Tauaofiaga Itumalo o le 1996 “O Avefeau o le Filemu Mai le Atua”

¹ O le polokalame o le tauaofiaga itumalo i lenei tausaga, e mautinoa o le a fesoasoani ia i tatou e tausisia ai pea lo tatou filemu mai le Atua, ma o le a faamalamalama ai la tatou vaega o le fesoasoani lea i isi ina ia latou maua lea lava filemu. E pei ona faasilasila i Le Olomatamata o Iuni 1,1986 o le matua, “O Avefeau o le Filemu Mai le Atua.” Pe ua faia ni au fuafuaga ina ia aua neʻi misia so o se vaega o le polokalame?

² O se Tauaofiaga e Tolu Aso: Ua matou iloa, o le a e matuā olioli i le tauaofiaga o lenei tausaga ma o le a e foi atu i le aiga ma se malosi ua faafouina. (2 No. 7:10) I lenei tausaga, o le a toe faia ai foi se polokalame e tolu aso. Po ua uma ona faia ni ni au fuafuaga e faia ni ou aso mālōlō mai galuega masani ina ia mafai ai ona e auai mo le taimi atoa o le tauaofiaga? O nisi o tauaofiaga o le a muai faia a o lumanai le tuuaga o aʻoga i le taumafanafana. Afai e iai sau fanau e aʻooga, po ua e faailoa atu ma le faaaloalo i o latou faiaʻoga e faapea o le a toesea i latou mai le aʻoga i le Aso Faraile mo lenei vaega tāua o lo latou toleniga faalelotu?

³ O loo lisiina mai i Le Olomatamata o Fepuari 15, 1996, aso ma nofoaga mo tauaofiaga uma i le Pasefika i Saute. I le taimi nei, ua tatau i le failautusi o la outou faapotopotoga ona faailoa atu ia te oe le tauaofiaga ua tofia oe e te auai atu i ai.

⁴ O le a amataina le polokalame i le 9:30 i le taeao ma faaiu i le 4:00 i le afiafi o le Aso Sa. O le a tatalaina le fale i le 8:00 i le taeao. E na o le pau lava i latou e faatagaina ona ulufale a o lei oo i lena taimi, o i latou ia e iai galuega tofia, ma o le a lē faatagaina i latou nei e taofia ni nofoa seʻi vagana ua tatalaina le fale mo tagata uma. Po o le a tatou faaalia le agalelei i o tatou uso matutua ma ē e lē atoatoa le malosi i le faaavanoaina o nofoa i vaipanoa e sili ona faigofie ma lelei mo i latou? Ia manatua “o le alofa . . . e le sailia e ia ana lava mea.”—1 Kori. 13:4,5; Fili. 2:4.

⁵ Po o le a Faamaaiina ai Oe? Ina ua uma ona sii mai le Faataoto 27:17, “E maamaai le uamea i le uamea,” na mātauina e Le Olomatamata o Aokuso 15,1993, e faapea: “E pei lava i tatou o ni mea faigaluega e manaomia ona faamaaiina pea i taimi uma. Talu ai ona o le faatinoina o le alofa mo Ieova ma le faia o faaiuga e faavae i lo tatou faatuatua, o lona uiga ia faaesea mai le lalolagi, e manaomia ai la ona matuā ese mamao o tatou ala mai le toatele o tagata.” E mafai faapefea ona tatou faatatauina lena fautuaga?

⁶ E ese i tatou ma e tatau ona tumau ona faaesea i tatou mai le lalolagi. E tatau ona tausisia pea le faia o ni taumafaiga maumauai ina ia faataunuuina lenei mea, pe afai tatou te mananao e maelega i galuega lelei. (Tito 2:14) O le mafuaaga lena na faaauau ai ona faapea mai le mataupu na sii mai i Le Olomatamata e pei ona taʻua i luga: “Afai tatou te faatasi ma isi o ē e alolofa ia Ieova, ua tatou faamaaiina ai la le tasi i le tasi—ua tatou faatupuina ai le alofa ma galuega lelei o le tasi i le isi.” O le tauaofiaga itumalo o se tasi lea o sauniuniga mai ia Ieova e fesoasoani ia i tatou ina ia tumau ai ona malolosi i le itu faaleagaga. E lē tatau ona tatou misia so o se vaega o le polokalame.

