E tutasi le Tusi Paia mai i isi tusi faalelotu. E leai se isi tusi e pei o le Tusi Paia ua taaʻina ai le tele o talitonuga o tagata i le tele o tausaga. I le isi itu, e leai foʻi se isi tusi ua sili ona mataʻitūina ma tele i ai faitioga.

O se faataʻitaʻiga, o nisi faitofā e lē o mautinoa po o ni kopi maufaatuatuaina o uluaʻi tusitusiga ia Tusi Paia o loo iai nei. Na taʻua e se polofesa i suʻesuʻega i mataupu faalelotu, “E matou te lē mautinoa pe na saʻo aʻiaʻi le toe tusiaina o le uluaʻi tusitusiga o le Tusi Paia. E tele mea sesē i kopi o loo iai nei ona o le auala na toe tusia ai, ma na faia a ua mavae le tele o senituri talu ona māeʻa tusia uluaʻi tusitusiga o le Tusi Paia, e mautinoa la e tele vala e eseese ai.”

Ua lē mautonu nisi i le moni o faamatalaga o loo i le Tusi Paia ona o lotu na ola mai ai. O se faataʻitaʻiga, na aʻoaʻoina Faresa e lo latou aiga e lē o ni Kerisiano, o le Tusi Paia o se tusi e paia ae ua suia. Na ia faapea mai: “O le pogai lea ou te masalosalo ai pe a talanoa mai tagata e faatatau i le Tusi Paia. Auā e lē o le uluaʻi tusitusiga o le Tusi Paia lea e latou te faaaogāina, ae o kopi ua suia.”

Pe e afāina pe afai ua suia pe lē suia le Tusi Paia? Seʻi manatu i fesili nei: Pe e te maufaatuatuaina folafolaga faamāfanafanaloto o loo i le Tusi Paia e faatatau i le lumanaʻi, pe ana e iloa o nei folafolaga e leʻi iai i uluaʻi tusitusiga o le Tusi Paia? (Roma 15:4) Pe e te faaaogā taʻiala o le Tusi Paia e faia ai au filifiliga tāua i galuega, aiga, po o le tapuaʻiga pe ana e iloa e lē saʻo le auala na toe tusia ai le Tusi Paia o loo iai i aso nei?

E ui lava ua lē o toe iai uluaʻi tusitusiga o le Tusi Paia, ae e mafai ona tatou tilofaʻia kopi mai anamua, ia e aofia ai le faitau afe o manusikulipi o le Tusi Paia. Na faapefea ona faasaoina nei manusikulipi mai i le pala, teteega, ma taumafaiga ia suia faaupuga? E faapefea i le faasaoina o nei manusikulipi ona tatou mautinoa ai i le moni o le Tusi Paia o loo iai i aso nei? Seʻi iloilo tali o nei fesili i mataupu o loo mulimuli mai i le faasaoina o le Tusi Paia.

LAMATIAGA: O pepa sa faia mai i paʻu o laau ma paʻu o manu, o mea autū ia na faaaogā e tusitala ma ē na toe tusia le Tusi Paia. (2 Timoteo 4:13) Na faapefea ona lamatia le faasaoina o le Tusi Paia ona o le faaaogāina o nei mea?

O pepa na faia mai i paʻu o laau e faigofie ona masae, matafi, ma e vaivai. Ua faapea mai Richard Parkinson ma Stephen Quirke o ē e suʻesuʻe i mea mai i Aikupito anamua: “E mafai ona pala se pepa, e legalegā pe pala i le susū pe a teu, ma pe a tanu, e ono ʻati e mogamoga po o iniseti aemaise lava i le loi paʻepaʻe.” O nisi pepa ia na maua e fai mai i paʻu o laau, na vave ona leaga ona o le tele o le malamalama ma le susū o le ʻea.

E umi atu ona lelei pepa e fai mai i paʻu o manu nai lo o pepa e fai mai i paʻu o laau, peitaʻi e mafai foʻi ona faaleagaina pepa e fai mai i paʻu o manu pe a tuu i se mea e matuā vevela, susū, pe malamalama.a E ʻati foʻi e iniseti pepa e fai mai i paʻu o manu. O le pogai lea ua lē toe maua ai le tele o tusitusiga anamua i aso nei. O lea, pe ana faapea na pala le Tusi Paia, faapenei la ua mou atu ai ma le feʻau o loo iai.

