemu Mai le Atua—O Afea?

“E le pine foi ona solia o Satani i lalo o outou vae e le Atua e ona le manuia [filemu].”—ROMA 16:20.

1, 2. (a) O le ā sa fai mai ai se tagata poto Hinitu e uiga i taua ma le filemu? (e) O ai i latou fiafia ua ō mai ina ia olioli i le filemu mai le Atua?

“AFAI E faauau pea lenei taufetuliga faavalea i mea tau, o mea moni o le a iʻu i se faatamaʻiaga tele sa leʻi faapea o a tupu i tala faasolopito. Pe a faapea e i ai sē manumalo e ola o lona uiga o lena manumalo o le a avea o se ola a e ua oti mo se malo na te maua le manumalo.” O lena vaaiga sa uluaʻi faia i le 1938 e Mohandas Gandhi sa ia vaai mamao ai lavai le lumanaʻi e sili atu i ona aso.

² Talu ai nei lava, i le 1931, na taʻu atu ai e Gandhi i se sui mamalu o Peretania: “Pe a fai e aufaatasi lou atunuu ma loʻu atunuu i aʻoaʻoga na faataatitia e Keriso i lenei Lauga i luga o le Mauga, atonu o le a mafai ona ta foʻia ai faafitauli o le lalolagi atoa.” E pei ona faailoa mai e le tagata poto Hinitu, ua ua faasino mai e le lauga a Iesu le auala i le filemu tumau. Sa fetalai Iesu i le lauga lena: “Amuia e faatupuina le filemu; auā e taʻua i latou o atalii o le Atua.” (Mataio 5:9) E toatele “atalii” ua olioli nei i le filemu mai le Atua. I le taimi nei, o ē uma e agamalu i le lalolagi o le a “faafiafia foi i latou ia te i latou ona o le manuia e tele.” (Salamo 37:11) A e pe mafai ona tatou mautinoa e uiga i nei mea tutupu?

3. Ai se a ua leai ai se filemu moni i le lalolagi i aso nei?

³ I aso nei, o le mataʻu i le faaumatiaga o le lalolagi o loo faapepepe nei i luga o le fanau a tagata. Ua taʻua mai e se suʻesuʻega talu ai nei: “O se faaiʻuga faavalea o le faamaumauina lea o le $3-4,000,000,000,000 (3-4 tiliona talā) talu mai le Taua e ll a le Lalolagi e fausia ai nofoaga e teu ai mea tau faaniukelea, lea pe a faaaogāina, o lona uiga ua pulea ai ola o le kelope atoa . . . O mekatone o loo i totonu o faaputuga o mea tau faaniukelea a le lalolagi ua lava ma totoe e fasiotia ai le 58 piliona o tagata, po o le fasiotia ai lea o tagata uma o loo ola nei faa-12 taimi”a Peitaʻi o loo faaauau pea ona faavave lenei taututuuga faavalea. MAD o le mea moni, o nei mataʻitusi pupuu ua sui tulaga i le Mutually Assured Destruction, o lona uiga o ni talitonuga maluelue o loo tausia ai e malosi sili le mea ua taʻua o lo latou filemu. E mautinoa lava e lē o le filemu lenei mai le Atua.

4. (a) O le ā le vaaiga faanoanoa ua tuuina mai nei e le lalolagi? (e) Peitaʻi o le ā le faamoemoe malosi ua faafiafiaina ai tagata tapuaʻi a Ieova?

⁴ I mea uma lava, ua tuuina mai e le lalolagi se vaaiga faanoanoa. Sa leʻi faapea lava ona i ai muamua i le sosaiete faaletagata le taumafai ina ia sao mai le tele o iʻuvale faapolotiki, le tele o faiga sauā e soli ai le tulafono, mea faatiga ulu tau tamaoaiga, po o le tele o mea e lē faaleatua ma feeseeseaiga faalotu na i lo o le tupulaga i aso nei. Sa leʻi faapea foʻi ona sili atu ona moni e uiga i le fanau a tagata “ua oi faatasi, ma oono faatasi mea uma lava na faia.” Peitaʻi ua folafola mai e le Atua faapea o ana mea na faia faaletagata “o le a tuusaunoa ia lava mea na faia ia le faapologaina e le iuvale, a e oo i le saolotoga o le fanau a le Atua e manuia ai.” (Roma 8:21, 22) O na tagata alolofa i le filemu o ē tapuaʻi i le Atua o le Tusi Paia, le Alii Silisili Ese o Ieova, ua mautinoa lo latou ulu atu i lena saʻolotoga. O le a avea o se saʻolotoga e mauaa i le filemu moni, le filemu e faavavau. (Esekielu 37:26-28) Peitaʻi o afea ma o le a faapefea ona oo mai lena filemu?

