Suesueina o le The Greatest Man Who Ever Lived

¹ E lē taumatea ua amata ona tatou suesueina le The Greatest Man Who Ever Lived ma o tatou aiga, atoa ma nisi o a tatou tagata aʻoga o le Tusi Paia. Maeu se olioli o le a maua i le autaluina o le soifuaga ma le faiva a Iesu Keriso! Ona e fai si ese o le auala na fuafuaina ai lenei tusi mai isi tusi ua tatou suesueina, o le a aogā ai la nisi o taʻiala nei.

² E lē o faanumeraina itulau o le tusi, e mafai la ona suesueina mataupu atoatoa, e masani lava o le tolu i le fa mataupu i vaiaso taitasi. O mataupu e 35, 111, ma le 116, e fai si uumī, ma e mafai ona vaevaeina i ni suesuega tailua i mataupu taitasi. A uma ona faitauina se mataupu atoa (po o se tamai ulutala atoa, e pei ona iai i mataupu e 35, 111, ma le 116), ona fai lea e lē o loo taulimaina le suesuega, fesili o loo i le faaiʻuga o le mataupu, e talafeagai ma le mataupu po o le vaega na faitauina. E lē o maua foi tali i se auala faasolosolo i le mataupu. E ao ona faavae tali pupuu ma tuusaʻo i le mataupu o le lesona.

³ A maeʻa lena, pe a lava le taimi, e ao ona faitauina mau uma o loo sii mai i le faaiʻuga o le mataupu. O mau uumī o loo sii mai, e mafai ona vaevae i ni vaega laiti ina ia avanoa ai le tagata aʻoga mo le faitauina, ona aumaia lea o ni tali e faavae i le vaega na faitau. O le a fesoasoani ni fesili tuusaʻo e sauniunia e le taʻitaʻi, ina ia aumaia ai ni tali uigā e faaalia ai le auala e fesootai ai mau na faitauina ma manatu ua faamatilatila i le tusi. E ao i fesili ma tali uma ona fesoasoani ia i latou o loo auai, ina ia uaʻi totoʻa atu ia Iesu Keriso, lona soifuaga, ma ana aʻoaʻoga.

⁴ O loo iloiloina e le tusi o le Greatest Man le soifuaga o Iesu e tusa ma le faasologa o mea na tutupu. I le mafaufau i mea na tutupu ma le teuina i le mafaufau o mea na tutupu ai, e mafai ona avea o se fesoasoani moni i lo tatou manatuaina. O le mea lea, ia mautinoa ai le iloiloina o ata felanulanuai ma ia tagai e lē aunoa i faamaumauga o loo i le faafanua ua faaalia i le amataga o le tusi, lena o loo sosoo atu ai ma le faatomuaga.

⁵ E mafai ona iloiloina le faatomuaga o le tusi i le vaiaso muamua. A maeʻa ona faitauina palakalafa uma o loo i lalo o le tamai ulutala, ona faia lea e le taʻitaʻi o ni fesili talafeagai ua ia sauniunia. O lena uluai iloiloga, e mafai ona faataatia ai le faavae mo suesuega o loo mulimuli mai. O le tele o aogā e maua mai i le talanoaina o le mataupu, e matuā faalagolago lava lea i le tele o sauniuniga a i latou uma e aofia ai. Ae maise, e ao i le taʻitaʻi ona sauniuni lelei i vaiaso taitasi e fesoasoani i le tagata aʻoga, ina ia matuā iloa lelei le tagata silisili o ē uma na soifua mai, o lo tatou Alii ma le Faaola, o Iesu Keriso.