Le Olomatamata ma le Awake!—O ni Mekasini o le Upu Moni mo le Taimi Tonu

“Ieova e, le Atua faamaoni, ua e togiolaina aʻu.”—SALAMO 31:5.

1, 2. (a) Na faapefea e se tuafafine ona lagona e uiga i se mea na ia faitau ai i Le Olomatamata? (e) O ā fesili ua fesiligia e uiga i a tatou mekasini?

“FAAFETAI tele lava mo le faamatalaga ofoofogia i Le Olomatamata i le mataupu, ‘E Mafai ona E Maua Faamafanafanaga i Taimi o Mafatiaga.’a O le tele o manatu na outou aumaia ai, e matuā fetaui lelei ma faalogona sa ou taumafai e manumalo ai; e pei lava na tusia saʻo mai lenei mataupu ia te aʻu. O le taimi muamua lava na ou faitauina ai, sa maligi ai oʻu loimata. E matuā ofoofogia lava le iloa e faapea, o loo iai se tasi o loo ia iloaina oʻu faalogona! Ua ou matuā fiafia tele e avea ma se tasi o Molimau a Ieova. E leai se isi mea e mafai ona tatou maua ai ni folafolaga e uiga i le ola e faavavau i le Parataiso i le lumanai lata mai, ma, i le taimi nei, o se faamafanafanaga mo i tatou! Faafetai tele lava. Ia faitau miliona ona faafetai atu,” o le tusi mai lena a se tuafafine Kerisiano.

² Pe sa e lagona ea faapena i se taimi? Pe sa iai ea se mea faapena i Le Olomatamata po o lona soa, le Awake!, sa foliga mai na tusia faapitoa lava mo oe? O le ā le mea e uiga i a tatou mekasini na e faagaeeina ai le fiafia o loto o tagata? E mafai faapefea ona tatou fesoasoani i isi ina ia maua aogā mai le feau faasaoola o loo iai i na mekasini?—1 Timoteo 4:16.

Mekasini e Folafolaina le Upu Moni

3. Mo le ā le mafuaaga lelei ua pāʻia ai e mekasini o Le Olomatamata ma le Awake! loto o le toatele o le au faitau?

³ O Ieova “o le Atua faamaoni.” (Salamo 31:5) O lana Afioga, le Tusi Paia, o se tusi o le upu moni. (Ioane 17:17) E tali lelei mai tagata loto faamaoni i le upu moni. (Faatusatusa i le Ioane 4:23, 24.) O se tasi o mafuaaga ua faagaeetia ai ma le loloto e Le Olomatamata ma le Awake! loto o le faitau miliona o le au faitau, ona o mekasini e faamaoni ma le upu moni. O le mea moni, o le pogai na amata ai ona lolomia Le Olomatamata ona o le luʻi e faatatau i le faamaoni i upu moni o le Tusi Paia.

4, 5. (a) O ā ni tulaga na taitaia atu ai C. T. Russell e lomiaina le Olo Matamata? (e) Ua faapefea ona faaaogāina le mekasini o Le Olomatamata e le “auauna faamaoni ma le mafaufau”?

⁴ I le 1876, na amata ai ona faatasi atu Charles T. Russell ia Nelson H. Barbour o Rochester, i Niu Ioka. Na saunia e Russell tupe e toe faaolaola ai le lomiaina o tusi faalelotu a Barbour e taʻua o le Herald of the Morning, na avea ai Barbour ma faatonu sili, ae avea Russell ma faatonu lagolago. Peitai, pe tusa o le tausaga ma le afa mulimuli ane ai, i le lomiga o le Herald, o Aokuso 1878, na tusia ai e Barbour se mataupu e faafitia ai le aogā faatogiola o le maliu o Keriso. Na tali atu i ai Russell, o lē sa toeitiiti lava 30 tausaga e laitiiti ai ia Barbour, i se lomiga i le isi mataupu na sosoo ai na lagolagoina ai le togiola, lea na ia faasino atu i ai e faapea, “o se tasi lea o aʻoaʻoga e pito sili atu ona tāua o le Afioga a le Atua.” (Mataio 20:28) Ina ua uma ni taumafaiga faifai pea o fefulifulisaiga faale-Tusi Paia faatasi ma Barbour, ona faaiu ai loa lea mulimuli ane e Russell ina ia faamutaina uma fesootaiga ma le Herald. Na amata i le lomiga o Iuni 1879 o lena lava tusi, ona lē toe aliali mai le igoa o Russell e faapea o se faatonu lagolago. I se masina mulimuli ane, na amata ai loa e Russell ua 27 tausaga lona matua i lena taimi ona lomiaina le Zion’s Watch Tower and Herald of Christ’s Presence (lea ua lauiloa nei o Le Olomatamata Faasilasilaina le Malo o Ieova), lea na amata ai lava i inā ona lagolagoina upu moni faale-Tusi Paia, e pei o le togiola.