Silafaga a le Atua i ‘Taimi ma Tau’

5. O le ā le fesili ua mapuna aʻe e tusa ai ma le 1 Tesalonia 5:1?

⁵ Sa faamafanafana atu le aposetolo o Paulo i Kerisiano i Tesalonia i lona faamatalaina atu pe ua faapefea ona fesootaʻi le toetu ma le “afio mai o le Alii” o Iesu. Na sosoo ai ma lona faapea mai: “A o aso ma tausaga, e le aoga ia te outou, le au uso e, ona ou tusi atu ai ia te outou.”—1 Tesalonia 4:15; 5:1.

6. E faapefea ona tatou iloa e tāua i le Atua ‘taimi ma tau’?

⁶ O faaalia ea i upu a le aposetolo faapea ua lē tāua ‘taimi ma tau’ i le Atua? E mamao lava mai lena manatu! (Failauga 3:1) “A ua oo atu i le faatoaga o tausaga,” i le faaiʻuga o le 69 vaiasosa, ona “auina mai lea e le Atua o lona Alo.” Ma o le umi o le faiva a Iesu e tolu ma le ʻafa tausaga—mai le 29 T.A. e oo i le 33 T.A.—e pei lava ona sa valoia mai. (Kalatia 4:4; Tanielu 9:24-27) O le faaiʻuga tonu lava o “tausaga o nuu ese” i le 1914 na faatuina ia Iesu e avea o se Tupu i “Ierusalema faalelagi.” (Luka 21:24; Eperu 12:22; Esekielu 21:27; Tanielu 4:31, 32) O le a oo mai foʻi le “puapuaga tele” i lea “aso ma lea itu aso” ua tuupoina e Ieova. “E le faatuai mai.”—Mataio 24:21, 36: Sapakuka 2:3.

7. Ai se ā sa lē manaomia ai ona tusi atu Paulo i tagata Tesalonia e uiga i ‘taimi ma tau’?

⁷ Peitaʻi, e tusa ma lenei mea e lē manaomia ai ona tusi mai Paulo faatatau i “aso ma tausaga.” Ua uma lava ona faailoa atu i na Kerisiano Tesalonia faapea o le ‘tau’ mo le faaiʻuga o mea faa-Iutaia, o le a faaaiʻuina i le 20 tausaga mulimui ane, i le 70 T.A. Sa susulu atu lo latou maelega ma le “olioli mai le Agaga Paia” e fai ma faaaʻoaʻo. (1 Tesalonia 1:4-7) E fapena foʻi Molimau a Ieova i aso nei, ona latou matuā faapea o taua ma isi mea faigata na oo mai i le lalolagi i le 1914 o “faailoga” ia o le faatasi lē vaaia mai o Iesu i le mana ma le mamalu o le Malo.—Mataio 24:3-8; 25:31.

8. Ai se a e ao ai ona tatou tausia pea le mataala ma le tiotio?

⁸ Ona sosoo ai lea, ma le toe faamautinoa mai e le aposetolo ona uso Kerisiano, i lona faapea mai: “Auā ua outou iloa lelei lava, o le aso o le Alii [o Ieova] e pei o le gaoi i le po, e faapea ona oo mai ai.” (1 Tesalonia 5:2) E ui lava tatou te lē iloa le taimi tonu, a e o lena aso mo le faataunuuina o le faamasinoga ua lata tele mai. E faafuaseʻi lava ona pa, ma le tonu lava i le taimi, tuupoina a le Atua. O lea, ia tatou mataala ai ma ia tiotio.—Luka 21:34-36.

O Se Alaga Faaiʻu mo le Filemu

9. (a) O le ā le alaga ua maōna aʻe, ma ai se a ua lē saosaolaumea ai Kerisiano moni i lea alaga? (e) O ai o loo faaleoina atu lenei alaga, ma e faapefea ona faatusatusa atu i latou i tupu o aso o Ieremia?

