Tauaofiaga Itumalo ma Faava-o-Atunuu o le 1998 o “Le Ala a le Atua i le Ola”
1 Ua faamanatu mai e le Faataoto 10:29 ia i tatou e faapea “o le ala o Ieova o le malosi lea.” E maeu se matua talafeagai ua iai mo le tauaofiaga o lenei tausaga—“Le Ala a le Atua i le Ola”! Ae o le a faapefea nei ona faalauteleina lenei matua i le faagasologa o le polokalame o aso e tolu? Ua tatou vaavaai uma atu lava ma le naunau fia iloa po o ā mea o loo teuina mai mo i tatou i lea tauaofiaga. Ma o le a faatomuaina ai manatu tāua faatupu lagona.
2 Atonu o le a auai i la outou tauaofiaga ni misionare, ni auauna faava-o-atunuu, po o isi o loo auauna i tofiga i isi atunuu. Ua faatalitalia o le a faitau afe tagata usufono mai isi atunuu e iai i aai e faia ai faatasitasiga faava-o-atunuu. Atonu o le a e feiloai ai i nisi o nei tagata asiasi mai. O le a faatomua e le polokalame o le tauaofiaga lipoti i le auala o loo faamanuiaina ai e Ieova le galuega i oganuu eseese.
3 E Aogā Taumafaiga Ina ia Auai: O le toatele o o tatou uso i Aferika ua oo i ai faigata ona o taua ma fevesiaiga o loo tutupu i nisi vaega o lena lava konetineta. E latou te vaai i tauaofiaga a tagata o Ieova o se mea tāua lava mo le ola. O nisi e tatau ona savalia ni savaliga uumi ma mamao ina ia auai ai i se tauaofiaga, ae latou te lē manatu lava ia misi se aso. Na savalia e se uso e 73 tausaga le matua i le Malo Temokalasi o Congo (na avea muamua ma Sāia) le 280 maila [450 kilomita] ina ia auai i se tauaofiaga. Na taunuu o ia i le 16 aso mulimuli ane ai, ua fulafula vae, ae na fiafia lava ua iai iina. Mulimuli ane ina ua maeʻa le tauaofiaga, na olioli tele ma faamalosia o ia faaleagaga, ma toe savali atu i lona nuu. Sa avea lea mea ma ana masani mo le tele o tausaga!
4 I Mozambique na aʻea ai e se ovasia itumalo ma lona faletua se mauga maualuga lava ma savalia se laufanua tele pei se toafa ina ia auai i se fonotaga matagaluega. Na la faimalaga i le mamao e 55 maila [90 kilomita] i le 45 itula. Na faamalosiauina i latou uma i le aofia i le faaaoaoga lelei a lenei ulugalii. O le tele o aiga na auai sa faia foi taumafaiga faapea ina ia auai. Na lipotia mai e le ovasia itumalo e faapea o nisi uso, e aofia ai se tasi ua 60 tausaga le matua, na savavali atu i le 130 maila [200 kilomita]!
5 Po ua e faia ea ni fuafuaga maʻoti ina ia auai i le tauaofiaga o lenei tausaga? Atonu o le a lē tele se mamao e te tau savali ai, ae o le a manaomia ni taumafaiga ma faataulaga ina ia mafai ona e auai ma lou aiga. Fuafua ina ia auai i le polokalame atoa mai le amataga e oo i le faaiuga. O le toatele o tagata aʻoga o le Tusi Paia ua agaigai i le tuuina atu. O lo latou auai i le tauaofiaga o le a fesoasoani ia i latou e faia ai se filifiliga saʻo. Po ua valaauliaina ea au tagata suesue o le Tusi Paia ma isi tagata fiafia ina ia auai faatasi ma oe?
6 Se Polokalame e Tolu Aso: O le a tauaaoina atu le polokalame o lenei tausaga i tauaofiaga e 43 i le Pasefika i Saute. O tauaofiaga i le gagana Samoa o le a faia i Amerika Samoa, Samoa ma Niu Sila. Ua lisiina mai i Le Olomatamata o Fepuari 15, 1998, aso ma nofoaga o nei tauaofiaga. E tatau ona oo atu i le taimi nei ua logoina atu outou i le tauaofiaga ua tofia i ai la outou faapotopotoga.
7 Manatu Tāua Faapitoa: E faapitoa lava ona tāua lou auai atu i le tauaofiaga ua tofia i ai lau faapotopotoga. Faamolemole aua e te fuafua e te auai i se tauaofiaga faava-o-atunuu seʻi vaganā ua tofiaina atu i ai lau faapotopotoga. O nofoaga o le a faia ai tauaofiaga faava-o-atunuu o le a lē mafai ona ofi uma ai se vaega o i latou uma o ē fia auai iina. O lou faaaloalogiaina totino ma lau lagolagosua i nei faatulagaga o le a faamautinoa ai ua faia mea uma ma le matagofie ma le saunia lelei.—1 Kori. 14:33, 40.