AUALA NA FAASAOINA AI LE TUSI PAIA: Na poloaʻia i le tulafono a Iutaia tupu uma e “tusi se kopi o nei tulafono mo ia lava,” o uluaʻi tusi e lima o le Tusi Paia. (Teuteronome 17:18) Na faia foʻi e i latou e atamamai i le toe tusia o mea le tele o manusikulipi, ma oo ane ai i le uluaʻi senituri T.A. ua maua Tusitusiga Paia i sunako i Isaraelu atoa e oo atu i Maketonia. (Luka 4:16, 17; Galuega 17:11) E faapefea i ni manusikulipi ua matuā tuai ona faasaoina e oo mai i aso nei?

Ua faapea mai Philip W. Comfort, o se faitofā o le Feagaiga Fou: “Na lauiloa tagata Iutaia i le tuu o tusi tāʻai o Tusitusiga Paia i faguele ina ia faasaoina ai.” E mautinoa na faaauau foʻi e Kerisiano lenā faiga. O lea na maua ai nisi uluaʻi manusikulipi o le Tusi Paia i faguele, tamaʻi potu pogisa, ana, ma vaega e mātūtū ai le ʻea.

LE IʻUGA: E faitau afe vaega o manusikulipi o le Tusi Paia o loo iai i aso nei, ma o nisi vaega ua silia i le 2,000 tausaga talu ona iai. E leai se isi tusitusiga anamua e pei o le Tusi Paia, i le tele o ona manusikulipi ua umi talu ona iai.

LAMATIAGA: E toʻatele taʻitaʻi o malo ma lotu e feteenaʻi o latou sini ma le feʻau o le Tusi Paia. E masani ona faaaogā la latou pule e taofia ai tagata mai i le umia, saunia, po o le faaliliuina o le Tusi Paia. Seʻi iloilo faataʻitaʻiga nei:

• Pe ā o le 167 T.L.M.: Na poloaʻia e le tupu o Seluko o Antiochus Epiphanes, o lē na faamalosia tagata Iutaia e auai i le lotu Eleni, ia faatamaʻia kopi uma o Tusitusiga Paia Eperu. Na tusi Heinrich Graetz o se faitofā i talafaasolopito, na saei ma susunu e tagata aloaʻia a lenei tupu tusi tāʻai o le Tulafono po o fea lava na maua ai, ma fasiotia i latou na saʻilia ni faalaeiauga ma faamāfanafanaga mai i le Tusi Paia.

• Pe ā o le 800 tausaga ua mavae: O nisi taʻitaʻi lotu Katoliko na feita ona na talaʻi e o latou tagata lotu mea o loo aʻoaʻo i le Tusi Paia nai lo o talitonuga a le Katoliko, ma o so o se tasi o i latou na umia tusi o le Tusi Paia e ese mai i le tusi o Salamo i le faa-Latina, na manatu i ai o sē e tetee. I se tasi fono a le lotu na faamalosia ai le poloaʻiga e ala i le faatonuina o o latou tagata, ia “saʻilia ma le faamaoni ē e tetee . . . e ala i le suʻe o fale uma na masalomia o loo iai le Tusi Paia. . . . O le fale na maua ai sē e tetee, na tatau ona faatamaʻia.”

Pe ana taulau fili i le faatamaʻiaina o le Tusi Paia, semanū ua mou atu le feʻau o loo iai.

AUALA NA FAASAOINA AI LE TUSI PAIA: Na taulaʻi atu taumafaiga a le tupu o Antiochus i Isaraelu, ae e tele isi faalapotopotoga o tagata Iutaia na iai i isi atunuu. I se fua faatatau a faitofā, e oo ane i le uluaʻi senituri T.A., e silia i le 60 pasene o tagata Iutaia ua nonofo i isi atunuu. Na tuu e tagata Iutaia i a latou sunako kopi o Tusitusiga Paia, ma o kopi foʻi ia na faaaogā e tupulaga fai aʻe e aofia ai ma Kerisiano.—Galuega 15:21.

I le pe ā ma le 800 tausaga ua mavae, na fesagaʻia ai ma le lototetele e tagata e fiafia i le Tusi Paia sauāga, ma faaauau ona latou faaliliuina ma toe tusia le Tusi Paia. A o leʻi maua foʻi ni masini lomitusi i le ogatotonu o le senituri lona 15, ae atonu e 33 gagana ua maua ai ni vaega o le Tusi Paia. Mulimuli ane, na faaliliuina ma saunia le Tusi Paia i se tulaga e leʻi iai muamua.

LE IʻUGA: E ui i teteega mai i tupu malolosi ma taʻitaʻi lotu ua faasesēina, ae ua avea le Tusi Paia ma tusi ua sili ona tufatufaina ma faaliliuina i le talafaasolopito. Ua limataʻitaʻiina ai tulafono ma gagana a nisi atunuu, faapea olaga o le faitau miliona o tagata.

