Ia Tautala atu ma le Lototele
1 I le faagasologa o tausaga e lei leva tele atu, ua faateleina ai le faafaigata i tagata talaʻi i nisi vaipanoa ona talanoa atu i tagata i o latou aiga. E toatele ua lipotia mai e faapea i a latou oganuu, e silia i le 50 pasene o tagata e lē iai i aiga i taimi e asiasi atu ai mai lea fale i lea fale. O le iuga, ua lē fua mai ai le tele o le taimi o faaaluina.
2 I tausaga ua leva, sa maua ai le toatele o tagata i aiga i le Aso Sa, lea sa vaai lautele i ai o se aso mālōlō. Ua suia aganuu. Ua taatele i aso nei le faigaluega o tagata i a latou galuega masani, tausiaina manaoga o le aiga pei o le faia o faatauga, po o le auai i ni faafiafiaga, ia e masani ona ave ese atu ai i latou mai o latou aiga. Ua oo ai lava la i Aso Sa, ua avea ai foi o se faafitauli le faafesootaia o tagata mai lea fale i lea fale.
3 Pe a lē o iai tagata i aiga, o lona uiga moni lava la, o loo i se isi mea. Ae talu ai o lo tatou sini ia talanoa atu i tagata, aisea la e lē talanoa atu ai ia i latou ia tatou te fetaiai—i luga o le auala, i le maketi, po o le nofoaga o galuega. Sa fai ma masani a Paulo le faalatalata atu i “e na feiloai ma ia” ina ia avatu ia i latou se molimau. (Galu. 17:17) Na faamaonia le fua mai o lea ituaiga o molimau, ma o se ituaiga foi lea o molimau e fua mai i o tatou aso.
4 Pe a tatou ō atu mai lea fale i lea fale, e masani ona tatou feiloai ai ma tagata savavali pe atonu o loo faatalitali mo se tasi. I aso lagilelei, atonu latou te nofonofo ai i nofoa o pāka po o le galulue, pe fufulu foi a latou taavale. O se ʻataʻata atu pei e te lua masani ma se faafeiloaiga faaleuo atonu e pau lea o le mea tatou te manaomia ia amata ai se talanoaga. Afai latou te nonofo latalata ane iina, e mafai lava foi la ona tatou taʻua faapea na semanu a tatou misia i latou i o latou aiga ae o lea ua tatou fiafia ua maua lea avanoa e talanoa ai ma i latou. E ala i le tausolomua ona faaalia o le lototele, e toatele ua olioli ai i mea tutupu e tauia ai.
5 Maua Iuga Ona o le Lototele: Na taʻua e se isi uso e faapea e faalatalata atu o ia i tagata o loo tutū, faatali mo se pasi, savalivali e evaeva, po o le nonofo i totonu o a latou taavale. Faatasi ma se ʻataʻata mafana ma se leo fiafia, e faalatalata atu ai o ia e pei o se uo tuaoi o loo fia asiasi atu. I lea auala, e lē gata ua ia tuua ai le tele o tusi, ae ua ia amataina ai foi ni suesuega faale-Tusi Paia.
6 A o asiasi atu se tasi uso ma lona toʻalua mai lea aiga i lea aiga, ae latou fetaui ma se fafine o tau saʻe mai se faatauga telē lava. Na la amataina loa se talanoaga i le faamālō atu ia te ia i lona finafinau i le tausiaina lelei o manaoga o lona aiga. Na la fesili atu: “Ae o ai la e mafai ona faamalieina manaoga o tagata?” Na faaosofia i lena mea le fiafia o le fafine. Na taʻitaʻia atu lea talanoaga puupuu i se valaaulia mai e ō atu i lona aiga, lea na amata faia ai se suesuega faale-Tusi Paia.
7 O lea la, o le isi taimi e te molimau atu ai mai lea aiga i lea aiga, pe i le Aso Sa po o i se isi lava aso o le vaiaso, ma e tau atu e lē o iai tagata i o latou aiga, aisea e lē faaosofia atili aʻe ai lou lototele e tautala atu i tagata tou te fetaiai—i luga o le auala po o i isi mea? (1 Tesa. 2:2) E te ono maua ai se auaunaga e fua mai, ma e maua ai le olioli e sili atu i lau auaunaga.