Le Tala o le Malo ua Fetaui ma o Tatou Taimi, e Ao ona Tufa i le Lalolagi Aoao

¹ I le Aso Sa, Aperila 23, o le a fofogaina ai se lauga lautele faapitoa i le mataupu e faateia ai mafaufau o tagata e faapea, “Ua Lata mai le Iuga o Lotu Sese.” I le iuga o le sauniga i lena aso, e tatalaina ai le sāvali faaoso naunau e fa ona itulau, o le Tala o le Malo. O le feau e talafeagai ma o tatou aso o loo iai, o le a tufaina atu i le lalolagi aoao mo se vaitaimi e tolu vaiaso e amata ia Aperila 24 e oo ia Me 14.

² I vaega uma o le lalolagi, ua fememeai ai tagata. Po o fea lava o nonofo ai, ua latou pagatia i faafitauli. O le Tala o le Malo, o le a avea o se mea e naunau i ai ē o loo manatunatu mamafa moni i mea o tutupu, auā o le a faasino saʻo ai i latou i le Afioga a le Atua, le puna lē masese o taʻiala mo tagata. (Sala. 119:105) Ua tatou faatalitalia uma ma le naunau ina ia maua se kopi o le Tala o le Malo pe a tatalaina ia Aperila 23. I le taimi nei, e tele mea e ao ona fai i le sauniunia o lenei tauiviga malosi e tolu vaiaso.

³ Faalaeiau i Tagata Uma ina ia Faia ai se Sao ma le Maelega: O ai e mafai ona faia se sao i le galuega? E mautinoa o i latou uma ua avea ma tagata talaʻi, o le a naunau e faia faapea! Ae faapefea tagata aʻoga o le Tusi Paia o loo auai e lē aunoa i sauniga a le faapotopotoga? O nisi ua fai si leva o auaufaatasi ma i tatou ma o loo agaigai pea i luma. Afai ua ogatasi o latou olaga ma mataupu silisili faale-Tusi Paia, po ua agavaa ea i latou e faitaulia o ni ē folafola le Malo? O le tagata talaʻi o loo faia le suesuega, e mafai ona talanoaina le mataupu ma le tagata aʻoga, ma afai ua manao le tagata aʻoga e auai i le auaunaga i le fanua, ona autalu lea e ni toeaina se toalua ma ia mataupu i le itulau e 98 ma le 99 o le tusi Organized to Accomplish Our Ministry. E ao ona faia vave lenei mea ina ia mafai ai e i latou ua agavaa e avea o ni tagata talaʻi lē papatisoina ona faia atoatoa se sao i le tauiviga. O tagata aʻoga o le Tusi Paia e leʻi agavaa e faitaulia o ni tagata talaʻi e leʻi papatisoina, e mafai ona faalaeiauina ina ia tufa atu lenei Tala o le Malo talafeagai i ē e masani ai po o tagata o aiga.—Tagaʻi i Le Olomatamata, Iuni 6, 1989, itulau 23, palakalafa 8.

⁴ O lenei galuega e lē faigata; e mafai e tagata uma ona faia ai se sao. E mafai e mātua ona faaaofia ai ni faataʻitaʻiga i le Tala o le Malo ina ia saunia lelei ai tagata uma o le aiga e taulimaina le Tala o le Malo i le galuega talaʻi mai lea fale i lea fale. E masani lava ona sili ona lelei se taulimaga puupuu. Pe a uma sina upu tomua puupuu, ofo loa le Tala o le Malo i lē ona le fale, ma faalaeiau ia te ia ina ia faitau i ai. Pe a faaalia e ē ona fale le fiafia, ia faamau i lalo ina ia mafai ai ona toe foi atu e asi ina ia faatupu atili ai le naunau. (1 Kori. 3:6, 7) Ina ia taulau manuia, ia fai se taulimaga faigofie ma saunia lelei.

⁵ O le a “tele mea e fai” ia Aperila ma Me. I le lomiga o le isi masina o sosoo mai o La Tatou Faiva o le Malo, o le a saunia ai isi faamatalaga atili i le faaopoopoga o le a faaulutalaina “Tele Mea e Fai i le Galuega a le Alii.”—1 Kori. 15:58, NW.

