Ia Faaaogā Lelei le Tusi o le Talavou ia Fepuari
1 I le faagasologa o Fepuari, o le a tatou ofoina ai le tusi o le Talavou. Ma le mautinoa, o le a tele avanoa tatou te ofoina ai lenei fesoasoani e silisili ona lelei mo suesuega faale-Tusi Paia i le fanua a o tatou ō atu mai lea fale ma lea fale. Atonu e te mauaina le aogā o fautuaga o loo mulimuli mai i le saunia o lau taulimaga.
2 A maeʻa se faafeiloaiga talafeagai, atonu e te taʻua se mea faapenei
◼ “E te talitonu o le ā le faafitauli sili o loo fesagai ma tagata talavou i aso nei?” Atonu e eseese tali, e faalagolago i le mea na tupu totino i lē o loo e talanoa i ai. Po o le ā lava le tali, e ao ona iai i lou mafaufau se mataupu talafeagai i le tusi, ona faaalia lea o lena mataupu pe a ofoina le tusi. Atonu e mafai loa ona e faapea atu: “E ao ona tatou naunau uma i talavou i aso nei. E matuā faapena Lē na Foafoaina Mea, ma e finagalo o ia ia latou olioli i le olaga. [Faitau le vaega muamua o le Failauga 11:9.] Ae pe o tatou vaaia ea o fiafia moni tagata talavou i aso nei? O loo latou fesagai ma le tele o omiga ma faafitauli e mafai ona aveesea ai lo latou fiafiaga. O le tele o o latou faafitauli e mafai ona alofia pe a latou iloa le mea o loo fetalai mai ai Lē na Foafoaina Mea. O se puipuiga le poto. O le poto i le Afioga a le Atua e aogā faapitoa i lenei taimi. E mafai ona puipuia ai le talavou mai faanoanoaga ma mala. [Faitau le Failauga 11:10 ona faatomua atu lea o le tusi i le faaaogaina o le itulau e 144.]
3 Pe afai o oe o se matua, atonu e te fiafia e faataʻitaʻi se feiloaiga faapenei
◼ “Ona o se matua, e mautinoa o le a e ioe faapea o le tausiaina aʻe o fanau i aso nei e aumaia ai le tele o luʻi. Ua ou iloaina o le tulaga moni lena. E toatele mātua ua latou iloa le moni o nei upu i le Tusi Paia. [Faitau le Faataoto 22:6.] O se fesoasoani lelei mo mātua lenei lomiga Lou Talavou—Mauaina mai ai Aogā Silisili. Mātau nisi o ulutala o mataupu. [Taʻua ni nai mataupu o le a naunau i ai lē ona le fale.] Ou te mautinoa o le a fesoasoani lenei tusi ia te oe o se matua i le aʻoaʻoina o lau fanau. [Ona faailoa lea o le tusi.]”
4 Atonu e mafai ona e fausia aʻe se naunau i le faaaogāina o lenei fautuaga:
◼ “E mafai faapefea e se tagata talavou ona manuia i le olaga? Mātau lenei tali mai le Afioga a le Atua, le Tusi Paia. [Faitau le Salamo 1:1-3.]” Saili ia mautinoa po o le ā atonu o naunau patino i ai i le faaalia o Mataupu o loo Iai i le tusi, ma faaali le aogā tele o le tusi i le fesoasoani i se tagata ina ia manuia i le olaga.
5 Aisea e lē asiasi atu ai i faiaʻoga ma pule o aʻoga? Ia faamasani i latou i tusi o le Talavou, ma faaali ia i latou le matuā aogā i le fesoasoani i tagata talavou. Taʻu atu ia i latou le auala na aogā ai ia te oe faamatalaga o loo iai. Faailoa ia i latou e faapea o lenei lomiga e mafai e i latou ma a latou tagata aʻoga ona mauaina. Atonu o le a faateʻia ma le fiafia oe i iuga e te maua.
6 Seʻi tatou taumafai e tuuina atu lenei meafaigaluega tāua i lima o le toatele o tagata e mafai ai a o faagasolo lenei masina. Tau ina ia faateleina lou olioli ma faamanuiaga e tele a o e taulimaina le tala lelei faatasi ma le tusi o le Talavou ia Fepuari.