Mataupu 15

Ua Faapefea ona Faatonutonuina e Ieova Lana Faalapotopotoga?

1. O ā faamatalaga e faatatau i le faalapotopotoga a Ieova ua faailoa mai e le Tusi Paia, ma aisea e tāua ai ia i tatou?

E ALA i le Tusi Paia faagaeeina, ua faaemo mai ai e Ieova ia i tatou ni ata pupuu o lana faalapotopotoga ofoofogia faalelagi. (Isa. 6:2, 3; Eseki. 1:1, 4-28; Tani. 7:9, 10, 13, 14) E ui lava e lē mafai ona tatou vaaia meafaiola agaga, ae ua ia faatepa i tatou i auala o gaoioiga a le au agelu paia ua aafia ai tagata tapuai moni i le lalolagi. (Kene. 28:12, 13; 2 Tu. 6:15-17; Sala. 34:7; Mata. 13:41, 42; 25:31, 32) Ua faamatala mai foi e le Tusi Paia le vaega vaaia o le faalapotopotoga a Ieova ma fesoasoani ia i tatou e malamalama i le auala o loo ia faatonutonuina ai. Afai e ia i tatou moni lava le malamalamaga faaleagaga o nei mea, o le a fesoasoani lea ia i tatou e “savavali e tusa ma [“Ieova,” NW], ina ia faafiafiaina o ia.”—Kolo. 1:9, 10.

MATAULIAINA LE VAEGA VAAIA

2. Talu mai le Penetekoso o le 33 T.A. o le ā na avea ma faapotopotoga a le Atua?

² Na avea le nuu o Isaraelu ma faapotopotoga a le Atua mo le 1,545 tausaga. Peitai na lē taulau ona latou tausia le feagaiga o le Tulafono ma sa latou teena le Alo o le Atua. O lea na faatuina ai e Ieova se faapotopotoga fou, lea na ia osia ai se feagaiga fou. Ua matauliaina lenei faapotopotoga i le Tusi Paia o le “faatoanofotane” a Keriso, ua faia aʻe i le 144,000 o ē na filifilia e le Atua e aufaatasi ma lona Alo i le lagi. (Efe. 5:22-32; Faaa. 14:1; 21:9, 10) O lona uluai vaega na faauuina i le agaga paia i le taimi o le Penetekoso, 33 T.A. E ala i le agaga paia na aumai ai e Ieova faamaoniga lē masese e faapea o le faapotopotoga lea o le a ia faaaogāina mai lena taimi e faataunuu ai lana fuafuaga.—Epe. 2:2-4.

3. O ai i aso nei ua faia aʻe ai le faalapotopotoga vaaia a Ieova?

³ I aso nei ua na o se vaega totoe o le 144,000 o loo iai i le lalolagi. Peitai, ina ia taunuu valoaga o le Tusi Paia, ua aumaia ai se motu o tagata e toatele o “isi mamoe” i se aufaatasiga olaola ma i latou. Ua tuufaatasia e Iesu Keriso, le Leoleo Mamoe Lelei, “isi mamoe” ia, ma ē o totoe o ona soʻo faauuagagaina ina ia ‘tasi le lafu mamoe’ i lana taitaiga o ia o lo latou “leoleo mamoe e toatasi.” (Ioa. 10:11, 16; Faaa. 7:9, 10) O i latou uma nei ua faia aʻe ai le faalapotopotoga autasi e tasi, le faalapotopotoga vaaia a Ieova i aso nei.

E FAATIOKARATE I LE FAUSAGA

4. O ai o loo taitaia le faalapotopotoga, ma e faapefea?

⁴ O le faaupuga faale-Tusi Paia “le ekalesia [“faapotopotoga,” NW] lea a le Atua soifua” e faamaonia ai po o ai o loo ia taitaia. E faatiokarate, pe e pulea e le Atua le faalapotopotoga. Ua saunia e Ieova faatonutonuga mo ona tagata e ui mai i lē ua Ia tofia e avea ma ao lē vaaia o le faapotopotoga, o le Alii lea o Iesu Keriso, ma e ala i Lana lava Afioga faagaeeina, le Tusi Paia.—1 Timo. 3:14, 15; Efe. 1:22, 23; 2 Timo. 3:16, 17.

