Faaauau ona Aʻoaʻo Atu e Aunoa ma le Faavaivai
1 Ua lē tuu masalosaloina i tatou e le Tusi Paia e faatatau i le ituaiga o oganuu sa iai le au aposetolo ma uluai soʻo Kerisiano. E leʻi leva talu le maliu o Iesu, ae lapataia loa i latou e ē pule ia aua neʻi “tautala atu pe aʻoaʻo atu” e uiga ia Iesu. (Galu. 4:18) Aiseā? O se tasi o mafuaaga ona o le taulau ofoofogia na latou maua. E faitau afe na avea ma ē talitonu, e pei ona lipotia mai e le Galuega 4:4 “E toatele o e na faalogologo i le upu ua talitonu i latou; o le tau aofai foi o tagata po ua lima gaafe.”
2 Ona ua tatou faaauau foi ona aʻoaʻo atu e aunoa ma le faavaivai, e faitau selau afe, ioe, e faitau miliona ua avea ma ē talitonu i o tatou aso. Ua ia i tatou le faaeaga ia Oketopa e ofoina ai le Awake! ma Le Olomatamata e faavae i tusiga. E lē taumatea ua faatinoina e le Awake! se vaega tāua i le uunaia o tagata ia taunapa i o latou manaoga faaleagaga. O lenei ua taʻitaʻia ai le toatele i le fiafiaga, a o latou aʻoaʻoina e faia le finagalo o Ieova.—Faatusatusa Mataio 5:3.
AUSIA TAGATA UMA
3 E ui atonu o loo iai a tatou oganuu e galueaina soo, e ono mafai pea ona talatalanoa ma nisi o ē na itiiti le avanoa e faalogo ai i le tala lelei. E faapefea? E masani ā ona leai se tasi i le fale pe a tatou asiasi atu ma e ono misia ai lena aiga. I le toe asia i se taimi ese, atonu tatou te feiloai ai ma se tasi na te leʻi talia muamua se molimau. Pe faia foi se taumafaiga faapitoa e fetāpaʻi ai ma le tamā o le aiga pe a auai i le molimau atu i le afiafi po o le faaiʻuga o le vaiaso. E ala i le tausia lelei o faamaumauga i lea fale ma lea fale, atonu e mafai ai ona tatou sailia isi sui o le aiga, e pei o se tinā o se tasi o mātua, se tama a le uso po o sē e tausoga tinā po o tamā e alu i le aʻoga, po o le toalua o le uso e faigaluega i le vaiaso. E mafai ona matuā tauia se taumafaiga faaopoopo e faia ia fetāpaʻi ai ma sui taitoatasi o le aiga.
4 A o faagasolo le masina e anoanoai auala lelei e maua ai tusiga. O se tasi o le valaaulia lea o a tatou tagata aʻoga o le Tusi Paia ma isi tagata fiafia e faia tusiga. Masalo ua maeʻa ona faia se tusiga a se tasi o a tatou tagata aʻoga o le Tusi Paia i se tasi o mekasini. Aiseā la e lē fautuaina ai o ia e maua uma le lua? E ono faalaeiauina foi aiga ia maua se tusiga o Le Olomatamata mo sui taitasi ina ia mafai ai ona latou sauniuni mo le Suesuega o Le Olomatamata. O se isi faufautuaga o le atiina lea o ala mekasini ma ofoina ai tusiga ia i latou o ē e faaalia le naunau atili na i lo le mea e masani ai. E ao foi ona tatou ofo atu e suesue le Tusi Paia ma i latou o ē faaalia le naunau moni.
FAALAUTELE LAU FAIVA
5 O loo telē pea le taimi e avatu ai se talosaga mo le auaunaga faapaeonia lagolago mo le masina o Oketopa. O ē fuafua e auai i le galuega paeonia i aso malōlō o le lalolagi ia Tesema, o se aiga? O le taimi lenei e amata ai ona manatunatu pe mafai faapefea ona ē faatinoina ma le manuia. Afai e lē mafai ona paeonia lagolago le aiga atoa, faamata tou te ono galulue faatasi ina ia mafai ai ona faia faapea e se sui e toatasi pe sili atu o le aiga? Afai e leai, pe lē mafai ona tau ina faaaluina se taimi tele i le ofoina o mekasini o le Awake! ma Le Olomatamata?
6 Tatou te sapaitalia aogā faaleagaga ma faamanuiaga ua tatou maua e ala i itulau o le Awake! ma Le Olomatamata. Ua tatou iloa o le a maua foi e tagata loto faamaoni ia tatou oganuu aogā faaʻoaina mai le faitauina o mekasini i se faavae faifai pea. Seʻi o tatou faaauau pea la tatou aʻoaʻo atu faatasi ma meafaigaluega matagofie ua faaavanoaina e Ieova ia i tatou, i le masina o Oketopa. I le faia faapea, o le a tatou seleseleina ai faamanuiaga a Ieova ma faamaonia ai o i tatou o se faamanuiaga i isi.—Kala. 6:9.