Lototele e Faasalafa le Valaaulia i nā “Sau Ia!”
1 Ua faailogaina i mea tutupu faatopelau i le lalolagi aoao aso nei o “aso e gata ai.” (2 Timo. 3:1-5) O le faatupulaia o solitulafono, le lē mautonu o le tamaoaiga, atoa ma faamaʻi e faamataʻu ai le ola ua faaopoopo atu foi a latou omiga. Ae o se mea e fiafia ai, a o fesagaʻi ma na mala, ua faasalafa atu i tagata se valaaulia e faapea ona aafia ai lo latou ola e faavavau. O loo faaauau ona faapea mai le agaga ma le faatoanofotane: “Sau ia!” Ma ua auai nei se “motu o tagata e toatele” ma i latou i le faasalafaina atu o se valaaulia i tagata i so o se vaipanoa e o maia ma ave fua le vai o le ola.—Faaa. 7:9; 22:17.
2 I aso nei, ua tali atu ai i latou o loo galala mo le amiotonu i lenei valaaulia i se aofiaga tele. I le tausaga ua mavae na auai le faitau miliona i tauaofiaga itumalo sa usuia i le lalolagi aoao, ma toetoe lava sefulu miliona na auai i le Faamanatuga. E faitau miliona foi isi ua faaalia le talisapaia mo le sauniuniga a Ieova e ala i le faalogologo i le feau o le malo. Maeu la le tāua, o lo tatou faaaogāina ma le atamai o lo tatou taimi i le faasalafaina o lenei valaaulia i le lautele ma i lea fale ma lea fale!—Galu. 5:42; Efe. 5:15, 16.
FAIA SE SAO MA LE LOTOTELE
3 Sa sauaina uluai Kerisiano ona o la latou talaʻiga maelega. (Galu. 16:19-21; 17:2-8) Peitai, latou te leʻi faavaivai ai i a latou taumafaiga ma le lototele e folafola le tala lelei. E tatau foi ona faapena lo tatou lototele ma maumauai i a tatou taumafaiga ina ia talaʻia le tala lelei.
4 E oo foi i atunuu o loo taofia ai le galuega, o loo tofu sao ai ma le loto atoa uso i le galuega talaʻi e ui i sauaga ogoogo, e aofia ai le matuā aveesea o a latou galuega, fale, ma e oo foi i lo latou saolotoga. E aogā la latou faaaʻoaʻoga lelei e faalaeiau ai i tatou ia faaauau le valaaulia o isi i nā “Sau ia!”—2 Tesa. 3:9.
5 Ina ua maeʻa ona aʻoaʻoina le upu moni, mo le sili atu i le 35 tausaga sa tausisia pea e se tasi o tuafafine le faanaunauga i lona loto e paeonia. Na suia ona aiaiga ina ua 70 tausaga lona matua, ma avea ai o ia ma paeonia sauatoa. E ui ina toaitiiti tagata i lena matua o le a tauaveina se galuega fou, ae sa ia faia faapea. I le olioli ai nei i le faiva faataimi atoa mo ni nai tausaga, na ia faapea mai, “Ua faaleleia atili i aso taitasi.” Ua ia aumaia ai se faafouina faaleagaga i isi ona o le taliaina ma le lē fefe o le valaaulia a Ieova e aapa atu ma auai atoatoa i le auaunaga o le Malo.
6 E pei lava o le uluai senituri, ua faapea foi ona tali atu tagata i lenei valaaulia, ua liliu atu o latou manatu, fuataiina o latou mafaufau, ma tuuesea ai gaoioiga e lē faamamaluina ai le Atua. Ua oo ina avea i latou ma vaega o le au uso tuuina atu faavaomalo o Molimau ma auai ma le agaga ma le faatoanofotane i le faapea atu “Sau ia!” i isi tagata loto faamaoni.
7 O le faatelega anoanoai i le galuega o le Malo ma le faateteleina o ofisa o lala i atunuu eseese e fai ma faamaoniga o le faamanuiaga a Ieova. Ae ua utiuti se taimi o totoe mo lenei faiga tuai o mea. O le taimi avanoa la lenei e faaalia ai le lototele ma maelega i le faasalafaina o le valaaulia i nā “Sau ia!” ina ia mafai ai foi e isi ona vave tali atu ma gaoioi i mea ua latou faalogo i ai.—Galu. 20:26, 27; Roma 12:11.