⁵ Mo le 114 tausaga ua mavae, ua avea ai Le Olomatamata e pei o se loia tomai, ua na faavaeina ia lava e avea o sē e puipuia le moni o le Tusi Paia ma aʻoaʻoga. I le faagasologa, ua na mauaina ai le faatuatuaga mai le faitau miliona o le au faitau talisapaia. O loo matuā lagolagoina malosi ai pea le togiola. (Tagai, mo se faaaoaoga, i le lomiga o Iuni 15, 1991.) Ma o loo faaauau pea ona avea ma meafaigaluega autū a “le auauna faamaoni ma le mafaufau” ma lona Vaega Pule mo le faasilasilaina o le Malo o Ieova ua faavaeina, ma faasoasoaina mai meaai faaleagaga “i ona itu aso.”—Mataio 24:14, 45.

6, 7. O le ā sa avea ma sini autū o le Golden Age e pei ona taʻua mai, ma o le ā e faaalia ai e faapea ua tali mai tagata mafaufau i lana feau?

⁶ Ae faapefea le mekasini o le Awake!? Mai lava i lona amataga, o loo lagolagoina ai foi e le Awake! le upu moni. Sa faaigoaina muamua o le Golden Age, o lenei mekasini ua fuafuaina mo le tufatufaina atu i le lautele. E tusa ai ma lona sini, sa taʻua i le lomiga muamua, ia Oketopa 1, 1919, e faapea: “O lona fuafuaga, o le faamalamalamaina lea e tusa ai i le malamalama o le atamai mai le Atua i le uiga moni o mea mataina sili o aso nei, ma faamaonia ai i mafaufau o tagata e ala i faamaoniga e lē mafesiligia ma faatalitonuina ai e faapea, o le taimi o faamanuiaga e sili atu mo tagata ua i faitotoa.” Sa tali mai tagata mafaufau i le feau a le Golden Age. Mo le tele o tausaga, sa sili atu lona faasalalauina na i lo o Le Olomatamata.b

⁷ Peitai, o le alumia o Le Olomatamata ma le Awake!, ua sili atu i le mea moni e faapea, ua la lomiaina aʻoaʻoga moni ma faamatala atu uiga faavaloaga o tulaga o le lalolagi. Ae maise lava i le sefulu po o le luasefulu tausaga ua mavae, ua puea ai e a tatou mekasini loto o tagata mo se isi foi mafuaaga.

Mataupu Fetaui mo le Taimi Tonu ua Pāʻia ai Olaga o Tagata

8. O le ā le fetuutuunaiga o tusitusiga na faia e Iuta, e uunaia ai lana au faitau e teena ai le ā le taaʻiga i totonu o le faapotopotoga?

⁸ Pe tusa ma le 30 tausaga talu ona mavae le maliu ma le toetu mai o Iesu Keriso, na fesagai ai le tusitala o le Tusi Paia o Iuta ma se luʻi. O amioga lē mamā, o tagata pei ni manu ua iai faatasi i le lotolotoi o Kerisiano. Na mafaufau ai loa Iuta e tusi atu i uso Kerisiano e uiga i se mataupu tau i aʻoaʻoga—le faaolataga lea ua masani ona taofia e Kerisiano faauuina. Na i lo o lena, e ala i le taitaiga a le agaga paia, na ia iloa ai le tatau ona uunaia o lana au faitau ina ia teena taaʻiga e faaleagaina ai o loo i totonu o le faapotopotoga. (Iuta 3, 4, 19-23) Na fetuutuunai Iuta e tusa ai ma lea tulaga, ma na saunia ai fautuaga fetaui lelei ma lena taimi, ma na faafetaiaia ai manaoga o ona uso Kerisiano.

