Ia Manatua Pea le Aso o Ieova
“E o mai i ona aso e gata ai o e tauemu.”—2 PETERU 3:3.
1. O le ā le uiga o le faanatinati na iai i se tasi Kerisiano i ona po nei?
NA TUSI mai faapea se faifeau na galue faataimi atoa mo le silia i le 66 tausaga: “Ou te lagona pea lava se uiga malosi o le faanatinati. Ou te mafaufau pea lava ia Amaketo, e pei o lea o le a oo mai tala atu taeao. (Faaaliga 16:14, 16) I le pei o loʻu tamā, ma le tamā o loʻu tamā, ua faapena foi ona ola ai loʻu olaga e pei ona faalaeiau mai le aposetolo [Peteru], ‘o loo manatua pea le oo mai o le aso o Ieova.’ E masani lava ona ou manatu i le lalolagi fou folafolaina o se ‘mea moni e ui e lē o vaaia.’”—2 Peteru 3:11, 12, NW; Eperu 11:1; Isaia 11:6-9; Faaaliga 21:3, 4.
2. O le ā le uiga o le manatua pea o le aso o Ieova?
2 O le faaupuga a Peteru “o loo manatua pea,” i le faasino atu i le aso o Ieova o lona uiga tatou te lē o aveesea mai o tatou mafaufau. E lē tatau ona tatou faagaloina, ua latalata mai lava le aso o le a faaumatia ai e Ieova lenei faiga o mea e avea ma faataimuaga i le faavaeina o lana lalolagi fou folafolaina. E tatau ona matuā moni ia i tatou, e matuā manino i ai la tatou vaai, e pei lava o lea ua i o tatou luma. Sa faapena le moni i perofeta a le Atua i aso anamua, ma sa masani ona latou tautala i ai faapea ua latalata mai.—Isaia 13:6; Ioelu 1:15; 2:1; Opetaia 15; Sefanaia 1:7, 14.
3. O le ā e foliga mai na uunaia ai le faia o le fautuaga a Peteru e faatatau i le aso o Ieova?
3 Aisea na faalaeiau ai i tatou e Peteru ina ia manatu i le aso o Ieova e peiseai e mafai ona oo mai, e pei ona taʻua, “tala atu taeao”? Talu ai ua manino le amata ona tauemua e nisi le manatu o le folafolaga o le faatasi mai o Keriso, lea o le a faasalaina ai ē fai mea sese. (2 Peteru 3:3, 4) I le mataupu la e 3 o lana tusi lona lua, lea o le a tatou talanoaina nei, ua tali atu ai Peteru i le aamu a nei tagata tauemu.
Se Auganiga Mafana ia Manatua
4. O le ā e manao Peteru ina ia tatou manatua?
4 O lagona mafana o Peteru mo ona uso ua faaalia i lona faasino soo atu ia i latou i lenei mataupu “le au pele e.” I le augani atu ma le mafana ia i latou ina ia aua neʻi galo mea na latou aʻoaʻoina, ua amata atu ai Peteru e faapea: “Le au pele e, . . . ou te faamafanafana atu ai i o outou loto faamaoni i loʻu faamanatu atu; ina ia outou manatu ai i valoaga [“upu,” LT] na fai mai e le au perofeta paia, ma le poloaiga a le Alii o le Faaola lea, ua ala mai i a outou aposetolo.”—2 Peteru 3:1, 2, 8, 14, 17; Iuta 17.
5. O le ā na fai mai ai nisi perofeta e faatatau i le aso o Ieova?
5 O ā “upu na fai mai e le au perofeta paia” lea o loo faalaeiau atu Peteru i lana au faitau ina ia latou manatua? Ioe, o upu e faatatau i le faatasi mai o Keriso i le mana o le Malo ma e faatatau i le faamasinoga o ē faalematau. Na muai tataʻi atu e Peteru i le taimi ua mavae manatu i nei upu. (2 Peteru 1:16-19; 2:3-10) Ua faasino atu Iuta ia Enoka, o le uluai perofeta faamauina lea na lapatai mai e faatatau i le faamasinoga aasa a le Atua i ē faia mea leaga. (Iuta 14, 15) Na mulimuli atu foi isi perofeta i le mea na faia e Enoka, ma e lei manao Peteru e tatou te faagaloina mea na tusia e i latou na.—Isaia 66:15, 16; Sefanaia 1:15-18; Sakaria 14:6-9.
