Puipui Faasaga i Agalelei Sese

¹ Ua lauiloa tagata o Ieova i lo latou agaga agalelei ma le lima foai. E masani ona faaalia e lenei uiga ia lava i se auala faaletino, pe a tatou faataitai i le tuaoi agalelei Samaria lea na fetalai faatatau i ai Iesu i lana faataoto faamomoiloto. (Luka 10:29-37) Ae, o nisi o ē e lē onomea i ai le fesoasoani faaletino, atonu e taumafai e faaaogā mo lo latou manuia lo tatou agalelei. O lea, o lo tatou alofa mo isi e tatau ona paleni ma “iloa lelei, atoa ma le faautauta uma.”—Fili. 1:9.

² Totonu o le Faapotopotoga: O se faaaoaoga, e ono fai mai se tasi ua leai sana galuega, pe fai mai isi pogai ua talosaga ai mo se fesoasoani. E iai taimi e lē o gaoioi maelega ai i latou nei e saili ni galuega, ae na ona mananao i isi e saunia mea manaomia mo i latou i le olaga. Ia i latou na, sa faatonu mai le aposetolo o Paulo: “Afai e le fia galue se tasi, aua neʻi ʻai foi o ia.”—2 Tesa. 3:10.

³ O le “tausaga ma le mea e tupu ai” e oo ia i tatou uma, o lea, afai e iai so tatou manaoga faaletino, lē lava o “mea e ʻai e tatau ma le aso,” e lē tatau ona tatou popole naua, auā e saunia e Ieova mea mo i latou o ē alolofa ia te ia ma fai lona finagalo. (Fai. 9:11; Mata. 6:11, 31, 32) Atonu o le a aogā i lē e iai le manaoga ona talanoa ma se tasi o le autoeaina. Atonu e iloa e le autoeaina polokalama faalemalo o loo iai e saunia fesoasoani, ma atonu o loo iai i se tulaga e fesoasoani i le faamaeaina o pepa po o le faamalamalamaina o mea manaomia mo na polokalama. I so o se tulaga, e mafai e le autoeaina ona fuafua tulaga o tagata taitoatasi o loo talosagaina se fesoasoani, ma fuafua le mea e mafai ona fai.—Faatusatusa 1 Timoteo 5:3-16.

⁴ Tagata Femalagaai Taufaasese: O loo maua pea e le Sosaiete lipoti faapea o nisi i le faapotopotoga, ua ave faagaoia e tagata femalagaai taufaasese tupe ma mea totino. E lē tatau ona tatou faateia i lenei mea, auā ua lapataia i tatou e le Tusi Paia, “o tagata amio leaga ma e taupelopelo, e alualu pea lava lo latou leaga, o loo faasese atu, ua faaseseina foi i latou.” (2 Timo. 3:13) E masani ona fai mai nei tagata taufaasese o loo latou iai i se tulaga lē manuia, ma e manaomia se tupe e totogi ai femalagaaiga ma meaai mo se malaga e toe foi i aiga. E ui atonu latou te foliga faamaoni mai, i le tele o tulaga e lē o i latou o ni Molimau a Ieova, ae o loo faatagā foliga mai faapena.

⁵ A fesili se tagataese mo se fesoasoani, o se mea poto le talanoa i se tasi o toeaina o le faapotopotoga, o lē e mafai ona taimua e faamautinoa po o lenei tagata o se tasi o uso. E masani lava ona telefoni atu i se tasi o toeaina i le faapotopotoga a lena tagata, ina ia mafai ona faamaonia tulaga o lea tagata. O uso ma tuafāfine moni o ē e iai i se tulaga manaomia sa leʻi faatalitalia, o le a malamalama o le faia o lenei ituaiga o sailiiliga e mo le puipuiga o i latou uma o loo aafia ai. I le isi itu, o lenei ituaiga o sailiiliga o le a faaalia ai tagata taufaasese. E lē manaomia ona soona masalosalo i ē uma tatou te lē iloa, ae tatau ona tatou mataala faasaga i tagata taufaasese amioleaga.—Tagai foi km 9/80, itulau 2.

⁶ Na fautua le tupu poto o Solomona: “Aua neʻi e faafiti se mea lelei i e ua tatau i ai, pe a ua e mafai ona faia.” (Faata. 3:27) I lo tatou faautauta atamai, e mafai ona tatou alolofa pea a o puipui faasaga i agalelei sese.