9. O le ā o aafia ai i le sauniaina o mataupu i le taimi fetaui lelei mo a tatou mekasini?

⁹ E faapena foi, o le sauniunia o mataupu i lona taimi fetaui mo a tatou mekasini, o se luʻi i le avega tauave. Ua suia taimi, e faapena foi i tagata—o o latou manaoga ma o latou fiafiaga ua lē tutusa ma ia sa iai i le sefulu tausaga po o le luasefulu tausaga ua teʻa. Na matauina e se ovasia femalagaai talu ai nei e faapea: “Ina ua avea aʻu ma Molimau mai le 1951 seia oo i le 1959, o lo matou faalatalata atu e suesueina le Tusi Paia ma tagata, sa faapitoa lava i aʻoaʻoga—aʻoaʻo ia i latou le upu moni e uiga i le Tolutasi, le afi i seoli, le solu, ma isi lava aʻoaʻoga. Ae i le taimi nei, e foliga mai, ua matuā tele lava faafitauli ma faigata i olaga o tagata, o lea ua tatau ai ona tatou aʻoaʻoina i latou i le auala e ola ai.“ Aisea ua faapea ai?

10. Aisea e ao ai ona lē faateia i tatou e faapea, ua iai se gasologa mautu o le paʻū maulalo o mataupu fai a tagata talu mai le 1914?

¹⁰ E tusa ai ma “aso e gata ai,” ua valoia e le Tusi Paia e faapea: “O tagata amio leaga ma e taupelopelo, e alualu pea lava lo latou leaga, o loo faasese atu, ua faaseseina foi i latou.” (2 Timoteo 3:1, 13) O le mea lea, e lē o se mea e faateia ai i tatou, ona ua iai se gasologa mautu o le paʻū maulalo o mataupu a tagata talu mai le taimi o le iuga na amata mai i le 1914. O Satani, o lē ua saasaa lava lona taimi o totoe na i lo o se isi lava taimi, ua ia matuā faasasao atu lona ita tele i le sosaiete o tagata i le taimi nei sa leʻi faapea ona iai muamua. (Faaaliga 12:9, 12) O le iuga, o amioga ma le tāua o aiga ua matuā eseese mamao lava mai le mea sa iai i le 30 po o le 40 tausaga ua mavae. O tagata a lautele ua lē uai atu i tapuaiga e lē pei o le faitau sefulu tausaga faatoʻā mavae atu. Ua matuā faateteleina le solitulafono, ma ua manaomia ai i tagata le faaeteete sa leʻi faapea ona iai i le na o le 20 po o le 30 tausaga ua mavae.—Mataio 24:12.

11. (a) O ā ituaiga o mataupu o loo i mafaufau o tagata, ma ua faapefea ona tali atu i ai le auauna faamaoni ma le mafaufau i na manaoga? (e) Aumai se faaaoaoga i se mataupu i Le Olomatamata po o se Awake! na pāʻia ai lou olaga.

¹¹ O lea la, e lē o se mea e ofo ai e faapea, o mataupu tau i faalogona, i le lautele ma i le aiga, ua i mafaufau o le toatele o tagata. Ua tali mai ma le lototele le vasega o le auauna faamaoni ma le mafaufau i Le Olomatamata ma le Awake! e ala lea i le lomiaina o ona mataupu i lona taimi fetaui, na o loo fetaui lelei i manaoga moni o tagata, ma o loo matuā pāʻia moni ai lava o latou olaga. Seʻi manatunatu i ni nai faaaoaoga.

12. (a) Aisea na sauniunia ai mataupu e uiga i aiga e taitoatasi mātua mo Le Olomatamata i le 1980? (e) Na faapefea ona faaleo mai e se tasi tuafafine lona talisapaia mo mataupu e uiga i aiga e taitoatasi mātua?

