1 Peteru 5:6 7—ʻIa Faamaulalo Outou i Lalo o le Aao Malosi o le Atua, a o Lafo Atu o Outou Popolega Uma iā te Ia’

“O le mea lea, ia faamaulalo ai outou i lalo o le aao malosi o le Atua, ina ia faaeaina e ia outou i le taimi e tatau ai, a o lafo atu o outou popolega uma iā te ia, auā o loo manatu mamafa mai o ia iā te outou.”—1 Peteru 5:6, 7, Faaliliuga a le Lalolagi Fou.

“O le mea lea ia faamaulalo ai outou i lalo o le aao malosi o le Atua, ina ia faamaualugaina outou e ia i ona po e tatau ai. Ia tuuina atu ia te ia mea uma tou te popole ai, auā o loo manatu mai o ia ia te outou.”—1 Peteru 5:6, 7, Tusi Paia Samoa—Lomiga 1969.

Uiga o le 1 Peteru 5:6, 7

O nei upu ua faamautinoa mai ai e le aposetolo o Peteru i Kerisiano, e mafai ona latou tatalo i le Atua i o latou faafitauli ma popolega. E tāua i le Atua ē e lotomaulalo, ma o le a ia matuā tauia i latou.

ʻIa faamaulalo outou i lalo o le aao malosi o le Atua.’ I le Tusi Paia, e masani ona faasino atu le aao po o le lima o le Atua i lona mana e laveaʻi ma puipuia ai. (Esoto 3:19; Teuteronome 26:8; Esera 8:22) E faamaulalo e Kerisiano i latou lava i lalo o le aao o le Atua, pe a latou faalagolago iā te ia. E latou te iloa le mea e gata ai lo latou malosi, ma iloa foʻi e lē mafai ona foʻia e i latou lava o latou faafitauli. (Faataoto 3:5, 6; Filipi 4:13) E latou te mautinoa e iai le mana o le Atua e fesoasoani ai iā i latou i le taimi tatau ma i le auala sili.—Isaia 41:10.

“Ina ia faaeaina e ia outou i le taimi e tatau ai.” O i latou e tumau ma le onosaʻi i faafitauli, e latou te mautinoa o le a faaeaina pe tauia e le Atua i latou. E na te lē tuua ona tagata tapuaʻi ina ia tofotofoina e faavavau, pe e sili atu nai lo o le mea e latou te lavātia. (1 Korinito 10:13) Peitaʻi, pe a latou faia pea mea lelei, e mautinoa “e iai le taimi” o le a tauia ai i latou e le Atua.—Kalatia 6:9.

“A o lafo atu o outou popolega uma iā te ia, auā o loo manatu mamafa mai o ia iā te outou.” E lafo atu e Kerisiano o latou popolega uma i le Atua, e ala i le tatalo ma le lotomaulalo iā te ia. Ua taʻua i se tasi tusi e faapea: “O le veape lafo atu e maua ai le manatu o ni taumafaiga e liaʻiese se mea o loo iā i tatou. O loo faamatalaina ai se gaoioiga maumauaʻi o loo fai.” Pe a lafo atu e se Kerisiano ona popolega i le Atua, o le a faaitiitia ai lona popole ma tofo ai i le “filemu mai i le Atua” e pei ona taʻua i le Tusi Paia. (Filipi 4:6, 7) E mafai ona ia mautinoa e finagalo le Atua e fesoasoani iā te ia, ona e manatu mamafa le Atua iā te ia ma e na te faaaogā le tele o Lona mana e tausia ai o ia.—Salamo 37:5; 55:22.

Siʻomaga o le 1 Peteru 5:6, 7

O loo faaiʻu i le mataupu e 5 le uluaʻi tusi a le aposetolo o Peteru i Kerisiano. (1 Peteru 1:1) Na feagai soo o Keriso ma luʻi eseese na tofotofoina ai lo latou faatuatua, ma ono faapopoleina ai i latou e pei foʻi o aso nei. (1 Peteru 1:6, 7) Ina ua iloa e Peteru faigatā o loo latou fesagaʻia, na ia tusi atu ai se tusi faamāfanafanaloto ma faalaeiau i le pe tusa o le 62-64 T.A.—1 Peteru 5:12.

Na faaiʻu e Peteru lana tusi i se faamanatu alofa mo i latou e feagai ma luʻi ona o lo latou faatuatua. Pe a faaauau ona latou lotomaulalo ma faalagolago i le Atua, e mafai ona latou mautinoa o le a fesoasoani le Atua iā i latou ia tutumau. (1 Peteru 5:5-10) E mafai foʻi ona faalaeiauina Kerisiano o loo sauāina i aso nei i upu a Peteru.

Ia matamata i lenei vitiō puupuu o loo aumai ai se aotelega o le tusi o 1 Peteru.