⁷ O se Tagata Atamai o le a Faalogo: O le faalogo, o se tomai e tatau ona atiina aʻe. Na faapea mai, o se tagata e lē matuā naunau i ni mea, na te manatuaina pe na o le ʻafa o mea na ia faalogo i ai—e tusa lava pe na ia matuā faalogologo lelei. Talu ai o loo tatou ola i se vaitaimi fenuminumiai, o nisi taimi, e oo ai ina faigata ona tatou uaʻi atu mo ni taimi uumi. Pe mafai ona tatou taumafai e faateleina lo tatou uaʻi atu, ae maise lava pe a nonofo faatasi ma se aofia e toatele o loo faalogologo atu i se tasi o lauga mai? Afai e fesiligia oe ina ia aumaia se aotelega o le polokalame o aso taitasi pe a foi atu i le aiga mai le tauaofiaga, faamata e mafai ona e faia faapea? E mafai faapefea e i tatou uma lava na faaleleia lo tatou tomai e faalogologo ma uaʻi atu ai ma le faaeteete i vaega taitasi o loo fofogaina mai i le polokalame o le tauaofiaga?

⁸ E manaomia tele le matuā naunau e faalogo, auā o le meaalofa mai le Atua o le manatuaina o mea e lē mafai ona faagaoioia lelei e aunoa ma lena manoaga. Mo se faaaoaoga, o le tele o le naunau o se tagata i se mataupu, o le faigofie foi lena ona manatua manatu tāua o se lauga po o se vaega o le polokalame. Ae peitai, o le tele o mea e faalagolago i lo tatou matuā uaʻi totoʻa atu i mea ua tatou maua le faaeaga e faalogologo i ai i tauaofiaga itumalo. O lo tatou matuā naunau i ai ma le faalogologo lelei i vaega taitasi o le polokalame o le tauaofiaga e mafai ona tatou maua ai ni fua lelei o lo tatou tulaga faaleagaga i le taimi nei faapea foi ma o tatou faamoemoega i le lumanai. I tauaofiaga, e aʻoaʻoina ai i tatou i ala o Ieova, ma tuuina mai ai faatonuga mo le faataunuuina o se galuega faasaoola. (1 Timo. 4:16) Seʻi manatu ifo faapea o oe o se vaa i se sami ua fesouaiina i se matagi malosi. O folafolaga a Ieova o se taula mausali lea o le faamoemoe. Afai e le faalogo se tagata i polokalame faa-Kerisiano ma faataga lona mafaufau e tafaofao solo, e mafai ona ia misia manatu tāua o fautuaga ma faatonuga e mafai ona puipuia ai o ia mai le ogotia i se vaa ua āfatia faaleagaga.—Epe. 2:1; 6:19.

⁹ I le tele o vaega o le lalolagi, o loo faia ai e o tatou uso se taumafaiga sili faaletino ina ia mafai ona latou auai i sauniga. E ofoofogia e vaaia o lo latou uaʻi totoʻa atu i tauaofiaga. Ae i nisi nofoaga, ua faalavelavea ai e nisi tagata isi e ala i le faasavalivali solo i le nofoaga o loo faia ai le tauaofiaga i le taimi o loo faasolo le polokalame. O isi e tuai mai. I ni tauaofiaga ua mavae, sa faigata lava ona faalogo atu i uluai minute o le polokalame ona o le toatele o tagata e feofeoai solo i le faapaologa o le fale ma tua atu o mea o loo nonofo ai tagata. E masani lava, o i latou nei, e lē o uso ma tuafafine ia e galulue i o latou tofiga poo tinā o loo tausi a latou fanau laiti. O le tele o le faalavelave e māfua mai tagata o loo na ona talatalanoa. I lenei la tausaga, o le a uaʻi totoʻa atu ai le Matagaluega o le ʻAu Tautua i lenei faafitauli, ma e iai le faamoemoe, o le a nofoi tagata uma i o latou nofoa i le taimi o le a valaaulia ai e le taʻitaʻifono i tatou ina ia faia faapea. O le a matuā talisapaia lo outou lagolagosua mai i lenei itu.

