Suesuega Tautusi a le Faapotopotoga

Faasologa mo suesuega a le faapotopotoga i le polosiua “Faauta! Ou te Faia ia Fou Mea Uma Lava”:

Ianuari 5: Palakalafa 20 - 31

Ianuari 12: Palakalafa 32 - 41

Ianuari 19: Palakalafa 42 - 50

Ianuari 26: Palakalafa 51 - 58

ma fesili autalu e 12

Faasilasilaga

● Tusi e ofo mo Fepuari: Ofo faapitoa o Le Manuia Moni ma Le Saogalemu—Mai le a le Puna? ma le Agaga Paia—Le Malosi i Tua o le Faiga Fou o Loo Sau! mo le meaalofa paʻū e $1.00 (US50c) mo le lua. Afai o iai i faapotopotoga tusi faa-Peretania e taʻi 192-itulau na lomia i tua atu o le 1980, e mafai ona ofo i latou mo se tau paʻū e $1.00 (US50c) seʻi vagana ia o loo mulimuli mai: Aiga Fiafia, Great Teacher, This Life, Upu Moni, ma le Youth. (Vaai le tusi a le Sosaiete o Tesema 28, 1989 e faatatau i le talosagaina o se tau paʻū.) Mati: Tusi o le Revelation Climax mo le meaalofa e $6.00 (US$3.00). Aperila ma Me: Tusiga o Le Olomatamata. I mea e lē talia ai le tusiga, e mafai ona ofo mekasini e lua ma se kopi o so o se polosiua, vagana le polosiua Aʻoga, mo le meaalofa e $1.40 (US80c).

● E tatau i le failautusi ma le ovasia o le auaunaga ona autalu gaoioiga a paeonia sauatoa uma. Afai o faafaigata i so o se tasi ona ausia itula e manaomia, e ao i toeaiina ona fuafua mo se fesoasoani e avatu. Mo faufautuaga, autalu le tusi a le Sosaiete (S-201) o Oketopa 1, 1988, ma Oketopa 1, 1989. Faapea foi, ona tagai i palakalafa 12-20 o le sulu o La Tatou Faiva o le Malo o Aokuso 1986.

● O le a faatino le faamanatuina o le Faamanatuga i le Aso Lua, Aperila 10, 1990. E ui ina atonu e vave amata le lauga, ae faamolemole ia manatua o le faasoloina o le areto ma le uaina o le Faamanatuga e lē tatau ona amata seia goto le la. Siaki puna o faamatalaga i lou vaipanoa ina ia faamautinoa le taimi e goto ai le la i lou nofoaga. E leai se isi sauniga e ao ona faia i lena aso. Afai e masani ona faia sauniga a lau tou faapotopotoga i le Aso Lua, atonu tou te mananao e suia lea i se isi taimi o le vaiaso pe afai e avanoa le maota. Ae afai e afaina ai lau tou Sauniga o le Auaunaga, e mafai ona faaofi i se isi Sauniga o le Auaunaga so o se vaega na fuafuaina mo lena vaiaso e faapea ona faatatauina patino i lau tou faapotopotoga.

● E amata i le lomiga o Ianuari 1, 1990, ona lomia faalua i le masina Le Olomatamata o Ukraine. Ae amata i le lomiga o Ianuari 1990, ona lomia faafa i le tausaga le Awake! o Ukraine.

● O le Awake! faa-Arapi, o le a faalua ona lomia e amata i lomiga o Ianuari 8, 1990.

Faaalia le Faalagolago ia Ieova i le Paeonia

¹ O le faamuamua o faanaunauga o le Malo e manaomia ai le faalagolago ia Ieova. (Sala. 56:11; Faata. 3:5; Mata. 6:33) Tatou taumafai e liliu ese o tatou mafaufau mai mea ua manatu le lalolagi e tāua ae uai atu i oa faaleagaga. A o tosina le lalolagi i le tuinanau mo mea faitino, ua augani mai Ieova ia i tatou ia loto malie i mea e tāua moni.—1 Timo. 6:8; Fili. 1:10.

² O se luʻi faapitoa lenei i talavou Kerisiano o ē mananao e tauaveina ma le uigā poloaiga a Ieova. Atonu e omia i latou e o latou faiaʻoga ma a latou aumea i le aʻoga o ē manatu e matuā manaomia aʻoga maualuga ina ia taulau ai i le olaga. A o amanaia e iai o latou manaoga faaletino, e toatele talavou Kerisiano ua teena ma le atamai na omiga ae filifilia le faiva faapaeonia o sa latou galuega tumau. I le faalagolago i folafolaga a Ieova, ua latou vaavaai atu ai ia te ia e tausia o latou manaoga.—Sala. 62:2; 68:19; 1 Timo. 5:8; 6:9, 10.

AUTALU AIAIGA TOTINO

³ Sa faalaeiau e Le Olomatamata faa-Samoa o Setema 1, 1983, i tatou taitoatasi e fesili: “Pe mafai ona ou faamaonia i luma o Ieova le mea moni faapea e lē o aʻu o se paeonia?” E manino, e toatele sa leʻi ausia le tulaga e paeonia ai i lena taimi. Peitai sa lē faavaivai ai i latou, i le iloaina faapea so o se fua o le auaunaga ma le loto atoa e taliaina lava e Ieova. (Mika 6:8; 2 Kori. 8:12) Mulimuli ane, ina ua suia aiaiga totino, o le iloiloina faatasi ma le tatalo o lena mataupu o Le Olomatamata 1983 na mafai ai ona auai nisi i le faitau afe o tagata taitoatasi o ē e leʻi mamao atu ona tagofia le auaunaga paeonia sauatoa.

