Ua Alagaina e le Tauaofiaga Itumalo se Valaau e Faagaeeina Ai!—Ia Vivii atu ma le Olioli ia Ieova i Lea Aso ma Lea Aso!

¹ Na fesili le aposetolo o Paulo e faapea: “A faaletonu le leo o le pu, o ai ea se na te sauni e tau?” (1 Kori. 14:8) Pe na leotele ma manino le valaau na alagaina atu i le Tauaofiaga Itumalo “O Ē Vivii ma le Olioli”? Ioe, e mautinoa lava. O le ‘⁠Vivii ia Ieova ma le olioli i aso uma,’ sa avea o se feau e faagaeetia ai! Pe na uunaia ai lou loto i lenei valaau ina ia gaoioi? E anoanoai mafuaaga malolosi i le polokalama o le tauaofiaga e ao ai ona tatou vivii pea lava i le Tupu o le vavau, o Ieova.—Sala. 35:27, 28.

² Ua faailoa mai e le lagi matautia le mamalu o Ieova i “le tasi aso i le tasi aso.” (Sala. 19:1-3) Afai e vivii pea foafoaga faiola e leai ni leo ma lē mafai ona gaoioi i viiga o Ieova, pe e lē tatau ai ea la ona faagaeetia i tatou o tagata fai mafaufau e sii aʻe o tatou leo e vivii ai ia te ia i taimi uma lava ona o ona uiga e lē mafaatusaina ma mea ua ia faataunuuina? O ai e sili atu ona onomea ma tatau i ai a tatou viiga ma le olioli nai lo o Lē e sili ona maualuga na Foafoaina i tatou?—Sala. 145:3, 7.

³ Mai Lea Aso i Lea Aso: Na tusi mai le faisalamo faagaeeina e faapea: “Ia outou talaʻi atu [“le tala lelei,” NW] o lana faaolataga i lea aso ma lea aso. Auā e silisili Ieova, e tusa foi ona matuā viia o ia.” (Sala. 96:2, 4) Pe na o paeonia e faatatau i ai lenei mea? E leai! Po o lona uiga la, o i tatou uma lava e tatau ona talanoa atu i isi e uiga ia Ieova i so o se taimi ma i so o se mea tatou te mafaia, e oo lava i aso tatou te lē o auai ai i le faiva mai lea fale i lea fale? Ioe! O le manaoga ina ia vivii atu ia Ieova i aso uma ma taʻu atu i isi e uiga i lana auala o le faaolataga ua faanatinati. E tatau ona iloa e tagata o Ieova o le Tupu e Faavavau ma ua Ia tuuina atu le pule i le lalolagi i Lona Alo faamamaluina, o Iesu Keriso. O le alofa mo Ieova ma tagata o le a mafai ai ona tatou talanoa atu pea e uiga i lenei feau ma e uiga i ana sauniuniga mo le faaolataga i so o se mea lava e mafai ona maua ai tagata.—Sala. 71:15.

⁴ I aso uma lava o lana faiva i le lalolagi, na faataatia ai e Iesu Keriso le faaaoaoga sili ona lelei i le avea o sē vivii tuusaʻo atu ia Ieova. Na ia faapea mai: “Ou te faafetai [“vivii,” NW] ia te oe, loʻu Tamā e, le Alii o le lagi ma le lalolagi.” (Mata. 11:25) E moni lava e tusa ai ma lana fetalaiga, e so o se mea lava na iai Iesu, sa vivii o ia ia Ieova i luma o le lautele. Ma e so o se mea foi sa faapotopoto ai tagata—pe i sunako, i le malumalu i Ierusalema, po o luga o se mauga, po o le matafaga—sa vivii ai lava o ia ia Ieova. Afai tatou te mulimulituʻi i tulaga aao o Iesu e ala i le tausisia i aso uma o se gaoioiga maumauai e faasilisiliina ai Ieova i le lautele, o le a tatou maua ai ni iuga fiafia e olioli ai.

⁵ Tali atu i le Valaau: Po o le a e tali atu ea i le valaau ia vivii ia Ieova i luma o le lautele i aso taitasi? Ia manatua, e lē avea le matua po o le laitiiti ma mea e taofia ai. Ua valaaulia e le Salamo 148:12 tane talavou, o taupou, o toeaina, ma tama ina ia vivii ia Ieova. Talavou e, po o le a outou vivii ea ia Ieova i le lotolotoi o a outou aumea i le aʻoga ma faiaʻoga i lenei tausaga fou faaleaʻoaʻoga? Tagata matutua e, po o faalogo i latou o outou faigaluega faatasi e uiga ia Ieova ma ana sauniuniga pe a iai se taimi talafeagai e talanoa faatasi ai? E tatau ia i tatou uma lava ona avea le talanoa e uiga ia Ieova o se vaega tele o lo tatou olaga e pei o le mānava ma le ʻai. E tusa lava pe lē faalogo mai tagata e lē manatu mamafa i mea o tatou fai atu ai, ae e iai Lē o faafofoga mai, ma o le a ia tauia i tatou.—Mala. 3:16.

⁶ A o lalata tele mai le iuga o le faiga o mea, ua oo atu ai le valaau i tuluʻiga uma o le lalolagi e faapea: “Ia outou vivii atu ia Ioa!” (Sala. 106:1) Seʻi faaleo tele atu la tatou alaga o le viiga a o mavae atu aso taitasi ina ia iloa e tagata uma e faapea, o Lē e ou le suafa o Ieova o le Silisili ese i le lalolagi uma.—Sala. 83:18.