‘Seʻi Vaganā ua Fausia e Ieova le Fale...’

PO O FEA lava e te nofo ai, e iai se nofoaga mo oe, o le aiga. O ituaiga o nofoaga ma fua o fausaga e matuā telē lava le eseesega. O faleoo e fausia i le palapala ma laau, o fale uumi, o fale simā—o le lisi e foliga mai e leai se iʻuga. Ua matuā lagona lava e nisi le mafana i le iai i le aiga i le na o se fale vaovao, e pei lava o isi ua iai lea lagona o loo mau i fale e sili ona mautu. Aiseā ua faapea ai?

O le iai o se faalogona nofogofie, le loto malie, e faalagolago tele lava i tagata o loo nonofo faatasi. (Faataoto 18:24) Na i lo o mea matagofie ma le feilafi ua ofo mai e le lalolagi, ae o le aiga lava o le a manao se tasi e liliu atu i ai mo le filemu ma le sologa lelei. Peitai, i le faamasinoina e ala i lipoti e uiga i olaga faaleaiga i ona po nei, e leai se faamautinoaga faapea o le a maua pea e se tasi le filemu ma le sologa lelei i le aiga. I sona tulaga lautele, o i latou o loo nonofo ma oe—lou aiga—e mafai ona auai faatasi ma oe i lou filemu pe faaleagaina ai foi. O le ā la le mealilo i le atiina aʻe o se aiga fiafia ma le filemu?

Fausiaina o le Fale

“Seʻi vagana ua fausia e Ieova lava ia le fale, e leai se aogā o le galuega mamafa a ē ua fausiaina,” ua fai mai ai le uluai fuaiupu o le Salamo 127. (NW) O i latou o loo auai i le fausiaina o se fale mo le tapuaiga i le Atua moni, o Ieova, ua latou iloa le moni o lenei mea. E ui lava ua tauofo mai e ni tagata galulue tomai o latou taimi ma taumafaiga mo le fausiaina vave o Maota o le Malo, ae o le faamanuiaga a Ieova o le mea lea e faamautinoa ai le manuia. E oo lava i tagata na matamata i ai e masani lava ona latou vaaia se mea uigaese i lena galuega. Mo se faaaʻoaʻoga, na lipotia mai e se mekasini i se tasi o atinaʻe faapena i Colchester, Egelani, na faaaogāina ai le ulutala “Ua Atiina aʻe e Ieova le Falealuga.”

Ae peitai, ina ia manuia i taumafaiga e ese ai na i lo o le polokalama moni lava ia o le fausiaina o fale, e faalagolago foi i le faamanuiaga a Ieova. Manatu i upu a Solomona i le fuaiupu e tolu o le Salamo 127: “Faauta, o le fanau, o le tofi lea mai ia Ieova; o e ua fanau mai, o le taui lea mai ia te ia.” Pe a oo mai i tulaga o aiga, e sili mamao atu ona lelei Ieova o Lē e Fausia, ma ua iai i mātua se faaeaga ofoofogia o le avea o lana au faigaluega, po o ē galulue faatasi ma ia.a (Eperu 11:10) E mafai faapefea e mātua Kerisiano ona faaaogā lenei faaeaga o le galulue faatasi ma tausia ma le manuia se aiga fiafia, filemu, se aiga e aumaia ai le mamalu i Lē na Foafoaina Mea, o Ieova le Atua?

O le Fausiaina Manuia o se Aiga

O se mea e matuā manaomia mo se fausaga manuia, o se ata mautu ua fuafuaina lelei, po o se ata auiliili. Mo le atiina aʻe o talavou e vivii i le Atua, e leai lava se isi ata auiliili e sili ona lelei i lo o lana Afioga faagaeeina, le Tusi Paia. (2 Timoteo 3:16, 17) “Aʻoaʻo ia i le tama e tusa ma lona ala; a oo ina toeaina lava o ia, e le teʻa ese ai,” na tusi ai Solomona. (Faataoto 22:6) O “lona ala” o le ala o Ieova, ma afai e mulimuli atu i ai mātua, ona la ofoina atu ai lea i le la fanau laiti le faamoemoe o le tuputupu aʻe e avea o ni auauna faamaoni a le Atua.

O se fale ina ia mautu e manaomia ai ni meafaufale malolosi. Na iloa e se tasi tagata mai i Aferika na asiasi atu i Europa le faigata ona talitonu faapea o nisi o fale na ia iloa ua taʻi selau tausaga le leva. Sa o se faaaliga ia te ia le vaaia o ni mea e anagata na faaaogāina i nei fale. I le isi itu, afai e lē uaʻi lelei atu ē faufale i meafaifale, o iʻuga e masani lava ona faamaonia le mataʻutia, e oo lava ina lavevea tagata ia oti. E moni foi lenei i le tausiaina o fanau.