6. O ā fetalaiga a Keriso ma ona aposetolo ua faamalamalamaina ai i tatou e faatatau i le aso o Ieova?
6 E lē gata i lea, ua taʻu atu e Peteru i lana au faitau ina ia latou manatua “le poloaiga a le Alii o le Faaola lea.” O le poloaiga a Iesu e aofia ai le timaiga: “Ia outou, neʻi mafatia o outou loto . . . neʻi faafuasei mai lea aso ia te outou e pei o se mailei.” “Ia outou, ina mataala ia, auā tou te le iloa pe oo mai afea ia aso.” (Luka 21:34-36; Mareko 13:33) Ua uunaia foi i tatou e Peteru ina ia utagia upu a aposetolo. Mo se faaaoaoga, na tusi mai le aposetolo o Paulo: “O le aso o le Alii e pei o le gaoi i le po, e faapea ona oo mai ai; O lea, aua neʻi tatou momoe ai faapei o isi, a ia tatou mataala, ma ia faautauta.”—1 Tesalonia 5:2, 6.
O Tuʻinanauga o Ē Tauemu
7, 8. (a) O ā ituaiga o tagata e iai i latou o loo tauemu i feau lapatai a le Atua? (e) O ā manatu o le au tauemu?
7 E pei ona taʻua muamua, o le mafuaaga mo apoapoaiga a Peteru talu ai ua amata ona amuamu nisi i na lapataiga, e pei foi ona taufaifai tagata Isaraelu o taimi anamua i perofeta a Ieova. (2 Nofoaiga a Tupu 36:16) Ua faamatala mai e Peteru: “Ua muamua ona iloa o lenei mea, e o mai i ona aso e gata ai o e tauemu, latou te savavali e tusa ma o latou lava tuʻinanau.” (2 Peteru 3:3) Ua taʻua e Iuta o tuʻinanau o nei tagata tauemu e “mo mea faalemataʻu.” Ua ia faaigoaina i latou “o tagata amio faamanu, e lē o iai se faaleagaga.”—Iuta 17-19, NW.
8 O aʻoaʻo pepelo ia na faapea mai Peteru o loo “mulimuli atu i la le tino i le tuʻinanau i le fia ulavale” e foliga mai e iai i nei tagata tauemu o ē ua lē o iai se faaleagaga. (2 Peteru 2:1, 10, 14) Ua latou fesili atu ma le aamu i Kerisiano faamaoni: “Ofea nei le folafolaga o lona afio mai? auā talu ona momoe o le augātamā, ua tutumau pea o mea uma pei ona faatoa faia.”—2 Peteru 3:4.
9. (a) Aisea e taumafai ai tagata tauemu e taʻu faatauvaa i le uiga o le faanatinati lea o loo faamamafa i le Afioga a le Atua? (e) E faapefea ona avea o se puipuiga mo i tatou le manatuaina pea o le aso o Ieova?
9 Aisea ua faia ai lenei amuamu? Aisea e faaofi mai ai le manatu faapea atonu e lē taitai ona taunuu le faatasi mai o Keriso, e lei faalaa mai lava le Atua i mataupufai a tagata, ma o le a lē faia lava faapena? Ioe, ona o le manatu faatauvaa i le uiga o le faanatinati lea o loo faamamafa mai i le Afioga a le Atua, ua saili atu ai nei le au tauemu amio faamanu ina ia uunai isi e lolo atu i se tulaga o le faalēano i mea faaleagaga ma faigofie ai ona maileia i latou i faatosinaga manatu faapito. Maeu se faalaeiauga malosi mo i tatou i aso nei ina ia tumau i le mataala faaleagaga! Tau ina ia tatou manatua pea le aso o Ieova ma ia aua neʻi galo o loo silasila mai ona fofoga ia i tatou! Ona uunaia ai lea o i tatou e auauna atu ia Ieova ma le maelega ma tausisia lo tatou mamā tau amio.—Salamo 11:4; Isaia 29:15; Esekielu 8:12; 12:27; Sefanaia 1:12.
