“Ia Talosaga Atu Pea, Ona Foaʻiina Mai Lea”

“Le Alii e, ia e aʻoaʻo mai iā i matou i le tatalo.” (Luka 11:1) O le talosaga lenā a soo o Iesu, ma sa tali atu Iesu e ala i le taʻua o ni talafaatusa se lua e iloa ai le auala e tatalo atu ai, ma le auala e faafofoga mai ai le Atua. Afai o loo e masalosalo pe e faafofoga mai le Atua i au tatalo, o le a fesoasoani la le tali a Iesu iā te oe.​—Faitau le Luka 11:5-13.

O le talafaatusa muamua e taulaʻi atu i lē o loo tatalo. (Luka 11:5-8) O loo taʻua ai se tamāloa na taunuu atu sana mālō i le vaeluapō, ae e leʻi iai sana meaʻai e laulau atu mo le mālō. O lea na nanati atu ai loa i sana uō ma talosaga atu i ai mo ni falaoa, ae sa musu lana uō e faia faapea ona ua momoe lona aiga. Peitaʻi, o le talosaga faatauanau atu pea o lenei tamāloa e aunoa ma le mā, na tuuina atu ai loa e lana uō iā te ia mea na ia manaʻomia.a

O le ā e aʻoaʻoina mai i lenei tala e uiga i tatalo? Ua faailoa mai e Iesu, e tatau ona faatauanau a tatou tatalo e pei o loo talosaga, saʻili, ma tuʻituʻi atu pea. (Luka 11:9, 10) Aiseā? Po o lona uiga e musuā le Atua? E leai. Ae ua faailoa mai ai, e fiafia le Atua e tali mai iā i latou e tatalo atu ma le faatuatua, e ala i le faatauanau atu pea. O le talosaga atu pea, e iloa ai o loo tatou manaʻomia moni lava le mea o loo talosaga atu ai, ma talitonu o le a foaʻiina mai e le Atua pe afai e tusa ma lona finagalo.​—Mareko 11:24; 1 Ioane 5:14.

O le talafaatusa lona lua e taulaʻi atu i le “Faafofoga tatalo” o Ieova. (Salamo 65:2) Na faapea mai Iesu: “O ai se tamā o iā te outou e ōle mai lona atalii iā te ia mo se iʻa, ae ia avatu i ai se gata ae e lē o se iʻa? Pe e ōle mai foʻi mo se fuāmoa, ae e avatu i ai se akarava?” E manino le tali, e lē mafai e se tamā alofa ona avatu i sana fanau se mea e lamatia ai. O lea na faamatala mai ai e Iesu: Pe afai e avatu e tamā lē lelei atoatoa “meaalofa lelei” mo a latou fanau, “e sili atu la ona foaʻi mai e le Tamā o i le lagi le agaga paia,” o le meaalofa sili lea mo lana fanau!b​—Luka 11:11-13; Mataio 7:11.

O le ā ua tatou aʻoaʻoina mai i lenei tala e uiga i le “Faafofoga tatalo” o Ieova? Ua faalaeiau i tatou e Iesu ina ia manatu iā Ieova o se Tamā alofa, o lē e naunau e faamalie manaʻoga o lana fanau. O lea, e saʻoloto tagata tapuaʻi o Ieova e faalatalata atu iā te ia ma faailoa atu mea o loo i o latou loto. O le iloaina e finagalo Ieova e faia le mea lelei mo i tatou, o le a tatou talia ai so o se tali e na te aumaia, e tusa lava pe e lē o le tali lenā na tatou faatalitalia.c