¹⁰ O ā ni fautuaga aogā o le a fesoasoani ia i tatou ina ia matuā faalogologo lelei atu ai i le polokalame o le tauaofiaga ma manatua ai le tele o mea o fofogaina mai? O mea na talanoaina i tausaga ua mavae e manaomia ona toe taʻu atu: (a) Ia taulai atu manatu i le mafuaaga autū na ō atu ai i le nofoaga o loo faia ai le tauaofiaga. E lē ina ia auai i ni tafaoga ma ni faafiafiaga, ae ia faalogo ma aʻoaʻoina se mea. (Teu. 31:12) Taumafai ia lava se malologa i po taitasi. Afai e te sau i le tauaofiaga ae o loo e matuā vāivai, o le a faigata foi ona e uaʻi totoʻa atu. (e) Ia e vave taunuu ina ia lava ai se taimi e suʻe ai se paka o lau taavale ma maua ai sou nofoa a o lei amataina le polokalame. O le faananati atu e suʻe se nofoa i le taimi mulimuli, o le a masani lava ona iu ai i lou misia o nisi o vaega amata o le polokalame. (i) Fai ni faamaumauga pupuu i manatu autū. O le soona tele o faamaumauga, e mafai ona lē faalogologo lelei ai. Pe a tusi, ia mautinoa e te lē o misia isi manatu ona o lou uaʻi tele i au faamaumauga. (o) Pe a faasilasila mai se vaega o le tauaofiaga, ia matuā āloālo atu i ai ma le naunau. Fesili ifo ia te oe lava, ‘⁠O le ā se mea e mafai ona ou aʻoaʻoina mai lenei vaega o le a faateleina ai loʻu talisapaia ma le alofa mo Ieova? E mafai faapefea ona fesoasoani faamatalaga ia te au ina ou matuā faaalia atu ai ni uiga fou faaletagata? O le a faapefea ona fesoasoani lenei mea mo le faaleleia ai o laʻu faiva?’

¹¹ Amioga e Taʻuleleia ai la Tatou Faiva: Na faalaeiau atu Paulo ia Tito ina ia avea o ia “ma faaaʻoaʻo o galuega lelei.” Ona o lona faaalia o le faamaoni i ana aʻoaʻoga, sa fesoasoani atu ai Tito i isi ina ia latou “viia . . . i mea uma lava . . . le aʻoaʻoga a le Atua lo tatou Faaaola.” (Tito 2:7, 10) I tausaga taitasi tatou te maua ai faamanatuga agalelei e uiga i le pogai e tāua tele ai le amioatua a o tatou faimalaga atu i le tauaofiaga ma toe foi mai, faapea foi ma taimi tatou te iai i faletalimalo ma faleaiga ma le tauaofiaga foi. I le tausaga ua mavae na matou mauaina ai ni faamatalaga faamafanafanaloto matou te fia faailoa atu ia te outou.

¹² Na taʻua e le pule o se faletalimalo e faapea: “E avea pea o se fiafiaga le talia o Molimau a Ieova e nonofo iinei ona o lo latou onosai, lagolagosua, ma latou te vaaia lelei foi a latou fanau.” Na faapea mai se tagata faigaluega e faatoʻai atu i ai manaoga mo se tasi o faletalimalo, “e matuā faigofie lava lana galuega pe a ō atu Molimau ma toe ō ese mai le faletalimalo auā, e tusa lava pe faatali mo se taimi umi i le laina, ae latou te faaalia pea le faaaloalo, onosai, ma le uiga malamalama.” Sa matuā faafiafiaina se fafine i New England ona o amioga a talavou Molimau na latou nonofo faatasi i se tasi faletalimalo, o lea na ia talosaga ai na te fia mauaina ni lomiga e uiga i la tatou faalapotopotoga.

