Faafaigofieina o le Tauaofiaga Itumalo o le 1995
1 Maeu le matuā faafiafiaina pe a auai i ni faigaai faaleagaga, pe i sauniga a le faapotopotoga, fonotaga matagaluega, fonotaga o aso faapitoa, po o tauaofiaga itumalo! Aisea? O aufaatasiga ma tagata matatau i le Atua e faafouina ai, ma o mataupu faaleagaga e tolaulauina mai i na faatasiga, e faamanatu mai ai i a i tatou e uiga i mea e sili ona tāua.
2 I tausaga na seʻi mavae atu, na lolofi mai ai le faitauafe ua faatoateleina i na faatasiga faaleagaga. I le va o le 1985 ma le 1994, ua faateleina ai i le sili atu i le 50 pasene le faitau aofai o faapotopotoga, mai le 49,716 i le 75,573. A o faatelevaveina e Ieova le galuega o le aoaoina, ua faapena ai foi ona faateleina le fuainumera o tauaofiaga itumalo ma fonotaga matagaluega. (Isa. 60:22) O le faateleina foi o le aofai o tauaofiaga na faia i le na o le oganuu o le lālā i le Iunaite Setete, mai le 113 i le 1985 e oo i le 168 i le 1994, o se ata lea o lenei faatelega ofoofogia i le faitau aofai o faapotopotoga. O galuega e aofia ai i le faatulagaina ma le taulimaina o nei tauaofiaga ua matuā faateleina. E talu ai tatou te tauaofia ina ia maua aogā mai le polokalama faaleagaga ua saunia mo nei faigaai, o se auala atamai la le faafaigofieina i se auala e sili ona aogā mo le tausia o fuafuaga faaletino.
3 Laasaga Atili e Faia: Tatou te vaavaai atu i a Ieova mo ana faamanuiaga a o tatou agaigai pea i luma. Ua tatou fiafia e iloa ua ia tuuina mai i ona tagata le agaga o le atamai ma le malamalama lea e manaomia. E tatau ona tatou matuā ioe e faapea, e ala i le vasega o le auauna faamaoni ma le mafaufau, ua taʻitaʻiina ai ma le maelega e Iesu mataupu mo le faataunuuina o fuafuaga a le Atua i se auala ofoofogia. (Mata. 24:45-47; Kolo. 1:9, 10) E pei ona faasilasila atu i lenei lomiga o La Tatou Faiva o le Malo, e amata atu i a Fepuari 1995, o le a lē toe taulimaina atu ni vaiinu i tauaofiaga itumalo, i fonotaga matagaluega, ma fonotaga o aso faapitoa. E aumai e le tagata lava ia lana meaai ma vaiinu. Atonu o loo outou naunau e fia iloa le auala o le a aogā ai lenei suiga. E lē taumatea o le autaluga o loo mulimuli mai o fesuiaiga ia na faia i nai tausaga ua mavae, o le a avea o se faamanatuga lelei o aogā ua uma ona tatou maua e ala i le faafaigofieina o le galuega i tauaofiaga.
4 Fesuiaiga i le Taimi ua Tuanai mo le Faafaigofieina: A o leʻi faatinoina faatulagaga ina ia faatutusa ma faafaigofie fuafuaga mo tauaofiaga itumalo, e pei o le auaunaga tau i mea taumafa, auaunaga tauofo, ma le vaaia o āpi, e tele se galuega na manaomia ona faia e le faitauafe o uso ma tuafāfine i le sauniunia o tauaofiaga. I le vaai atu i le tele o omiga ma le tele o mea na manaomia mai mea e tausi ai o tatou uso i aso faisoo, atoa ma le faatuputupulaia pea o le faalapotopotoga, ua iloa ai e tatau ona faia ni fesuiaiga ina ia faafaigofie ai le galuega. E lē gata i lea, o le iuga o le faafaigofieina o la tatou taulimaga o mea taumafa i le Iunaite Setete i le 1978, na mafai ai ona faalogologo i le polokalama le sili atu i le 70,000 uso ma tuafāfine o ē sa masani ona galulue mamafa i le taimi a o faagasolo le tauaofiaga i le saunia o ia mea. I le 1987, na faia atili ai ni taualumaga e faafaigofieina ai le auaunaga tau i mea taumafa i tauaofiaga, faapea ma le tausaga faaleauaunaga na sosoo mai ai i Maota o le Malo. Mulimuli ane, na mafai ai ona maua fua mea taumafa i le tauaofiaga e aunoa ma se totogi mo i latou na auai. Ma maeu ni fesuiaiga lelei, ua mafai ai ona faamāmā le galuega ma mafai ai ona uai totoʻa atu i vala faaleagaga o le tauaofiaga, ua mafai ai e i latou na galulue ona faalogologo ma sili atu ona olioli i le polokalama. (Teu. 31:12) O na tagata faatuatua o loo faatasi ma i tatou ma ua tele tausaga o auauna faamaoni, latou te manatua lelei nei suiga agaigai i luma ma ua faaalia le talisapaia mo le taitaiga ua maua. Ae o ā galuega e manaomia atili ona aveesea ina ia mafai ai e le isi vaega e toatele o tagata ona maua atoatoa aogā mai le polokalama faaleagaga?
