E finau mai le toʻatele e lē mafai ona tatou iloa se mea e faatatau i le nofoaga agaga, talu ai e leai se tasi na vaaitino i ai ma faamatalaina mai lea nofoaga. Peitaʻi, e sesē lenā manatu. Sa soifua Iesu i le lagi i le nofoaga agaga, a o leʻi afio mai i le lalolagi. Na ia faailoa atu ma le manino i taʻitaʻi lotu i le uluaʻi senituri: “Na ou sau mai i le lagi e fai le finagalo o lē na auina mai aʻu, ae e lē o loʻu loto.” Sa faamatala mai foʻi e Iesu mea na ia vaaitino i ai, ina ua ia faapea atu i ona aposetolo: “E tele mea e nonofo ai i le maota o loʻu Tamā.”​—Ioane 6:38; 14:2.

O le Tamā o Iesu o le Atua, ma o lona suafa o Ieova, ma o le “maota” o Ieova o loo i le lagi. (Salamo 83:18) O lea, e leai se tasi e lelei lona faamatalaina o le nofoaga agaga nai lo o Ieova le Atua, ma Iesu Keriso. Na la faailoa mai le tele o faamatalaga e faatatau i le nofoaga agaga, e ala i ni vaaiga mataʻina na faaali mai i ē faamaoni.

O loo talanoaina i le mataupu o loo sosoo mai vaega o le Tusi Paia o loo faamatalaina ai ni vaaiga na vaaia e nisi o tane. A o e iloiloina nei vaaiga, ia manatua o le nofoaga agaga e lē o se nofoaga faitino, e iai mea e mafai ona paʻi pe vaai i ai. O lea, nai lo o le faamatalaina mai e le Atua o le nofoaga agaga i se auala e malamalama ai na o foafoaga agaga, ae ua Ia faaaogā se auala e faigofie ona tatou malamalama ai i le nofoaga agaga. O le a fesoasoani nei vaaiga iā te oe e malamalama ai i ē o loo nonofo i le “tele” o nofoaga i le lagi.

O IEOVA O LĒ SILISILI ESE

“Ua tū mai le nofoālii i le lagi, ma o loo iai se tasi o afio ai i le nofoālii. O lē o loo afio i le nofoālii, ua pei ona foliga o se maa iasepi, ma se maa tāua lanu mūmū, ma e iai se nuanua e pei o le maa samaraki ua faataamilo i le nofoālii.”​—Faaaliga 4:2, 3.

“Ua iai le pupula ua siʻomia ai o ia. Ua iai le mea e pei o se nuanua lea e tupu i le ao tele i le aso e totō ai timuga. O foliga na o le matuā pupula ua siʻomia ai. E foliga mai e pei o le mamalu o Ieova.”​—Esekielu 1:27, 28.

O nei vaaiga na faaali atu i le aposetolo o Ioane ma le perofeta o Esekielu, ua faamatala mai ai le mamalu o le Atua Silisili Ese o Ieova i mea e mafai ona faaata i o tatou mafaufau e pei o maa tāua feʻilafi, se nuanua, ma le mamalu o le nofoālii. Ua faailoa mai e nei vaaiga le ofoofogia, matagofie, ma le toʻafilemu o le afioaga o Ieova.

Ua ōgatusa na faamatalaga e uiga i le Atua ma upu a le faisalamo o lē na tusi: “Auā e sili Ieova ma e tatau ona matuā viia o ia. E mataʻutia o ia i lo o isi atua uma. Auā o atua uma o nuu o atua e lē aogā; a o Ieova, na ia faia le lagi. O loo i ona luma le mamalu ma le matagofie; o loo i lona malumalu foʻi le malosi ma le matagofie.”​—Salamo 96:4-6.

E ui o Ieova o le Silisili Ese ae ua ia valaaulia i tatou e faalatalata atu iā te ia i le tatalo, ma faamautinoa mai e faafofoga mai o ia iā i tatou. (Salamo 65:2) O le alofa tele ma le manatu mamafa mai o le Atua iā i tatou na tusi ai ma le faamaoni le aposetolo o Ioane: “O le Atua o le alofa lava ia.”​—1 Ioane 4:8.

O LOO FAATASI IESU MA LE ATUA

“Ua tumu [le soo Kerisiano o Setefano] i le agaga paia, ua tepa aʻe i le lagi, ma iloa atu ai le mamalu o le Atua, ma Iesu o loo tū i le itu taumatau o le Atua, ma faapea atu: ʻFaauta! ua ou iloa atu ua avanoa le lagi ma le Atalii o le tagata o loo tū i le itu taumatau o le Atua.’”​—Galuega 7:55, 56.