¹³ I le isi itu, o loo iai foi le avanoa mo le faaleleia i nisi o vala. Matou te fia faailoa atu nisi o mea na mātauina ma faailoa mai i le Sosaiete. Na lipotia mai e se tasi ovasia faimalaga e faapea, o loo tele pea se vaavaaiga lelei e manaomia mo fanau a Molimau a Ieova pe a ō i faletalimalo. Ua vaaia nisi tamaiti e taufetuli solo i poletito, tietie i lalo ma luga i lifi, ua soona pisapisaō i tafatafa o le vai taele, ma teeele ai pea i le vai e sili atu i le taimi faagataina, ua faalavelavea ai i isi malō ua momoe. E manaomia ona toleniina a tatou fanau ia iloa lelei, o amioga faa-Kerisiano, e lē faatapulaaina. E lē faamutaina pe a tatou ō ese atu mai le fale o faia ai le tauaofiaga. O se mea e tatau ona faaalia i le 24 itula i le aso. O a tatou amioga i faletalimalo, i faleaiga, ma luga o le auala, e tatau ona viiviia e pei o le taimi tatou te nonofo faatasi ai ma o tatou uso ma tuafafine ua aʻoaʻoina e Ieova, a o faagasolo le polokalame o le tauaofiaga.—Isa. 54:13; 1 Pete. 2:12.

¹⁴ Matou te fia faailoa atu foi se faamanatuga agalelei e uiga i le foaiina o se meaalofa. O le ʻau tautua, o ē teuina potu o faletalimalo, o tagata e feaveaia atopaʻu i potu, ma isi i galuega faapena, ua faalagolago atu i latou i meaalofa faapena e ola ai.—Tagai i le Awake! o Iuni 22, 1986, palakalafa 24-27.

¹⁵ E ui ua lē o toe faia ni sauniuniga mo meataumafa i a tatou tauaofiaga, ae o loo tele pea mea e tatau ona totogia o loo aafia ai i le totogiina o le fale, saunia o paka mo taavale ma le tausia o isi mea eseese. O a tatou meaalofa tauofo e manaomia mo le faafetaiai o nei manaoga. O se tasi tuafafine na ō mai i le tauaofiaga ma lana fanau talavou, sa faalelava sa latou tupe. Ae peitai, sa fesoasoani pea o ia ma lana fanau i le faia o ni meaalofa tauofo itiiti. O le mea ua filifilia e le tagata i lona loto e faia e tusa ai ma lea itu, o se mataupu e fitoi tonu ia te ia lava, ae matou te iloa e te talisapaia na faamanatuga.—Galuega 20:35; 2 Kori. 9:7.

¹⁶ E Iloa i o Tatou Laei: O le auala tatou te laei ai, e faaalia ai mea e tele e uiga ia i tatou faapea ma o tatou faalogona agaʻi i isi. O le toatele o tagata talavou ma le toatele o tagata matutua ua siomia i ituaiga o tifiga eseese, o le ofuina o ofuvae ma mitiafu masaesae i le aʻoga pe i latou fale faigaluega. I tausaga taitasi, ua agaʻi ina sili atu ona matautia le tulaga o tifiga, ua oo lava ina avea o se mea matuā faateʻia ai. Afai tatou te lē faaeteete, e ono faigofie lava ona taaʻina ai i tatou e a tatou aumea faalelalolagi ina ia tatou laei e pei o i latou. E tele ituaiga o tifiga e lē talafeagai ona ofu i sauniga mo le tapuaiga. Na maua mai se faaaliga ina ua uma se tasi o tauaofiaga i le tausaga ua mavae, na faaalia ai le talisapaia o le polokalame ae na faaopoopo mai: “Sa ou tau mānatu pe aisea ua toatele ai teine talavou na ofuina ni ofu pupuu, ofu ua matuā aliali mai ai le papatua ma le fatafata, ma ofu e faavā tua poo autafa e oo i sulilapalapa.” E mautinoa, tatou te faanaunau uma lava ina ia laei i se auala e talafeagai mo faifeau Kerisiano i le tauaofiaga, ma a o tafafao foi pe a uma le polokalame. E lelei pea mo i tatou uma ona toe manatunatu i le fautuaga a le aposetolo o Paulo mo Kerisiano ina ia teuteu “i ofu e onomea, ma ia le teuanoai, a ia faamatuafafine.”—1 Timo. 2:9.