Ua Foaiina i ai o Mea e Tele—E Sueina foi i ai o Mea e Tele

¹ Maeu le faamanuiaina o i tatou ona o le mauaina o le upu moni! Ona o lo tatou tuuina atu ia Ieova, ua “tuuina mai ai . . . le tala lelei” ia te i tatou. (1 Tesa. 2:4) O lenei mea, ua aumaia ai ia i tatou se tiute tauave sili. Na fetalai Iesu e faapea: “O i latou ua foaiina atu i ai o mea e tele, e suʻeina atu foi ia te ia o mea e tele.”—Luka 12:48e, NW.

² Maeu le moni o na upu! Talu ai, o i tatou uma lava ua faamanuiaina i le poto i le Afioga a le Atua, i se aufaatasiga matagofie faaleauuso, ma se faamoemoe ofoofogia, ua mafai ai ona fai atu ma le tonu, ua tuuina mai mea e tele ia i tatou. Ua talafeagai foi la ona faatalitalia o mea e tele mai ia i tatou.

³ Tausia se Vaaiga Saʻo o Mea e Manaomia: Ua faia e nisi tagata se faaiuga e faapea, ua tele naua mea e manaomia mai ia i tatou. Ona o Iesu o le Ao o le Faapotopotoga Kerisiano, ua ia filifilia ai “mea e manaomia” mo lona faagasologa lelei. (Efe. 4:15, 16) Ua ia faamautinoa mai ia i tatou e faapea, ‘o lana amo e avegofie ma o lana avega e māmā ia.’ (Mata. 11:28-30) E faapalepale ma le agalelei o ia ia te i latou o ē e i ai mea e gata mai ai lo latou malosi. (Luka 21:1-4) Pe afai la tatou te faia le mea e aupito sili ona tatou mafaia, e tusa pe tele pe itiiti, o le a faamanuiaina i tatou.—Kolo. 3:23, 24.

⁴ Fesili ifo ia te oe lava, ‘Po o faamuamua i loʻu olaga mea tau i le Malo? Po o ou faaaogā loʻu taimi ma aʻu alamanuia i se auala e viia ai le suafa o le Atua ma aogā ai i isi? Po o ou iloaina o loʻu fiafiaga sili e maua mai i le auauna atu ia Ieova na i lo o le fiafiaga manatu faapito i mea faitino?’ O ā tatou tali faamaoni i nei fesili e faaalia ai uunaiga mai o tatou loto.—Luka 6:45.

⁵ Aloese mai le Tofotofoina e Faia le Mea Leaga: Sa leʻi faapea muamua ona i ai ni tofotofoga ma ni omiga e uiga i le manatu faapito, le matapeʻapeʻa, ma le manao tele i tuʻinanauga o le tino. I aso uma lava, tatou te fesagai ai ma luʻi e faatatau i tulaga tau amio, faapea ma faaosoosoga ina ia tatou faagutugutulua ai. Ina ia faafetaiaia ma le manuia nei luʻi, e tatau ona tatou ole atu ia Ieova ina ia fesoasoani mai ia i tatou. (Mata. 26:41) E mafai ona ia faamalosia i tatou e ala i lona agaga. (Isa. 40:29) O le faitauina o le Afioga a le Atua i aso uma o se fesoasoani sili lea. (Sala. 1:2, 3) O le aoaia o le tagata lava ia ma le pulea totino, e telē foi sona sao i ai.—1 Kori. 9:27.

⁶ E lē lava le na ona manao e faia le mea lelei—e tatau foi ona tatou ʻinoʻino i le mea leaga. (Sala. 97:10) O lona uiga, aua neʻi faatupuina i le loto se moomooga e fia manao i na mea leaga. Ua lisiina mai i le Faataoto 6:16-19 mea e fitu e inosia e Ieova. E manino lava la, afai e manao se tasi ina ia fiafia mai Ieova ia te ia, e tatau foi ona ʻinoʻino i na mea. Ona ua faamanuiaina i le maua o le poto saʻo o le upu moni, e tatau ai ona tatou mananao e gaoioi e ogatasi ma lena poto, i le taulaʻi pea o o tatou mafaufau i mea lelei.