Ia Iai se Agaga Faataulagaina Totino!

O ROLFa o se tagata faigaluega manaomia tele. Ina ua ia filifili ina ia faia se galuega faavaitaimi ina ia mafai ai ona faateleina le faia o sona sao i le faiva faa-Kerisiano, sa nofo sauni lava lona pule e lagolagosua. O le mea lea, sa mafai ai ona olioli Rolf i le auaunaga faapaeonia mo le tele o tausaga. E ui i lea, i se tasi aso, sa suia ai le tulaga o le galuega. Ona sa faamaonia le tomai o Rolf i lana galuega, o lea sa ofoina atu ai ia te ia le tulaga o le pule i fefaatauaiga a le kamupani. O le galuega, sa aofia faatasi ai se totogi tele ma ni faamoemoega lelei mo le agaʻigaʻi atili i luma. Ae peitai, o le a lē toe mafai ona faia se galuega faavaitaimi.

O Rolf e iai lana avā ma se fanau e toalua e ao ona tausia, ma o le a aogā tele lava lenei tupe faaopoopo. Ae peitai, sa ia teena le ofo ma talosaga mo se isi galuega, o se galuega e faatagaina ai o ia e faafetaiaia uma ona manaoga faaleagaga ma tulaga tau tupe. Sa matuā ofo lava le pule o Rolf i lana filifiliga. I le iloa faapea e oo lava i se ofo mo se totogi maualuga o le a lē aogā, ona faapea atu loa lea o lona pule: “Ua ou iloa e lē mafai ona ou faatavā i lou talitonuga.”

Ioe, sa iai le talitonuga o Rolf. Ae sa iai foi ma se isi ona uiga—o le agaga o le faataulagaina totino. O se agaga faapena e seāseā lava ona maua i lo tatou lalolagi manao tele mo lona lava lelei totino. Ae e mafai ona taʻitaʻiina atu ai i le ala i le ola e aogā ma faamalieina ai. O le ā le agaga o le faataulagaina totino? O le ā o aofia ai? Ma o le ā e tatau ona tatou faia ina ia maua ai lea agaga?

O se Mea e Manaomia Mai le Tusi Paia

O le faataulagaina o lona uiga o le siilima po o le faamatuu atu o se mea tāua. O le faataulagaina o se vaega lea o le tapuaiga mamā talu ona ofoina atu e le uluai molimau faamaoni, o Apelu, “‘uluai tama a lona lafu” e fai ma taulaga i le Atua. (Kenese 4:4) O tagata faatuatua e pei o Noa ma Iakopo, sa mulimulituʻi ai i lena mea. (Kenese 8:20; 31:54) O taulaga i manu sa o se vala tāua foi lea o le Tulafono faa-Mose. (Levitiko 1:2-4) E ui i lea, sa apoapoaia tagata tapuai i lena Tulafono ina ia ofo atu a latou mea silisili ona lelei. Sa lē faatagaina i latou e ofo atu so o se manu maʻi e fai ma taulaga. (Levitiko 22:19, 20; Teuteronome 15:21) Ina ua solia e Isaraelu aposetate lenei tulafono, sa aʻoaʻia i latou e le Atua, i lona fetalai atu: “A outou aumai le mea pipili [mo le taulaga, ona outou fai mai lea]: ‘E lē leaga.’ Seʻi avatu ia faamolemole, i lou pule. Pe fiafia mai ea o ia ia te oe, pe talia fiafia mai ea oe e ia? . . . Pe ou te fiafia ea i se taulaga ai o outou lima?”—Malaki 1:8, 13, NW.

O le mataupu silisili o le taulaga sa faaauau pea ona faia i le tapuaiga faa-Kerisiano. Ae peitai, talu ai ona ua uma ona totogia e Keriso le tau atoatoa o le togiola, ua lē o toe talia ai e le Atua taulaga i manu. O lea, o le ā e mafai e Kerisiano ona avatu e fai ma taulaga e taliaina? Ua tusia e Paulo i le Roma 12:1 (NW): “O lenei, le au uso e, ou te aioi atu ia te outou, ona o le alofa mutimutivale o le Atua, ina ia tuuina atu o outou tino i le Atua, o le taulaga ola, e paia, ma le mālie, o se auaunaga paia faatasi ma le malosi o outou mafaufau.” Maeu se suiga e faateʻia ai! Na i lo o le faataulagaina o tino mamate (o manu), sa tatau ona avea Kerisiano ma taulaga ola—o lo latou malosi, alā manuia, ma tomai. Ma e pei ona sa faia i Isaraelu, o le a lē talia ai e Ieova ni taulaga i mea “pipili,” po o ni tagata faalotolotolua. Ua ia manaomia faapea e avatu e ona tagata tapuai ia te ia le mea sili ona lelei latou te mafaia, o lona uiga ia latou auauna ia te ia ma o latou loto atoa, solu, mafaufau ma le malosi.—Mareko 12:30.

