Sauniuni Lau Lava Taulimaga o Mekasini
1 E tatou te talisapaia ia mekasini o Le Olomatamata ma le Ala Mai! ona o loo aumaia ai mataupu talafeagai ma faamatalaina ai le tele o mea, e aofia ai mataupu uma e uiga i le lalolagi e oo “lava i le uiga loloto o le Atua.” (1 Kori. 2:10) E manatua e i tatou uma lava le tele o mea fou ma atiaʻe ai ua tatou faitau ai i nei mekasini, ia o loo faaaogaina e Ieova e faaalia faasolosolo mai ai le upu moni. (Faata. 4:18) E tatou te mananao ina ia tatou filigā i le tufaina atu o mekasini i le tele e mafai ai.
2 Iloilo Lau Oganuu: O ā ituaiga o tagata e nonofo i lou vaipanoa? Afai e televave le laasaga o lo latou olaga, e manaomia ai la ona e saunia se taulimaga puupuu ma ia tuusaʻo. Ae afai e fai si faifaimalie o le olaga i lau oganuu, e mafai la ona e fai atu atili nisi faamatalaga. Afai o le toatele o tagata o aiga e faigaluega i le ao, atonu e sili ona lelei le faataulauina o lou asiasi atu i o latou aiga i le afiafi a o lei po. Atonu e te feiloai atu i nisi i le ao a o e molimau atu i magāala po o le galue mai lea faleoloa i lea faleoloa. E maua e nisi tagata talaʻi iuga lelei i le faafeiloaia o tagata i se auala lē fuafuaina i nofoaga e paka ai taavale, po o paka e tafafao ai i le taulaga.
3 Ia E Faamasani i Mekasini: Faitau lomiga taitasi i le taimi lava e te maua ai. Fili ni mataupu e te lagona o le a fiafia i ai tagata i lau oganuu. O ā mataupu o latou manatu mamafa i ai? Vaavaai mo se manatu patino e mafai ona e sii maia i le mataupu ua e fuafua e faamatilatila atu. Manatunatu i se fesili e mafai ona e lāgā e faagaee ai le fiafia. Fili se mau talafeagai e faitau atu i lē ona le fale pe afai e maua sou avanoa e faia ai faapea. Mafaufau i se tala e te ono fai atu ai ina ia taʻua ai le fuafuaga mo foai tauofo ma le auala e faataatia ai se faavae mo se toe asiga.
4 Sauniuni Au Upu Tomua: Ia filifili ma le faaeteete upu ua e fuafua e faaaogā e faailoa atu ai oe ma amata ai se talanoaga. Ua taulau manuia nisi i le faatomua atu faapea: “Sa ou faitau i se mataupu manaia lava i lenei mekasini, ma ou te manao e fetufaai ai ma isi.” O le toatele e amata lava i se fesili e taulai atu i le mataupu ua talanoaina lea ua latou filifilia e faaaogā. Mo se faaaoaoga:
5 Afai e faamatilatila se mataupu i le faateteleina o le solitulafono, e mafai ona e fesili atu:
◼ “O le ā e manaomia ina ia tatou momoe lelei ai i le po e aunoa ma le mataʻu ina neʻi gaoia a tatou mea pe afaina foi?” Ia faamatala i ai e faapea o loo ia te oe ni faamatalaga e uiga i se vaifofo mo lenei faafitauli. O le a lē pine ae soloiesea foi e lenei vaifofo isi ituaiga uma o faaletonu tau i tulaga lautele. Ia faasino i se manatu o i le mekasini o loo ofoina mai ai sea faamoemoe. Pe a e toe foi atu e asia, e mafai ona e tataʻi le manatu o lē ona le fale i le mataupu 1 o le tusi o Le Poto.