E Faia ma le Loto i ai ma e Inosia
10. Ua faapefea ona faamaonia mai e Peteru le sese o le au tauemu?
10 Ua faagalogalo e na au tauemu se mea moni. Ua latou lē amanaia ma le loto i ai ma taumafai e uunaia isi tagata ina ia latou faagaloina foi. Aisea? Ina ia atili faigofie ai ona faaseseina tagata. Ua tusi mai Peteru: “Auā latou te mananao ia lilo lenei mea [“mea moni,” NW] ia te i latou.” O le ā le mea moni? “Sa i ai le lagi talu anamua, atoa ma le lalolagi na faia mai totonu o le vai, e ala foi i le vai, ona o le afioga a le Atua, o le mea foi lea sa faaumatia ai le lalolagi tuai ina ua lofia i le vai.” (2 Peteru 3:5, 6) Ioe, sa tafiesea e Ieova le lalolagi o ē amioleaga i le Lolo i aso o Noa, o se mea moni na faamamafaina foi e Iesu. (Mataio 24:37-39; Luka 17:26, 27; 2 Peteru 2:5) I le eseese la ma mea o loo fai mai ai le au tauemu, ua lē o faaauau ona iai mea uma e “pei ona faatoa faia.”
11. O ā faatalitaliga lē taulau a uluai Kerisiano na māfua ai ona tauemu nisi ia i latou?
11 Atonu foi o le isi mafuaaga o le aamu a le au tauemu i Kerisiano faamaoni talu ai sa lei taulau mea na faatalitalia e i latou nei. A o toeitiiti lava oo i le maliu o Iesu, sa manatu ai ona soo “o le a faaalia loa mai le malo o le Atua.” Ma, ina ua ia toetu aʻe na latou fesili ai po o le a faavaeina loa i lea taimi le Malo. E lē gata i lea, pe tusa ma le sefulu tausaga a o lei tusia e Peteru lana tusi lona lua, sa iai nisi na “faaatuatuvaleina” i “se upu” po o “se tusi,” e faapea na aumai mai le aposetolo o Paulo po o ana aumea, e foliga ai e “peiseai ua oo mai le aso o le Alii.” (Luka 19:11; 2 Tesalonia 2:2; Galuega 1:6) Ae peitai, o na mea sa faatalitalia e soo o Iesu, e lē sese, e ui e lē o le taimi lena e faataunuu ai. O le a oo mai lava le aso o Ieova!
E Maufaatuatuaina le Afioga a le Atua
12. Ua faapefea ona faamaonia le maufaatuatuaina o le Afioga a le Atua i ana valoaga e faatatau i “le aso o Ieova”?
12 E pei ona taʻua i le taimi ua fano, sa masani ona lapatai mai perofeta o ē na iai a o lei oo mai i taimi o Kerisiano, e faapea ua latalata mai le aso o le toasa o Ieova. Sa oo mai se faaataga itiiti o le “aso o Ieova” i le 607 T.L.M. ina ua faaoo e Ieova lona toasa i ona tagata faalogogata. (Sefanaia 1:14-18) Mulimuli ane, sa mafatia ai isi nuu, e aofia ai Papelonia ma Aikupito, i se faaataga itiiti o le “aso o Ieova.” (Isaia 13:6-9; Ieremia 46:1-10; Opetaia 15) Sa valoia foi le iuga o le faiga o mea faa-Iutaia o le uluai senituri, ma na taunuu ina ua faatamaia Iutaia e autau a Roma i le 70 T.A. (Luka 19:41-44; 1 Peteru 4:7) Peitai o loo faasino atu Peteru i le “aso o Ieova” i le lumanai, lea o le a matuā silisili atu ona telē, e sili atu foi i le Lolo faalekelope!