LAMATIAGA: E leʻi faaleagaina le Tusi Paia mai i lamatiaga e pei o le pala ma teteega. Peitaʻi na taumafai nisi o ē na toe tusia ma faaliliuina e sui le feʻau o le Tusi Paia. A o faagasolo taimi na latou taumafai e sui le feʻau o le Tusi Paia e fua i o latou talitonuga, nai lo o le sui o o latou talitonuga ia ōgatusa ma le Tusi Paia. Seʻi iloilo nisi o faaaʻoaʻoga:

• Nofoaga o le tapuaʻiga: I le va o le senituri lona fā ma le senituri lona lua T.L.M., na faaopoopo ai e tusitala Samaria o uluaʻi tusi e lima o le Tusi Paia, le faaupuga “Mauga o Keresema. Ma o i inā e tou te fausia ai se fata faitaulaga,” e sosoo i le Esoto 20:17. Na faamoemoe tagata Samaria e lagolagoina e lenei mau lo latou fausiaina o se fata faitaulaga i le Mauga o Keresema.

• Aʻoaʻoga o le tolutasi: A o leʻi atoa le 300 tausaga talu ona māeʻa tusia le Tusi Paia, na faaopoopo e se tusitala e talitonu i le tolutasi i le 1 Ioane 5:7 le faaupuga, “i le lagi, le Tamā, le Upu, ma le Agaga Paia: o nei mea e tolu e tasi.” E leʻi iai i le uluaʻi tusitusiga lenei faaupuga. Na taʻua e se faitofā o le Tusi Paia o Bruce Metzger: ʻI le senituri lona ono ma faasolo mai ai, na tele ina aliaʻe mai lenei faaupuga i manusikulipi tuai faa-Latina ma le Vulgate [faa-Latina].’

• Suafa o le Atua: Na faaaogā e le toʻatele o tagata faaliliu o le Tusi Paia, se talitonuga faanuupō o tagata Iutaia e avea ma māfuaaga e aveesea ai le suafa o le Atua mai i Tusitusiga Paia. Na latou suia lenā suafa i taʻu e pei o le “Atua” po o le “Alii.” Ae o nei taʻu e faaaogā i le Tusi Paia e lē gata e faasino atu i Lē na Foafoaina mea, e faasino atu foʻi i tagata, mea e faaaogā i tapuaʻiga sesē, faapea foʻi le Tiapolo.—Ioane 10:34, 35; 1 Korinito 8:5, 6; 2 Korinito 4:4.a

AUALA NA FAASAOINA AI LE TUSI PAIA: Muamua, e ui lava o nisi tagata na toe tusia le Tusi Paia na faatamala pe e leʻi faamaoni, ae e toʻatele lava ē tomai ma na toe tusia ma le māeʻaeʻa le Tusi Paia. I le va o le senituri lona ono ma le senituri lona 10 T.A., na toe tusia ma saunia ai e le ʻau Masoreta Tusitusiga Paia Eperu lea e taʻua o Tusitusiga a le ʻau Masoreta. Na latou faitauina upu ma mataʻitusi ina ia faamautinoa o loo saʻo le toe tusiaina. I vaega na latou masalomia e sesē i le kopi na latou faaaogāina, na latou tusia ai i autafa se faamatalaga. Na matuā teena e le ʻau Masoreta le suia o faamatalaga o le Tusi Paia. Na tusi le polofesa o Moshe Goshen-Gottstein: “O se agasala matuiā iā i latou le suia ma le iloa o Tusitusiga Paia.”

Lona lua, o le tele o manusikulipi ua maua i aso nei ua fesoasoani i le ʻau faitofā o le Tusi Paia e mātauina ai mea sesē. O se faataʻitaʻiga, na aʻoaʻo e taʻitaʻi lotu i le tele o senituri, o loo iai i la latou faaliliuga faa-Latina faamatalaga saʻo aʻiaʻi o le Tusi Paia. Peitaʻi na latou faaopoopo i le 1 Ioane 5:7 se faaupuga sesē, lea na taʻua i le amataga o lenei mataupu. O lenei faaupuga na aafia ai le faaliliuga taatele faa-Peretania a le King James. Ae o le ā le mea moni na iloa ina ua maua isi manusikulipi? Na tusi Bruce Metzger: “O le faaupuga i le [1 Ioane 5:7] e lē o maua i isi manusikulipi uma anamua (e pei o le Syriac, Coptic, Armenia, Aitiope, Arapi, Slavonic), seʻi vaganā ai le faa-Latina.” O le iʻuga, ua aveesea lenei faaupuga sesē mai i le faaliliuga toe teuteuina o le King James ma isi Tusi Paia.