⁹ ‘Filemu ma le Saogalemu!’ Ua faamataalia mai ai i tatou e Paulo faapea o le a tatou faalafoina se alaga i le tumutumuga o le “afio mai” o Keriso. (1 Tesalonia 5:3) Po ua toeitiiti tatou faalogoina lena alaga? O fea e amata mai ai se alaga mo le filemu ma le saogalemu o le lalolagi? E mautinoa lava e lē mai soʻo o Keriso, auā na taʻua e Iesu faapea e lē o ona soʻo po o lona Malo o ni “o le lalolagi” i latou. (Ioane 15:19; 17:14,16; 18:38) O i latou e alagaina lena valaau e tatau ona avea o ni tagata o le lalolagi o ē tetee i le oo mai o le Malo o le Atua. O i latou o se vaega o le lalolagi ‘o loo nofo toilalo i loo leaga,’ o Satani le Tiapolo. (1 Ioane 5:19) E pei lava o taʻitaʻi o malo faapolotiki ma lotu i aso o Ieremia, o le a latou tautala atu i le “faaaliga mai o latou lava loto,” ua faapea mai, “E manuia outou,” ua finau atu ai faapea i lea filemu mai le Atua. Maeu se faamaonia o lo latou sese!—Ieremia 23:16,17,19,20.

10. O le ā le faasologa o mea tutupu ua taʻitaʻiina atu ai le lalolagi i le tulaga ua i ai nei?

¹⁰ O se faasologa o mea tutupu ua taʻitaʻiina atu i lenei alaga o le “Filemu ma le saogalemu!” Na tuuina mai i luma Malo Sosoo i le 1920 ina ua mavae le Taua Tele, lea ua lauiloa nei o le Taua l a le Lalolagi. O le fuafuaga o lene Malo Sosoo sa faia ina ia faamutaina taua mai le lalolagi e faavavau. Peitaʻi, o le Taua e ll a le Lalolagi na ia lafoia Malo Sosoo i le to e lē gata. Ia Oketopa 24, 1945, na toe ola mai ai lenei tino, ua toetu aʻe mai le efuefu ma se igoa fou, o Malo Aufaatasi. (Faatusatusa i le Faaaliga 12:8.) O lana uluaʻi sini lava “o le faasaoina o le filemu ma le saogalemu i le lalolagi.” Sa faamatalaina mai e i latou na faavaeina a latou taumafaiga maumauaʻi “ina ia faasaoina tupulaga auiluma mai le pagatia i taua.” Pe na taulau ea Malo Aufaatasi i le faamautinoaina o lea filemu ma le saogalemu?

11. O le ā le mataʻutia o le faalavelave ua fesagaʻi ma le lalolagi?

¹¹ E ui lava po o le ā le faamaoni atonu na i ai nisi o i latou na faavaeina le Malo Aufaatasi, a e sa leʻi taulau lava lena tino, e pei fo’i o Malo Sosoo na muamua ia te ia, i lona faataunuuina o lana fuafuaga faatulagaina. Ua saofaʻi nei le lalolagi i luga o se paelo o oge o meatau faaniukelea. O se faalavelave faafuaseʻi na tupu i Chernobyl, i Rusia ia Aperila 1986, na iʻu ai ina toulu ifo ave o malosi faaniukelea i luga aʻe o le tele o vaega i Europa, e faaalia ai, e tusa lava pe faaaogāina mo fuafuaga o le filemu, a e ua i ai i malosi faaniukelea se tulaga mataʻutia. O nisi atunuu i le Pasefika i Saute o loo taumafai ia tausia o latou vaipanoa ina ia saʻoloto mai meatau faaniukelea. Peitaʻi pe a pa se taua faaniukelea atoatoa, o le a leai la ni ē faasaoina i so o se mea.

Pe Tatau le “Filemu ma le Saogalemu”?