O lea o se agaga faataulagaina ua aafia ai e sili mamao atu na i lo o le na ona pipii atu o se tasi i se faasologa mo sauniga ma gaoioiga i le faiva faa-Kerisiano. O lona uiga o le maumauai i le faia o le finagalo o le Atua e tusa lava po o le ā le tau. O lona uiga o le nofo sauni e tigaina i faigata ma mea e lē talafeagai. “Ai se tasi e fia mulimuli mai ia te au,” na fetalai ai Iesu, “aua neʻi usiusitai o ia ia te ia, a ia ave e ia lona satauro, i le mulimuli mai ai [pea] ia te au.” (Mataio 16:24) E lē faia e se Kerisiano ona lava faanaunauga fiasili po o ni sini manao tele i mea faitino, o ni mea e faamuamua i lona olaga. E faaautū lona olaga i le muai sailia o le Malo o le Atua ma Lana amiotonu. (Mataio 6:33) Afai e tatau ai, e nofo sauni o ia e ʻave lona satauro,’ e puapuagatia i sauaga, i le faalumaina, pe oo lava i le oti!

O Faamanuiaga e Sau Mai le Faataulagaina Totino

I le feagai ai ma na tulaga matuiā, atonu o le a tau mānatu ai se tasi e tusa ai ma tulaga masani, pe aogā ai le faataulagaina totino. Mo i latou o ē alolofa ia Ieova le Atua ma mananao e vaai atu ua faamamaluina lona suafa, o le mea moni lava e faapena. (Mataio 22:37) Seʻi manatu i faaaʻoaʻoga lelei atoatoa na faataatia e Iesu Keriso. Muamua lava a o leʻi afio mai i le lalolagi, sa ia olioli i se tulaga maualuga i le lagi e avea o se meafaiola agaga. Ae peitai, e pei ona ia taʻu atu i ona soʻo, sa ia sailia ‘e lē o lona lava loto, ae o le finagalo o le Atua, o lē na auina mai o ia.’ (Ioane 5:30) O lea, sa ia lotomalie e “faamaulalo e ia ia te ia, ua uiga o ia faatasi ma le pologa, ina ua faia o ia faapei o se tagata; na iloa foi o ia ua tino mai i le tagata, ua faamaulalo e ia ia te ia, ua na anaana ua oo ina maliu, o le maliu lea i le satauro.”—Filipi 2:7, 8.

O taulaga faapena sa faamaonia le fua mai. Talu ai sa finagalo malie Iesu ‘e tuuina atu lona solu e fai ma sui o ana uo,’ ua mafai ai ona ia totogia le tau o le togiola, ina ia mafai ai e tagata lē lelei atoatoa ona maua a lē o le ola e lē mafai ona oti i le lagi, ia po o le ola e faavavau i le lalolagi. (Ioane 3:16; 15:13; 1 Ioane 2:2) E ala i le tausia atoatoa o lona faamaoni, na ia faapogaia ai ona viia i se tulaga sili ona maualuga le suafa o Ieova. (Faataoto 27:11) E lētioa ona faamanuiaina o ia e Ieova ona o lona ala faataulagaina totino! “Ua matuā faaeaina ai o ia e le Atua, ma foaiina atu ai ia te ia o le suafa e silisili i suafa uma lava.”—Filipi 2:9.

