Pāʻia Loto e Ala i Suesuega Faale-Tusi Paia Uigā
1 Sa fiafia Iesu i le faia o le finagalo o lona Tamā, ma na tausaafia ia te ia le fesoasoani i isi e auauna foi ia Ieova. (Sala. 40:8; Mata. 9:37, 38; 11:28-30) Sa lē faamalieina Iesu i le tau ina faaoo atu o lana feau. Afai tatou te fia taulau i le faalaeiauina o isi e auai ma i tatou i le galuega faaevagelia, e tatau la ona tatou pāʻia loto o a tatou tagata aʻoga. E sili atu e aofia ai i lenei na i lo le faafoeina o se talanoaga i fesili ma tali o se lomiga. Ina ia pāʻia le loto, e manaomia ona teu i manatu a tatou tagata aʻoga pe a sauniuni.
2 Sa naunau totino Iesu i isi. Na ia amanaia o latou lafo faatutū. Sa ia faaaogā talafaatusa e faafaigofie ai ni mataupu faigata. (Mata., mata. 5-7) Na avatu e Iesu fautuaga talafeagai e tusa ma faafitauli o le a latou fesagaʻi. (Mare. 9:33-37) Ina ua lē mafai ona puʻe e lana au faalogologo le manatu o lana aʻoaʻoga i le taimi muamua, ona ia faataʻitaʻia lea ma le onosai o le mea na ia taʻua. (Mata. 16:5-12) E ao i le naunau loloto o Iesu i isi ona uunaia ai i tatou e fesili, ‘A fai o aʻu o se tagata aʻoga, o le ā e manaomia ona ou iloa ina ia ou malamalama ai ma uunaia i mea ua aʻoaʻoina?—Matau 1971 Yearbook, itulau 246-247.
FAAMATILATILA LE TUSI PAIA
3 Ina ua siligia se tasi ulugalii i le mea na mafua ai ona la sauni e tali ane i le molimau na avatu, o le la tali: “Ona sa aumaia i le Tusi Paia.” Ioe, e pāʻia loto e le Afioga a le Atua. (Epe. 4:12) Faasino soo i ai, ma saoloto e faaaogā mau i palakalafa. Fesoasoani i le tagata aʻoga ia iloa le pogai e atamai ai pe valea se ala patino. Fefulisaʻi ma ia pe faapefea i le usiusitai i tulafono a le Atua ona aʻogā ia te ia.—Vaai Le Olomatamata Mati 1, 1985, itulau 15-16.
4 Ua iloa e le toatele o tagata talaʻi faapea e uigā tele le faaaogāina o le tusi Reasoning i le faamatilatilaina o le Tusi Paia. Mo se faaaʻoaʻoga, a iloiloina le itulau e 124, palakalafa e 13, o le tusi Ola e Faavavau, atonu e fesili ane lē ona le fale pe aiseā ua taʻua ai e lo latou faifeau faapea ua mafua ona maliliu tamaiti ona e finagalo le Atua latou te faatasi ma ia i le lagi. O se iloiloga o manatu i le itulau e 99 o le tusi Reasoning i lalo o le “Aiseā e maliliu ai pepe?” o loo faamamafa ai le naunau o Ieova e faasaoina le faatulagana o le aiga. E ono avea le faamatalaga ma ala e talitonu ai le tagata i le alofa o Ieova mo le fanau a tagata.
SILIGIA FESILI
5 Sa fesoasoani le faaaogāina ma le uigā o fesili ia Iesu ina ia mafai ai e tagata ona mafaufau ma fefulifulisaʻi. (Mata. 17:24-27) E ono fesoasoani tali a le tagata aʻoga ia i tatou e faamautinoa ai mea ua ia aʻoaʻoina atoa ma manatu lē faale-Tusi Paia o loo ia taofia pea. Atonu o loo tauivi le tagata aʻoga ma le masani o le ulaula. Ua maeʻa ona lua autaluina manatu i le mataupu e 27 o le tusi Ola e Faavavau ma le faamatalaga i itulau e 13-16 i le lomiga o le Awake! o Iulai 8, 1989. Ua ia iloa e manaomia ona taofia. Peitai, ua ia talitonu moni ea e ao ona ia vavaeese mai ai? E te ono faapea atu: “O le ā sou lagona e uiga i lenei mea. Seʻi faapea e te taofia nei loa ae teʻi ua ulagia oe e nisi o au uō. O le ā lau mea o le a fai?”
6 E ui i lea, na o se upu lapatai. I nisi taimi o fesili faapena e ono aumaia ai ni tali e te meia ai pe e te faameo ai. Ona ā lea? Afai o se mataupu e ʻilitata i ai, atonu e lelei ona aua neʻi faamalosia le manatu ae faapea atu: “Ta pāpāave ia mo le taimi nei. Seʻi o ta toe foi mai i ai i se taimi mulimuli.” Pe, “Ia, o se mea lea e ao ona manatunatu i ai, a ea?” (Ioane 16:12) I le iloaina o le lagona moni o le tagata aʻoga e faatatau i le mataupu, e mafai ai ona e sauniunia se faamatalaga atonu e fesoasoani ia te ia e agaʻigaʻi atili i luma. E ao ona tatou tauivi e uunaia le loto o se tagata ma tatalo ia fesoasoani mai Ieova ia te ia e tuputupu aʻe faaleagaga.—1 Kori. 3:5-9.
7 A faafoeina se suesuega faale-Tusi Paia, tau ina manatua pea ia lava se taimi e faaalu e fefulifulisaʻi ai ma le tagata aʻoga le mataupu ua iloiloina. Fetuutuunai au auala tau aʻoaʻoga ia fetaui ma ona manaoga patino. Galue ia atiina aʻe i totonu o lona loto se alofa loloto ma le faaaloalo mo Ieova, le Tusi Paia, ma le faalapotopotoga a Ieova. Talosia ia tatou faia la tatou vaega e fesoasoani ai i isi e avea ma soʻo o Keriso i le taumafai e faafoeina suesuega faale-Tusi Paia uigā.—Galu. 2:41-46.