12. O le ā le faalauiloaga e Malo Aufaatasi mo le 1986, ma faatasi ai ma le ā le tali mai a atunuu?

¹² I le iloa lelei o le oʻooʻo o tulaga mataʻutia, ua faalauiloa mai ai e Malo Aufaatasi le 1986 e avea ma Tausaga Faavaomalo o le Filemu. Sa faafetaiaʻia lenei mea i ni fesilafaʻiga eseese i totonu o atunuu. O le toatele lava o i latou sa lagolagoina le Tausaga o le Filemu a Malo Aufaatasi i lea auala ma le isi foʻi auala, a e ua latou faasino atu i le taua faaniukelea o se ao uliuli o loo faamataʻuina ai le filemu. I le taimi nei, o loo faaauau pea ona tauina taua laiti i le lalolagi atoa, ma e 150 nisi o nei taua na tauina i le vaitaimi o le Taua e ll a le Lalolagi, faatasi ma se aofaiga o ē ua maliliu e sili atu i le 30,000,000. E mafai ea la ona faapea atu ua i ai moni se malo na muaʻi gaoioi e faatinoina na upu taʻutaʻua o le Isaia e 2:4 na o loo matagofie ona lomia i luga o le pa taalaelae i le maota o Malo Aufaatasi?

13. Ua faapefea ona tuuina atu e taʻitaʻi lotu le lagolagosua?

¹³ Sa leʻi solomuli lotu o le lalolagi i lo latou tuuina atu o le lagolagosua i le Tausaga o le Filemu a Malo Aufaatasi. Na faalauiloa mai e Pope Ioane Paulo ll Ianuari 1 o se Aso o le Lalolagi mo le Filemu ma uunaia tagata popoto ina ia latou saunia se taʻitaʻiiga e manaomia mo le faatuina o se faavae mo le filemu faalevateatea. Sa ia valaau atu foʻi i faatuatuaga uma i le lalolagi ina ia latou aufaatasi i talosaga i Assisi, i Italia, i le taimi o le Tausaga Faavaomalo o le Filemu. Sa talia ma le mafana e le Aki Epikopō, o Canterbury, le ulu o le Lotu Egelani, ma le vaega a Puta lenei valaau. Na tuuina mai e le Komiti o Lotu i le Lalolagi se taʻutinoga i le Tausaga Faavaomalo o le Filemu, ma nanati mai ina ia amata vave loa ona lafoaʻi auupega faaniukelea.

14. E na o le pau faapefea le fuafuaga e mafai ona faamanuiaina mo le filemu?

¹⁴ Ae peitaʻi, i lenei mataupu o le faavaeina o le “filemu ma le saogalemu,” o le ā le finagalo i ai o “le Atua e ona le manuia [filemu]”? O le faaalia ea i le Afioga faavaloaga a le Atua faapea e mafai e tagata lē lelei atoatoa ma malo ona aumai le filemu ma le saogalemu i lenei lalolagi? E matuā mamao lava mai lea! E faalagolago le “manuia foi” o mea i le auala e tauaaoina ai e Ieova e tusa ai ma lana amiotonu ma lona viiga.—Isaia 55:11; 61:11.

O le “Fano Faafuaseʻi” o Faaloloʻu Mai

15. O le ā le faasilasilaga e faateʻia ai ua faia mai e Paulo e sosoo ai?

¹⁵ Ua taʻu mai e le aposetolo o Paulo ia i tatou le mea o le a tupu. Ua ia faapea mai: “Auā pe a latou fai ane, O loo filemu, ua le afaina [saogalemu], ona oo lea ia te i latou o le fano faafuasei, faapei o le faatiga o le fafine to a fanau mai, latou te le sosola ai lava.”—1 Tesalonia 5:3.

16. Ai se ā ua lē o ala ai a le Atua ala o atunuu?

¹⁶ I le uluaʻi faitauina, o na upu atonu o le a foliga mai e gatete ai. Peitaʻi o loo faamanino mai e le Tusi Paia mea. O ala o malo i aso nei e lē o ala ia o le Atua. (Isaia 55:8, 9) O lana pogai mo le faatagaina o so o se ituaiga o pulega eseese faaletagata e faaauau pea, ina ia taliina ai le finauga na lagā e le Gata taufaaoleole, o Satani le Tiapolo e tusa ma le 6,000 tausaga ua mavae. Ina ua ʻolegia e Satani o tatou uluaʻi mātua e filifilia le fia tutoatasi mai le Atua, sa ia fesiligia ai pe faamata e manaomia moni e le fanau a tagata le pulega a le Atua.—Kenese 3:4, 5.

