Se Tusi Fou ua Faagaeetia ai le Faitau Miliona

O SE tasi o vala autū o Tauaofiaga o “Ē Alolofa i le Saolotoga” ia na amata ia Iuni o le tausaga na teʻa nei o le lauga “Le Tagata Silisili o Ē Uma na Soifua Mai.” O lona faauluuluga o le tatalaina mai lea o le tusi ua faaulutalaina i lena lava matua. E silia i le ono miliona tagata i le lalolagi aoao na auai atu i le faasologa o nei tauaofiaga na latou faalogologo ai i le lauga, lea o loo toe suia laitiiti i mataupu e lua na faatoʻā mavae atu o lenei mekasini.

E silia i le 12 miliona kopi o le tusi The Greatest Man Who Ever Lived ua lolomia i ni gagana e 60. Ua maua foi i gagana Albania, Croatia, Hagakeri, Maketonia, Polani, Rusia, Serbia, ma le Slovenia i Europa i Sasae. Ae na sili ai le fiafia o le silia i le 74,000 o i latou na auai i tauaofiaga e fitu i le Soviet Union i le mauaina o lea tusi i le gagana Rusia.

Le Amataga o le Tusi

O mataupu o loo i le tusi na uluai faaalia faasolosolo mai e lē motusia i lomiga e 149 o Le Olomatamata, e amata mai i le lomiga o Novema 1, 1985. E toatele tagata faitau na faapea mai sa latou faanoanoa ina ua faaiʻuina le faasologa i le lomiga o Oketopa 1, 1991. Na maligi loimata o Melissa, o se teineitiiti Italia e 12 ona tausaga, ina ua ia faitauina le tala mulimuli i Le Olomatamata. Na fai mai o ia: “I le po a o lumanai la matou tauaofiaga, sa ou tatalo ai ia Ieova ou te manao i se tusi e uiga i le soifuaga o Iesu. Ina ua tatalaina mai le tusi, sa ou matuā patipati seia oo lava ina ua pepē oʻu lima e patipati.”

O mataupu ia sa faasolosolo mai i Le Olomatamata na faatonutonu ma faamaopoopoina i se tusi fou e 448 ona itulau, e 133 mataupu ua matagofie ona faamatalaina i ata. O se taumafaiga tele na fai ina ia faamatala mai ai lauga uma na fai e Iesu ma mea uma ua faamauina na tutupu i lona soifuaga faalelalolagi, e aofia ai ana tala faatusa ma vavega uma. Na faia se taumafaiga tele, ina ia faamatalatala mai mea uma na tutupu i le faasologa saʻo o taimi na tutupu ai. I le faaiʻuga o mataupu taitasi, o loo iai se lisi o mau o le Tusi Paia, na o loo faavae mai ai le mataupu.

Atonu e mafaufau se tasi, ‘E tusa lava la ua uma ona ou faitauina le tusi auā o lea sa ou faitauina le faasologa mai i Le Olomatamata.’ Peitai na maua e tagata faitau o Le Olomatamata faamatalaga i le soifuaga o Iesu i ni vaevaega laiti sa aumai i mataupu na faaalia mai i le taʻilua vaiaso i se vaitaimi e silia i le ono tausaga. E ui sa aogā na mataupu a o faasolosolo mai, ae seʻi vaai faalemafaufau i le faagaeetia o le faitauina o se tala atoa lava i sina taimi puupuu ma maua ai le ata atoa o le tagata silisili na soifua mai!

E Faamalosia ai le Faatuatua

Ua lipotia mai e se fafine mai Washington, D.C., i le Iunaite Setete faapea: “E na o le lua vaiaso na ou faitauina uma ai le lomiga. A o oʻu faitau, sa maligi oʻu loimata. O nisi taimi e tuu ai laʻu faitau ae ou tatalo ma tagi. Na oo ia te aʻu se lagona e pei lava o lea sa ou iai faatasi i inā ma Iesu, ma puapuaga faatasi ma ia. E oo ina ua mavae le vaiaso talu ona uma loʻu faitauina o le tusi, ae sa maligiligi lava oʻu loimata pe a ou mafaufau i mea na ou faitau i ai. Ua ou lagona ai loʻu mafana atili atu ia Ieova ona o lona foaiina mai o lona Alo.”

Na tusi mai se fafine mai Pittsburgh, Pennsylvania, i le Iunaite Setete e faapea: “O le asō na uma ai ona ou faitauina le tusi e uiga ia Iesu. E ese le matagofie. Sa maligi oʻu loimata a o oʻu faitauina mataupu faaiʻuiʻu. E manaia tele le faitau atoa o le tusi i le taimi lava e tasi. Ua tau lē mafai ona ou faamatalaina oʻu lagona mo le tusi—na pau le mea e mafai ona ou faamatala atu, ou te matuā fiafia lava i ai!”

