Le Tagata Silisili o Ē Uma na Soifua Mai
1 Ina ua tatou mauaina lenei tusi fou, sa faafiafiaina i tatou i lona ulutala, The Greatest Man Who Ever Lived. O le faaesea mai o se tagata e toatasi e avea ma lē e silisili, o lona uiga ua maualuga atu o ia i le faitau piliona o tagata o ē o loo ola i lenei lalolagi. Ua faauigaina le upu “sili” i se mea e “maoaʻe i lona uiga po o lona aogā.” O le tagata ua agavaa mo lena tofiga e mautinoa e tatau ona tulaga ese!
2 Ua alagātatau atoatoa lena tofiga ia Iesu Keriso, le Alo o le Atua. O le mea na ia ausiaina i le lalolagi, sa leai sona sootaga ma ʻoa, ausiaga masani, po o pulega faapolotiki. Sa tupuga mai o ia i se talaaga faatauvaa ma na faaaluina le tele o lona soifuaga i mea e faigata ona iloa. Peitai, ina ua 30 tausaga o lona soifua, na ia taaʻina ai manatu o tagata uma lava i le nuu o Palesitina e ala i mea na ia fetalai i ai ma faia. Na ia faaalia mai uiga ma fuafuaga a Ieova le Atua i se auala sa leʻi faapea ona faia muamua e se tagata. Na ia faataunuuina le galuega talaʻi silisili e aunoa ma se tagata e toatasi na faia muamua, faatinoina vavega uigaese, ma faataatia le faavae mo se sosaiete o le lalolagi fou.
3 Le Manaoga mo Lenei Tusi: Na uunaia i tatou e Paulo ina ia ‘vaai totoʻa’ atu ia Iesu o so tatou faaaʻoaʻo ma o se faataʻitaʻiga tau i matafaioi. (Epe. 12:2) Mai le 1985 e oo i le 1991, na lomia ai e le Sosaiete i Le Olomatamata faa-Peretania mataupu faasolosolo e 149 e uiga i le soifuaga ma le faiva a Iesu. O ia mataupu ua faapogaia atili ai i tatou uma ina ia naunau i mea na fetalai i ai Iesu atoa ma mea na ia faia mo i tatou. Ua faamamafaina ai le manaoga mo i tatou ina ia faataʻitaʻi i lana faaaʻoaʻoga. O nei mataupu uma ua faapupuuina ma ua aumaia ia i tatou i se tusi. Maeu se mea faigaluega matagofie e fesoasoani ai i isi ina ia vaai totoʻa atu ia Iesu ma avea ai ma tagatānuu a lē ua tofia e Ieova “e silisili lava i alii sili uma, ma faipule, ma e ua malolosi ma alii”!—Efe. 1:21.
4 Vala Matilatila: Pe a ofoina le tusi, atonu e te fesili atu: “Aiseā ua avea ai Iesu ma tagata silisili o le lalolagi?” E mafai ona e taliina lena i le faasino atu i nisi o mataupu e 133 o loo taulaʻi i lona soifuaga, ona uiga, ana aʻoaʻoga, ma ana galuega. O loo faamatalaina e le mataupu e 24 lana fuafuaga ina ua afio mai i le lalolagi. Ua autaluina i le mataupu e 35 lana Lauga taʻutaʻua i le Mauga. O loo faamatilatila e le mataupu e 43 le tomai uigaese o Iesu i le aʻoaʻoina o isi e ala i faataoto. Ua aumaia e le mataupu e 133 se ata puupuu o faamanuiaga o le a olioli ai le fanau a tagata pe a ia faamaeʻaina lana galuega. Atonu o le a e iloa le matuā aogā o le faaaogāina o fesili i le faaiʻuga o mataupu taitasi e faagaee ai se talanoaga; ua faaalia i faamaumauga o mau sii le mea e mafai ona maua ai le tala i le Tusi Paia. E mafai ona e faasino atu i faataoto tuusaʻo o loo faaalia ai le malosi o uiga o Iesu, le loloto o lona alofa mutimutivale mo isi, ma lona maelega e lē mafai ona vaivai i le talaʻiga. (Ia matau foi mataupu 44, 95, 117, ma le 123). Afai o e faaaogāina le ofo e sui aʻi o Laʻu Tusi o Tala o Le Tusi Paia, ia filifilia ni manatu mai le Vaega 6 o loo feagai ma mea tutupu i le soifuaga o Iesu.
5 O le a tatou ofoina lenei tusi fou ia Tesema. Ua aumaia e ona vaega tutasi ia i tatou ni mafuaaga lelei e avatu ai ma ofo atu i isi ma le maelega tele. O i latou uma o ē mananao i le ola e faavavau e tatau ona ave i fale le poto e uiga ia Iesu Keriso. (Ioane 17:3) O a tatou taumafaiga maelega ina ia tufatufaina lenei tusi e mafai ai ona pāʻia e le tagata silisili o ē na soifua mai, ola o le toatele o ē loto faamaoni.