Faafesootaiga o a Tatou Upu Tomua ma Lomiga
1 Pe a sauniunia lau taulimaga i lenei masina, e mafai ona e iloiloina muamua faafitauli tetele o loo fesagaʻi ma tagata i lou vaipanoa, ona filifili ai lea o ni faamatalaga mai mekasini fou po o se polosiua o loo faasino atu i le vaifofō aogā faale-Tusi Paia.
2 I nisi vaipanoa, atonu o loo popole ai tagata i le faatupulaia o le leai o ni galuega atoa ma le taugatā o le soifuaga. Afai e te tau i se tulaga faapena, e mafai ona e taʻu patino lava i ai le faafitauli i au upu tomua.
Atonu e te faapea atu:
◼ “O loo matou talatalanoa ma o matou tuaoi e uiga i se mea e mafai ona fai e faamautinoa ai o le a maua galuega ma fale mo tagata uma. Pe e te talitonu ea e talafeagai ona faatalitalia faapea o le a faataunuuina e pulega faaletagata lenei mea? [Faataga mo se tali a lē ona le fale.] O loo iai se tasi na te silafia le auala e foia ai nei faafitauli; matau foi lana valoaga e faamautinoa ai i le Isaia 65:21-23. [Faitau.] Sa tusia lenei folafolaga e Lē na Foafoaina mea mo le faalaeiauina o i tatou, ma o le mea lena o loo tatou manaomia uma lava i nei aso faigatā, a ea?”—rs, itu. 11.
3 O le taimi lea o lau taulimaga, e mafai ai loa ona e faafesootaia i se mataupu o loo i mekasini fou po o se polosiua. Afai e te auai i le galuega mekasini, e mafai ona e filifilia se manatu talafeagai mai le mataupu “O Pelu e Fai ma Suotosina—O Afea?—E Faapefea?” i le lomiga o Le Olomatamata o Iulai 1. Afai e te ofoina le polosiua o le “Faauta!” aiseā e lē faailoa atu ai le manatu e uiga i fale ma galuega mo tagata uma o loo faaalia i le faavaa i luma ma tua o le polosiua. E mafai ona e tatalaina ina ia vaai ai lē ona le fale i le ata atoa.
4 I oganuu e tele ai mea o loo popole i ai tagata o aiga, o le a aogā la i ai se upu tomua e fetuutuunai atili. Atonu e te manao e faataʻitaʻi le faatomuaga lona lua o loo lisiina mai i le tusi Reasoning i lalo o le “Malo.”
E mafai ona e faapea atu:
◼ “Ua aʻoaʻoina i tatou e Iesu ina ia tatalo mo le Malo o le Atua, ia oo mai ma faia ai Lona finagalo i le lalolagi e pei ona faia i le lagi. Faamata e te manatu o le a avea moni lava le lalolagi ma parataiso, pe afai o le a faia le finagalo o le Atua i inei i le lalolagi?” A uma ona tali mai lē ona le fale, ia faailoa atu i ai ma faitau le Faaaliga 21:3-5.
Ma afai o loo e ofoina le polosiua o le Malo, ia faitau i ai ni vaega e filifilia mai le palakalafa muamua i le itulau e 3. Matau le fuaiupu faapea: “E auala mai i le Malo, o le a le pine ona faaiua lea e le Atua o taua, le galalaga i le fia ai, faamaʻi, ma amioleaga.” Fesili i lē ona le fale po o le fea o nei faafitauli e na te lagona ua sili atu ona matuiā.
Afai e te faatomuaina le “Olomatamata” o Iulai 15, e mafai ona e faapea atu:
◼ “E toatele tagata o loo tatalo mo le Malo o le Atua ia oo mai, ae o le ā moni lava le Malo o le Atua? Ou te mautinoa o le a e iloa le matuā faamalosia o lou faatuatua i lenei mataupu, ‘Le Uiga o le Malo o le Atua ia te Oe.’”
5 E mafai foi e outou talavou ona taulimaina ma le uigā le feau o le Malo, i tagata matutua.
I le faatomuaina o le Isaia 65:21-23, e mafai e se tagata talaʻi talavou ona faapea atu:
◼ “Ou te iloa, ona o oe o se tagata matua, ua sili atu ai la le tele o mea e te silafia o le olaga na i lo o aʻu, peitai, ua faamafanafanaina i tatou uma lava i lenei mau.”
6 Ia mautinoa ua faia se faamaumauga faaeteete o so o se lomiga e tuua, e aofia ai polosiua po o mekasini patino na tuua. O le a e manaomia lena faamatalaga pe a e toe asiasi atu e atiina aʻe le naunau.