I le faatoʻā afuafua, ua maua ai e fanau se uiga o le lē lelei atoatoa na tuufasolo mai i le amataga talu ai ona o le agasala. (Salamo 51:5) I se isi faaupuga, ua ponā i latou mai lava i le amataga. O mātua Kerisiano e tatau ona faafetaiaia lenei mea e ala i le taumafai ia atiina aʻe uiga faaleatua e tumau, i totonu o a latou fanau. (1 Korinito 3:10-15) Seʻi vaganā ua faia lenei mea, e tusa lava po o le ā le malosi o le galulue o mātua i isi vaipanoa, e pei o le saunia o meaʻai sili ona lelei, lavalava, ma fale, mo o latou atalii ma afafine, ae o le a lē aogā lava a latou taumafaiga o le atiina aʻe.

O le pogai lena ua apoapoaia ai tauatua mātua,ae maise lava tamā, ina ia: “Tausi atu ia i latou [tamaiti] i aʻoaʻiga ma apoapoaiga a Ieova.” (Efeso 6:4, NW) O aʻoaʻiga ma apoapoaiga a Ieova e aafia ai ata auiliili sili ona lelei ma meafaufale sili ona lelei. O le faaaogāina o ia mea o le a iʻu ai i aogā e faavavau mo le aiga atoa.

Toleniina i le Faia o le Galuega

E ui lava i fuafuaga aupito sili ona lelei ua uma ona faataatia, e iai pea mea faigata e leʻi faatalitalia i le faagasologa o so o se fausaga. E faapena foi, ona tatau i mātua ona aʻoaʻoina le aloalo atu i faafitauli e leʻi faatalitalia i le olaga i aso faisoo o tagata o le aiga ma ia nofo sauni foi e feutagai ma i latou. E mafai faapefea ona faia o lenei mea?

O le lelei o fesootaiga i le va o mātua e matuā tāua. Afai e talanoaina ma le tatalo e le tamā ma le tinā le agaʻigaʻi faatasi i luma o le fanau iti, o le a la maua ai nisi o vaipanoa ua tatau ona avatu ai se faamalo ma isi e tatau ona manaomia atili ai le “atiina aʻe.” O le taimi lava e iloa ai vaivaiga faapena, e mafai loa e mātua ona gaoioi faatasi ma faia laasaga talafeagai e feutagai ai ma i latou.

Ae atonu e toatele sou aiga, ma atonu e te tau manatu: ‘E mafai faapefea ona tuufaatasi a maua taumafaiga mo manaoga o tagata taitoatasi o la ma fanau e toatele?’ Aiseā e lē avatu ai se toleniga i le faia o galuega ina ia mafai ai e la oulua fanau ona fesoasoani le tasi i le isi? O tagata faatoʻā aʻoaʻo e tele tausaga e faaaluina i le aʻoaʻoina o tomai faatasi ma o latou matai tufuga. Atonu i la outou suesuega faaleaiga, e mafai ona e taumafai e fai atu i lau fanau talavou ina ia faamatala atu nisi o mataupu i tamaiti laiti. O le faamaoni, o le filifilia o uo, teena o taaʻiga leaga i aʻoga, ma mea faapena, o mataupu na e mafai e tagata matutua ma tagata laiti ona fesootai lelei ai. E ala i le tofia atu i tamaiti matutua o na atinaʻe moni o le olaga, e mafai ai ona e fesoasoani e toleni i latou e atiina aʻe le malosi i o latou mafaufau ma le tomai e aʻoaʻo ai a o aʻoaʻoina le fanau iti i mea o manaomia ona latou iloa. (Eperu 5:14) Ua iai i lenei mea se aogā faaopoopo i le atiina aʻe o le faiā moni i totonu o uso ma tuafafine totino.

Atonu e toaitiiti lou aiga, pe na o se toatasi le tamaitiiti. O lea, ua iai ia te oe avanoa e tele e te iloa ai ma malamalama i lau tama talavou. Ae peitai, ia mataala, i mataʻutia o le faitama valea i lau tamaitiiti e ala i le matuā faaautū uma atu i ai o ou manatu. E toatolu outou, a ea? O lea, ia faia faatasi mea uma. O le a aʻoaʻoina e lenei mea o ia ina ia fesootai ma isi ma ia uaʻi atu i fafo, i lea ua taofia ai o ia mai le manatu ifo ia te ia lava.