5 Suiga na Faatalitalia: I le faagasologa o tausaga, na saunia ai ni taumafataga faigofie ma tufaina atu, na iloa ai e “itiiti ni nai mea” na “manaomia” moni. (Faatusatusa i le Luka 10:38-42, NW.) Ae peitai, o le faateleina o na mea itiiti faatasi ma le aofaiga o ē e auai, ua tulai mai ai pea le tele naua o mea e manaomia ma le galuega e fai, e faaopoopo atu i ai ma le tele o mea faigaluega taugata e faaaogā ai. Sa faapea foi ona manaomia ai se aofaiga tele o le ʻau tauofo ina ia faamaopoopoina ma lagolagosua i ia faatulagaga. E tatau ona saunia ni mea e teu ai meaai ma ni nofoaga e faasoa atu ai. E lē gata i lea, o nisi o matagaluega a le soifua maloloina i le atunuu, e matuā maumauai i mea latou te manaomia mo le tautuaina o meaai, ma ua avea lenei tulaga o se avega mamafa i uso o loo vaaia lea matata. O mea e faaaogā mo le kukaina o meaai, e manaomia foi ona tausia ma teuina lelei, lea e aofia ai le faia o ni galuega, le taimi, ma tupe faaalu. Pe a faafaigofieina atili, e toatele uso o le a mapu mai lenei galuega tele o le tausia lelei o nei meafaigaluega.
6 O le auaunaga ma le loto naunau a i latou na tauofo e tusa ai ma nei matata, ua matuā sili ona tāua ma matuā talisapaia. Ae peitai, e ala i lenei faafaigofieina atili, ua mafai ai e le faitauafe o i latou o loo auauna i le faia o faatauga, gaseseina, ma le tautuaina atu o meaai, ona faaaogā lo latou taimi mo isi manaoga tatau o le Malo, e aofia ai ma le matuā olioli atoatoa i le aufaatasiga faaleuso i tauaofiaga. O le ʻau tauofo sa masani ona auauna i le Auaunaga mo Mea Taumafa, o le a mafai nei ona fesoasoani i isi matagaluega, e pei o le Au Tautua ma le Faamamāina. O le a avea lenei o se faamāmā avega mo tagata uma, ma o le a lē toe manaomia ai e lena toatele ona galulue e oo i le leva o le po, le taeao po, po o le taimi a o faagasolo le polokalama, e pei ona iai i le tele i le Auaunaga mo Mea Taumafa.
7 Lagolagoina Fuafuaga: E matuā talisapaia e le Sosaiete le lagolagosua lelei na tuuina mai e outou uso ma tuafāfine “ma le loto atoatoa” mo le tele o tausaga i faatulagaga tau i le tauaofiaga, e aofia ai ma le auaunaga tau i mea taumafa. (1 No. 29:9) Ua fesoasoani lea i le tele o auala. Ua mafai ai ona totogi ni fale lelei ma totogi ai mea manaomia mo le tauaofiaga. Ua mafai ai foi e i latou o auai ona nonofo ai pea i le nofoaga o le tauaofiaga i le taimi o le malologa puupuu i le aoauli, ina ia maua ai mea taumafa talafeagai, e faamalosia ai, ma auai mo le polokalama faaleagaga. E lē taumatea foi, o le limafoai ma le lagolagosua ua faaalia e uso ma tuafāfine i le foaiina o meaalofa mo nei sauniuniga, o le a faaauau pea. Ua avea o se faaaliga o lo latou talisapaia i se auala faaletino.—Faata. 11:25; Luka 16:9.
