Foai Tauofo i le Galuega a le Sosaiete i le Lalolagi Aoao e Lagolagosua i le Faatelega
E pei ona valoia i le Isaia 54:2, 3, ua faaauau pea le faatelega o le tapuaiga mamā a Ieova i le lalolagi aoao. Ua aofia ai iinei atunuu eseese o le konetineta o Aferika ma atumotu lalata ane. I le faagasologa o tausaga e sefulu ua tuanai, na aveesea ai faasasaaga o le galuega o le Malo i nofoaga e pei o Angola, Cameroon, Equatorial Guinea, Ethiopia, Madagascar, Malawi, Mozambique, ma Togo. I nei la nuu ma atunuu ua matuā pula mo le seleseleina, o misionare o Kiliata, o ē ua faauu mai le Aʻoga mo Toleniga i le Faiva, o sui o aiga Peteli, ma isi ua taliaina nei tofiga.—Mata. 9:37, 38.
E manino mai la, o le faatuputupulaia o tagata tapuai moni i le faalapotopotoga a Ieova ua manaomia ai le fausiaina o le faitau selau o nisi Maota fou o le Malo. Ua talafeagai ai foi le faia o fuafuaga mo Maota Fono ma lālā fou po o le toe sosooina o nisi vaega o lālā. O le faatupeina o nei galuega faapea foi ma le faaauilumaina o le galuega o le Malo e lē gata i Aferika ae i isi foi vaega o le lalolagi ua paʻū tonu lona mamafa i foai tauofo mo le galuega a le Sosaiete i le lalolagi aoao.
Ua avatua ia te oe e ata puʻe ma ata tusi o loo i itulau e lua o lenei faaopoopoga se faapupulaga i le tulaga o loo taumafai le Sosaiete e faataulau i oganuu o Aferika. O loo faaalia ai nisi o galuega faufale o loo faagasolo nei ma galuega ua lē o toe pine ae amataina.
E ala i le siakiina o le siata o le auaunaga i le fanua o loo i le 1996 Yearbook, e mafai ona e vaaia ai se ata manino i le faiva a le autalaʻi o loo faia i nei atunuu. Ua iai faatelega mataina i le tele o atunuu, ma o le malosi o le faatuputupulaia ua faaāta mai i le aofaiga o i latou o auai i le Faamanatuga. Afai e teu i o tatou mafaufau tulaga ua uma ona faataulauina i le avea ai o se vaega o le talaʻiga o le Malo i le lalolagi aoao ma le galuega o le faia o soo i isi konetineta, e aumaia ai se aafiaga loloto ia i tatou i le tāua o le faaeaga ua tatou maua i le lagolagoina i se auala faaletino le puna o le tapuaiga moni.—Luka 16:9; 1 Timo. 6:18.
[Ata i le itulau 3]
Maota o le Malo i KwaZulu-Natal, i Aferika i Saute, na fausia i aso e 9
[Ata i le itulau 3]
Maota o le Malo na fausia i se tau talafeagai i Nigeria
[Ata i le itulau 3]
Maota Fono i Mozambique faatasi ai ma nofoa mo le 1,500 tagata, e faamaeʻaina i le faaiuga o le 1996
[Ata i le itulau 3]
O se vaega o le lālā i Mozambique, e nofoia nei i le tau e afu ai mea i le 1996
[Ata i le itulau 3]
Le lālā i Sierra Leone, ua fuafua e maeʻa i le taumafanafana o lenei tausaga
[Ata i le itulau 4]
Maota Fono taalaelae ua maeʻa i Mauritius, faatasi ai ma vaega o le lālā, e faamaeʻaina i le vaitau e totogo ai mea i le 1997
[Ata i le itulau 4]
Le lālā i Zimbabwe o loo fausiaina nei
[Ata i le itulau 4]
Maota Fono taalaelae ma le lālā fou o loo fausiaina nei i Senegal
[Ata i le itulau 4]
Le lālā fou i Kenya, i le laumua, o Nairobi
[Ata i le itulau 4]
Le lālā i Madagascar, ua toeitiiti maeʻa lona fausiaina
[Ata i le itulau 4]
O fale ua fuafua mo le lālā i Malawi