E Faapefea ona Pulea lo Tatou Ita?
1 O loo tatou ola i se lalolagi ua fai ma masani le ita. O le feitagai, o le lē faamasinotonu, po o isi tulaga faigata o le olaga i aso uma, ua mafua ai le tele o omiga. E tatau ai la ona tatou iloa ona faatoʻatoʻa. E mafai ona tatou amataina aso taitasi i se uiga mautinoa—le faaalia o le onosai, le faapalepale, ma tausuaga malie. Ua taʻua e le Tusi Paia: “E sili ona lelei o le ua gesegese i le ita i le ua malosi; e sili foi le ua pule i lona loto i le na te aea le aai.”—Faata. 16:32.
2 O le ā e mafai ona tatou faia, pe a tatou lagona le ita? Na i lo o le faataalise ona ita, e ao ona tatou manatunatu i le iʻuga e ono iʻu i ai a tatou gaoioiga. (Faata. 14:17) Afai e teʻi lava ua tatou feita ae lē iloa le pogai, ia tatou ole atu la ma le faamaoni ma le loto maulalo mo se fesoasoani. (Faata. 15:22) O le taumafai e malamalama i pogai ua amio ai nisi tagata e pei ona latou faia, e fesoasoani lea ia i tatou e pulea a tatou gaoioiga tau i faalogona.—Faata. 19:11.
3 I le isi itu, pe a tatou faamanuʻaina se tasi ae leʻi mafaufauina, e ao lava ona faatoese atu i ai. Mo se faaaʻoaʻoga, afai e tū se tasi i lou tamatamai vae, atonu e te ita. Ae a ia faamalūlū atu ia te oe, ona teʻa ai lea o lou ita. E ono tiga pea lou vae, ae o lena e faaaloalogia pea oe. E faapena foi la a tatou amioga lelei, ma le faaaloalo masani ma tausuaga talafeagai, e mafai ona liua ai le ita ma tumau ai foi a tatou faiā lelei ma isi tagata.
4 O le fesagaʻi ma tulaga e mafua ai lo tatou ita, e fesoasoani lea tatou te iloaina ai pe faapefea ona talanoa e uiga i lo tatou ita e aunoa ma le osofaia o le isi tagata. E matuā eseese le fai atu: “Lou vale!” pe “Toeitiiti oʻu alu atu tuʻi oe!” na i lo o le fai atu “Ua ou lē fiafia tele lava,” pe “Ua tiga tele loʻu loto!” E masani ona lē manuia faaupuga ita ona e tupu ai foi le ita o le isi tagata. (Faata. 15:1,18) O le toatele o i tatou e masani lava ona ita i nisi taimi. Ua faapea mai le Tusi Paia, e oo lava ia Ieova e toasa o ia. (Sefa. 2:2,3; 3:8) O le lagona ita la e lē o se agasala.—Efe. 4:26,27.
5 O lo tatou ola ia tusa ma le Afioga a le Atua ua na o lea le puipuiga moni mo i tatou i lenei lalolagi sauā. (Sala. 119:105) Toeitiiti lava ona faia mai lea o le faamasinoga a le Atua i atunuu. E manaomia lava ona tatou mautinoa i le taimi nei, tatou te lē o faataʻitaʻia ala o lenei lalolagi sauā. O le pulea lelei o lo tatou ita, e fesoasoani lea e tausia ai se faiā lelei ma isi tagata, ae o le mea e sili ona tāua, e fesoasoani ai ia i tatou e olioli pea i le finagalo o Ieova ma ana faamanuiaga.—Sala. 119:165.