¹² O luʻi i le aiga. Ina ua faailoa mai e lipoti o tala o le lalolagi aoao le matuā faateteleina o le aofai o mātua taitoatasi i aiga, sa saunia ai loa e Le Olomatamata faa-Peretania o Setema 15, 1980 ni mataupu faaoso manatu e pei ona faaulutala mai e faapea, “Aiga e Toatasi le Matua—Feagai ai ma Faafitauli.” E lua ni faamoemoega autū o le mataupu: (1) ina ia fesoasoani i le matua e toatasi e feagai ai ma faafitauli tupito o loo latou fesagai ma (2) ina ia fesoasoani i isi ina ia tele so latou silafia ma mafai ai ona latou faaalia le “alofa i le au uso” ma “tauasiasi atu” ma le faamaoni i aiga e taitoatasi mātua. (1 Peteru 3:8; Iakopo 1:27) E toatele le au faitau ua tusi atu e faailoa atu lo latou talisapaia mo le mataupu. Na tusi mai se tasi o matua e toatasi e faapea: “Sa maligi moni lava oʻu loimata ina ua ou vaai i le faavaa, ma ina ua ou tatalaina le mekasini ma faitau le faamatalaga, sa matuā tumu loʻu loto i le faafetai ia Ieova mo le sauniunia o ia faamatalaga i le taimi o manaomia ai.”

13. O le ā le talanoaga loloto o le loto mafatia na lomia i le Awake! i le 1981, ma o le ā na fai mai ai se tasi o le au faitau e uiga i ai?

¹³ Le luʻi tau i faalogona. O le mataupu e uiga i le loto mafatia sa amata ona talanoaina i Le Olomatamata ma le Awake! talu mai le 1960 seia oo i le 1969. (1 Tesalonia 5:14) Ae o se vaaiga fou ma le mautinoa i le mataupu sa aumaia i le faavaa o le Awake! o Setema 8, 1981 e faapea, “E Mafai ona E Manumalo i le Loto Mafatia!” E leʻi leva lava ae taunuu atu le anoano o tusi i le Sosaiete o le Olo Matamata, mai vaega uma o le lalolagi, e faailoa atu ai le talisapaia. Na tusi atu se tasi o tuafafine e faapea: “E mafai faapefea ona ou faailoaina atu i le pepa le faalogona o i loʻu loto? Ua 24 oʻu tausaga, ma i le sili atu i le sefulu tausaga ua mavae, sa tele lava taimi na ou mafatia ai. Ae i le taimi nei, ua ou lagona le latalata ia Ieova, ma faafetai ona ua ia tali mai i manaoga o tagata loto mafatia e ala mai i nei mataupu alofa, ma ou te manao e taʻu atu foi le mea lena ia te outou.”

14, 15. (a) Ua faapefea ona taulai atu a tatou mekasini i le mataupu e uiga i le faaleagaina o tamaiti? (e) O ā mataupu o i le mekasini na faagaeetia ai se tagata tietie solofanua i Ausetalia?

¹⁴ Le luʻi i le tulaga lautele. Na valoia mai e le Tusi Paia e faapea, “o aso e gata ai” o le a avea tagata “ma e alolofa i latou ia i latou lava, . . . o e le lotoaiga, . . . o e le taofi manao o le tino, o e faasaua, o e le alolofa i tagata amio lelei.” (2 Timoteo 3:1-3) O le mea lea, e lē ao ai ona faateia i tatou e faapea, o le faaleagaina o tamaiti ua faia i se fuatele i aso nei. O lenei mataupu na tuuina atu ai ma le manino le vaifofo i le mataupu “Fesoasoani mo Ē ua Aafia Fua i Faiga Mataifale” i Le Olomatamata faa-Peretania o Oketopa 1, 1983. I le valu tausaga mulimuli ane, na tusia ai i le faavaa le mataupu “Fofoina o Manua o le Faileagaina o Tamaiti” i le Awake! o Oketopa 8, 1991, sa sauniunia ai ma le faaeteete tele e avatu ai malamalamaga ma se faamoemoe mo ē ua afaina fua, faatasi ai ma le faamalamalamaina i isi ina ia mafai ai ona latou ofoina atu se fesoasoani aogā. O nei faasologa o mataupu na aumaia ai mai le au faitau se tali tele i le talafaasolopito o a tatou mekasini. Na tusi mai se tasi o tagata faitau e faapea: “O le malosiaga silisili o loʻu toe fuatai mai, o manatu faamafanafana ia ma faamatalaga faale-Tusi Paia o i nei mataupu. I le iloa e faapea e lē manatu māmā mai Ieova ia te aʻu, sa o se fesoasoani malosi lea. I le iloa e faapea, sa lē tuua toatasi na o aʻu, sa matuā faamafanafanaina ai.”

