Pe o le a E Auai ea i le Molimau Lē Fuafuaina?
1 O la tatou masani faifai pea i le olaga, e aofia ai vaitaimi patino e talanoa atu ai i tagata e uiga ia Ieova. Tatou te faataatia ese le taimi e molimau atu ai i se auala ua fuafuaina i lea fale ma lea fale, faia o toe asiga, ma le faafoeina o suesuega faale-Tusi Paia. E ui i lea, e tele foi isi avanoa e leʻi fuafuaina lelei, e mafai ona tatou talanoa atu ai i tagata e uiga i le upu moni. Ua tatou taʻua lenei talaʻiga o le molimau lē fuafuaina.
2 Ae o le ā tonu lava le mea e taʻu o le molimau lē fuafuaina? E ui ina sa tatou taʻua lenei ituaiga o molimau i le taimi ua mavae, o se molimau faafuaseʻi, ae ua lē faamatalaina saʻo ai e lena faaupuga lenei vala o la tatou galuega. Ua lē na o se galuega faaopoopo lea e lē manaomia, e na ona faafuaseʻi ona tatou faia. O le mea lea, ua tatou toe taʻua ai o le molimau lē fuafuaina. O le molimau lē fuafuaina, e aofia ai le tele o fuafuaga, ma e ui ina atonu tatou te lē auai moni i le molimau ua fuafuaina i tagata mai lea fale i lea fale, ae o se vaega lenei e sili ona tāua o la tatou auaunaga ia Ieova.
3 Ua maua e nisi tagata talaʻi le tele o avanoa e auai i lenei vaega o le faiva. E mafai ona tatou taumafai uma lava ina ia mataalia i avanoa faapena a o tatou ō malaga, auai i malōlōga, ma i asiasiga i auaiga. Po o le a e faaaogā tatau ea avanoa e molimau lē fuafuaina ai i lena taimi?
4 Faia ni Fuafuaga Mamao: O sauniuniga ma manatu e mafaufauina muamua e mafai ai ona tatou molimau lē fuafuaina i se auala uigā. I lenei itu, ua matuā faaauupegaina ai i tatou i le matalasi o lomiga e fesoasoani ia i tatou ina ia faataunuuina ai lenei galuega. E faaopoopo atu i Le Olomatamata ma le Awake!, ua ia i tatou nisi o sāvali o loo faatomuaina ai ulutala e faagaeeina ai le naunau. O loo iai polosiua e tosina i ai tagata e eseese o latou talaaga ma lotu. Ua ia i tatou foi tusi e mafai ona fafao i taga o o tatou ofu o loo talanoaina ai mataupu o loo naunau i ai i le taimi nei. O lē fea lomiga ua e lagonaina le toʻa e faaaogāina? Ia manatunatu i lenei itu e pei o se aiga. Ona faataʻitaʻi lea o le mea o le a e fai atu ai pe a aliaʻi mai se avanoa.
5 A o Auai i Malōlōga: O le taimi e sili ona lelei e molimau lē fuafuaina ai, o le taimi lea a o auai i malōlōga. Po o e fuafua ea e malaga i se vaalele, se vaa, po o se pasi? Ia alu la ma ave se Tusi Paia ma se tasi o lomiga ua taʻua i luga. O le faitauina o lomiga faapena i auala o loo feoai ai le lautele, e masani lava ona faamaite ai se talanoaga. Afai e te malaga i se taavale, ia manatunatu i sau tala e mafai ona fai atu pe a e afe i se pamu penisini. E faapefea ona e avatu se molimau i se faleʻaiga po o le taimi e te nofo ai i se fale talimālō. Mo na avanoa, e mafai ona e tausia sina aofaiga itiiti o sāvali ina ia faigofie ai ona avatu i tagata naunau. Afai e te malōlō i se fale faatali pasi e manaia, se matafaga po o se togalaau matagofie, e mafai ona amata lau molimau atu e ala i le fesili i se tasi: “Pe e lē manaia ea pe ana faapea le lalolagi atoa?”
6 O lea, ia aua lava neʻi sopoloa la tatou vaai i avanoa tatou te maua e avatu ai se molimau lē fuafuaina. E fuatele mai lenei auala o le talaʻiga, ma e ao i auauna a Ieova ona auai. Faatasi ma Iesu, tau ina ia avea lo tatou alofa mo uso a tagata e uunaia ai i tatou e tautala atu i avanoa talafeagai uma!—Mata. 5:14-16.