E moni, o Iesu o le Alo pele e toatasi o le Atua. Pe tauia foi la e le Atua isi o ē faia taulaga ia te ia? Ioe, ma ua faaalia lenei e ala i le tele o faaaʻoaʻoga i aso anamua atoa ma aso nei. Manatu i le faamatalaga a le Tusi Paia e uiga ia Ruta le fafine Moapi. E foliga mai na ia aʻoaʻo e uiga ia Ieova e ala i lana tane Isaraelu. Ina ua maliu o ia, sa tatau ai ia Ruta ona ia faia se filifiliga. Pe o le a ia nofo pea i le nuu faapaupau na ia fanau ai, po o le a ia malaga atu i le Nuu Folafolaina faatasi ma Naomi le tinā ua matua o lana tane? Sa filifili e Ruta le laasaga mulimuli, e ui lava ina faataulagaina ai le toe faatasi atu i ona mātua po o le toe faaipoipo foi. Ae peitai, ua oo ina iloa e Ruta Ieova, ma o le faanaunauga ina ia tapuai atu ia te ia faatasi ma ona tagata filifilia na uunaia ai o ia e pipii atu ia Naomi.

Pe sa tauia ea Ruta ona o lena faataulagaina totino? O le mea moni, sa tauia o ia! I le taimi lea, na ave ai o ia e se tagata e pule i fanua e igoa ia Poasa ma fai ma ana avā, ona avea ai lea o Ruta ma tinā o se tama na faaigoaina ia Opeta, lea na avea ai o ia [Ruta] ma tupuga o Iesu Keriso.—Mataio 1:5, 16.

Sa faapena foi ona avea faamanuiaga ma mea e olioli ai auauna faataulagaina totino a le Atua i aso nei. Mo se faaaʻoaʻoga, i le 1923, na tuua ai e William R. Brown, o lē sa lauiloa o “Bible” Brown, lona aiga i Initia i Sisifo ina ia taʻimua i le galuega i Aferika i Sisifo. Sa ō faatasi ma ia lona faletua ma lona afafine. Sa mulimuli ane siitia atu o ia i Nigeria, i inā sa faatoʻā amata ai ona fua mai le galuega talaʻi. Faatasi ma se tagata uliuli mai Amerika e igoa ia Vincent Samuels ma se tasi Molimau mai Initia i Sisifo e igoa ia Claude Brown, sa faia ai e “Bible” Brown se vaega tāua i le tau amatamataga o le galuega i Aferika i Sisifo.

I aso nei, e sili atu i le 187,000 le au talaʻi o loo auauna i Sierra Leone, Liperia, Ghana, ma Nigeria, o oganuu na sa āsā e “Bible” Brown ma ana aumea. A o leʻi maliu o ia i le 1967, sa faapea mai “Bible” Brown: “Maeu le olioli i le vaai atu i tane ma fafine ua oo ina gauai i le tala lelei o le Malo o le Atua!” Ioe, sa matuā tele ona faamanuiaga ona o lona ala faataulagaina totino.

Auala e Faataulaga Totino Ai

O ā nisi o auala e mafai ai ona tatou faaalia lea lava agaga i aso nei? O le tasi o le fai lea o se sao faalevaiaso i le faiva i lea fale ma lea fale. (Galuega 20:20) O le faia faapea, ae maise lava ina ua uma se vaiaso ua vaivai i se galuega masani, atonu e lē faigofie. Atonu e manaomia ai le aʻoaʻiina ma se faasologa lelei. Ae o le olioli o le a aveesea ai ni tulaga faalēlelei na pagatia ai. Ioe, e ono mafai ona e maua le faaeaga o le fesoasoani atu i se isi e avea ma “tusi a Keriso . . . e lei tusia i le vaitusi, a o le Agaga o le Atua soifua; ua le tusia i papatusi maa, a o papatusi aano o le loto.”—2 Korinito 3:3.

E ala i le faaeteete e “faaaogaina . . . aso o lenei olaga,” atonu i galuega masani po o faafiafiaga, ua mafai ai e nisi ona faateleina le faia o so latou sao i le galuega talaʻi. (Efeso 5:16) E toatele ua faatulagaina a latou faasologa ina ia mafai ai ona olioli i le auaunaga o le paeonia lagolago, a itiiti mai o le faatasi i le tausaga. O isi ua mafai ona paeonia lagolago faifai pea po o le auauna foi o ni paeonia faasauatoa. O le isi faataulagaina e ao ona manatunatu i ai, o le siitia atu lea i vaipanoa o manaomia ai nisi tagata talaʻi o le Malo. O lenei mea e masani lava ona aofia ai ni suiga tetele i auala o o latou olaga, i le onosaia o mea lē talafeagai, faia o ni fetuutuunaiga faatatau i tu ma aganuu fou. Ae o faamanuiaga o le faia atoatoa o se sao i le fesoasoani atu i isi e maua le ola, ua aogā ai le faia o na taulaga.