13. O le ā le faaaoaoga i talafaasolopito e faataitaia ai le mautinoa o le iuga o lenei faiga o mea?
13 Ua faatomua mai e Peteru lana faamatalaga o lena faaumatiaga o loo sau, i le faapea mai: “Ona o lea lava afioga.” Ua faatoʻā uma lava ona ia taʻua faapea “ona o le afioga a le Atua,” sa tu ai le lalolagi a o lei oo mai le Lolo i “totonu o le vai, e ala foi i le vai.” O lenei tulaga, o loo faamatalaina i le tala a le Tusi Paia i le foafoaga, na mafai ai ona faatinoina le iai o le Lolo ina ua totō ifo le vai ona o le faatonuga po o le afioga a le Atua. Ua faaauau mai Peteru: “O le lagi ma le lalolagi o ona po nei ua tuu mo le afi ona o lea lava afioga [a le Atua]; ua taofia ai foi mo le aso e faamasino ai ma fano ai tagata faalematau.” (2 Peteru 3:5-7; Kenese 1:6-8) Ua ia i tatou le afioga maufaatuatuaina a Ieova mo lea mea! O le a ia aumaia le iuga i “le lagi ma le lalolagi”—lenei faiga o mea—i le toasa aasa o lona aso tele! (Sefanaia 3:8) Ae o afea?
Le Naunautai Ina ia Oo Mai le Iuga
14. Aisea e mafai ai ona tatou mautinoa o loo tatou ola nei i “aso e gata ai”?
14 Sa fia iloa e soo o Iesu po o afea e oo mai ai le iuga, ona latou fesiligia lea o ia: “O le ā le faailoga o lou faatasi mai ma le vaitaimi faaiuiu o le faiga o mea?” E foliga mai sa latou fesili e faatatau i le taimi e iu ai le faiga o mea faa-Iutaia, peitai na muamua ona taulai atu le tali a Iesu i le taimi o le a puapuagatia ai ‘lagi ma le lalolagi’ lea o loo iai nei i le faaumatiaga. Na valoia e Iesu mea e pei o taua tetele, le lē lava o meaʻai, o mafuie, o faamaʻi, ma solitulafono. (Mataio 24:3-14, NW; Luka 21:5-36) Talu mai le tausaga e 1914, ua tatou vaaia ai le faataunuuina o le faailoga lea na tuuina mai e Iesu mo “le vaitaimi faaiuiu o le faiga o mea” faapea foi mea na taʻua e le aposetolo o Paulo o le a mataulia ai “aso e gata ai.” (2 Timoteo 3:1-5) E moni, ua matuā tele faamaoniga e iloa ai o loo tatou ola nei i le taimi o le iuga o lenei faiga o mea!
15. O le ā ua tau mātele atu Kerisiano e fai e ui lava i le lapataiga a Iesu?
15 Ua leva ona naunautai Molimau a Ieova e fia iloa po o afea o le a oo mai ai le aso o Ieova. Ona o lo latou naunautai, e iai nisi taimi latou te taumafai ai e fuafua po o afea e ono oo mai ai. Peitai o lo latou faia faapea, ua pei ai foi i latou o uluai soo o Iesu, i le lē taulau ona latou utagiaina le lapataiga a lo latou Matai e faapea “tou te le iloa pe oo mai afea ia aso.” (Mareko 13:32, 33) Ua taufaifai ē tauemu i Kerisiano faamaoni ona o le lē saʻo o a latou faatalitaliga. (2 Peteru 3:3, 4) E ui i lea, ua faamautinoa mai e Peteru, o le a oo mai lava le aso o Ieova, e tusa ai ma Lana taimi faatulagaina.
E Manaomia Ona Malamalama i le Silafaga a Ieova
16. O le ā le apoapoaiga e ao ona tatou utagia ma le atamai?
16 E manaomia ona tatou malamalama i le silafaga a Ieova e faatatau i le taimi, e pei ona faamanatu mai nei e Peteru ia i tatou: “A e aua neʻi lilo ia te outou, le au pele, lenei mea e tasi, e tusa i luma o le Alii le aso e tasi ma tausaga e afe, o le afe foi o tausaga e tusa ma le aso e tasi.” Maeu le puupuu o lo latou olaga o le 70 pe 80 tausaga, pe a faatusatusa atu i ai! (2 Peteru 3:8; Salamo 90:4, 10) Afai la e foliga mai o loo tolopo le faataunuuga o folafolaga a le Atua, e manaomia ona tatou talia le apoapoaiga a le perofeta a le Atua: “E ui lava ina tuai mai [le taimi atofaina], a ia faatalitali pea i ai; auā e oo mai lava, e le faatuai mai.”—Sapakuka 2:3.