Fuafua mo le Faatasia o le Aiga

E moni, e iai mea e tele i le atiina aʻe o se aiga na i lo o le faia o se suesuega faale-Tusi Paia ma le avatua o fautuaga ma aʻoaʻiga. Na faapea mai Solomona: “E leai se mea e sili ona lelei i le tagata na i lo o le tatau ona ia ʻai ma inu ma ia fiafia lona loto e vaai i mea lelei ona o ana galuega fita.” (Failauga 2:24, NW) E lē taumatea e olioli lou aiga i meaʻai pe afai e manogi lelei le sauniunia. Pe o tou fuafua e fai faatasi la outou taumafataga o se aiga? O lenei mea e lē mafai ona faia pea pe afai o isi tagata o le aiga o loo ō atu e fai galuega, i aʻoga, po o isi lava galuega. Ae peitai, e masani lava ona iai se ʻaiga e tasi e mafai ona tou ʻaai faatasi ai o se aiga. O le ā e mafai ona saosaolaumea i se siomaga mamā i le ʻaiga a le aiga?

Ua faaaogā e se tasi uso lenei tulaga e lagā ai se fesili faale-Tusi Paia mo tagata uma e iai ina ia talanoaina. E moni lava, na te alofia le faamāina o i latou o ē atonu ua lē iloa le tali. O isi latou te tala atu ni mea na tutupu i le faiva. E ala i le uaʻi totoʻa atu i mataupu faaleagaga, ua oo ai ina avea taimi o taumafataga ma taimi mo le atiina aʻe o le aiga atoa. (Tagai i le Roma 14:19.) E moni, i nisi vaega o le lalolagi, e lē o la latou lea tu le talanoa tele i taimi o taumafataga. Peitai, o se taumafaiga aʻiaʻi ina ia tausisia se siomaga fiafia e matuā tāua. Fai mai le Faataoto 15:17: “E sili ona lelei o le faalumaga o laau ʻaina, a o i ai le alofa, i le povi ai le fale povi, a o i ai le ʻinoʻino.”

O le malōlō ma le suia o se laasaga e iai foi lo latou nofoaga i le olaga o se aiga Kerisiano. O mātua atamamai latou te faaaogā na tulaga e fausia ai le fusi o se aiga malosi faatiokarate. Faapefea?

A o faigofie ona tuu atu tamaiti laiti e ō ese ma tuliloa o latou lava faanaunauga, ua iai le mataʻutia i lenei mea. Mo se faaaʻoaʻoga, maeu le lē poto e iai i le faatagaina o tamaiti laiti e matuā faaafia i latou i taaloga lea e faamataʻu ai le ola pe pipili ai! (1 Timoteo 4:8) I se tulaga faateleina e mafai ai, ia filifili gaoioiga e aafia ai sui taitoatasi o le aiga. E mafai e le tamā ona fesili atu mo o latou manatu ma mafaufauga ma tofia i tagata taitoatasi se mea e sauniunia.

Pe e mafai e outou i le avea o se aiga ona faalauteleina lo outou alofa ma valaaulia isi tagata o le faapotopotoga ina ia auai i olioli o loo maua e lou aiga? O tagata matutua o le faapotopotoga e masani lava ona olioli e auai i le agaga faaleaiga,ae maise lava pe afai e lē o iai o latou lava aiga, pe e lē o ola foi e tusa ma mataupu silisili faa-Kerisiano. (Iakopo 1:27) I le tele o faapotopotoga, e iai aiga e taitoatasi matua. Ona o le manatunatu e tatau ai i le tulaga ulu faatiokarate ma i le faaaloalo mo tulaga faa-Kerisiano, e mafai e toeaina ma isi ona ofoina atu ni faamalumaluga faaleagaga i tagata o lena aiga. (Isaia 32:1) O le toatele o “tamaiti ua leai ni tamā” ua tupu olaola i le avea o se ulu paleni o se aiga ona o ni iʻuga o le faaalia i ai o le alofa naunau o se Kerisiano matua taʻumatuaina.—Salamo 82:3.

O le atiina aʻe o se aiga faa-Kerisiano o se galuega faigata. Ae faatasi ai ma le fesoasoani a Ieova, o le a oo ai ina e talisapaia moni faapea “o le fanau, o le tofi lea mai ia Ieova; o e ua fanau mai, o le taui lea mai ia te ia.” (Salamo 127:1, 3) E mafai ona avea i latou o se puna o viiga e lē gata i mātua Kerisiano ae faapea foi i Lē na Foafoaina i latou, o Ieova le Atua.

[Footnotes]