¹⁷ O ai e filifilia po o le ā le ofu e talafeagai ma “onomea”? O le onomea, o lona uiga, “e lē o le faatoatoa ma mata le mā, e lē o le fia matamuamua foi.” Ua faamatalaina foi e le lomifefiloi le onomea e faapea “e lē o le faalialiavale.” E lē o faataatia maia e le Sosaiete po o toeaina ni tulafono e faatatau i laei po o teuga. Ae peitai, pe e lē tatau ea ona manino i se Kerisiano po o lē fea ituaiga o laei e matuā lē onomea pe lē talafeagai? (Faatusatusa le Filipi 1:10) E lē tatau i o tatou laei ma teuga ona valovaloia ai i tatou. E tatau ona matagofie o tatou foliga atu, ia lē faalelalolagi pe aafia ai faalogona o nisi. I le avea o ni faifeau o le tala lelei, o le onomea ma talafeagai o o tatou laei ma teuga le taimi tatou te auai atu ai i le vaipanoa o loo faia ai le tauaofiaga itumalo, e faamamaluina ai Ieova ma faaatagaia lelei atu ai le faalapotopotoga. O lea, o le a faataatia ai e mātua se faaaoaoga ma ia faamautinoa o loo talafeagai laei o a latou fanau mo lea sauniga. O le a mananao toeaina e faataatia se faaaoaoga lelei ma nofo sauni e ofo atu se fautuaga agalelei pe afai ua tatau ai.

¹⁸ O Faletalimalo: Faamolemole ia manatua le onosai ma le agalelei e faaalia pe a feutagai ma tagata o faigaluega i faletalimalo. Atonu tatou te vāivai mai le malaga ma atonu foi e umi le laina o loo e faatalitali ai mo api, ae o lou onosai e lē faapea e lē o mātauina mai. O lo tatou faia faapea atonu o le a uunaia ai nisi e suesueina ma le faaeteete le upu moni. E faaopoopo i ai, e lē tatau ona kukaina ni meaʻai i potu o le faletalimalo sei vaganā o iai se umukuka mo lena fuafuaga. E aogā tele mo tagata talaʻi ona toe autalu ma a latou tagata aʻoga o le Tusi Paia nei faamatalaga.

¹⁹ O Mea Pueata, Vitio Pueata, ma Mea Pueleo: E faataga ona faaaogā mea pueata ma isi masini pue leo, ae tau ina ia tatou faaalia le magafagafa mo isi o loo auai. Afai tatou te feoai e pue ni ata a o faagasolo le polokalame, o le a lē gata ina tatou faalavelave ai i isi o ē o loo taumafai e faalogologo, ae o le a tatou misia ai foi nisi vaega o le polokalame. E masani ona tatou maua aogā e sili atu mai le tauaofiaga pe a uaʻi totoʻa atu i failauga ma faia ni faamaumauga talafeagai. Atonu o tatou pueina ni ata mo se uso po se tuafafine e lē o mafai ona auai, ae afai o loo faia mo i tatou lava atonu o le a e iloa ane pe a foi atu i le fale, e leai lava se taimi tatou te toe autaluina ai le tele o na mea na alu i le tele o itula o pueina. E lē tatau ona sulu atu so o se ituaiga o mea pue leo i masini o mea faaleotele leo, e lē ta- tau foi ona poloka e na masini le auala o loo fesavaliai ai tagata, po o loo vaavaai atu ai i failauga.

²⁰ Nofoa: O loo faaauau pea ona matou mātauina le faaleleia o le tulaga i le taofia o nofoa. I le tausaga ua mavae, o le toatele lava o outou na utagia le faatonuga: E MAFAI ONA TAOFIA NOFOA MO NA O TAGATA O LOU AIGA MA NISI O Ē O LOO TOU MALAGA FAATASI MAI I LA OUTOU TAAVALE. Atonu sa e iloa le faaitiitia o faafitauli ona ua utagia e le toatele o tagata nei faatonuga manino. Ae sili ona tāua, o lou gauai sa faafiafiaina ai Ieova faapea ma le ‘⁠auauna faamaoni,’ o ē o loo aumaia meaʻai faaleagaga.—Mata. 24:45.