5. (a) Sa faapefea ona folasia le taitaiga faalelagi a le faapotopotoga i le uluai senituri? (e) O le ā e faaalia ai o loo avea pea Iesu ma ulu o le faapotopotoga?

⁵ Na matuā faaalia lea faatonutonuga faatiokarate ina ua osofia i gaoioiga e le agaga paia uluai sui o le faapotopotoga i le Penetekoso o le 33 T.A. (Galu. 2:1-4, 32, 33) Sa faailoa mai ina ua faatonutonuina e le agelu a Ieova mea tutupu, lea na iu i le faasalalauina o le tala lelei i Aferika. (Galu. 8:26-39) E faapea foi, ina ua tulei saunoa Iesu i faatonuga i le liliuina o Saulo o Taso ma i le taimi foi na amata ai le galuega faamisionare i Nuu Ese. (Galu. 9:3-7, 10-17; 10:9-16, 19-23; 11:12) Peitai sa lē faaauau ai pea le saunia o faatonutonuga manaomia i na auala ofoofogia. Mulimuli ane na lē toe lagonaina ai ni leo mai le lagi, lē toe iai foi ni agelu e asiasi mai i tagata ma ua aunoa ma se meaalofa faavavega a le agaga. Peitai na poloai Iesu i ona soʻo faamaoni e faapea: “Faauta! Ou te ia te outou i aso uma lava, e oo lava i le vaitaimi faaiuiu o le faiga o mea,” ma ua faaalia e mea moni o loo ia faia faapea. (Mata. 28:20, NW; 1 Kori. 13:8) E lē gata ina aloaia e Molimau a Ieova lona tulaga ulu, ae ua mautinoa foi le lē mafai ona latou faaauau i le folafolaina o le feau o le Malo i lalo o teteega matuitui, pe a aunoa ma lana fesoasoani.

6. (a) O ai o loo faia aʻe ai le “auauna faamaoni ma le mafaufau,” ma aisea? (e) O le ā le tofiga na ia tuuina atu i lena “auauna”?

⁶ A o toeitiiti lava oo i le maliu o Iesu na ia fetalai ai i ona soʻo e faatatau i se “auauna faamaoni ma le mafaufau” lea ona o ia o le Matai o le a ia avatu ai se avega tauave faapitoa. O lena “auauna,” e tusa ai ma le faamatalaga a Iesu, o le a iai pe a afio le Alii i le lagi ma o le a soifua pea i le taimi o le toe maliu mai o Keriso. O sea faamatalaga e lē mafai ona fetaui i se tagata e toatasi. Peitai e fetaui i le faapotopotoga faauuina faamaoni a Keriso e pei o se vaega e tasi. Sa silafia e Iesu o le a ia faatauina i latou i lona lava toto, o lea sa fetaui lelei ai ona ia faasino i le aotelega o i latou o lana “auauna.” Na ia avatu ia i latou ni galuega e fai, tofia i latou uma e faia soʻo ma faasolosolo ai ona fafagaina faaleagaga i latou nei, i le faasoaina atu ia i latou o “a latou mea e ʻai [faaleagaga] i ona itu aso.” Sa faamautinoaina lo latou tofiga e le agaga paia i le Penetekoso o le 33 T.A.—Mata. 24:45-47; 28:19, 20; 1 Kori. 6:19, 20; faatusatusa i le Isaia 43:10.

7. (a) O ā avega tauave faateleina ua iai nei i le “auauna”? (e) Aisea e tāua ai la tatou tali atu i faatonuga e ui mai i lenei auala?