17. O le ā se sini na faia e pulega a tagata, ma o leā ua faamaonia mai e lenei tulaga?

¹⁷ Talu mai meleniuma mulimuli ane, ua faatagaina pea e le Atua tagata ia latou tofo i ituaiga uma o pulega tautagotago faaletagata. Tusa lava pe tumau mo ni nai tausaga pe mo ni nai selau ni tausaga, o ituaiga pulega taʻitasi uma lava faaletagata ua matuā lē taulau e aumaia ai le filemu ma le saogalemu moni. O taua, solitulafono, o le fefe, ma le oti ua avea ma iʻuga faifai pea o le fanau a tagata i lalo o so o se ituaiga o pulega faaletagata. I le faagasologa o talafaasolopito “e pule ai le tasi tagata i le tasi, e leaga ai o ia vala.” (Failauga 8:9) E leai lava se eseesega ma aso nei. So o se tasi ua ia iloa e uiga i le finauga e mafai ona fai atu nei, e pei ona sa faia e le perofeta a le Atua: “Ieova e, ua ou iloa e le i le tagata lona ala, e le o i le tagata e savali ona faatonuina le mea e ui ai o ia.”—Ieremia 10:23.

18. Ai se ā ua lē aogā ai le alaga a atunuu i le “Filemu ma le Saogalemu”?

¹⁸ Ua oo mai nei le taimi e faaleleia ai le finauga mo le uluaʻi taimi ma aso uma lava. Ua na o le pulega lava a le Atua e mafai ona aumaia le filemu ma le saogalemu i le fanau a tagata. Peitaʻi, e lē o le pulega a le Atua o loo mananao i ai malo pe a latou alaga mai ua “Filemu ma Saogalemu!” Ua latou mananao e faaauaua pea a latou pulega e tusa ai ma o latou talitonuga ma manatu faamaualuga. Peitaʻi ua leai se taimi! Ua logo i tino o malo e tatau ona faia se mea e sili ona malosi. A leai, o le a leiloa tagata uma i se mala faaniukelea. O lea, o le a latou faia ai e pei ona valoia e Ieremia: “Ua latou fofo faatauvaa le manua o le tama fafine o loʻu nuu, ua faapea ane, E manuia, e manuia; a e leai se manuia.”—Ieremia 6:14; 8:11, 15.

O le Iʻuga na Valoia

19. O le a faapefea ona oo mai le “aso o [Ieova]”?

¹⁹ “Ona oo lea . . . o le fano faafuasei,” ua fai mai ai le aposetolo o Paulo. Ua faaopoopo mai le perofeta a le Atua o Isaia: “Faauta, e alalaga o latou tagata totoa i fafo; e tagi lotulotu o le sāvali o le faaleleiga [filemu].” (Isaia 33:7) I le tele o nofoaga, ua faaalia ai e le Tusi Paia faapea o le faaoosala o le faamasinoga a Ieova i luga o nuu ma tagata amio leaga o le a vave lava ona oo mai, e lē mafaatalia—e moni “e pei o le gaoi i le po.” (1 Tesalonia 5:2, 3; Ieremia 25:32, 33; Sefanaia 1:14-18; 2 Peteru 3:10) I le taimi pea a faalauiloa mai ai ma le leotele e le lalolagi faapea ua ia ausia ni tulaga sili o le “Filemu ma le saogalemu,” ona oo mai lea o le “aso o [Ieova]” ma le mataʻu tele ma e faafuaseʻi lava. O le a iloa ai e tagata o le Atua po o le ā lea alaga o le “Filemu ma le saogalemu!” ma o le a o saogalemu ai i latou i le lafitaga ua saunia e Ieova.—Salamo 37:39, 40; 46:1, 2; Ioelu 3:16.

20. (a) O le ā le ituaiga o “manu feai” e i ai le Malo Aufaatasi? (e)  E faapefea ona silasila Ieova i lotu sese, ma ai se ā?