²¹ O loo iai le aofaiga faatuputeleina o o tatou uso o loo iai ni o latou manaoga faapitoa i le soifua maloloina. O nisi e ō mai i le tauaofiaga i ni nofoa faataavalevale ma e manaomia ona tausia e tagata o o latou aiga. O isi o loo iai i togafitiga eseese tau vailaau mo ni maʻi faaumiumi e pei o le maʻifatu po o maʻi e oso faamaʻi malosi. E faamafanafanaina moni ai o tatou loto i le vaaia o nei uso ma tuafāfine pele i le tauaofiaga, ua finafinau ina ia lē misia se meaʻai faaleagaga. Ae peitai, i nisi taimi, e iai se faafitauli i isi tagata pe a oo ina mamaʻi ae o loo faagasolo le tauaofiaga, e aunoa ma nisi o le aiga po o le faapotopotoga e fesoasoani atu. I nisi o tulaga, sa manaomia ai e le pulega o le tauaofiaga ona telefoni atu mo se auaunaga faafuasei a le falemaʻi e avatu se uso po o se tuafafine i le falemaʻi. O le tiute tauave mo le tausia mo le tagata maʻi, e paʻu muamua lava i tagata o le aiga ma ona tauaiga vavalalata. O le Matagaluega mo le Fesoasoani Muamua i le tauaofiaga e lē o faatulaga e tuuina atu ni togafitiga mo na maʻi. Afai e iai se tagata o lou aiga e manaomia se tausiga faapitoa, faamolemole ia mautinoa e lē tuua na o ia ina neʻi mapuna mai se manaoga faafuasei. E lē gata i lea, o le a leai ni fuafuaga i tauaofiaga mo ni potu faapitoa e tuu ai i latou o ē iai nei mea e afaina ai o latou soifua maloloina ma lē faigofie ai ona latou nofoi i vaipanoa o loo iai nofoa. O le a mananao toeaina ina ia mataala i nisi o la latou faapotopotoga o loo iai ni manaoga faapitoa tau i le soifua maloloina ma vave fai ai ni fuafuaga a o lava le taimi mo le tausiga o i latou.

²² Manaoga mo Meataumafa i le Tauaofiaga: E tele ni faamatalaga lelei na faia e faatatau i le aogā o le aumai o a tatou lava meaʻai. Na tusi mai se tasi uso: “Ua ou iloa ai se aogā matuā telē faaleagaga mai lenei mea. Ua mafai nei ona faaaogaina lena malosi ma taimi i mea faaleagaga. Ou te lei faalogo lava i se faitioga se tasi.” Na tusi mai se tasi tuafafine: “E ala i faaaoaoga, o outou uso pele e, ua outou faalaeiauina ai i matou o Kerisiano taitoatasi e suesue ifo ia i matou lava ma saili ni auala e faafaigofie ai o matou olaga ma faateleina ai a matou gaoioiga faatiokarate.” Na tusi mai se ovasia faimalaga e uiga i sauniuniga na faia muamua mo le gasesega o meataumafa: “O le fuafuaga tuai na pogai ai ona misia e le toatele o uso le polokalame atoa o fonotaga.” Ae na tusi mai se tasi toeaina e faatatau i mea taumafa sa aumaia e uso e faapea: “Sa latou aumaia na o mea tonu lava sa manaomia, ma sa lē toe tau tutu faatali i ni laina mo le mauaina o ia mea.” I le faaiuga, na tusi mai ai se isi tuafafine. “Pe a uma ia polokalame, sa toafilemu ma leai se mea e gāsē ma sa iai se siomaga fiafia.” Ioe, e mafai e tagata taitoatasi ona aumaia meataumafa e lava e tausia ai o ia a o faagasolo le polokalame o le aoauli. E toatele na faapea mai, o le mea moni ua lava se taimi asiasi atu ai i a latou uo.