6 Pe a ofoina se lomiga e uiga i le olaga faaleaiga, e mafai ona e faapea atu:
◼ “Ua iloa e le toatele o mātua ua avea o se luʻi moni le tausia aʻe o se aiga i aso nei. E tele tusi ua lomia e faatatau i lea mataupu, ae e oo lava i tagata popoto ua feteenai o latou manatu. Pe e iai ea se tasi o lē e mafai ona saunia ni taʻiala maufaatuatuaina?” Ia faailoa atu se faamatalaga patino mai le mekasini e faataitaia ai le fautuaga atamai o loo maua i le Tusi Paia. Pe afai e te faia le toe asiga, ia talanoaina manatu mai le Tusi Paia i le tausia aʻe o fanau lea o loo talanoaina i le tusi o Le Poto, itulau e 145-148.
7 I le faatomuaina o se mataupu e uiga i se faafitauli tau i le tulaga lautele, e mafai ona e faapea atu:
◼ “E toatele tagata ua lagona le omia ona o nei taimi faigata ua tatou ola ai. E te manatu na finagalo le Atua ia tatou ola faapenei?” Faasino i se mataupu o faaalia ai le auala e gafa ai ma faafitauli i aso nei, po o loo faailoa mai ai ni mafuaaga e āloālo atu ai i se lumanai o le a lē toe iai ni popolega. I le isi au asiasiga, ia talanoaina le ata ma le faamatalaga i le itulau e 4-5 o le tusi o Le Poto, ona tataʻi saʻo loa lea i se suesuega faale-Tusi Paia i le aiga.
8 Ia Faafetaui le Mataupu i Lē Ona le Fale: O le a e feiloai atu i tagata e eseese mea e fiafia i ai ma talaaga. Ia sauniuni se taulimaga faigofie e mafai ona e fetuunai mo tagata taitoatasi o aiga. Ia mafaufau i le auala e mafai ona e faafetaui atu ai manatu o talanoaga i se tamaloa, se fafine, se tagata matua, po o se talavou. E leai ni tulafono patino i mea e ao ona e fai atu ai. Ia taʻua so o se tala e logolelei mo oe ma maua ai ni iuga lelei. Ae peitai, ia aasa, ia talanoa mai lou loto, ma ia avea ma sē e faalogologo lelei. O le a lagona e i latou o ē “ua saunia” lou faamaoni ma o le a tali lelei mai.—Galu. 13:48.
9 Fesoasoani le Tasi i le Isi: O le fetufaai o manatu o le tasi i le isi, tatou te aʻoaʻoina ai ni auala fou e faaupu ai o tatou lava manatu. O le faataitai faatasi o a tatou taulimaga, e tatou te maua ai le poto masani ma le mautinoa. (Faata. 27:17) Afai e te faataitaia muamua mea o le a e fai atu ai, o le a sili atu ona e toafilemu pe a e alu atu i le fale. E tāua tele pe a faaalu e mātua le taimi e fesoasoani ai i a latou fanau e sauniuni, faalogologo a o latou faataitaia a latou taulimaga, ma ofo atu ni fautuaga mo le toe faaleleia. E mafai e tagata fou ona maua aogā pe a galulue faatasi ma tagata talaʻi agavaa.
10 O le sauniunia o lau lava taulimaga o mekasini, e lē manaomia ona faafaigata. E tau lava ina ia manatua se manatu patino e fai atu ona faaleo atu lea i se auala e logoleleia. O le tausolomua ma le muai mafaufau lelei, e mafai ai ona e saunia se taulimaga lelei o le a maua mai ai se tali fiafia.
11 O le tufatufaina o mekasini o le tasi lea o auala sili ua tatou faasalalauina atu ai le feau o le Malo i le lalolagi aoao. Afai e mafai ona e tuuina atu Le Olomatamata ma le Ala Mai! i aao o tagata loto faamaoni, o le a tautala lava mekasini mo i latou lava. Ia manatua pea lo latou tautele ma le auala e mafai ai e le feau o loo iai ona faasaoina ola. O lenei ituaiga o ‘agalelei ma le fetufai atu’ e matuā faafiafiaina ai Ieova.—Epe. 13:16.