O le ā o le a Tatou Faataunuuina i Lenei Tausaga Faaleauaunaga?
1 Talu ai o le a amata le tausaga faaleauaunaga o le 1994 ia Setema 1, o le taimi lelei la lenei mo i tatou uma o ni tagata o Ieova, e matuā faamautinoa ai i o tatou mafaufau, mea o loo tatou mananao e faataunuu e le tagata lava ia, ma i le faalapotopotoga foi, a o faagasolo lenei tausaga fou faaleauaunaga.
2 Ia Tuputupu aʻe Pea Faaleagaga: Afai tatou te leʻi leva i le upu moni, e ao la ona tatou mananao ia malolosi i le faatuatua. (Epe. 6:1-3) Afai ua tatou malolosi faaleagaga, e ao ona tatou fesoasoani i ē fou ma isi o manaomia se fesoasoani ae ia uai atu foi i lo tatou lava itu faaleagaga, ia aua neʻi faapea ua ia i tatou uma le poto o le Tusi Paia ma le tomai i le olaga faa-Kerisiano e manaomia. Po o tatou talanoaina le mau i aso taitasi, faaauau pea le polokalama o le faitau Tusi Paia lea ua faatulaga mai i le Faasologa o le Aʻoga o le Faiva Faatiokarate, ma sauniuni mo le Suesuega Tau Tusi a le Faapotopotoga ma le Suesuega o Le Olomatamata? E ao ona ia i tatou uma lena sini. E ao ona tatou tutupu aʻe pea faaleagaga pe a tatou fia faasaoina mai le faaumatiaga o lenei faiga amioleaga o mea, ma sao ai i le lalolagi fou a le Atua.—Faatusatusa i le Filipi 3:12-16.
3 Tumau i le Mamā Faaleagaga: Ina ia matuā talia e Ieova, e tatau ona tatou faamamā i “mea uma e leaga ai le tino atoa ma le agaga.” (2 Kori. 7:1) Afai ua tatou mamā, aisea la tatou te toe fia ‘taafifili ai i le palapala’ o lenei lalolagi tuai amioleaga? (Faatusatusa i le 2 Peteru 2:22.) E tatau ona tatou maumauai e tumau i le malosi ma le mamā faaleagaga. Ona tatou lē vālea lea i mailei leaga a Satani ma popolevale ai, ona oo atu lea i le agasala ma lē maua ai le finagalo malie o Ieova.—2 Kori. 2:11.
4 Utagia Fautuaga Poto: Fai mai le Faataoto 15:22: “E faatumauina [se mea] i le toatele o faipule.” Ae manatua o le tagata na faia na upu o Solomona lea, na mulimuli ane ona faatagaina ‘ana avā e taaina lona loto e auauna atu i isi atua’ ona sa ia lē utagiaina le fautuaga a le Atua ia lē faiavā atu i fafine ese. (1 Tupu 11:1-4) Afai tatou te lē utagia le fautuaga atamai, tatou te utagia la faapefea lo tatou uigā i le auaunaga ia Ieova po o le faia o se faaaoaoga e onomea ona faataitaia? (1 Timo. 4:15) O le a fesoasoani le fautuaga a le Tusi Paia ia i tatou ina ia leoleoina ai o tatou loto. (Faata. 4:23) O le alofa i mea e alofa i ai Ieova, le inoino i mea e inoino i ai o ia, le saili atu pea i lana taitaiga, ma le faia o mea e finagalo malie i ai o ia, o se puipuiga moni lena.—Faata. 8:13; Ioane 8:29; Epe. 1:9.
5 O la tatou tapuaiga ia Ieova e lē tau ina fai, e lē o le ituaiga o tuutoina i le Atua lea e pei ona fai e le au fia Kerisiano o le lalolagi, ae uunaia e le agaga, e uigā, ma olaola e tusa ai ma le upu moni o loo i le Afioga a le Atua.—Ioane 4:23, 24.
6 O lo tatou tausisi e faia le finagalo o le Atua e ono tofotofoina i aso taitasi. E ao ona faamalosia i tatou i lo tatou iloaina, o loo fesagai foi ‘le faalapotopotoga atoa’ o o tatou uso ma na lava tofotofoga, ae o le a faamalosia i tatou e Ieova. (1 Pete. 5:9, 10) Ona mafai ai lea ona tatou matuā faataunuu la tatou faiva a o faagasolo le tausaga faaleauaunaga o le 1994.—2 Timo. 4:5.