²³ O le a lē iai se auaunaga mo meataumafa i lenei tausaga. E mafai ona e faaalu ni nai minute e autalu ai le faaopoopoga o La Tatou Faiva o le Malo o Aokuso 1995, palakalafa 26, mo fautuaga aogā i meataumafa susua e mafai ona aveina i le tauaofiaga. Faamolemole, ia manatua, e lē tatau ona aveina ni fagu mataʻetaʻe po o se ʻava malosi i le fale o loo fai ai le tauaofiaga. Afai e manaomia ona ave ni tamai cooler, e tatau ona tuu i lalo o lou nofoa. Ia manatua, e telē le taimi o le malologa i le aoauli e taumafa ai au sauniuniga na avatu. E pei lava i o tatou Maota o le Malo i taimi o sauniga, e lē tatau ona tatou aai ma feinu i le taimi o le faagasologa polokalame o le tauaofiaga. I lea ua tatou faaalia ai le faaaloalo i fuafuaga mo le tapuaiga faapea ma meaʻai faaleagaga ua saunia mai.

²⁴ Ua lē pine ona amata loa lea o le uluai Tauaofiaga Itumalo “O Avefeau o le Filemu Mai le Atua.” Po ua maeʻa ea ona faia au sauniuniga ina ia auai, ma po ua e nofo sauni nei e olioli i aso e tolu o le aufaatasiga faaleuso ma mea lelei faaleagaga? O la matou talotaloga moni ia faamanuia Ieova i au taumafaiga ina ia e auai i le tauaofiaga o lenei tausaga.

[Pusa i le itulau 12]

Faamanatuga mo le Tauaofiaga Itumalo

Papatisoga: E tatau i ē ua fuafua e papatiso ona alaala i o latou nofoa i le vaega ua tofiaina a o lei amata le polokalame i le taeao o le Aso Toonai. Ua mātauina le faia e nisi o ituaiga o teuga e lē mamalu ma faatosina ese ai manatu mai le sauniga. O se ofu taele onomea ma se solo e ao ona aumaia e tagata taitoatasi o ē ua fuafua e papatiso. O le a mananao toeaina o le faapotopotoga o ē o loo autaluina fesili i le tamai tusi o Aʻoaʻoga Faavae o le Tusi Paia ma i latou ua faanaunau e papatiso, ina ia faamautinoa ua malamalama na tagata i nei manatu. Pe a uma le lauga o le papatisoga ma le tatalo e faia e le failauga, ona faia lea e le taʻitaʻifono se faasilasilaga puupuu i ē o le a papatiso, ona valaaulia lea o le usuina o le pese. Pe a uma le fuaiupu mulimuli, ona faasino atu e le ʻau tautua i latou o le a papatiso i le mea e fai ai le papatisoga. Talu ai o le papatisoga e faailoa ai le tuuina atu o se tasi, o se mataupu totino ma e patino i le tagata lava ia i lo la va ma Ieova, e leai ai la se faatulagaga mo sui papatiso e taitoalua pe sili atu e uulima faatasi pe faauouo a o papatisoina.

Pine Fatafata: Faamolemole ia laeiina le pine fatafata o le tauaofiaga o le 1996 a o faimalaga atu ma pe a taliu mai foi mai le fonotaga o le tauaofiaga. O lenei mea e masani lava ona mafai ai ona tatou avatu se molimau lelei a o femalagaai. O pepa o pine ma faavaa iila e tuu ai e tatau ona maua mai i la outou faapotopotoga, auā o le a le maua i le tauaofiaga. Aua e te faatali seʻi toe o ni nai aso a o lei faia le tauaofiaga ona faatoʻā e fesili lea mo ni pine fatafata mo lou aiga. Ia manatua lau pepa fou o le toto (Advance Medical Directive/Release) e ave.