⁷ I le toe afio mai o le Matai, afai sa faatinoina faamaoni e le “auauna” lana galuega, o le a avatuina loa ia te ia se avega tauave ua faateleina. O le a avea tausaga mulimuli ane ma taimi o le molimau i le Malo i le lalolagi aoao, ma o le a aoaoina ai se “motu o tagata e toatele” o ē tapuai ia Ieova, ina ia faasaoina atu i latou i le “puapuaga tele.” (Mata. 24:14; Faaa. 7:9, 10) E manaomia foi e i latou nei, mea taumafa faaleagaga, ma o le a laulauina ia i latou e le “auauna” tuufaatasi, o auauna faauuagagaina a Keriso. Ina ia faafiafiaina Ieova, e manaomia ona tatou talia le faatonuga ua ia saunia e ui mai i lenei auala ma gaoioi ia ogatasi atoatoa i ai.

8, 9. (a) I le uluai senituri o le ā le faatatauga sa iai mo le foia o fesili e faatatau i aʻoaʻoga ma le avatuina o le taitaiga manaomia i le talaʻia o le tala lelei? (e) O le ā le faatatauga talitutusa ua iai i aso nei?

⁸ E moni, i nisi taimi, atonu e lagā ai fesili e faatatau i talitonuga ma feuiuiaiga. Ona ā lea? I le mataupu e 15 o le Galuega o loo taʻua ai le auala na foia ai se finauga i mea e manaomia mo tagata liliu mai o Nuu Ese. Sa faasino atu i aposetolo ma toeaina i Ierusalema, o ē sa avea o se vaega pule tutotonu. O na toeaina sa lē saʻolele i latou; e lē o ni tagata e leʻi faia lava ni mea sese. (Faatusatusa i le Kalatia 2:11-14.) Peitai sa faaaogā i latou e le Atua. Na latou iloiloina le mea o fai mai ai le Tusi Paia faagaeeina i le mataupu o loo aaoina atoa ma le faamaoniga o le gaoioiga a le agaga o le Atua ina ia tatalaina ai le fanua o Nuu Ese, ona latou avatu ai lea se faaiuga. Sa faamanuiaina e le Atua lena faatulagaga. (Galu. 15:1-29; 16:4, 5) Mai lena vaega tutotonu, na aauina atu ai foi tagata e faalautele le talaʻiga o le tala lelei i le ogatasi ma le mea na faatonuina e le Alii lava ia.—Galu. 8:14; Kala. 2:9.

⁹ I o tatou aso ua faia aʻe ai le Vaega Pule i uso faauuagagaina mai atunuu eseese. Ua faamautu i le ofisa ulu o Molimau a Ieova mo le lalolagi aoao. Ma le faamaoni ua ia faalauteleina ai faanaunauga o le tapuaiga mamā i lalo o le tulaga ulu o Iesu Keriso. Ua tofutofusia nei uso i le manatu o le aposetolo o Paulo, o lē na tusi atu ina ua auina atu le fautuaga faaleagaga i uso Kerisiano e faapea: “E leai foi so matou fia pule i lo outou faatuatua, a o fesoasoani i matou i lo outou olioli; auā o le faatuatua tou te tumau ai.”—2 Kori. 1:24.

10. (a) E faapefea ona filifilia po o ai o le a avea ma toeaina po o auauna o le faiva? (e) Aisea e tatau ai ona tatou felagolagomai vavalalata ma i latou ua tofia i ia tulaga?

