Talaʻiga—O se Faaeaga Faamamaluina
1 O le faiva o le tala lelei, o se faaeaga mamalu ua faasalafa mai e Ieova i a i tatou. (Roma 15:16; 1 Timo. 1:12) O le auala ea lena o e manatu i ai? E lē tatau ona faatagaina le mavae atu o le taimi po o le tauemu mai o isi e faaitiitia ai lona tāua i ō tatou manatu. O le tauaveina o le suafa o le Atua, o se faaeaga mamalu e na o le toaitiiti ua tuuina i ai. E mafai faapefea ona faatupuina lo tatou talisapaia mo lenei faaeaga?
2 O le talaʻiina o le feau o le Malo, e lē o se mea e fiafia mai ai le lalolagi i a i tatou. O le toatele e lē āno mai, pe e lē popole mai i la tatou galuega. O isi e tauemu ma tetee i ai. O na teteega, e mafai ona ui mai i aumea i galuega, tuaoi, po o tagata foi o aiga. I la latou vaai, e ono foliga faapea o i tatou o ni tagata ua faaseseina ma ua vālea. (Ioa. 15:19; 1 Kori. 1:18, 21; 2 Timo. 3:12) O ā latou faamatalaga e faalotovaivaia ai, ua fuafuaina ina ia faaitiitia ai lo tatou maelega ma faapogaia ai i tatou e faagesegese pe ia faamaamulu mai lo tatou faaeaga maualuga. O manatu sese, ua faapogaia e Satani o lē “ua faatauasoina manatu o i latou o e le faatuatua, . . . ina neʻi pupula atu ia te i latou le malamalama o le tala lelei i le mamalu o Keriso.” (2 Kori. 4:4) O le ā sou uiga faaalia i ai?
3 E tāua tele le manatua, o la tatou talaʻiga e uiga i le Malo, o le galuega lea e aupito sili ona tāua ua mafai e so o se tasi o i tatou ona faia i aso nei. Ua i a i tatou se feau faasaoola e leai lava se isi auala e mafai ai ona maua. (Roma 10:13-15) O le mauaina o le faamaoniga a le Atua ae lē o tagata, e taulia lena. O manatu lē faalaeiau o le lalolagi e uiga i la tatou galuega talaʻi, tatou te lē faavaivai ai mai le folafola atu ma le loto tetele o le tala lelei.—Galu. 4:29.
4 Sa matuā faatauaina e Iesu lona faaeaga o le faia o le finagalo o lona Tamā. (Ioa. 4:34) Sa tuutoina atu atoatoa o ia lava i le faiva, ma na te leʻi faatagaina ni faatosinaga po o tagata tetee e faagesegese ai o ia. Sa faamuamua pea i lona olaga le talaʻiina o le feau o le Malo. (Luka 4:43) Ua poloaiina i tatou ina ia tatou faataitai i lana faaaoaoga. (1 Pete. 2:21) I le faia faapea, ua tatou auauna ai o se “au faigaluega . . . faatasi ma le Atua.” (1 Kori. 3:9) Po o tatou faaaogā atoatoa ea lenei faaeaga? Po o tatou sailia ea avanoa e fetufai ai le tala lelei ma isi i se tulaga fuafuaina ma le lē fuafuaina? I le avea o ni Molimau a Ieova, e tatau ona saunia pea i tatou e “taʻutaʻu atu i le lautele lona suafa.”—Epe. 13:15, NW.
5 O le faia o so tatou sao i le faiva, e tele lava ina faalagolago i ō tatou uiga. Pe tatou te matuā talisapaia mea uma ua faia e Ieova mo i tatou? Po ua tatou atiina aʻe i ō tatou loto se alofa mo Ieova, lea e mafai ona uunaia ai i tatou e faia mea uma lava tatou te mafaia i le auaunaga i a te ia? O le mafaufau loloto i faamanuiaga ia o loo tatou olioli ai nei faapea ma mea ua folafolaina mai e Ieova mo le lumanai, ua fesoasoani lea i a i tatou ina ia faateleina le alofa mo Lē na Faia i tatou. O lena alofa e uunaia ai i tatou e gaoioi—ia finafinau ma ia auai e lē aunoa i le galuega talaʻi o le Malo i le tele tatou te mafaia pe a tusa ai ma o tatou tulaga. O lo tatou maelega o le a faamaonia ai lo tatou alofa mo Ieova ma o tatou tuaoi.—Mare. 12:30, 31.
6 Tatou te faaalia lo tatou matuā faatauaina o se mea i gaoioiga tatou te faia i ai ma tautala e uiga i ai. Pe o tatou te faatauaina moni ea lo tatou faaeaga e talaʻi i le Malo? Pe o tatou faaeaea i la tatou faiva? Po o tatou maumauai e finafinau i lenei galuega matuā tāua e ui lava i teteega? Afai tatou te matuā faatauaina lenei faaeaga matagofie, e mautinoa la o le a tatou maelega ma faia ma le loto atoa.—2 Kori. 4:1, 7.