Lau Vaega i le Faia o Sauniga ia Aogā
1 Ua fesoasoani a tatou sauniga ia i tatou ia iloa lelei Ieova. Latou te timaʻia i tatou ia malamalama i ana tulafono ma mataupu silisili ma faalaeiau ai foi i tatou ia ola e tusa ma i latou. Ua sauniunia i tatou e sauniga mo se sao e sili ona uigā i le galuega talaʻi faasao ola. Ma ua latou fesoasoani ia i tatou e ausia lo tatou sini o le ola e faavavau i le lalolagi fou a le Atua. O itula tatou te faaaluina faatasi i sauniga o le a aumaia ia i tatou aogā sili pe afai tatou te taitoatasi ma faia la tatou vaega mo sauniga ia aogā.
2 E tolu manatu autu mo le faia o sauniga ia aogā—o sauniuniga, faia o se sao, ma le faatatauga faatino. E tausoga uma i latou ia. O le sauniuni lelei e faafaigofie ai ona faia se sao ma le olioli. O saafiafiga, ma faaleoga maelega o le faatuatua e faalaeiau ma uunaia ai i latou o loo faalogologo. (Efe. 4:29) Atonu o le a sili atu ona faaaogāina e i latou uma i le aofia mea ua taulimaina pe afai latou te malamalama ai ma fesoasoani ai e talisapaia pe mafai faapefea ona faatatauina faamatalaga i ni auala faatino i o latou lava olaga ma i le fesoasoani atu i isi e avea ma soʻo.
SUESUEGA O LE OLOMATAMATA MA TAU TUSI A LE FAAPOTOPOTOGA
3 O le Suesuega Le Olomatamata ma le Suesuega Tau Tusi a le Faapotopotoga o ni sauniga tāua tele ona o i laua ua fafaga ai e le “auauna faamaoni ma le mafaufau” le auaiga o le faatuatua. (Mata. 24:45-47) Faamata e te faataatia ese se taimi e suesue ai le mataupu o le a iloiloina? Pe ua e sauni e tali i sauniga? E manino lava, le i ai o sau vaega iloga i lenei faatatau.
4 Afai sa e suesueina faaeteete le mataupu mo le Suesuega o Le Olomatamata ma le Suesuega Tau Tusi a le Faapotopotoga, o le a saunia ai oe e fetufaai i le fiafiaga sili o le foai. (Galu. 20:35) Ua iloa e le toatele le aogā o le vaseina o upu autu. I le sue i mau e lē o otoina mai ma iloilo pe faapefea ona faatatauina ia, o le a e maua ai le malamalamaga i faavae faale-Tusi Paia mo tali. Faamata e mafai nei ona e tali atu i au lava upu, pe tatau ona e faitauina le tali? O le sini autu i le suesuega faatiokarate o le faia lea ma oe o faamatalaga ma ia gaoioi i ai ma le loto talisapaia ma le malamalama.—Faata. 2:5; 4:7, 8.
AʻOGA O LE FAIVA FAATIOKARATE MA LE SAUNIGA O LE AUAUNAGA
5 Pe e te manatu i lau lauga o le aʻoga o se tofiga mai ia Ieova ma faaatagia ai lenei i le auala o lau sauniuniga? Ia mautinoa ua e malamalama i le mataupu ma mafai ona taulimaina i se auala faagaee loto. Ae tusa foi pe leai sou tofiga patino, ia suesue i le faitauina o le faasologa o mataupu o le Tusi Paia ma isi lesona o vaiaso taitasi. O le mea lava e tasi e ao ona faia mo le Sauniga o le Auaunaga. Afai e faia lenei a o mamao le taimi, o le a mafai ai ona maʻati lou mafaufau i mea o loo taulimaina a o faagasolo le sauniga, na i lo o lou tauivi e faamasani ma le mataupu mo le uluai taimi.
6 O faatulagana o faataʻitaʻiga i le Sauniga o le Auaunaga ma lauga a tagata aʻoga e ao ona moni, e faaatagia ai tulaga i lou vaipanoa lea e mafai e tagata uma ona faamatala. Faaaʻoaʻo lelei lau vaega. Ma teu talafeagai foi, ina ia avea ai ou laei o se faaaʻoaʻoga lelei mo isi.
7 Tausini mo se vaega saunia lelei e taulimaina ma le maelegā. Mātua e, fesoasoani ia outou fanau e sauniuni ma tali ia latou lava upu pe a maua le avanoa. Ioe, afai e avea ma faanaunauga totino o tagata uma le i ai i le taimi tonu ma sauniuni e faia se sao, o le a ola ai a tatou sauniga ma matuā tāua, i le taulimaina o faamatalaga e uunaia ai i se auala e puʻeina ai manatu o le aofia. Pe o le a e faatinoina lau vaega i lenei faatatau ina ia “faia mea uma mo le atiina aʻe” o isi ua auau faatasi ma oe?—1 Kori. 14:26, NW.