Api: O le toatele lava o ē auai mai i tauaofiaga i le oganuu a la tatou lālā e mafai ona alaala lava i o latou aiga po o le faia foi o ni a latou lava fuafuaga i mea e api ai. Peitai, pe afai e te manaomia se api, ia e tusi atu se tusi o loo otooto atu ai mea o e manaomia, ona tuu atu lea o le tusi i le failautusi o la outou faapotopotoga, ina ia tuuina atu i le matagaluega o loo vaaia api mo le tauaofiaga.

Taavale Toso Pepe ma Nofoa e Mafai Ona Faataatitia i Fafo: I le tele o nofoaga, e lē faaaogaina ai taavale toso pepe i nofoaga o faatasiga lautele. E lē faatagaina e aiaiga o tulaga tau tineimu le iai o nei mea i poletito o fale ma auala i va o nofoa. Talu ai o le tumutumu o tagata e ono feomai ai, e mautinoa la le matautia o taavale toso pepe e lē gata i le pepe ae faapena foi i so o se isi e ono lāvea ai. O lea faamolemole aua le aumaia taavale i le mea o loo faia ai le tauaofiaga. Ae peitai, e faatagaina ato po o moega o tamaiti, auā e saogalemu nei mea i autafa o nofoa o o latou mātua. Faamolemole aua foi neʻi aumaia nofoa ia e mafai ona faataatitia i fafo. E lamatia lona faaaogaina ma e lē faatagaina i nofoaga faitele. E talisapaia la outou lagolagosua i nei mea.

Auaunaga Tauofo: Ona o le lē toe iai o ni auaunaga mo meataumafa, o le toatele la o i latou sa galulue muamua i lena matagaluega, atonu ua mafai nei ona tauofo e galulue i se isi mea. Pe e te fesoasoani ai i se tasi o matagaluega? O le tautuaina o o tatou uso, e afai e mo na o ni nai itula, e mafai ona matuā aogā ma maua lelei ai le loto malie. Pe afai e mafai ona e fesoasoani, faamolemole lipoti atu i le Matagaluega o Auaunaga Tauofo a le tauaofiaga. O tamaiti e i lalo ifo o le 16 tausaga le matutua, e mafai foi ona faia so latou sao lelei e ala i le galulue i lalo o le faatonutonuga a se matua po o se isi tagata matua e tatau ai.

Lapataiga: Ia mataalia i faafitauli e ono tutupu mai ina ia alofia ai faigata lē manaomia. E masani lava o tagata gaoi ma isi tagata lē popoi e osofaia e tagata a o ō ese mai o latou aiga. Ia faamautinoa ua lokaina lau taavale i taimi uma, ma aua neʻi tuua ai se mea o iloa atu e tofotofoina ai se tasi e osofaia. O le ʻau gaoi ma le ʻau seʻi ato e faatitino a latou faiga i faatasiga tetele. E lē o se mea poto i le tuu o so o se mea tāua i lou nofoa. E lē mafai ona e mautinoa pe o tagata uma i ou autafa o ni Kerisiano. Aisea la o le a e avatua ai i ai se tofotofoga? Ua maua mai ni lipoti o taumafaiga ua faia e tagata o le lalolagi e faatosina ese tamaiti. IA E ILOA LE MEA O IAI LAU FANAU I TAIMI UMA.

O le televise ma fale vitiō o loo iai i le tele o faletalimalo e masani ona faaali ai ata matagā o aumaia ai faamatalaga masoā ma faiga lē mamā faaleituaiga. Ia mataala i lenei mailei, ma aua le faatagaina le fanau e saʻoloto e matamata i ia televise i le potu e aunoa ma se vaavaaiga lelei.

Faamolemole ia aua neʻi telefoni atu i le faauluuluga o le nofoaga o le tauaofiaga e fesili atu i ai mo ni faamatalaga e uiga i so o se mataupu o le tauaofiaga. Pe afai e lē o maua mai i le ʻau toeaina faamatalaga, e mafai ona e tusi atu i le tuatusi o lena tauaofiaga, lea o loo maua i tua o pepa o Talosaga mo ni Api Faapitoa, o se tasi o na pepa o loo faapipii i luga o le laupapa o faamatalaga a le faapotopotoga.