O ata matagofie i le tusi e faagaee ai lagona o se tasi, e pei ona fai mai ai se tasi tagata faitau loto talisapaia: “E oo ai ia te aʻu se faalogona e toetoe lava mafai ona ou lagona atu lo latou fetagisi i se tamaitiiti ua oti (mataupu e 47) po o lo tatou iloa foi o mea sa mafaufau i ai Iesu ina ua paʻi atu ia te ia le fafine na iai le punatoto ma malōlō ai (mataupu e 46). E matuā moni lava mea o loo faaalia mai i o latou foliga, e tiga faatasi ma i latou. . . . Na i lo le pei o se tiute le faitauina o lenei tusi, ae ua pei o se faafiafiaga po o se faainu pe a maeʻa aʻu galuega o le aso. O le manatunatu i uiga ma faalogona o loo tusia i le tusi e lē gata ina taʻu maia ia i tatou mea na fai e Iesu, ae ua aumaia ai foi sina ata itiiti o ona mafaufauga ma ona faalogona.”

Aogā Eseese

E toatele ua latou amata ona faaaogā le tusi i suesuega faale-Tusi Paia a o latou aiga. Ua tusi mai se isi ulugalii mai Silverton, Oregon, i le Iunaite Setete: “E toatolu la ma fanau laiti, ma ua matuā talafeagai lelei lenei tusi mo a matou ‘suesuega faaleaiga i po uma.’ Ioe, maeu le talafeagai ona tatou suesueina maeʻaeʻa le talaaga o lo tatou Tupu agaalofa, o Keriso Iesu.”

Ua faamatala mai e se teine talavou mai Iapani: “E faitau mai e lo matou tamā ia i matou a o matou malōlō ina ua maeʻa la matou ʻaiga o le afiafi. O loo amata mai i le amataga ona matou faitauina faatasi o se aiga, ae na ou filifili i po taitasi ae ou te leʻi moe ou te faitauina ai se mataupu e tasi e amata mai i mataupu faaiʻu. Peitai, e ese le faagauloto o le tusi e masani ai lava ona ta le tasi i le vaveao ae faatoʻā ou manatuaina le taimi ua oo i ai.”

E ofo le toatele i le tele o auiliiliga o loo iai i tala. Na tusi mai se tasi tuafafine Molimau: “E tele mea na ou aʻoaʻoina, ou leʻi iloa.” Na taʻua faapea i se tusi mai Kalefonia, i le Iunaite Setete: “Ua silia i le 35 tausaga o ma iai ma laʻu avā i le upu moni, ae ma te taʻutino atu ma te leʻi maua lava muamua se lomiga e faapea sona matuā faagaeetia ai e pei o lenei lomiga.”

Ua ao ona soloia e le tusi le pepelo faapea e lē talitonu Molimau a Ieova ia Iesu. O le faaupuga lenei a se tasi o tagata faitau e loto faafetai: “Ua lē mafai ona ou toe tuuesea le tusi, auā o se faasaʻoga sili lea i le valea o ē ua faapea mai, o tagata o Ieova latou te lē talitonu ma latou lē faamamaluina Iesu Keriso. E na o le pau lava le mea tatou te faia nei o le tuu atu ia i latou o lenei tali i lo latou valea.”

E mautinoa lava le iai o se vaega tāua a lenei tusi i le faiva a Molimau a Ieova. Na tusi mai faapea se tasi o tuafafine Molimau: “Na ou tuuina atu se kopi o lenei tusi i se fafine na faia se ma suesuega faale-Tusi Paia, ma na pei o se vavega le suiga na oo ai ia te ia. Ua atoa le tausaga o ma suesue, ae sa iai ni faigata a o oʻu taumafai e faalaeiau o ia ina ia auai i sauniga.” Ina ua uma ona faitauina e le tagata aʻoga mataupu e 45 o le tusi fou, na faamatala mai le Molimau, “na fai mai le fafine ia te aʻu o le a auai atu i le sauniga i le Aso Sa auā ua oo i le taimi mo ia e fai ai sana gaoioiga.”

Vala Tāua

O le iʻuga, ua tuuina mai e le The Greatest Man Who Ever Lived se faamatalaga o Evagelia. Ua aumaia ai faamalamalamaga o le tele o mea na fetalai ma aʻoaʻoina e Iesu, e ao ai la ona faaaogā le tusi e fai ma meafaigaluega aogā mo suesuega, auā o loo matuā pipii atu i faamatalaga a le Tusi Paia.

O le vala e sili ona matagofie, ona o mea uma lava o loo faamatala mai i se faasologa saʻo o taimi o mea na tutupu. I le na o le susueina lava o itulau a o mafaufau i lenei mea ua avea o se fesoasoani moni i le matauliaina po o ā taimi na tutupu ai mea taitasi i le gasologa o le faiva a Iesu. E masani lava ona taʻua e nisi o ē faitau i Evagelia ni mea ua manatu i ai e feteenai. Ae i le tusi fou, na i lo le toe tataʻi atu o manatu i na mea, ua ia lagolagoina e ala i ona tala o loo iai.

I le avea o ni Kerisiano, e mautinoa le lē tatau ona tatou mananao e lafoaia se suesuega maeʻaeʻa o le soifuaga o lo tatou Faaaʻoaʻo faamaoni, o Iesu Keriso. O le mea lea, seʻi o tatou iloiloina totoʻa ai tala a Evagelia faatasi ma le fesoasoani a le tusi fou The Greatest Man Who Ever Lived.