17. E ui lava ua faaumiumi pea aso e gata ai nai lo le umi sa faatalitalia e le toatele, ae o le ā e mafai ona tatou mautinoa i ai?
17 Aisea ua faaumiumi ai pea aso o lenei faiga o mea nai lo le umi sa faatalitalia e le toatele? O le a faamatala mai loa e Peteru se mafuaaga lelei: “E le faatuai mai le Alii [Ieova] i le mea na folafolaina mai, faapei o le manatu a isi tagata i le faatuai; a e peitai ua onosai mai lava o ia ia te outou, ona ua le finagalo ia fano se tasi, a ia oo uma lava i le salamo.” (2 Peteru 3:9) E silasila Ieova i le mea e sili ona lelei ina ia laugatasia ai tagata uma. E manatu mamafa o ia i ola o tagata, e pei ona ia fetalai: “Ou te le fiafia lava i le oti o lē amio leaga, a ia liliu mai lē amio leaga ai lona ala, ma ola ai.” (Esekielu 33:11) O lea la e mafai ona tatou mautinoa, o le a oo mai le iuga i le taimi tonu lava, ina ia faataunuu ai le fuafuaga a Lē na Foafoaina i tatou, e alofa ma silisili lona atamai!
O le ā o le a Mavae Ese Atu?
18, 19. (a) Aisea ua maumaututu ai Ieova ina ia faaumatia lenei faiga o mea? (e) Ua faapefea ona faamatalaina e Peteru le iuga o lenei faiga o mea, ma o le ā moni lava o le a faaumatia?
18 Talu ai e alofa moni Ieova ia i latou o ē auauna ia te ia, o le a ia soloiesea ai tagata uma o loo faapogaia mafatiaga ia i latou. (Salamo 37:9-11, 29) I le matauina, e pei ona muai taʻua e Paulo, faapea o le a oo mai lenei faaumatiaga i se taimi e lei faatalitalia, ua tusi ai Peteru: “E sau le aso o le Alii pei o se gaoi, e mavaeeseina ai le lagi ma le gogolo tele, e teʻa eseese ai foi o mea na fai aʻi ina ua mu; o le lalolagi foi ma galuega o i ai e susunuina lava.” (2 Peteru 3:10; 1 Tesalonia 5:2) Sa lei faaumatiaina i le Lolo le lagi ma le lalolagi faaletino, o le a lē faaumatiaina foi i le aso o Ieova. O le ā la, o le a “mavaeeseina” pe faaumatia?
19 O faiga malo faaletagata lea o loo latou puleaina tagata e pei o ni “lagi” o le a faaiuina e faapena foi i le “lalolagi” po o le sosaiete o tagata faalemataʻu. O le “gogolo tele” atonu e faaalia mai ai le vave ona mavae ese atu o le lagi. “O mea” o loo faia aʻe ai le sosaiete ua faaleagaina a tagata i aso nei o le a “teʻa eseese,” pe faaumatia. Ma o le “lalolagi,” o loo aofia ai “ma galuega o i ai,” o le a “susunuina.” O le a matuā faaalialia e Ieova gaoioiga leaga a tagata a o ia aumaia i le faiga aoao o mea a le lalolagi lona iuga ua matuā talafeagai i ai.
Ia Taulai Atu Pea i Lou Faamoemoe
20. E tatau faapefea ona aafia o tatou ola i lo latou iloaina o mea tutupu ia o loo fotuai mai i le lumanai?
20 Talu ai ua lalata mai nei mea mataina, ua faapea mai ai Peteru e tatau ona tatou faia “amio e tatau ai i le amio lelei ma le amio Atua; o loo faatalitali ma manatua pea le oo mai o le aso o Ieova.” E lē mafai ona masalomia lena mea! “E teʻa eseese ai le lagi ina ua mu, e liu suāvai foi o mea na fai aʻi ina ua mu!” (2 Peteru 3:11, 12, NW) Ona o le mea moni e mafai ona tutupu taeao nei mea mataina, e tatau la ona aafia ai mea uma o tatou faia pe fuafua e fai.