¹⁰ Ua aloaia e Molimau a Ieova i le lalolagi aoao lenei faatulagaga faatiokarate. O a latou faapotopotoga uma e galulue felagolagomai vavalalata faatasi ma ia. Latou te vaavaai atu i le Vaega Pule e saunia le tofiga o toeaina ma auauna o le faiva ina ia tausia ai le sologa lelei o gaoioiga o faapotopotoga. I ā faavae ua filifilia ai tagata mo sea tofiga? Ua taʻua manino mai i le Tusi Paia mea e manaomia. Ua tauaveina e toeaina o ē faatuina mai, atoa ma i latou ua tuu atu i ai le aiā e faia ai tofiga se avega tauave mamafa i luma o le Atua ia tausisia ia mea. (1 Timo. 3:1-10, 12, 13; 5:22; Tito 1:5-9) E leai ni vaega tauva i totonu o sui o le faapotopotoga po o ni palota faalefaapotopotoga. Na i lo lea, i le ogatasi ma le mea na faia e aposetolo ina ua aaoina tofiga i le uluai senituri, sa ofoina atu e na toeaina o ē na faia le lafo faatū, ma i latou o ē na mulimuli ane faia tofiga, ni tatalo mo le fesoasoani a le agaga o le Atua atoa ma le sailia o le taitaiga mai lana Afioga faagaeeina. (Galu. 6:2-4, 6; 14:23; faatusatusa i le Salamo 75:6, 7.) I la tatou tali atu i le faatonutonuga a toeaina, e mafai ai ona tatou faaalia lo tatou sapaitalia o le sauniuniga alofa a Keriso e ala i nei “mea alofa i tagata” e fesoasoani ia i tatou uma ia maua “le loto gatasi i le faatuatua.”—Efe. 4:8, 11-16.

11. (a) O ā auaunaga tāua ua faatino e fafine i totonu o le faatatauga faatiokarate? (e) O afea e manaomia ai ona fai o latou ufiulu, ma aisea?

¹¹ Ua faasino mai e le Tusi Paia faapea o le vaavaaia o le faapotopotoga e ao ona tausia e tane. E lē o se mea lenei e vaai maulalo ai i fafine, auā e toatele foi i latou o loo aofia i suli o le Malo faalelagi. I le amio mamā ma le loto maulalo, ma le sogasoga e tausia o latou aiga, ua saosaolaumea ai foi fafine Kerisiano i le talaaga lelei o le faapotopotoga. (Tito 2:3-5) E masani ona latou faia le tele o le galuega o le sailia o ē fou fiafia ma aumaia i latou ia fesootai ma le faalapotopotoga. (Sala. 68:11) Peitai o le aʻoaʻo atu i totonu o le faapotopotoga e tausia lea e tane o ē ua tofia. (1 Timo. 2:12, 13) Ma afai e leai ni tane agavaa i se sauniga ua faatulaga e le faapotopotoga, ona faaaogā lea e se fafine o se ufiulu pe a ia taitaia pe tatalo.a E faaalia ai i lea tulaga lona faaaloalo mo le faatulagaga a Ieova, e pei ona faataatia e Iesu le faaaoaoga mo tagata uma ia gauai i lona Tamā.—1 Kori. 11:3-16; Ioa. 8:28, 29.

12. (a) O le ā le vaaiga ua uunaia e le Tusi Paia toeaina e manatu i ai i o latou tulaga? (e) O le ā le faaeaga matagofie e mafai e i tatou uma ona auai i ai?

¹² I le lalolagi o se tagata na te umia se tulaga maualuga e manatu i ai e tāua, peitai i totonu o le faalapotopotoga a le Atua e faapea le tulafono: “O le aupito itiiti ia te outou uma, e sili lava ia.” (Luka 9:46-48; 22:24-26) O lea ua fautuaina ai e le Tusi Paia toeaina ia faaeteete ina ia lē aliitai i fanau a le Atua, ae na i lo lea, ia avea ma faaaoao i le lafu. (1 Pete. 5:2, 3) E lē na o se toaitiiti filifilia, ae o Molimau a Ieova uma lava, o tane ma fafine, ua iai le faaeaga matagofie o le fai ma sui o le Pule Silisiliese aoao, e tautala ma le loto maulalo i lona suafa ma taʻu atu i tagata i so o se mea e faatatau i lona Malo.