8 Tausia o Manaoga mo A Outou Mea Taumafa: Ae peitai, o nei fesuiaiga atili, o le a tatau ai i tagata taitoatasi uma ma aiga ona sauniunia tau lava o mea taumafa mo i latou, o mea e manaomia i le itu faaletino, e taumamafa ai i le taimi o la tatou malologa i le aoauli. E tatou te matuā manatu mamafa i aogā lelei o le polokalama faaleagaga. O le faatagaina o meaai faaletino e fai ma mea e sili ona tāua, o se tulaga ua lē atamai lea. E matuā tāua mo tagata taitoatasi “le iloa lelei o mea e sili ona tāua” e tusa ai ma lenei itu. (Fili. 1:9, 10a, NW) O tauaofiaga tetele talu ai nei a tagata o Ieova i Polani, Rusia, ma Ukraine, faapea ma isi nofoaga, na faia ma le manuia e aunoa ma ni fuafuaga o ni auaunaga tau i mea taumafa. E lē gata i lea, o atunuu o loo aofia ai i le vaavaaiga a le lālā a Samoa i Sisifo, na tatou faia ni tauaofiaga ma fonotaga e aunoa ma ni auaunaga tau mea taumafa, sa na o vaiinu na saunia mo i latou na auai. I nei tulaga taitasi, na aumaia ai e sui usufono a latou lava mea taumafa mo le aoauli. E tatou te iloa ai foi, afai tatou te aumai na o sina meaai māmā e tali ai le laualo i le aoauli, o le a mafai ai ona matala lelei o tatou mafaufau, ma mafai ai ona tatou maua atoatoa aogā mai le polokalama o le afiafi. Ina ia ogatasi ma lenei mea, e ao i tagata uma ona aumai ni mea taumafa māmā ma aogā. Mo se faaaoaoga, ina ua fāgaina e Iesu le motu o tagata, e na o le lua lava mea na ia saunia, o areto ma iʻa. (Mata. 14:16-20; tagaʻi foi i le Luka 10:42a.) I lea itu, matou te fiafia ai e ofoina atu sina fautuaga e tusa ai ma mea atonu e talafeagai ma aogā pe a manatu i le puupuu o le malologa i le aoauli ma ituaiga o mea tatou te faaaogā.
9 Talu ai o le a lē toe iai se fuafuaga mo ni auaunaga tau i mea taumafa i le tauaofiaga, o le faia la o se fuafuaga lelei, o le a mafai ai e i latou o auai ona olioli faatasi ma o latou aiga i se taumafataga o le taeao, a lē i le fale, ia po o se faleaiga masani. O le lava o le malologa i le po, o le a mafai ai ona e alapo ina ia maua mea e manaomia mo le taumafataga o le taeao, ia vave ai ona taunuu i le tauaofiaga, ma tele ai se taimi e olioli ai faaleuso faatasi ma isi sui usufono. O le isi aogā o lea fuafuaga fou, o le a lē manaomia ai ni tagata e vaaia ma vave tatalaina i le taeaopo faitotoa o fale mo mea taumafa, e pei ona faia muamua e tagata tauofo mo le auaunaga tau i taumafa ma o latou aiga. O le a tatalaina faitotoa o le fale i le 8 i le taeao mo sui usufono uma, seʻi vaganā ai se toaitiiti e iai ni a latou galuega patino ua tofia i ai, e manaomia ona vave ulufale atu i le taeaopo. E pei lava ona sa iai muamua, e lē manaomia mo se tasi ona faanatinati atu i le nofoaga o le tauaofiaga e vaai mo ni nofoa, auā o le a lava pea nofoa ua faatulagaina mo le faitau aofai ua fuafuaina.
10 O le malologa i le aoauli, o le a fai sina puupuu na i lo o tauaofiaga ua mavae atu. Ae peitai, o le a maua ai pea se avanoa e faia ai ni taumafataga māmā, faapea ma se taimi mo se aufaatasiga ma isi. O o tatou uso ma tuafāfine e nonofo i le oganuu o loo faia ai le tauaofiaga pe latalata ane foi i ai, o ē e masani ona foi atu i le po, o le a faigofie mo i latou ona sauniuni ni nai mea taumafa mo sui taitoatasi o le aiga e aumai mo le malologa i le aoauli. E tutusa lelei lava lenei faiga ma meaai a tamaiti ia e ave i le aʻoga e ʻai i le malologa, atonu o se sanuisi ma sina fualaau aina, o se masi keke, ma se vaiinu. E toatele foi tagata e masani ona ave ni meaai faapena i a latou galuega i aso faisoo.
