Faalaeiau le Tuliloaina o Sini Faaleagaga
1 Sa leʻi faapea muamua le toatele nauā o tagata talavou ua auai i le talaʻia o le tala lelei o le Malo! E faitau sefulu afe i latou ua talia le fautuaga i le Failauga 12:1: “Ia e manatua le na faia oe i ona po o lou taulealea.” O le ā ua uunaia ai nei talavou ina ia auai e lē aunoa i le faiva, ma aiseā ua toatele nauā ai i latou ua auai i le auaunaga faapaeonia?
2 E lē taumatea o le toatele o i latou ua faataʻitaʻi i le amio a le talavou iloga o Timoteo. Sa aʻoaʻoina o ia e lona tinā ma le tinā o lona tinā a o tamaitiiti i le aogā o aʻoaʻoga faaleagaga ma faalaeiauina ai o ia e tuliloaina ni sini faaleagaga. (2 Timo. 3:14, 15) O lea, ina ua aliaʻe se avanoa mo ni faaeaga faaopoopo i le auaunaga, sa agavaa o ia ma ua sauni e talia.—Galu. 16:1-3.
3 E mafai faapefea ona faalaeiauina le toatele o talavou e tuliloaina ni sini faaleagaga? O le ā le ituaiga o faavae e tatau ona faataatia? E mafai faapefea e mātua ona atiina aʻe i a latou fanau le talisapaia mo le upu moni ma ia fesoasoani ia i latou e faataatitia ni sini mo se taimi umi?
4 Faataatia se Faavae Faale-Tusi Paia: E tatau i mātua ona faamautinoa, o mea ua latou aʻoaʻoina ai a latou fanau e mai ia Ieova, ina ia mafai ai e a latou fanau ona maua le poto “e iu ai i le ola.” (2 Timo. 3:15) Ia taumafai ma le tinoū e atiina aʻe ia i latou se alofa loloto mo le Afioga a le Atua, le Tusi Paia. E manaomia ai i lenei mea, se suesuega uigā o le Tusi Paia e faatatau i o latou manaoga, faatasi ma le auai e lē aunoa i sauniga. Ina ia maua e talavou se faatuatua malosi e faapea ona uunaia ai i latou e tuliloaina ni sini faaleagaga, e tatau ona iai sa latou lava polokalama o suesuega totino ma ia atiina aʻe sa latou lava faiā ma Ieova.—1 Tesa. 5:21; Epe. 11:1.
5 O le a sili atu ona sauniuni talavou Kerisiano e tuliloaina manaoga faaleagaga pe afai e faataatitia e o latou mātua atoa ma isi tagata taʻumatuaina i le faapotopotoga se faaaʻoaʻoga lelei ma matuā folasia ai le “fiafia ia Ieova.” (Nee. 8:10) E ala i le faaalia o le fiafia, e mafai ai e i tatou uma lava ona fesoasoani atu i ē talavou e talisapaia faapea, e lē mamafa nauā mea ua manaomia e le Faa-Kerisiano moni.—1 Ioane 5:3.
6 E toatele talavou ua matuā taaʻina lava e paeonia, o misionare, ma ovasia femalagaai o ē sa galulue ma i latou i le auaunaga i le fanua po o ē foi sa ofoina atu se faalaeiauga ia i latou. E mafai e mātua ona fesoasoani atu e ala i le valaauliaina i o latou aiga, o ē galulue faataimi atoa e lelei a latou faaaʻoaʻoga mo se ʻaiga o le afiafi pe i isi taimi mo se mafutaga faa-Kerisiano. Ua saunia e Iesu Keriso se faaaʻoaʻoga e sili ona lelei i le paleni o le uaʻi atu i ē talavou.—Mare. 10:13-16.
7 Faataatitiaina o Sini: Faatasi ma le taʻitaʻiga lelei a mātua, ua masani ai ona faataatitia e le fanau ni sini faaleagaga a o laiti. O le taimi lava e filifilia ai e talavou ni sini aogā faaleagaga ua latou mananao e ausia, pe auauna faapaeonia, auauna i mea o loo manaomia tele ai le fesoasoani, auaunaga i Peteli po o le faamisionare, faapea ma isi, e mafai loa e mātua atoa ma isi ona faalaeiau mafana ia i latou ina ia faaauau pea ona galulue i o latou sini, e ala i le saunia o ni faufautuaga aogā e faagaee atili ai i latou.
8 Ua faatusaina faapotopotoga taitasi i se aiga. O lea e ao ai ia i tatou taitoatasi ona naunau e fesoasoani atu i ē talavou ina ia faaauau pea ona savavali i le upu moni ma ia agaʻigaʻi i luma faaleagaga. E mafai ona tatou faia lenei mea e ala i le faamautinoa atu o lo tatou alofa mo i latou ma le faalaeiauina o i latou e tuliloaina ni sini faaleagaga.