Po ua faamaonia ai i nei manusikulipi tuai le faasaoina o le feʻau o le Tusi Paia? Ina ua maua Tusi Tāʻai o le Sami Mate i le 1947, na faatusatusa e le ʻau faitofā tusitusiga Eperu a le ʻau Masoreta, i tusi tāʻai o le Tusitusiga Paia ia na tusia i le silia ma le afe tausaga muamua atu. Na taʻua e se sui o ē na tusi e faatatau i nei Tusi Tāʻai o le Sami Mate, e tasi le tusi tāʻai “ae ua saunia ai se faamaoniga maumaututū, i le faamaoni ma le faaeteete o le auala na toe tusia ai e tagata Iutaia Tusitusiga Paia, i se taimi e silia i le afe tausaga.”

I le faletusi o le Chester Beatty i Dublin i Aialani, o loo iai se tuufaatasiga o ni pepa e fai mai i paʻu o laau, e toetoe o tusi uma o Tusitusiga Paia Eleni o loo iai, e aofia ai ma manusikulipi mai i le senituri lona lua T.A. O nei manusikulipi na iai ae pe faatoʻā 100 tausaga talu ona māeʻa tusia le Tusi Paia. Na taʻua i se tusi The Anchor Bible Dictionary: “E lē gata e tele faamatalaga fou ua maua mai i nei pepa e fai mai i paʻu o laau, ae ua faailoa mai ai foʻi le lelei o le auala na toe tusia ai tusitusiga paia.”

LE IʻUGA: Nai lo o le faasesēina o tusitusiga o le Tusi Paia, o le leva ma le tele o manusikulipi o le Tusi Paia ua faaleleia atili ai. Na tusi Sir Frederic Kenyon e faatatau i Tusitusiga Paia Eleni: “E leai se isi tusi mai anamua e pei o lenei tusi i le leva ma le tele o faamaoniga e faatatau i ona tusitusiga, e leai foʻi se faitofā faamaoni e tetee ma faapea mai ua suia tusitusiga ua iā i tatou i aso nei.” E tusa ai ma Tusitusiga Paia Eperu, na taʻua e le faitofā o William Henry Green: “Atonu e talafeagai ona faapea atu e leai se isi galuega mai i aso anamua, e matuā saʻo le auala na toe tusia ai.”

O le faasaoina o le Tusi Paia ua mafai ai ona e maua ma faitau i se kopi i aso nei. Pe a e filifilia se faaliliuga lelei o le Tusi Paia, e te mautinoa o loo e faitauina se kopi maufaatuatuaina o uluaʻi tusitusiga.a Ae aiseā e mataʻina ai le faasaoina o le Tusi Paia mai i le pala, teteega ogaoga, ma le suia o le feʻau o loo iai? Aiseā e matuā tāua ai lenei tusi?

E toʻatele tagata aʻoga o le Tusi Paia ua tutusa o latou manatu ma le aposetolo o Paulo, o lē na tusi: “O Tusitusiga Paia uma e mai i le agaga o le Atua.” (2 Timoteo 3:16) E latou te talitonu ua faasaoina le Tusi Paia ona o le Afioga tutasi a le Atua, ma ua faasaoina e le Atua seʻia oo mai i aso nei. Na iʻu ina filifili Faresa lea na taʻua i le mataupu muamua, e iloilo nei manatu e ala i le suʻesuʻeina o le Tusi Paia, ma na faateʻia o ia i mea na ia aʻoaʻoina. Na ia iloa ai e lē o iai i le Tusi Paia le tele o aʻoaʻoga taatele a lotu ua faapea mai o Kerisiano. Na pāʻia ai foʻi lona loto i le finagalo o le Atua mo le lalolagi, e pei ona faailoa mai i Lana Afioga.

Ua faapea mai o ia: “Ua ou talitonu nei o le Tusi Paia o loo iā te aʻu o se meaalofa mai i le Atua. Auā afai o le Atua na faia le vateatea, pe e lē o iā te ia foʻi le mana e aumaia ai ma faasaoina se tusi mo i tatou? O le teena o lenei manatu e peiseaʻī ua ou faapea atu e gata mai le mana o le Atua. Ae o ai aʻu ou te faagataina ai le mana o le Silisili Ese?”—Isaia 40:8.