Sa iloa e John Cutforth lava ia o lē na fanau i Kanata lenei mea. Ina ua uma lona faauuga mai le Aʻoga Faale-Tusi Paia a le Olomatamata o Kiliata, sa tofia loa o ia e avea o se misionare i Ausetalia. “Pagā le mamao mai le aiga!” na manatua ai e Uso Cutforth. “Pe faamata e mafai ona ou toe foi i Kanata seʻi toe vaai i oʻu mātua ma aʻu uo a o leʻi oo mai Amaketo? E na o le pau lava le auala e mafai ai ona iloa o le alu i ai.” Sa alu Uso Cutforth, ma sa leʻi faanoanoa o ia ona o taulaga na ia faia. I tausaga mulimuli ane, sa ia taʻimua foi i le galuega molimau atu i Papua Niu Kini, o i inā o loo ia auauna ai pea ma le maelega, i le faaiʻuina o le 50 tausaga o le auaunaga faataimi atoa. Na ia faapea mai i se tasi taimi: “O le saili pea e mulimuli i le taʻitaʻiga a Ieova, i le talia o so o se tofiga ua ia silafia ua talafeagai ona tuuina mai, e aumaia ai le olioli, fiafia, lotomalie ma le lē mafaitaulia o uo e maua.”

E moni, o tulaga e pei o le soifua malōlōina, tulaga tau tupe, ma tiute tauave faaleaiga e ono mafai ona faatapulaaina ai mea e mafai ona e faia; e lē mafai e tagata uma ona auauna e avea ma paeonia ma misionare. Ae peitai, ia maumauai ina ia fai se sao atoatoa i le mea e mafaia ina ia auai i sauniga ma le auaunaga i le fanua, i le lē faatagaina o nai faaletonu laiti, e pei o le leaga o le tau, e taofia ai oe. (Eperu 10:24, 25) E mafai foi ona e faataulaga le tele o le taimi mo suesuega totino o le Afioga a le Atua. Ua faia faapea e nisi aiga e ala i le faatapulaaina o matamataga i polokalama o le TV, po o le oo foi ina “tasi le po mo le TV” i vaiaso taitasi po o le matuā leai lava o se TV. E ala i le sailia o se taimi mo suesuega totino, o le “taulaga o le viiga” na e te ‘taʻutaʻu atu ai lona suafa i le lautele’ i sauniga ma i le auaunaga i le fanua ua faapena ona faapei o se taulaga e sili ona maualuga.—Eperu 13:15.

Ia manatua ua iai nei le galuega talaʻi i ona tulaga faaiʻu. E lē o toe mamao ae aumaia loa e le Atua lana faamasinoga i luga o lenei lalolagi matapeapea ma le manao e faamalie na o ia lava. (Sefanaia 2:3) Ina ia maua pea le finagalo malie o le Atua, e lē mafai ona tatou taumafai e fai ni faamolemolega. E tatau ona tatou ‘tuuina atu o tatou tino o le taulaga ola, ma le paia ma le mālie i le Atua.’ (Roma 12:1) O se agaga faapena o le a aumaia ai le fiafiaga sili ma le lotomalie. O le a fesoasoani lea ia i tatou ia maua pea le olioli e sili atu i la tatou faiva. Ma ona o lea, o le a faafiafiaina ai le finagalo o Ieova le Atua!—Faataoto 27:11.

O lea, ia tausisia pea se agaga faataulagaina! Aua le faatalatū e faaavanoa oe e fesoasoani atu i isi ma i le lagolagoina o faanaunauga o le Malo. Ua apoapoai mai Paulo: “Aua le galo ia te outou ona agalelei ma alolofa atu; auā o taulaga faapena e fiafia ai le Atua.”—Eperu 13:16.

[Faaopoopoga i lalo]

[Ata i le itulau 26]

O le mauaina o se taimi mo suesuega totino ma le auaunaga i le fanua e mafai ona aafia ai le faataulagaina, ae o se mea e tauia

[Ata i le itulau 28]

Sa matuā tele faamanuiaga o W. R. Brown ma John Cutforth ona o o laua ala faataulagaina totino