Fesoasoani i Isi e Talisapaia le Aogā o A Tatou Lomiga
1 “O loo ola le afioga a le Atua, o loo matuā galue foi.” (Epe. 4:12) Talu ai o a tatou lomiga faale-Tusi Paia e fesoasoani i tagata ina ia mauaina aogā mai le malosi o le Afioga a le Atua, tatou te faaaogāina ai e faagaee ai le naunau i le Tusi Paia pe a molimau atu lē fuafuaina pe asiasi atu foi mai lea fale i lea fale.
2 O lomiga e ofo ia Ianuari, o so o se tusi e 192 ona itulau na lomia i tausaga e i luma atu o le 1980 po o le tusi Faia o Lou Olaga Faaleaiga ia Fiafia pe afai e lē o maua na tusi tuai. Afai o maua na tusi i la outou faapotopotoga, ona sauniuni lea o lau taulimaga o le feau o le Malo ina ia tatai atu ai i se manatu patino o i le tusi o loo e faaaogāina. E mafai faapefea ona faia lenei mea?
3 Le Auala e Sauniuni Ai: Ina ia amata, ia filifili se fuaiupu i le tusi o loo e faaaogāina, e te iloa e ono tosina mai ai tagata loto faamaoni i lau oganuu. Ona e mafaufau lea i se mea na tupu lata mai nei po o se mataupu taatele o loo talanoa i ai tagata, e mafai ona lua talanoa puupuu i ai ma le tagata o lē e ona le fale a o leʻi tataia atu ona manatu i le lomiga lea ua uma ona e filifilia. Atonu o loo iai se mau o sii mai po o otooto mai, e mafai ona e faitau mai i le Tusi Paia pe faitau saʻo mai i le tusi, e lagolagoina ai au faamatalaga. Afai ua faaalia e le tagata le naunau moni, e mafai loa ona e ofo atu i ai le tusi. I lena lava taimi, po o se isi foi taimi e talafeagai, faamatala puupuu i ai le auala o loo faatupeina ai lenei galuega talaʻi i le lalolagi aoao, ma tuu i le tagata le avanoa e fai ai sana foai pe afai e manao ai. Po o le ā lava le tulaga, taumafai e tuua le tagata ma se fesili po o se manatu e mafai ona e faaaogā e faavae ai se toe asiga.
4 E tele faapotopotoga o loo iai ni kopi o tusi faa-Peretania o le Your Youth—Getting the Best Out Of It ma le Listening to the Great Teacher. Afai o maua nei tusi, aisea la e lē sauniuni ai mo ni talanoaga ma tagata talavou tou te fetaiai i le oganuu? Faalaeiau ia i latou e faitau se tasi o nei tusi matagofie. Afai e te ofoina so o se isi tusi tuai faa-Peretania, e mafai ona e faaaogāina le auala lea ua faataatia mai i luga, ma ia sauniuni e talanoaina so o se aʻoaʻoga faavae o le Tusi Paia o loo talanoaina i lenei fesoasoani sili mo suesuega faale-Tusi Paia.
5 Ofo le Tusi o le Olaga Faaleaiga: Atonu e mafai ona e amataina se talanoaga e ala i le tatai atu o manatu i se tala o loo faamatilatila ai faafitauli i le aiga, pe faaali foi i ai le manaomia o se olaga lelei i le aiga.
Ona fai atu lea o se fesili e pei o lea:
◼ “Aisea e te manatu ai o loo tofu le tele o aiga ma faafitauli matuia e tusa lava po o i latou o ni aiga lolotu? [Faatali mo se tali.] Pe e faateia ea oe i lou iloaina e faapea e tai tutusa uma lava aʻoaʻoga faavae a le tele o lotu, ma e matuā vāvāmamao lava ma aʻoaʻoga a le Tusi Paia?” Pe afai e naunau le tagata e ona le fale e faalogo, faaali ia te ia le faasologa o mataupu o loo i le tusi, ma faamatala puupuu i ai e faapea, ua fesoasoani lenei tusi ia i tatou e iloa ai fautuaga aogā mai le Tusi Paia mo se olaga malosi faaleaiga. Faasino i ai faapea e mafai ona ia mauaina aogā mai le aʻoaʻoina o le auala e faatatau ai mataupu silisili mai le Tusi Paia i lona olaga.
6 I nisi taimi, atonu e sili atu ona talafeagai le ofoina o mekasini po o se sāvali. Ua ia i tatou mafuaaga uma e naunau ai ma maelega e faalaeiau i isi tagata e faitau i nei lomiga, ina ia mafai ai ona faaauupegaina i latou, e tofo i le malosi o le Afioga a le Atua i o latou olaga e ala i le utagiaina o ana taiala.