11 O lenei faiga e lē taumatea o le a avea o se luʻi i a i latou e ō mai i nofoaga i fafo atu o le oganuu o le tauaofiaga, e manaomia ona faia ai e nisi ni fuafuaga mamao mo a latou mea taumafa mo le aoauli. Atonu o mea e pei o solo pepa, ma iputi pepa mo i latou o malaga faatasi i la outou vaega, e mafai ona aumaia mai le fale. Ua iloa e nisi, ua lava sina meaai māmā e pei o se fualaau ʻaina suamalie po o ni fualaau taumafa mata, e faamalie ai o latou manaoga, ma e mafai foi ona aumai mai le fale. O isi meaai e manaomia mo le malologa i le aoauli o aso taitasi, e mafai ona maua i se faleoloa o loo i le oganuu o le tauaofiaga. Ioe, ua tatou iloa, o le tuuina i le pusa aisa o ni mea taumafa se tele, o le a lē talafeagai mo i latou e nonofo i fale talimalo.
12 E faamanatu atu, faamolemole ʻAUA LE FAIA NI KUKA I TOTONU O POTU O FALE TALIMALO seʻi vaganā o iai se umukuka laitiiti mo lea fuafuaga. E matautia, ma o le solitulafono le faia faapea ma e ono faaleagaina, pisipisia ma gaʻogaʻoa ai meāfale. E maua ai se manogi leaga e faigata ona aveesea mai le potu mo le tele o aso. O nei mea uma o le a faafaigata ai i le fale talimalo ona toe tuuina atu le potu e nofo ai se tasi seiloga e faaalu ai ni tupe, faia se galuega e toe faamamā ma faamanogi lelei ai. O le mafuaaga lena e poto ai le fuafua e faatau mai mea e lē vave leaga e pei o pepa masi, pe atonu e te filifili e aumai se falaoa, ni pani, po o ni keke. Afai e te filifili e aumai ni sanuisi, atonu o le faleoloa o mea taumafa lea e te iloa, e iai se vaega faapitoa e saunia ai nei mea taumafa. O le faatauina o nei ituaiga o mea taumafa ua uma ona saunia, o le a taofia ai le saunia o mea taumafa i totonu o potu o fale talimalo po o taavale.
13 Ona o le nofoaga o le a fai ai le tauaofiaga o le a avea o se Maota o le Malo telē i le taimi o le tauaofiaga, o se auala poto foi la le alofia o le faia o se siomaga e pei o loo faia ai se tafaoga i le taimi o le malologa i le aoauli. Ma e pei lava ona tatou lē aai i le Maota o le Malo i le taimi o a tatou sauniga, e lē tatau foi la ona tatou aai pe feinu i le taimi o polokalama o le tauaofiaga. O cooler lapopoa ia e masani ona ave i tafaoga, o le a lē faatagaina i totonu o le maota, ona e ono tutupu mai ai ni faalavelave, ma e lē mafai foi ona tuuina i le auala e feoai ai pe e lē tatau ona tuuina i luga o nofoa. Atonu e sili ona lelei ni tagapepa iila, o le a sili ona talafeagai mo a tatou mea taumafa māmā ia o le a faaaogā i le aoauli. Afai e manaomia, e mafai ona faaaogā se cooler laitiiti lea e mafai ona tuu i lalo o le nofoa, ae e lē o luga o le nofoa.
14 E manaomia foi ona faaeteete e tusa ai ma ituaiga o ipu ma fagu e inu ai ia o le a tatou filifilia e avatu i le mea e fai ai le tauaofiaga. O kofe, ma ti vevela, e mafai ona utu i fagu faapitoa mo vaivevela. So o se ipu ma so o se fagu mataetae lava, e ono lamatia ai. E tele lava nofoaga ua faasā ai le faaaogaina o nei mea. O le mea lea, matou te talosaga atu ai e faapea, e manaomia ona matuā faaeteete pe afai o le a faaaogaina ipu po o fagu mataetae.
15 Isi Aogā: E moni ua mafai ona tatou iloa le atamai o le faia o ni fetuunaiga i na fuafuaga. O le a mafai ai e tagata uma ona uai atoatoa i le taliaina o aogā faaleagaga—o le fuafuaga moni lea o lo tatou faapotopoto faatasi. Ua maua nei aogā i le aufaatasiga lea ua tatou olioli ai, faapea ma le polokalama lava ia. O lea, na i lo o le tuua o le nofoaga o le tauaofiaga i le taimi o le malologa i le aoauli mo le sailia o ni mea taumafa, maeu le aogā o lo tatou ō mai ma aumai sina mea taumafa mo i tatou i le tauaofiaga. O lenei faiga o le a mafai ai ona olioli i le aufaatasiga ma o tatou uso ma tuafāfine, ma o le a taofia ai i tatou mai le misia o so o se vaega o le polokalama i le afiafi.