21. O le ā o le a suia ai le lagi ma le lalolagi o loo iai nei?
21 Ua taʻu mai nei e Peteru ia i tatou le mea o le a suia ai le faiga tuai o mea, i le faapea mai: “A e faatalitali i tatou i le lagi fou ma le lalolagi fou, pei o lana na folafola mai, e mau ai le amiotonu.” (2 Peteru 3:13; Isaia 65:17) Oka, maeu se mapusaga tele! O le a faia aʻe le faiga malo o le “lagi fou” ia Keriso ma ana pule lagolago e 144,000, ae o tagata o ē faasaoina atu i le iuga o lenei lalolagi o le a faia aʻe ai le “lalolagi fou.”—1 Ioane 2:17; Faaaliga 5:9, 10; 14:1, 3.
Ia Tausia Pea le Faanatinati ma le Mamā Tau Amio
22. (a) O le ā o le a fesoasoani ia i tatou e alofia ai so o se ponā po o se mataʻuleagaina faaleagaga? (e) O le ā le lamatiaga ua lapatai mai ai Peteru?
22 Ua fai mai atili Peteru: “O lenei, le au pele e, ua outou faatalitali i ia mea, o lea ia outou finafinau ai lava ina ia maua outou e ia ma le manuia, ua le ponā, ma le le mataʻuleagaina. Ia outou manatu o le onosai o lo tatou Alii o le faaolataga lea.” O le faatalitali ma le naunautai ma manatu i so o se tolopoina o le aso o Ieova e avea o se faaaliga o lona onosai, o le a fesoasoani lea ia i tatou e alofia ai so o se ponā po o se mataʻuleagaina faaleagaga. Peitai, o loo iai se lamatiaga! Ua lapatai mai Peteru e faapea, i tusitusiga a “Paulo lo tatou uso pele . . . o i ai nisi upu faamatalagatā, ua faauigaeseina e tagata e lei aʻoaʻoina, ma ua le faatumauina, faapei o isi Tusi foi e oo ai lo latou lava malaia.”—2 Peteru 3:14-16.
23. O le ā le apoapoaiga faaiu a Peteru?
23 E foliga mai sa faauigaese e aʻoaʻo pepelo tusitusiga a Paulo e faatatau i le alofa tunoa o le Atua, ina ia faaaogā e fai ma faamolemolega mo amioga lē taupulea. Atonu o le mea lena o loo mafaufau i ai Peteru ina ua ia tusi atu lana apoapoaiga faamavae: “O lenei, le au pele e, ia outou faaeteete ia te outou, auā ua muai iloa e outou, neʻi taʻitaʻieseina outou i le sese o e faaletaupulea, tou te pauu ai i le mea sa outou tumau ai.” Ona ia faaiu atu lea o lana tusi, i le faalaeiau atu: “Ia tutupu outou i le alofa tunoa ma le poto i a lo tatou Alii, o lo tatou Faaola lea o Iesu Keriso.”—2 Peteru 3:17, 18.
24. O le ā le uiga e tatau ona iai i auauna uma a Ieova?
24 Ua manino mai, e manao Peteru ina ia faamalosia ona uso. E faanaunau o ia ina ia maua e tagata uma le uiga lea sa faaalia mai e le Molimau faamaoni ua 82 ona tausaga lea na taʻua i le amataga lava: “[Ua] ola . . . loʻu olaga e pei ona faalaeiau mai le aposetolo, ‘o loo manatua pea le oo mai o le aso o Ieova.’ E masani lava ona ou manatu i le lalolagi fou folafolaina o se ‘mea moni e ui e lē o vaaia.’” Tau ina ia faapena foi ona ola ai o tatou olaga uma lava.
E Faapefea Ona E Tali?
◻ O le ā le uiga o le faaupuga “o loo manatua pea” le aso o Ieova?
◻ O le ā ua faagalogalo ma le loto i ai e le au tauemu, ma aisea?
◻ O le ā le mafuaaga ua taufaifai ai le au tauemu i Kerisiano faama- oni?
◻ O le ā le manatu e manaomia ona tatou tausisia?
[Ata i le itulau 23]
Ia manatua pea le aso o Ieova . . .
[Ata i le itulau 24]
. . . ma le lalolagi fou o loo sosoo mai