Aua le Faavaivai
1 Ua taʻu mai e le 1991 Yearbook se faatelega faamaniti tino o loo tupu i le lalolagi aoao. O loo iai ni tumutumuga fou o tagata talaʻi i lea atunuu ma lea atunuu.
2 Ae o faapeī lau oganuu? Lua te fesagaʻi ma le faalotolotolua? E manatu faatauvaa tagata i le feau o le Malo? E tau leai ni tagata i aiga? Pe toaitiiti e talilelei mai? Afai o lea, e mafai la ona faalaeiau oe e le fautuaga a Paulo i le Kalatia 6:9 “Aua neʻi tatou faapalapala i le [faia o le mea lelei]; auā o ona po e tatau ai tatou te selesele mai ai, pe afai tatou te le faavaivai.” O le faia o le mea lelei e mautinoa e aofia ai le talaʻiga o le tala lelei o le Malo i lea fale ma lea fale. E tatau ona faaauau ona tatou talaʻi ma le faanatinati seia fetalai mai Ieova ua maeʻa le galuega. (Isaia 6:8) E oo foi i oganuu faigata, o loo maua ai pea ē pei ni mamoe.
3 O le ā e mafai ona tatou faia ina ia aua le faavaivai i la tatou faiva? E mafai ona fesoasoani le suia o a tatou faafeiloaiga ma a tatou upu tomua. O loo maua faufautuaga e sili ona lelei i le tusi Reasoning. Ua e faataʻitaʻia i latou? E mafai e se faafeiloaiga puupuu ae fana saʻo ona puʻea le faautaga a le toatele o tagata o aiga. Faailoa i tagata o le pogai o lou alu atu ona e te naunau totino ia i latou ma lo latou lelei.
OFO LE TUSI “MANUIA MONI”
4 I a Ianuari e mafai ona tatou faaalia le manatu mamafa mo isi i le ofoina o le tusi Le Manuia Moni ma Le Saogalemu—Mai le a Le Puna? Ua tatou iloa o le a oo mai le filemu moni ma le saogalemu e ala i le Malo o le Atua ma tatou te fautuaina totino ma lagolagoina lena i le talaʻiga o le tala lelei. O le tusi Manuia Moni o se mea faigaluega e sili ona lelei e fesoasoani ai i isi ia aʻoaʻo atili e uiga i le Malo lea latou te taʻua soo i tatalo, ae itiiti se iloa e faatatau i ai.
5 O mataupu uma o lenei tusi o loo iai ni manatu e sili ona lelei e talanoa i ai. Atonu o le a e iloa le aogā o le mataupu 1 ma le ata i le itulau e 4 i lau taulimaga. O ae sē e lē fia ola i tulaga faaparataiso ua folasia i inā? O loo faasino le palakalafa e 3 o le mataupu 1 i se suiga iloga e fesootai ma le va o malo malolosi o le lalolagi ma ua faamatilatilaina lenei e mea na tutupu e leʻi mamao atu i Europa. O le mea moni, atonu e te tau ane i nisi manatu e fetaui mo lau taulimaga, e pei o le palakalafa e 20 o le mataupu e 4 i le itulau e 44. E mafai foi ona sosoo le Mataupu o Talanoaga o loo iai ma le vaega i itulau e 82 ma le 83 o loo faasino i le “faailoga,” e faaalia ai po o afea o le a faatino ai e le Malo le gaoioiga ua taʻua i le Tanielu 2:44.
6 Ma le mautinoa e mafai ona faalaeiauina totino ma faamalosia i tatou i lo tatou auai i le galuega talaʻi o le Malo i se faavae faalevaiaso. E faaopoopo i lena, e mafai ona siitia lo tatou tulaga faaleagaga i le suesueina e lē aunoa o le Afioga a le Atua ma auai pea i sauniga a le faapotopotoga.—Epe. 10:23-25.
FAALAEIAU ISI IA FAAMALOLOSI PEA
7 E mafai ona e fesoasoani ia te oe lava ma faalaeiau isi i le galulue ma i latou i le faiva i le fanua. (Kala. 6:10) Aiseā e lē fesili ai i paeonia ma toeaina pe mafai ona tou galulue ma i latou? O le a faalaeiauina foi i latou o ē lē talaʻi pea pe ua lē toe talaʻi i lou naunau i lo latou lelei faaleagaga.
8 Tatou te manaomia uma lava ona tumau i le auaunaga a Ieova ae aua le faavaivai i nei aso faaiʻu faigata. O lena tutumau o le a mafai ai ona tatou tausisia lo tatou maelega faa-Kerisiano e ui i le faigata ma le manatu māmā i ai o nisi. (Epe. 10:36-39) Tatalo ia Ieova mo le malosi. (Isaia 40:29-31) Talosaga ia te ia e fesoasoani mai ia te oe e tumau, ma tausia se uiga maumauai faalemafaufau. Manatua, o loo tatou faia le galuega a le Atua. E silasila mai o ia i le mea o loo tatou faia i lana auaunaga, ma na te lē faagaloina. (Epe. 6:10) O lea aua neʻi o tatou faavaivai! Na i lo lena, tau ina tatou ‘faia pea mea e tele i le galuega a le Alii,’ ma faalagolago ia Ieova e faamalosia i tatou mo lana ‘galuega lelei.’—1 Kori. 15:58; Kala. 6:9.