A o leʻi vaaia e Setefano lenā vaaiga, na fasiotia Iesu ona o tuuaʻiga a taʻitaʻi lotu Iutaia. O i latou foʻi ia o loo talanoa atu ai Setefano. Na faamautinoa mai i le vaaiga sa soifua Iesu ma na toe faatūina ma faamamaluina o ia. E tusa ai o lenā vaaiga na tusi ai le aposetolo o Paulo: ʻNa toe faatūina e Ieova Iesu mai i le oti, ma faanofo ai o ia i lona itu taumatau i mea o i le lagi, e sili ona maualuga nai lo o malo, o pule, o malosi, o taʻitaʻi, ma igoa uma ua faaigoaina ai, e lē na o i le faiga o mea a lenei lalolagi ae e faapea foʻi ma le lumanaʻi.’​—Efeso 1:20, 21.

I le faamatalaina atili o le tulaga mamalu o Iesu, ua faaalia mai i le Tusi Paia e manatu mamafa foʻi o ia i tagata e pei o Ieova. A o faagasolo lana faiva i le lalolagi na faamālōlōina ai e Iesu ē e mamaʻi, o ē e lē atoatoa le malosi o le tino, ma toe faatūina mai ē ua maliliu. E ala i lona maliu faataulaga na ia faaalia mai ai lona alofa loloto mo le Atua ma tagata. (Efeso 2:4, 5) A o iai Iesu i le itu taumatau o le Atua, e lē o toe umi ona ia faaaogā lea o lana pule, ma aumai faamanuiaga silisili i tagata usiusitaʻi i so o se vaipanoa.

O LOO AUAUNA AGELU I LE ATUA

“Na ou [le perofeta o Tanielu] vaai pea seʻia oo ina tuuina mai ni nofoālii ma ua alaala ai Lē e mai anamuā ona aso [Ieova]. . . . Ua auauna pea iā te ia le afe o ni afe, ma ua tutū pea i ona luma le selau miliona.”​—Tanielu 7:9, 10.

I lenā vaaiga i le lagi na vaaia ai e Tanielu le faitau afe o agelu. Maʻeu le ofoofogia o lenā vaaiga! O agelu o ni foafoaga agaga e mamalu, atamamai ma malolosi. O o latou tulaga e aofia ai serafi ma kerupi. E silia i le 250 taimi o loo taʻua ai agelu i le Tusi Paia.

O agelu e lē o ni tagata na soifua muamua i le lalolagi. Ua leva ona foafoaina e le Atua agelu a o leʻi foafoaina tagata. Na vaaitino agelu i le taimi na faia ai le lalolagi ma na latou alalaga i viiga.​—Iopu 38:4-7.

O se tasi o auala e auauna ai agelu faamaoni i le Atua, o le faia lea o so latou sao i le galuega e sili ona tāua o loo faia i aso nei i le lalolagi, o le faalauiloaina atu lea o le tala lelei o le Malo o le Atua. (Mataio 24:14) O le faia o so latou sao i lenei galuega na faaalia i se vaaiga na iloa e le aposetolo o Ioane. Na tusi o ia: “[Na] ou iloa lea o le isi agelu o loo lele i le taulotoaʻiga o le lagi, ua iā te ia le tala lelei e faavavau e folafola atu, o se tala fiafia i ē o loo nonofo i le lalolagi, ma nuu uma, ma ituaiga uma, ma gagana uma, ma tagata uma.” (Faaaliga 14:6) E ui e lē o toe talanoa mai agelu i tagata i aso nei e pei ona sa latou faia i aso ua mavae, ae ua fesoasoani agelu i le taʻitaʻiina o i latou o loo talaʻia le tala lelei i ē lotofaamaoni.

UA FAASESĒINA E SATANI LE FAITAU MILIONA

“Ona tau ai lea o le taua i le lagi: O Mikaele [Iesu Keriso] ma ana agelu ua tau ma le tarako, ua tau foʻi le tarako ma ana agelu ma i latou, ae ua toʻilalo, ua lē toe maua foʻi se mea e nonofo ai i le lagi. Ona lafo ifo lea o le tarako tele, o le uluaʻi gata lea, ua igoa foʻi i le Tiapolo ma Satani, o lē ua faasesēina le lalolagi atoa; ua lafo ifo o ia i le lalolagi, ua lafo ifo foʻi ana agelu faatasi ma ia.”​—Faaaliga 12:7-9.

