Ia Avea ma Ē Anaana—Ae Lē na ona Faalogologo
1 Ua teuloto e Kerisiano moni i aso nei le apoapoaiga a le Tusi Paia ina ia avea ma ē anaana i le upu, ae lē na ona faalogologo. (Iako. 1:22) O lenei mea, ua faaesea mamao ai lava i latou mai i ē, e ui lava ina latou faapea mai o i latou o Kerisiano, ae ua na ona auauna atu i le Atua i o latou laugutu. (Isa. 29:13) Na taʻua manino mai e Iesu e faapea, e na o i latou e faia le finagalo o le Atua o le a faaolaina.—Mata. 7:21.
2 O le tapuaiga e faia e aunoa ma ni galuega o le amioatua e leai se aogā. (Iako. 2:26) O lea, e tatau ai ona tatou fesili ifo ia i tatou lava e faapea: ‘E faapefea i aʻu galuega ona faamaonia ai e moni loʻu faatuatua? O le ā o faaalia ai o loo oʻu ola moni e ogatasi ma mea o loo oʻu talitonu i ai? E mafai faapefea ona ou faataʻitaʻi atoatoa atu ia Iesu?’ O tali faamaoni i nei fesili o le a fesoasoani ia i tatou e iloa ai po o ā agaʻigaʻi i luma ua tatou faia po o manaomia foi ona faia i le faatinoina o le finagalo o le Atua.
3 I le avea o ni soo e mulimulituʻi i tulagaaao o Iesu, o lo tatou sini autū i le olaga, e tatau ona tutusa ma lea na faaalia e le faisalamo: “Matou te vivii atu pea lava i le Atua, matou te faaneenee foi e faavavau i lou suafa.” (Sala. 44:8) O le faa-Kerisiano, o se auala lea o le olaga e faaalia mai lava i aso uma i mea uma tatou te faia. Maeu le faamalieina ai a o tatou faatinoina i a tatou gaoioiga uma lo tatou faanaunauga ma le loto atoa e vivii atu ia Ieova!—Fili. 1:11.
4 O le Tuuina atu o le Viiga ia Ieova e Aofia ai Mea e Sili atu nai lo o le Tau ina Ola i se Olaga Amio Saʻo: Pe ana faapea e na o le amio lelei lava le mea e manaomia e le Atua, e mafai lava ona tau ina tatou uai atu i le faaleleia o o tatou uiga totino. Ae peitai, o la tatou tapuaiga e aofia ai foi ma le folafolaina atu i nuu uma o lelei o Ieova ma faalauiloa atu i le lautele lona suafa!—Epe. 13:15; 1 Pete. 2:9.
5 O le talaʻiina o le tala lelei i le lautele, o se tasi lea o galuega e aupito sili ona tāua ua tatou faia. Sa tuutoina e Iesu ia lava i le faia o lenei galuega, auā na ia silafia, e iu ai i le ola e faavavau mo i latou o ē o le a faalogo i ai. (Ioa. 17:3) I aso nei, e faapena foi ona tāua “le auauna i le upu,” e na o lena lava le auala e mafai ona faaolaina ai tagata. (Galu. 6:4; Roma 10:13) I le iloa lelei e maua ai aogā e sili mamao atu, ua mafai ai ona tatou talisapaia le mafuaaga na apoapoai mai ai Paulo ia i tatou ina “ia talaʻi atu le upu,” ma ia ‘faia i se tulaga faanatinati.’—2 Timo. 4:2.
6 O le ā le tele e tatau ona faaaafia ai o tatou olaga e vivii atu ai ia Ieova? Na faapea mai le faisalamo, sa iai pea i lona mafaufau i le aso atoa. Pe e lē o le lagona ea lena o loo iai ia i tatou? Ioe, ma o le a tatou manatu i feiloaiga uma ma se isi tagata e faapea, o se avanoa lelei lea e mafai ona talanoa atu ai e uiga i le suafa o Ieova. O le a tatou vaavaai mo ni avanoa talafeagai e tataʻi saʻo atu ai a tatou talanoaga i mataupu faaleagaga. I le tele e mafai ai, o le a tatou auai e lē aunoa i gaoioiga tau i le faiva i le fanua ua faamaopoopoina e le faapotopotoga. O i latou o loo i se tulaga lelei, e mafai ona manatunatu mamafa i le auaunaga faapaeonia, auā o le a fesoasoani lenei mea ia i tatou e faamuamua ai le galuega talaʻi i o tatou olaga i aso faisoo. Ua faamautinoaina i tatou e le Afioga a le Atua e faapea, o le maumauai i le faia o le finagalo o le Atua, o le a tatou fiafia ai.—Iako. 1:25.