16 O le faamalosia faaleagaga pe a uma le polokalama o le afiafi, ua mafai ai e nisi ona latou olioli pea i le aufaatasiga ma isi uso Kerisiano, ma talatalanoa ai e uiga i mea lelei na latou aʻoaʻoina a o taumamafa faatasi ma fiafia faatasi ma aiga ma uo i faleaiga e masani ona taumafafa ai. O isi atonu e na ona faatau mai lava o se mea mai se faleoloa. O i latou e mafai ona toe foi i o latou lava aiga, e mafai ona filifili pe fai ai se taumafataga o le po i inā, e pei ona masani ai i le tele o aso e faigaluega ai pe ō ai foi i le faiva i le fanua.
17 Tatou te olioli moni lava i le faigaai faaleagaga i nei fonotaga ma tauaofiaga, o inā tatou te maua ai lomiga fou, aʻoaʻoga lelei, ma fautuaga aogā. O nei faamanuiaga, o mea ia e manatua e tagata uma, faatasi ma le olioli i le auaufaatasi ma tagata o le Atua. Fai mai le Faataoto 10:22: “O le faamanuia a Ieova, o lea e faatamaoaiga aʻi; na te le faaopoopo i ai se tiga.” Ua pogai lenei mea ona, i le avea o ni tagata o Ieova, tatou te lē auai i tauaofiaga ma se manao i mea faitino ma le manatu i ni mea e tele e maua. Tatou te tauaofia ma le faanaunauga mautinoa ina ia maua aoga aupito sili i se auala faaleagaga, ma e faatamaoaigaina i tatou i taui mai i a Ieova ona o le agaga ua tatou faaalia.—1 Timo. 6:6-8; Epe. 11:6.
18 O nei taimi mo faalaeiauga, ua faamanatu mai ai foi i a i tatou e uiga i le agaigai i luma o le seleselega faaleagaga. (Ioa. 4:35, 36) O upu amata o le Isaia mataupu e 54, o loo valaau atu i le faalapotopotoga pei o se faletua o Ieova ina ia nofo sauni mo ni faatelega e olioli ai. O le faatuputeleina, le faalauteleina, ma le malosi faafouina, e aofia ai i mea ua ofoina atu e pei ona valoia e Isaia: “Ia faalautele le mea e tu ai lou fale ie; ia fālōina ie puipui o mea e te nofo ai; aua e te faaitiitia; ia faaumiumiina au maea, ma ia malolosi au fao; auā e te osofia le tuapa i le itu taumatau ma le itu tauagavale.” O le faataunuuga o lena valoaga faafiafia loto, ua iu ai i le faatelega uigaese o le tapuaiga moni lea ua tatou vaaia nei.—Isa. 54:1-4.
19 E moni, o se filifiliga lelei le faatinoina atili o lenei fuafuaga e faafaigofie ai tauaofiaga, ina ia mafai ai e tagata uma ona olioli i le polokalama faaleagaga lea ua saunia, e aunoa ma ni mea e faalavelavea ai. Ua matou faamoemoe o le a iai foi le faamanuiaga a Ieova i lenei fuafuaga, talu ai o le a mafai ai ona taulimaina ma le uigā le faatuputelega atili. E ala i le taulai atu i le mea o manaomia, o le a mafai ai ona tatou olioli i aso ua tatou fuafuaina mo aufaatasiga fiafia ma uso faapea ma mea lelei faaleagaga. O la matou tatalo faamaoni ina ia faamanuia e Ieova a tatou taumafaiga a o faaauau ona tatou tauaofia ma fafagaina i lana laoai.—Faatusatusa i le Teuteronome 16:14, 15.
[Pusa i le itulau 5]
Aogā o le Leai o se Fuafuaga mo le Sauniunia o Mea Taumafa
◼ Faaitiitia ai galuega i le taimi a o leʻi amata, a o faagasolo ma pe a uma le polokalama o le tauaofiaga, ma maua ai se taimi mo nisi aufaatasiga
◼ E lē tau vaaia ai mea e faaaogā mo le gasesega o mea taumafa
◼ E toatele ai tagata o le a sili atu ona uai atoatoa i le polokalama faaleagaga
◼ O le a toatele atu ai le ʻau tauofo e mafai ona fesoasoani i isi matagaluega
◼ O le a tele ai le taimi e tuliloa ai isi faanaunauga faatiokarate
O Mea ua Fautuaina e Aumai mo le Malologa i le Aoauli
◼ O se taumafataga māmā, faigofie, ma susua
◼ O sanuisi, o fualaau ʻaina suamalie, o keke
◼ O fagu suamalie, o vaiinu, o niu, po o faguvai
AUA le Aumaia i le Totonu o le Maota o le Tauaofiaga
◼ ʻAva malosi
◼ Cooler po o paelo lapopoa