Vivii Atoatoa i le Suafa o le Atua
1 Maeu lo tatou olioli i le tele o faamanuiaga a Ieova! I atunuu e lima o loo i lalo o le Lala i Samoa i Sisifo, ua iai nisi o tumutumuga fou i tagata talaʻi, paeonia, ma suesuega faale-Tusi Paia i aiga, i lenei tausaga faaleauaunaga. Na iai foi se aofia lelei i le Faamanatuga e 1,819. E faitau selau tagata talaʻi na auai i se tauaofiaga faapitoa faavaoatumotu i Apia ia Tesema ua mavae, ma ua tatou maua uma foi ni aogā mai le fau ma soloi o taumafa faaleagaga sa saunia i polokalama matagofie o a tatou fonotaga matagaluega ma aso fono faapitoa. Ua tatou maua foi le tele o isi faamanuiaga.
2 E mafai faapefea ona tatou folasia lo tatou talisapaia mo nei mea uma ua faia mo i tatou e Ieova? E mafai ona tatou faia lenei e ala i le vivii atoatoa i le suafa o le Atua!—Sala. 145:21.
VIVII PEA I LE SUAFA O LE ATUA
3 E mafai faapefea ona tatou vivii atoatoa i le suafa o Ieova ia Aokuso? O le a faaauau pea ona tatou faatomuaina polosiua e pei o ni mekasini. E ala i le tinoū e sauniuni ma tauaveina ma i tatou i le auaunaga i le fanua polosiua Olioli i Le Ola i Le Lalolagi e Faavavau! ma O le Malo o le a na Aumaia le Parataiso, o le a faaauupegaina ai i tatou e vivii ia Ieova ma mafai ai ona fesoasoani i isi e aʻoaʻoina le auala e mafai ai foi e i latou ona vivii atu ia te ia.
4 O le Mataupu mo Talanoaga o “Le Lalolagi Fou—Mai ia te Ai?” E mafai ona tatou sauniunia ni faatomuga talafeagai e faavae i faamatalaga i itulau e 9-15 o le tusi Reasoning. O le a nofo sauni nisi tagata o aiga e talanoaina ma oe mea ua fai mai ai taʻitaʻi o le lalolagi e uiga i faamoemoega i le taimi nei mo le faaleleia atili o le lalolagi. E ui ina moomoo le toatele o tagata mo ni tulaga filemu, ae ua faaalia i le Ieremia 10:23 faapea e lē mafai ona foia e le tagata ona lava faafitauli. O se mea mautinoa le iloa faapea, o le folafolaga a le Atua e faia se mea e uiga i tulaga o le lalolagi i aso nei o le a lē mafai ona lē taulau. O loo maua lenei folafolaga i le 2 Peteru 3:13. Afai e foliga mai e naunau moni lē ona le fale, ofo i ai se polosiua talafeagai.
SAUNIUNI LELEI
5 E matuā manaomia ni sauniuniga pe afai tatou te fia uigā i le aʻoaʻoina o isi. Aiseā e lē sauniuni faatasi ai ma isi sui o le aiga, ma lē na ia aʻoaʻoina oe i le upu moni, po o se tasi i lau vaega o suesuega tau tusi? I le muai faaaʻoaʻoina o lau taulimaga, o le a e lagona atili ai le mautinoa ma faaalia ai le maumauai totino pe a talanoa ma tagata i le oganuu.
6 E ao i a tatou taulimaga ona atagia atu ai lo tatou naunau i tagata. Faamamafa le folafolaga a le Tusi Paia e uiga i se lalolagi fou na te ofoina mai se faamoemoe i ē lotomomomo ma lotovaivai. A talia e lē ona le fale le polosiua, e mafai ona e faataʻitaʻia i ai la tatou polokalama tau suesuega faale-Tusi Paia. Pe atonu foi e te filifili e sili atu ai ona talafeagai le faia faapea i se toe asiga.
7 A o tatou tu lata atu i le iʻuga o lenei tausaga faaleauaunaga tāua, maeu se olioli i le avea ma ē e talitalia le tele nauā o faamanuiaga mai ia Ieova! Talosia ia faaaogā e i tatou uma lava lenei toe masina o le tausaga faaleauaunaga 1991 e vivii atoatoa ai i le suafa o Ieova a o tatou tepa taulaʻi atu ma le naunautai e auauna e faavavau ia Ieova i lana lalolagi fou.