²⁰ I le Afioga a le Atua, ua faatusaina ai le faagasologa a Malo Sosoo ma lona sui, le Malo Aufaatasi i le “manu feai mūmū” o loo i ai ulu e fitu (ua fai ma sui o pule a le lalolagi lea ua amata mai ai) ma nifo e sefulu (fai ma sui o pule faalemalo o loo lagolago nei i ai). Ua faaalia mai e le Tusi Paia o ia o se “manu feai” faapolotiki, e faatusatusa atu i le “leona” a Peretania ma le “urosa” a Rusia. I lona papatua o loo tietie ai se fafine, o “PAPELONIA LE AAI TELE, O LE TINA O FAFINE TALITANE MA MEA E INOSIA I LE LALOALGI.” (Faaaliga 17:3-8) Ua faamatalaina lelei mai ai e lenei mea le silafaga a Ieova i lotu sese, lea e lē o suitulaga ia te ia ma lona Malo amiotonu. Ua talitane faaleagaga o ia i lona aafia i faiga faapolotiki. O se faaaʻoaʻoga o lenei mea, ua fusia faatasi lotu ma Malo Aufaatasi i faatosinaga faalelalolagi mo le filemu ma le saogalemu. O le a manao foʻi e i ai sana filemu ma le saogalemu mai le feau faafaamasinoga a le Atua le o loo faalauiloina e Molimau a Ieova. I lenei la itu, ua ia uunaia ai nisi malo o taofia le gaoioiga faa-Kerisiano a Molimau.—Salamo 2:1-3.

21. (a) O le ā le gaoioiga e faailoga ai le amataga o le “aso o (Ieova)”? (e)  I le ā le vaega mulimuli o le a toe sagaʻi atu i ai lea “aso”?

²¹ O le a faapefea ona oo mai le “aso o [Ieova]”? O le a sau moni lava, “e pei o le gaoi” i lenei po aupito sili ona pogisa o le talafaasolopito o le fanau a tagata! O le tulaga lena o le a i ai pe a liua e le Atua atunuu o le manu feai a Malo Aufaatasi ina ia toe liliu faafuaseʻi atu i tapuaʻiga sese. I le faaalia o lo latou matuā inoino ia Papelonia le Sili, o le a latou faaalialia ai o ia ma matuā faasaunoa i ai. Maeu se oo faanatinati mai o lenei faataunuuga lea o le a auē atu ai ma le leo tetele ana aumea faapolotiki o loo i ai nei: “Aue, aue Papelonia e, le aai tele ma le aai malosi! auā o le itu aso e tasi ua oo mai ai lau sala.” Peitaʻi o le a osofaʻia foʻi e malo mai a latou autau tagata o le Atua. Ona faaumatia loa lea e le Tupu o tupu o Iesu Keriso na fili uma ma lafoina loa i le to e lē gata le uluaʻi tetee, o Satani le Tiapolo.—Faaaliga 17:16, 17; 18:10; 19:11-21; 20:1-3; faatusatusa le Esekielu 38:11, 16, 18-23.

22. (a) O le ā le faamoemoe sili ua i ai i le fanau a tagata talitonu i aso nei? (e) O le a faapefea ona e sau ina ia olioli i le filemu mai le Atua?

²² I le iʻuga, o le a lauolaola loa le filemu ma le saogalemu i lalo o le Malo o le Atua! (Salamo 72:1, 7; Isaia 9:6, 7) Ma le fiafia lava, o le toatele o ē o loo ‘mataala pea ma faautauta’ i aso nei, o le a soifua pea ina ia latou vaai i ia mea. (1 Tesalonia 5:4-6) O “le motu o tagata e toatele mai atu nuu uma,” o ē o loo faaalia le faatuatua i le togiola a Ieova na saunia e ala ia Keriso, o le a faasaoina atu nai le “puapuaga tele’ ina ia olioli ai i le filemu e faavavau mai le Atua. (Faaaliga 7:9-17; 21:3, 4) Talosia ia avea oe o se tasi o i latou na!

[Faaopoopoga i lalo]

E Faapefea ona E Taliina?

◻ Ai se ā ua tāua ai ‘taimi ma tau’ i le Atua ma i tatou?

◻ E tatau faapefea ona tatou amanaiaina le latalata mai o le “aso o [Ieova]”?

◻ O ai o loo saosaolaumea i le alagaina o le 1 Tesalonia 5:3, ma o ana fea?

◻ O ā ni mea tutupu iloga ua tatalaina mai e lea alaga?