Amataina Suesuega Faale-Tusi Paia
1 Na fetalai Iesu, “Ia muai talaʻiina foi le tala lelei i nuu uma lava e ao ai.” (Mare. 13:10) O lona uiga o le a fesootai ona soʻo ma le anoanoai o tagata e eseese gagana, aganuu, ma talaaga faaletapuaiga. E uiga foi faapea o le a iai i ona soʻo faaonaponei o Molimau a Ieova, le tofiga o le aʻoaʻoina o ituaiga uma o tagata.
2 Ua saunia mo i tatou le matalasi o lomiga e mafai ona matuā uigā i le faaaogāina i lo tatou tofiga o le aʻoaʻo atu ma le faia o soʻo. O se tasi o na meafaigaluega e sili ona lelei o le tusi Ola e Faavavau. Ua ia i tatou foi polosiua eseese e lē taumatea o le a fesoasoani i le toatele atili o tagata loto faamaoni e sailia le Atua moni, o Ieova, ma sapasapaia lana ala o le upu moni. (Ioane 4:21-24) E mafai faapefea ona tatou amata suesuega faale-Tusi Paia e faaaogā ai ia lomiga eseese?
E FAAPEA ONA AMATA SE SUESUEGA
3 E mafai ona faataatia le faavae mo se suesuega faale-Tusi Paia i le uluai asiasiga pe a e iloa le noataga tau tapuaiga o le tagata ma talitonuga totino. I lena asiasiga amata, atonu e te tataʻia ai manatu o lē ona le fale i se mataupu maʻoti po o se palakalafa i se tasi o lomiga. Ona oo lea, pe i se asiasiga mulimuli ane, e mafai ona faaaogā lena lava manatu e fai ma faavae o se talanoaga e tataʻi ai i se suesuega. I le tele o lomiga, e mafai ona tatou faaaogāina fesili i le pito i lalo o le itulau e fai ma faavae e saveuina ai manatu ma iloiloga. O le mea moni, tatou te lē naunau e faamaite se fefinauaiga ae, na i lo lea, o se iloiloga e fetufaaʻi ai le mataupu. O lo tatou sini ia faasino le tagata i le Afioga a le Atua ma faalaeiau ia maua le poto ia Ieova le Atua ma Keriso Iesu. Aiseā e faapena ai?
4 Auā, e pei ona taʻu mai e le Ioane 17:3 ia i tatou, o le iloa o le Atua moni e toatasi, o Ieova, ma lē na ia auina mai, o Iesu Keriso, e iʻu lea i le ola e faavavau. E mafai e le Tusi Paia ona ‘faapotoina i tatou mo le faaolataga e ala i le faatuatua e fesootai ma Keriso Iesu.’ (2 Timo. 3:15) Ma, na fetalai Iesu lava ia, “O aʻu nei le ala, ma le upu moni, ma le ola; e le alu atu lava se tasi i le Tamā, pe a le ui mai ia te au.” (Ioane 14:6) O lea, ia faalaeiau le tagata e ave i fale lenei poto faasao ola. O le toe faaopoopo atu i le lua talanoaga ua tuanai e ala i manatu ua filifilia mai le lomiga na maua e lē ona le fale, o le a e folasia ai i lē ona le fale le tāua o le lomiga atoa ma le auala e suesue ai. O le a faalaeiauina e lenei mea le tagata e suesue i se faavae faifai pea. E mafai ona e ofo saʻo loa i ai e suesue ma le tagata pe tau a ina atiina aʻe lenei masani e ala i au asiasiga e lē aunoa. Po o le ā lava le tulaga, o le a tutusa aogā i lē ona le fale.
NOFOUTA I MANAOGA O LE TAGATA
5 Masalo ua e amataina se suesuega i se tasi o polosiua. Pe atonu ua uma ona e suesueina atoatoa lena, pe atonu foi i le maeʻa o ni nai suesuega o le a e manatu ai e atamai ona sii i se isi lomiga e tele mataupu faale-Tusi Paia o iai, e pei o le tusi E Mafai ona E Ola E Faavavau i Parataiso i Le Lalolagi. Ona o nisi o tusi ma polosiua ua fuafuaina e ufitia ai ni mataupu iloga, mo se faaaʻoaʻoga o le polosiua Tolutasi, atonu o le a lē tosina uma ona mataupu i tagata uma, pe atonu e oo ina talitonu lē ona le fale i le upu moni i lena mataupu e tasi i sina taimi puupuu. Ona manaomia lea ona tatou iloa pe faapefea ona fetuutuunai a tatou taulimaga ma le faatatauga o le suesuega i manaoga o tagata taitoatasi.—1 Kori. 9:19-22.
6 E manaomia ona tatou faia lenei mea ina ia faaolaola ai pea le naunau ua fafagaina i le suesuega o le Afioga a le Atua. Afai e lē faaosofia e le suesuega le naunau o le tagata ma faaauau ai ona ia aʻoaʻoina se mea, e foliga mai la o le a faagesegese lona uunaiga ma taofia atoatoa ai. O le pogai lenei e tāua ai le sauniuni lelei mo vaega taitasi o le suesuega ma ia faia faatasi ma lena tagata patino i le mafaufau. E tofu a tagata taitoatasi ma manatu patino, talitonuga ma sini i le olaga. Ina ia uigā le suesuega, e ao ona fai faatatau i na mea. A o matauina e le tagata aogā o le suesuega i se auala totino, o le a faalaeiauina ai o ia e faaauau.
AUSIA ITUAIGA UMA O TAGATA
7 E ao ona faaalia pea le alofa faa-Kerisiano ma le uta mamao, pe a suesue ma tagata o isi faatuatuaga. Sa faamamafa e Paulo lena mea ina ua ia tusia: “Ia le aunoa a outou upu ma le alofa, ia faamāi i le masima, ia iloa e outou ona fai faatatau se tali i tagata e taitoatasi uma.” (Kolo. 4:6) I suesuega ma i latou o ituaiga eseese o tapuaiga a Kerisinetoma, e lelei ona iloa muamua po o le ā le mea o latou talitonu i ai ona faaaogā lea o se lomiga talafeagai po o se mataupu o se lomiga. O le iloaina o manaoga o le tagata o le ki lea i le manuia.—Faatusatusa Galuega 17:22, 23.
8 Ua manaomia faapitoa le uta mamao pe a feagai ma tagata mapo lotu. E lē manaomia ona osofaia fua o latou talitonuga ae na i lo lea ia faaaogā lelei felafolafoaiga ma i latou ma faaali ia i latou le mea o loo fai mai ai le Tusi Paia. O le a faalogo mai i le upu moni i latou moni o ē pei ni mamoe. Ia tatou faasaga e felafolafoai e pei ona valaaulia e le Tusi Paia: “O loo o faapea mai Ieova, O mai ia, ina tatou filifili ia.”—Isaia 1:18; 1 Pete. 3:15.
9 Taumafai e fesoasoani i tagata o tapuaiga eseese ia maua le poto i le Atua moni. Ia manatua a o tatou totō ma faasūsū, i le auiliiliga faaiʻu, o le Atua ‘o lē e mafai ona faatupuina pea le fatu o le upu moni’ pe a tusa ai ma le eleele.—1 Kori. 3:6, 7; Mata. 13:18-23.