13. I le faaaogāina o nei mau, ia talanoa fesili ua lisiina i le faaiuga o lenei palakalafa.

¹³ E lelei tele ona fesili ifo ia i tatou: “Pe tatou te sapaitalia moni ea le auala o taitaia ai e Ieova lana faalapotopotoga vaaia? Po o atagia mai lea i o tatou uiga, i a tatou upu ma a tatou amioga?” O le fefulifulisaia o manatu o loo mulimuli mai e mafai ona fesoasoani ia i tatou ia faia sea auiliiliga:

Afai tatou te gauai moni ia Keriso o le ulu o le faapotopotoga, e pei ona faaalia i mau o loo mulimuli mai, o le ā la o le a tatou faia? (Mata. 24:14; 28:19, 20; Luka 21:34-36; Ioa. 13:34, 35)

I a latou taumafaiga e avea o ni Kerisiano e fuatele mai, i le ā le tele e tatau ai i ē uma o se vaega o le faalapotopotoga ona lagona le faalagolago i le Atua ma Keriso? (Ioa. 15:5; 1 Kori. 3:5-7)

Pe a taumafai toeaina e fetuutuunai manatu o tagata ina ia latou tagaʻi i mataupu i le ogatasi ma isi o le faalapotopotoga, o le faautaga agalelei a ai e tatau ona tatou utagia i lenei itu? (Efe. 4:7, 8, 11-13; 2 Kori. 13:11)

Pe a tatou talia ma le talisapaia sauniuniga faaleagaga o loo auala mai i le vasega o le “auauna” ma lana Vaega Pule, o ai ua tatou faaalia i ai le faaaloalo? Ae ā pe afai tatou te tautatala lē faaaloalo i ia mea? (Luka 10:16; faatusatusa i 3 Ioane 9, 10.)

Aisea e lē ao ai ona tatou soona faitioina toeaina tofia? (Galu. 20:28; Roma 12:10)

14. (a) O le ā ua tatou faaalia e ala i o tatou uiga agaʻi i le faalapotopotoga faatiokarate? (e) I lea itu, o ā avanoa ua tatou maua e faamaonia ai le pepelo o le Tiapolo ma aumaia ai le olioli i le finagalo o Ieova?

¹⁴ E ala i lana faalapotopotoga vaaia i lalo o Keriso le ulu tofia, ua feagai ai Ieova ma i tatou i aso nei. O lea o o tatou uiga agaʻi i lenei faalapotopotoga ua faaalia ai i se auala faatino le tulaga ua tatou tutū ai i le finauga e uiga i le pule silisiliese. (Epe. 13:17) E taofi Satani faapea ua uunaia i tatou uma e faanaunauga fia fai oloa, faapea o lo tatou popolega autū o i tatou lava. Peitai afai tatou te fiafia e faaavanoa i tatou e auauna i so o se auala o loo manaomia, a o alofia le tautala ma le faia o mea e soona tosina mai ai manatu ia i tatou, ona tatou faamaonia ai lea o le pepelo o le Tiapolo. Afai tatou te alolofa ma faaaloalo ia i latou o ē ‘fai ma taimua ia i tatou, faaaoao i lo latou faatuatua ae teena le avea ma ituaiga o tagata o lē “faaneenee atu foi i alii e maua ai ni mea,” ua tatou aumaia ai la le olioli i le finagalo o Ieova. (Epe. 13:7; Iuta 16) E ala i le atiina aʻe o le faaaloalo tausaafia mo le faalapotopotoga a Ieova ma faia ma le loto atoa le galuega ua ia faatonutonuina, ua tatou avatu ai faamaoniga faapea e moni lava o Ieova o lo tatou Atua ma tatou te autasi i lana tapuaiga.—1 Kori. 15:58.

[Faaopoopoga i lalo]

Talanoaga Autalu

● O le ā le faalapotopotoga vaaia a Ieova i aso nei? O le ā lona fuafuaga?

● O ai le ao tofia o le faapotopotoga? E ala i ā faatatauga vaaia ua ia saunia ai le taitaiga alofa mo i tatou?

● O ā uiga tausaafia agaʻi i avega tauave ma tagata i le faalapotopotoga e tatau ona tatou atiina aʻe?