¹⁵ Na telefoni mamao atu se tagata tietie solofanua i Melbourne, i Ausetalia agaʻi i le ofisa o le Sosaiete o le Olo Matamata i Sydney, e faailoa atu lona lē fiafia i le siomaga o faia ai le tuuga solofanua. Na ia taʻu atu e faapea, o lea faatoʻā uma lava ona ia faitauina le Awake! o Mati 8, 1993 i le mataupu “Toso Teine—O se Faamatauga Matautia i se Fafine” ma na faigata ona ia talitonuina i le iai o se mekasini tautele faapea. Na ia tuufesili atu pe ā ma le 30 minute, ma na matuā fiafia tele o ia i tali na tuuina atu.

16. I ā auala e mafai ai ona e faataitaia lou talisapaia mo a tatou mekasini?

¹⁶ Ae e faapefea oe? Pe e leʻi pāʻia ea lou olaga e se tasi o mataupu faapitoa na lomia i Le Olomatamata po o le Awake!? Afai sa iai, e mautinoa la ua e lagonaina se uiga o le faafetai loloto e faatatau mo a tatou mekasini. E mafai faapefea ona e faataitaia lou talisapaia? E mautinoa lava e ala lea i lou faitauina e oe lava o lomiga taitasi uma. E mafai ai foi ona fai sau vaega i le tuuina atu o nei mekasini tautele i le lautele e mafai ai. E mafai faapefea ona faia lenei mea?

Ia Tufa atu i Isi!

17. O le ā e mafai ona faia e faapotopotoga e faateleina ai le tufatufaina atu o mekasini?

¹⁷ Muamua, e iai se mea e mafai ona faia e faapotopotoga taitasi uma. I le lomiga o Oketopa 1952 o le Informant (lea ua igoa nei o La Tatou Faiva o le Malo) sa faapea mai: “O le auala aupito sili atu ona aogā o le tufatufaina atu o mekasini, o le tufa atu lea mai lea fale i lea fale, ma mai lea faleoloa i lea faleoloa. O le mea lea, ua fautuaina ai e le Sosaiete e faapea, o le tufatufaina atu o mekasini i nei avanoa, ia avea o se vaega faifai pea o le faiva o le Aso o Mekasini.” O lena fautuaga o loo aogā pea i aso nei. Atonu e faia e faapotopotoga se faasologa faifai pea o le Aso o Mekasini, se aso ua faataatia ese faapitoa mo le molimau atu i le na o le faaaogāina o mekasini. Mo le tele o faapotopotoga, e mautinoa o aso Toonai ua faapitoa lava o se taimi lelei lea. Ioe, seʻi faataatia ese nei e faapotopotoga taitasi ni aso faapitoa po o afiafi mo galuega mekasini—mai lea fale i lea fale, mai lea faleoloa i lea faleoloa, i galuega i fetaulaiga o ala, ma i alā mekasini. E faaopoopo atu i ai, o le ā e mafai ona e faia e oe lava, le tagata talaʻi o le Malo, e fesoasoani atu ai ina ia faateleina le tufatufaina atu o mekasini?

18, 19. (a) E mafai faapefea i le naunau i a tatou Olomatamata ma le Awake! ona fesoasoani ia te oe e ofoina atu mekasini? (e) O le ā le aogā o se taulimaga puupuu, tuusao le manatu, pe a ofoina atu mekasini? (i) O le ā e faaalia ai le aogā o le tuuina atu o mekasini i aiga o tagata?

