Ia Mataalia e Amata Suesuega Faale-Tusi Paia
1 O le amataina ma le faafoeina o suesuega faale-Tusi Paia i aiga o se vaega o lo tatou tofiga o ni Molimau a Ieova. (Mata. 28:19, 20) O lea, pe o le a avea oe o se tasi o aumea faigaluega a le Atua i le faatinoina o lenei?(1 Kori. 3:9) Maeu se faaeaga o le fesoasoani i isi ia oo ina iloa le Peresona silisili i le vateatea!
2 Faatasi ma le tele nauā o faafitauli ua fesootai ma suiga faatopelau o mea tutupu i le lalolagi, e toatele tagata loto faamaoni o loo saili mo ni tali i le pogai ua tutupu ai nei mea. O anamua lava sa saunia ai e Ieova tali i a latou fesili. Pe a aʻoaʻoina ē faamaoni i le Afioga a le Atua, e faamafanafanaina ai i latou. O le mea lea, e manaomia ai ona tatou mataalia i avanoa e amata ai suesuega faale-Tusi Paia.—Faata. 3:27.
IA MATAALIA I AVANOA
3 Pe ua e manatunatu e amata se suesuega faale-Tusi Paia ma sou tau aiga vavalalata po o sē lua te masani e lē i le upu moni? O le iloaina o i latou o le a avatu ai ia te oe se itu lelei e faaaogā ai le faautauta e tusa ma se taimi talafeagai e talanoaina ai le mataupu ma i latou. Teu i manatu faapea o se fesili ua filifilia lelei po se upu i le taimi tatau atonu o le a faateʻi ai lo latou naunau i le upu moni. Pe a faaosofia le fia iloa o se tagata, e masani lava ona iʻu i ni talanoaga fuatele mai, ma atonu e amataina ai se suesuega faale-Tusi Paia.
4 I le tele o tulaga o le amio tauagafau a se paaga Kerisiano ua galue e tatalaina le ala mo sē lē talitonu ia sau i totonu o le upu moni. (1 Pete. 3:1, 2) E masani ona talisapaia lea e paaga lē talitonu ma isi sui lē talitonu o le aiga pe afai e manatu atu ia i latou ma faaaloalogia e sui o le faapotopotoga. O le faaalia o le naunau totino ia i latou e mafai ona agaʻi mamao atu i le atiina aʻe o sootaga faaleuō. I le galulue faatasi ma le paaga po o se sui o le aiga i le upu moni, e ono mafai ai ona e faavaeina se suesuega faale-Tusi Paia.
5 A o auai i le galuega i lea fale ma lea fale, atonu tatou te taumafai e amata se suesuega faale-Tusi Paia i le uluai asiasiga. E mafai faapefea ona faia lenei? Na taulau nisi tagata talaʻi i le faia o lenei ina ua siligia e lē ona le fale fesili e mafai ona tali tuusaʻo mai i se lomiga. Afai e ioe le tagata e faitau le lomiga pe afai foi na te valaaulia i tatou i totonu, e mafai ona tatou puʻea le avanoa e faaauau ai le talanoaga ma atonu e faataʻitaʻi ai se suesuega. Faaaogā lau faautaga po o le ā le umi e te nofo ai i le uluai asiasiga. Atonu e aogā ona toe foi atu i se itula mulimuli ane po o se isi aso e faaauau le talanoaga. I asiga o lumanai, atonu e te manao e faaauau le talanoaga i le mataupu na e folasia i le uluai asiasiga. Pe mafai foi ona e laga se fesili na faatu i le mutaaga o le asiasiga talu ai.
FAATASIGA LĒ FUAFUAINA
6 E mafai foi ona avea le molimau lē fuafuaina o se vala fuatele mai i a tatou taumafaiga e amataina suesuega faale-Tusi Paia i aiga. I a tatou gaoioiga i lea aso ma lea aso, tatou te fesootai ai ma le toatele o tagata atonu latou te mananao e suesue. Ina ia fesoasoani ia i tatou ia uigā, e mafai ona tatou faaaogā nisi o faatomuaga ua maeʻa ona tofoina mai le tusi Reasoning e amata ai felafolafoaiga. Ma aua neʻi faatautū mai le ofoina o se suesuega faale-Tusi Paia i le taimi muamua auā e nofo le tagata i se isi vaipanoa ma atonu tatou te lē maua le avanoa e faafoeina ai e i tatou lava le suesuega.
7 Ia mataalia i faatasiga mo le molimau lē fuafuaina, ma ia sauniuni i le aveina o se sapalai o sāvali ma mekasini e faapea ona faaoso ai le naunau i le upu moni o lē faalogologo. (Fai. 11:1) Afai e faaalia e se tagata le naunau i le upu moni ae lē i totonu o le oganuu a lau faapotopotoga, tapā lona tuatusi ma isi faamatalaga manaomia ma auina atu lenei i le faapotopotoga o le mea o loo ia alala ai ina ia mafai e se tasi ona vaaia lelei o ia.
8 O le galuega o le faia o soʻo e lē mo na o sina toaitiiti. E mo tagata uma lava i le faapotopotoga. I le teu mau i manatu faapea o se tofiga faa-Kerisiano le avea ma ē faia soʻo o le a faalaeiauina ai i tatou ia mataalia i avanoa e amata ai suesuega faale-Tusi Paia.