Faataunuuina la Tatou Faiva o le Malo o ni Molimau a Ieova
1 I le avea o ni Molimau a Ieova ua ia i tatou se faaeaga silisili i le lalolagi. Ua fai i tatou ma suitulaga ia Ieova i se faamasinoga faalevateatea ua tuua ai i latou uma o ē ua tapuaia o ni atua i se tofotofoga. (Isaia 41:1, 23; 43:12) Ina ia fesoasoani la ia i tatou e fausia se puipuiga talafeagai o lo tatou faamoemoe, ua saunia ai e Ieova se faaputuga tusi matagofie o lomiga. (1 Pete. 3:15) O le Watch Tower Publicationa Index o se ki tāua lea i le sailia o faamatalaga tatou te manaomia. O le faamasani ma nisi o ona vaega autu o le a fesoasoani ia i tatou e tomai atili ai i lona faaaogāina.
2 E ao ia i tatou uma lava ona faamasani lelei ma le ulutala autū “Ieova.” I lalo o lena ulutala i le 1986-1989 Index, pe mafai ona e maua ai faamatalaga e faamatalaina ai le faatagaina faalētumau e Ieova o le amioleaga? O le a e maua foi, le ulutala ogatotonu “Suafa” i le 1930-1985 Index ma le Index o loo iai nei. O faamatalaga i mea uma ua lomia e uiga i le suafa o Ieova ua tuufaatasia i ina.
3 O se tasi ulutala e matuā tāua tele o “Molimau a Ieova.” Ua na aumaia faatasi faamatalaga e uiga i Molimau a Ieova o se faalapotopotoga. O ē silafia lo tatou manatu faale-Tusi Paia e faatatau i le poto auiluma, iloiloga o tino oti, fasiotia i le taumafai e puipuia, po o fesoasoani mo le lelei lautele? O le a e maua faamatalaga mo na fesili i lalo o le tamaʻi ulutala “uiga agaʻi—.” Faasolo ane ai le lisi o talaaga faaonaponei o Molimau a Ieova i atunuu eseese, ma se lisi tele o faamatalaga e uiga i Molimau a Ieova o loo maua i lalo o le ulutala ogatotonu “Faamatalaga mai Isi.”
4 E mafai ona sue faamatalaga i le faapefea ona faataunuuina e tagata o Ieova i aso nei la latou faiva o le Malo e ala i le faaaogāina o nisi o ulutala autū. I lalo o le ulutala “Aso,” o loo iai se ulutala ogatotonu “Faamalamalamaina o Talitonuga.” Ua lisiina faamatalaga mo le faamalamalamaga atoatoa o lo tatou malamalamaga i aʻoaʻoga, valoaga, ma ituaiga o faavaloaga i le faasologa mai o tausaga. Ona sosoo ai loa lea ma “Aso o Valoaga Iloga.” O tausaga ia na faataunuuina ai pe na amata faataunuuina ai valoaga po o ituaiga o valoaga.
5 O se puna o faalaelauga ma faatonuga mo i tatou tala i olaga o auauna faamaoni a Ieova. E mafai ona fesoasoani ia i tatou e faataatia ai se faavae mausali mo le lumanai ia tatou lava fanau ma a tatou tagata aʻoga o le Tusi Paia. O le a e maua nei tala i olaga ua lisiina i igoa totino ma ulutala o mataupu i lalo o “Tala i Olaga o Molimau a Ieova.”
6 O se mea e tutasi i tagata o Ieova o le aʻoaʻoga faale-Tusi Paia o taunuuga e lua mo i latou ua faamaonia e Ieova—o le tasi mo le lagi ma se tasi mo le lalolagi. O le ulutala autū tatou te maua i ai faamatalaga e uiga ia i latou o ē ua talia le “valaau mai le lagi” o le “Faapotopotoga a le Atua.” (Epe. 3:1; Galu. 20:28, N.W.; 1 Timo. 3:15, N.W.) O isi ulutala o le “Vaega Totoe” ma le “144,000.” O ulutala e lua, “Motu o Tagata e Toatele” ma “Isi Mamoe,” o vaega autū na o loo faasino atu i faamatalaga e feagaʻi ma i latou o ē o lo latou faamoemoe o le ola e faavavau i le lalolagi.—Faaa. 7:9; Ioane 10:16.
7 Pe tatou te laiti pe matutua, o le faaeaga o le avea ma se tasi o Molimau a Ieova e aafia ai vaega uma o le olaga. O le a faaalia i mataupu o La Tatou Faiva o le Malo i le lumanai pe mafai faapefea e le Index ona fesoasoani ia i tatou i la tatou faiva, i le faapotopotoga, i totonu o le aiga, ma i le fanua.