¹⁸ O le naunau i le “Olomatamata” ma le “Awake!” o se laasaga muamua lea. Ia iai se taimi e te faitau muamua ai i mekasini a o leʻi tufaina atu. A o e faitauina mataupu taitasi, ia fesili ifo ia te oe lava, ‘O ai o le a naunau i lenei mataupu? Mafaufau i ni nai upu e mafai ona e fai atu ai ina ia faagaee ai le naunau o le tagata i le mataupu. I le faaopoopo atu i le lagolagoina o le Aso o Mekasini faifai pea, aisea e te lē alu ai ma ave ni kopi ina ia mafai ai ona e faaaogāina avanoa taitasi uma e fetufaai ai na mataupu ma isi—pe a faimalaga po o le faia foi o se faatauga, ma pe a talanoa i ē tou te faigaluega faatasi, o tuaoi, o aumea i le aʻoga, po o faiaoga?

¹⁹ Ia faaauau pea ona faafaigofie lau taulimaga o se fautuaga lona lua lena. Sa faapea mai Le Olomatamata o Oketopa 1, 1956: “O se taulimaga e puupuu, e tuusao le manatu, e sili atu lena pe a ofoina mekasini. O le sini, o le tufaina atu lea o le tele o kopi. O le a faia lava e mekasini ia le ‘talanoaga.’” Ua iloa e nisi o le ʻau talaʻi le uigā o le filifili mai o se manatu se tasi mai se mataupu, ona ia faamatala lea i ni nai upu, ma tuuina atu loa le mekasini. Pe a taliaina e lē ona le fale mekasini, atonu o le a “talanoa” mekasini i isi e faaopoopo atu i le tagata lea na taliaina mekasini mai ia te oe. Na faitau e se tagata aʻoga talavou i le iunivesite i Aialani le lomiga o Le Olomatamata o Setema 1, 1991, o le lomiga na taliaina e lona tamā mai se Molimau. O le mataupu e uiga i fesootaiga ma isi mataupu na faagaee ai lona naunau. O le taimi lava na uma ai ona ia faitauina le mekasini, ona ia telefoni loa lea i le Molimau, i le faaaʻogaina o le numera o loo i le lisi o le tusi telefoni. E leʻi leva ae amataina se suesuega, ma sa papatisoina le teine talavou lenei i le Tauaofiaga Itumalo “Aʻoaʻoga Mai le Atua” ia Iulai 1993. O lea, seʻi o tatou tuuina atu mekasini i aiga, auā e mafai lava ona latou “talanoa” i tagata! Na ofoina mai e se ovasia femalagaai se tasi o fautuga faigofie e faapea: “Ave i fafo mekasini mai lau ato tusi.” O le mea moni, afai e lē o maua e au faamatalaga le mea o loo naunau i ai le tagata o le aiga, ia atonu o o latou ata o ni faataitaiga matagofie o loo i le faavaa o le a na ofoina atu se mekasini mo oe.

20, 21. (a) E mafai faapefea ona e fetuutuunai pe a auai i le galuega mekasini? (e) O le ā atonu e te faia ina ia tufaina atu le tele o mekasini i masina taitasi?

²⁰ O se fautuaga lona tolu o le, ia fetuutuunai. (Faatusatusa i le 1 Korinito 9:19-23.) Sauniuni ni taulimaga pupuu. Ia mafaufau i se mataupu se tasi e fetaui lelei i tane, o isi i fafine. Atonu e te faaali atu i talavou se mataupu mai “Ua Fesili le Au Talavou . . .” Ia fetuutuunai foi, a o e auai i le galuega mekasini. I le faaopoopo atu i le Aso o Mekasini, atonu e te iloaina e faapea, o le molimau atu i afiafi po, e maua ai le avanoa e sili ona lelei e ofoina atu ai mekasini mai lea fale i lea fale.