E leʻi faapea na iai pea le filemu i le lagi. I le amataga o le talafaasolopito o tagata, na fouvale ai iā Ieova se tasi o agelu na matuā naunau e tapuaʻi atu foafoaga uma iā te ia. O lea na avea ai o ia ma Satani, o lona uiga o “Lē e Tetee.” Mulimuli ane, na aufaatasi atu isi agelu i lenā fouvalega ma avea ai i latou ma temoni. O lo latou leaga tele na latou matuā tetee atu ai iā Ieova, ma e toetoe o tagata uma ua latou taʻitaʻia i se ala e feteenaʻi ma le taʻitaʻiga alofa a le Atua.

E leaga ma sauā Satani ma ana temoni. O i latou o fili o le fanau a tagata, ma e telē la latou vaega i le tele o mafatiaga i le lalolagi. O se faaaʻoaʻoga, na faaumatia e Satani le lafumanu ma auauna a le tagata faamaoni o Iopu. Ona sosoo ai lea ma lona faaumatia o le fanau e toʻasefulu a Iopu e ala i se “matagi malosi” lea na paʻū ai le fale sa latou iai. Ina ua māeʻa lenā, ona taia lea e Satani o Iopu “i se maʻi papala leaga e amata mai i ona alofivae e oo i lona tumuaʻi.”​—Iopu 1:7-19; 2:7.

Peitaʻi, e lē o toe umi ona faaumatia lea o Satani. Talu ona lafo mai o ia i le lalolagi, ua ia iloa “ua puupuu lona taimi.” (Faaaliga 12:12) E mautinoa e faaumatia Satani, ma o se tala lelei lenā!

O I LATOU MAI I LE LALOLAGI

“Na e [Iesu] faatauina mai ai tagata mo le Atua mai i ituaiga uma, ma gagana uma, ma nuu uma, ma atunuu uma, ma ua e faia i latou ma malo ma ositaulaga i lo tatou Atua, e latou te pule mai foʻi o ni tupu i le lalolagi.”​—Faaaliga 5:9, 10.

E pei ona toe faatūina aʻe Iesu i le lagi, o le tulaga foʻi lenā o le a oo i isi. Na fetalai Iesu i ona aposetolo faamaoni: ʻOu te alu e sauni se nofoaga mo outou. Ou te toe sau foʻi ona ou talia lea o outou, ina ia iai foʻi outou i le mea ou te iai.’​—Ioane 14:2, 3.

E iai le fuafuaga mo i latou e ō i le lagi. O le a faia aʻe iā i latou ma Iesu le pulega o le Malo, lea e lē o toe umi ona pule lea i tagata uma o le lalolagi ma aumaia faamanuiaga mo i latou. O le Malo lea sa fetalai Iesu i ona soo e tatalo ai i le tatalo faaaʻoaʻo: “Lo matou Tamā e o i le lagi, ia faapaiaina lou suafa. Ia oo mai lou malo. Ia faia lou finagalo i le lalolagi, e pei ona faia i le lagi.”​—Mataio 6:9, 10.

MEA O LE A FAIA E I LATOU I LE LAGI

“Ona ou [le aposetolo o Ioane] faalogo lea i le leotele mai i le nofoālii e faapea: ʻFaauta! Ua iai i tagata le faleʻie o le Atua, . . . e na te soloiesea foʻi loimata uma i o latou mata, e lē toe iai se oti, po o se faanoanoa, po o se tagiauē, e lē toe iai foʻi se tigā. Auā ua mavae atu mea muamua.’”​—Faaaliga 21:3, 4.

E faasino atu lenā vaaiga faavaloaga i le taimi e faamuta ai le pulega a Satani e le Malo o le Atua, lea e faia aʻe iā Iesu ma i latou e toetutū mai i le lalolagi, ona faia lea o le lalolagi e avea o se parataiso. O le a lē toe iai tulaga ia e māfua ai le tele o tigā ma faanoanoaga. O le a lē toe iai foʻi se oti.

Ae faapefea le faitau piliona ua maliliu ae e lē toe faatutūina i le lagi? I le lumanaʻi, o le a toe faatutūina aʻe i latou ma le faamoemoe o le ola e faavavau i le Parataiso i le lalolagi.​—Luka 23:43.