⁴ Afai sa faalavelavea oe i aiaiga totino mai le ulu atu i le auaunaga paeonia ina ua lomia le faamatalaga i luga i le 1983, pe ua suia ou aiaiga? I le Iunaite Setete, e silia i le 17,000 talosaga mo paeonia sa faasolosolo i le tausaga ua mavae! E lē masalomia o le tele o na talosaga sa mananao e avea ma paeonia muamua peitai sa manaomia ona faatali mo se suiga i aiaiga

⁵ I nisi tulaga, o se suiga tatau atonu e aafia ai le uiga faalemafaufau o se tasi e faatatau i le auaunaga paeonia. Pe atonu e aofia ai le na ona faia o se faasologa lelei mo le auaunaga. I ni taimi e manaomia ai se suiga i avega tauave totino ma matafaioi mo le tatalaina o le ala i le auaunaga paeonia. O le mea lea, e lelei ai ona avea lenei o se mataupu faifai pea o tatalo ia Ieova faatasi ma se fetuutuunaiga faamaoni o i tatou lava ma o tatou aiaiga. E faitau afe ua latou faia faapea ma o loo olioli ai nei i faamanuiaga o le auaunaga paeonia.

⁶ Afai e faaalia e se fua faatatau saʻo o ou aiaiga atonu e mafai ona e amata paeonia e lē o toe mamao i le lumanai, aiseā e lē amata ai nei le auaunaga paeonia lagolago i se faavae faifai pea? I totonu o ni nai masina, o le a e atiina aʻe ai toe asiga ma suesuega faale-Tusi Paia. E mafai e lea ona fesoasoani ia te oe i le faia o se suiga sologa lelei i le auaunaga paeonia sauatoa, a o lumanai le amataga o le tausaga faaleauaunaga fou.

⁷ Ua faataunuuina e Ieova mea tetele i aso e gata ai o le faiga amioleaga o loo iai. O nei la le taimi mo i tatou uma e tosina vavalalata ai ia te ia ma ia faamanū i lona suafa “i aso uma lava.” (Sala. 145:2; Iako. 4:8) Afai e faatagaina oe e ou aiaiga e faia faapea ma ua e agavaa, ia avea le auaunaga paeonia o se tasi o faamaoniga o lou faalagolago i a Ieova.—Sala. 94:18.

Pusa Fesili

● E mafai faapefea ona tatou folasia uiga Kerisiano pe a auai i le Suesuega Tau Tusi a le Faapotopotoga?

E masani ona mātauina i tatou e o tatou tuaoi, ma i nisi taimi latou te talanoa ai ma e oo ina tali mai ai i a tatou amio. (Faatusatusa 1 Korinito 4:9) Ona o ni auauna a Ieova, tatou te mananao ia logoleleia a tatou faiga i a latou talanoaga ma gaoioiga. (1 Pete. 2:12) Ua moni lea i le sootaga ma a tatou meafai i le Suesuega Tau Tusi a le Faapotopotoga. Ona o le tele o ia o loo aaoina i fale o aiga, e ao ona faatinoina le matuā faaeteete ina ia atagia lelei ai o tatou uiga i mea uma tatou te faia. I nofoaga e faatapulaa paka, aiseā e lē faia ai faatatauga e ō i se taavale e tasi ina ia foia ai le faasoesā lē manaomia ia i latou o vaifale o le suesuega tau tusi? O lo tatou alofa mo ō tatou tuaoi o le a tatou aloese ai mai le paka lē mafaufau o a tatou taavale i se auala ua lē avanoa ai mo ia pe mafatia ai.

Tatou te olioli po o fea lava tatou te fetaui ai, ma e masani ona iʻu i ni talanoaga faamalosiaʻu a o leʻi amata ma i le faaiʻuga o le feiloaiga. (Mika 2:12) O uiga lelei ma le magafagafa mo isi o le a na taʻumaia e tuutuu i lalo le leo o a tatou talanoaga. (Mata. 7:12; Kala. 6:10) O le a uunaia foi i tatou e le alofa faaʻKerisiano e taofia a tatou fanau mai le fetamoʻeai i fafo ma mai le faaleagaina o mea totino a isi. (Faata. 29:15; 1 Kori. 13:4, 5) E aofia i lenei amio faaaloalo i le maota o loo aaoina ai le suesuega. Afai e mātauina so o se amio faalētaupulea, e lē tatau i toeaiina ona faatuai i le avatuina o le fautuaga alofa ma le maumauai ina ia lē aliaʻi mai ai faafitauli e ono iʻu i faitioga mai tuaoi, faafitauli mo lē ona le fale sa ia faaavanoaina ma le agalelei lona maota mo le suesuega, po o le lē avanoa mo i latou e faapitoa ona auai i lea nofoaga o le suesuega tau tusi.