²¹ O se fautuaga lona fa o le, ia faataatia se sini totino. O le ulutala o le faaopoopoga, “Ua Faasino mai e Mekasini le Auala i le Ola,” lea na maua faatasi ma La Tatou Faiva o le Malo o Mati 1984, sa faapea mai: “I le avea o se fautuaga, atonu e faataatia e le tagata talaʻi se sini, mo se faaaoaoga, e faapea, ua faataatia se sini e ofoina atu mekasini e 10 i le masina, e faalagolago lava i o latou tulaga; o paeonia atonu e taumafai mo le 90. O le mea moni, o nisi o le au talaʻi atonu e mafai ona ofoina atu le tele o mekasini i le masina, ma o lea ua mafai ai ona faataatia se sini totino e sili atu. Peitai, ona o le lē lelei o le soifua maloloina, o le ituaiga o oganuu, po o isi mafuaaga tatau, atonu ua faaitiitia ai le sini o nisi. E ui i lea, o loo tauaogaina pea la latou auaunaga ia Ieova. (Mata. 13:23; Luka 21:3, 4) O le mea tāua, o le iai lea o se sini totino.”

22. I le ā le auala e mafai ai ona tatou faaalia e faapea, o loo tatou faafetai atu ia Ieova mo a tatou mekasini o le upu moni ua fetaui lelei ma o tatou taimi?

²² Maeu so tatou loto faafetai ia Ieova, “le Atua faamaoni,” i le faaaogāina o le vasega o le auauna faamaoni ma le mafaufau ma lona Vaega Pule, e sauniunia mai mo i tatou nei mekasini i lona taimi fetaui! (Salamo 31:5) I le faatagaina pea i le finagalo o Ieova, o le a faaauau ai pea ona aumaia nei mekasini ma faamalieina ai manaoga moni o tagata. O le a faaauau pea ona la tausia tulaga maualuga tau amio mamā a Ieova. O le a laua lē lafoaia le faaauilumaina o aʻoaʻoga saʻo. Ma o le a la saga uai atu pea i le faataunuuga o le valoaga lena e faailogaina ai o tatou aso, o le taimi o loo pule ai le Malo o le Atua ma faia ai le finagalo o le Atua i luga o le lalolagi sa leʻi faapea ona iai muamua, e ala i se faateleina o le aofai o tagata tapuai moni o Ieova. (Mataio 6:10; Faaaliga 11:15) Maeu se oa tele e lē mafaatusalia ua tatou maua i Le Olomatamata ma le Awake! Seʻi o tatou faaaogāina avanoa uma e tufa atu ai i ē agamalu nei mekasini tāua, ia e pāʻia ai ola o tagata ma faasilisilia ai upu moni o le Malo.

[Faaopoopoga i lalo]

O le ā Lau Tali?

◻ O le ā e faaalia ai e faapea o Le Olomatamata ma le Awake! o ni mekasini o le upu moni?

◻ Ua faapefea ona pāʻia e Le Olomatamata ma le Awake! olaga o tagata?

◻ O le ā e mafai ona faia e faapotopotoga ina ia faateleina ai le tufatufaina atu o mekasini?

◻ O ā fautuaga e mafai ona fesoasoani ia te oe ina ia tufaina atu ai le tele o mekasini?

[Pusa i le itulau 22]

O Nisi o Mataupu ua Pāʻia ai Olaga o Tagata

Mo le tele o tausaga, na tusi mai ai le toatele o le au faitau e faailoa mai lo latou talisapaia mo mataupu faapitoa na lomia i Le Olomatamata ma le Awake! O loo lisiina mai i lalo na o ni nai mataupu mai le tele o mataupu na sa aafia ai la tatou au faitau. Pe na suia e nisi o nei mataupu po o isi foi lou olaga?

Le Olomatamata

“Talia le Fesoasoani a le Atua e Foia Masei Faalilolilo” (Tesema 1, 1985)

“Faatinoina o le Amio Atua Agaʻi i Mātua Matutua” (Iuni 1, 1988)

“Aʻoaʻoga Faatasi ma se Fuafuaga” (Mataupu mo Suesuega, itu. 70)

Awake!

“E Mafai ona E Manumalo i le Loto Mafatia!” (Setema 8, 1981)

“Pe a Maliu Sē e Pele ia te Oe . . .” (Aperila 22, 1985)

“Puipui Lau Fanau!” (Oketopa 8, 1993)

[Ata i le itulau 23]

I Kanata—talaʻiga mai lea fale i lea fale ma mekasini

[Ata i le itulau 24]

I Myanmar—tuuina atu o mekasini e faasino atu ai le auala i le ola