8 O le a amataina le polokalame i le 9:30 i le taeao o le Aso Faraile, Aso Toonai, ma le Aso Sa. I le aso Faraile ma le Aso Toonai, o le a faaiuina ai le polokalame i le 5:00 i le afiafi, ma o le Aso Sa, o le 4:00 i le afiafi. O le a tatalaina faitotoa i le 8:00 i le taeao o aso taitasi. E na o i latou e iai tofiga e galulue o le a faatagaina e ulufale i luma atu o le taimi lena. Ae peitai, o le a leai se tasi e faatagaina ona taofia ni nofoa seiloga ua teʻa le 8:00 i le taeao.
9 A o tatou faimalaga atu ma faimalaga mai le tauaofiaga, e tatau ona tatou vaai i avanoa e faia ai se molimau lē fuafuaina. E ono fiafia i le feau o le Malo i latou o loo faigaluega i pamu penisini, o faatauoloa, o ē ao lafoga i luga o auala, o tagata faigaluega i faletalimalo, ma tagata faigaluega i faleʻaiga. Ia e sauniuni i lenei avanoa e ala i lou sau ma aumai ni sāvali, o mekasini fou, o polosiua, po o isi tusi ina ia mafai ai ona e faaaogaina avanoa e molimau ai i tagata atonu e lei maua muamua se avanoa e faalogo ai i le tala lelei.—2 Timo. 3:17.
10 “Faapefea lo Outou Faalogo”: Ua atamai mo le au usufono ona utagiaina le fautuaga o loo maua i le Luka 8:18. Ua faalaeiauina tagata uma ina ia aumaia se Tusi Paia faapea ma se tusi pese ma se api. Ia faalogo ma le faaeteete i manatu autū o lauga taitasi, ma faia ni faamaumauga pupuu. Ia fesili ifo ia te oe lava pe faapefea ona e faia se faatatauga totino o le mataupu. O po taitasi o le tauaofiaga, a o e lei alu e te tofā, aisea e lē autalu ai au faamaumauga ma faavasega po o le ā le lalata o loo e pipii atu ai i le ala a Ieova i le ola.—Faata. 4:10-13.
11 Ua matauina a o faia le fono, e tuua ai e nisi le maota fono ae nofonofo i a latou taavale, ma misia ai mataupu o le polokalame. Ua matauina nisi e fesavalivaliai solo e aunoa ma ni mafuaaga i fafo i le faapaologa o le fale ae o lea e tatau ona latou nonofo i le maota fono ma faalogologo. Ua vaaia foi ni vaega o talavou o loo tuua le nofoaga o le tauaofiaga i le aoauli. O nisi o auauna a Ieova i taimi ua mavae na latou faia ni mea sese matuia i o latou olaga ona latou te lei faalogo ma le faaeteete i apoapoaiga a Ieova. O le mea moni tatou te mananao e alofia le faia o na foi mea sese. (2 Tu. 17:13-15) Ua saunia e le “auauna faamaoni ma le mafaufau” faatonuga ia tatou te manaomia uma lava. E faapitoa le tāua ona tatou “atili ai ona naunau i mea ua tatou faalogologo i ai” a o faagasolo lauga taitasi o le polokalame o le tauaofiaga e tolu aso. E iai se mea tatou te naunau faapitoa i ai o le a faatomuaina mai i aso taitasi, e aofia ai faamatalaga ia o le a mautinoa le iai o se aafiaga aogā i le ala tatou te ola ai i le lumanai. E ala i lo tatou uaʻi totoʻa atu ma faaaogā atoatoa mea faaleagaga ua saunia mai e Ieova i le tauaofiaga o loo lumanai mai, o le a faamautuina ai le taulaina o lo tatou faamoemoe, ina ia “[tatou lē] teʻa ese” mai le ala a le Atua i le ola.—Mata. 24:45; Epe. 2:1.
12 Teuga e Faamamaluina ai Ieova: I nei taimi faigata, e manaomia ona tatou uaʻi atili atu ina ia aua ai neʻi puʻea i tatou e le agaga o lenei lalolagi. (1 Kori. 2:12) O o tatou laei ma teuga e tatau ona onomea ma e tatau ona atagia atu ai le mamalu o le Atua o lē o loo tatou tapuai i ai. (1 Timo. 2:9, 10) E lē manaomia ni ofu taugata ina ia iai ia i latou o ē “viia ai i mea uma lava . . . le aʻoaʻoga a le Atua lo tatou Faaola.” (Tito 2:10) Mātau le fautuaga lelei ma aogā faale-Tusi Paia o loo i le lomiga o Iuni 15, 1997, o Le Olomatamata, itulau 17 ma le 18, palakalafa 14-18. Aua lava neʻi manatu māmā i le molimau malosi e mafai ona tatou avatua e ala i le laei i le auala e faamamaluina ai Ieova.
13 Na taʻua e se Molimau e 16 tausaga le matua e faapea ina ua ō atu i se tasi afiafi ma lona tuagane i se faleaiga ina ua maeʻa le fonotaga, na la matauina ai nisi o uso ma tuafāfine o ē na iai iina ua sui i ni teuga e lē talafeagai. E ui i lea, o le toatele o ē sa taumamafa i le faleaiga sa fiafia i Molimau sa lelei ma talafeagai laei ma faia a latou pine fatafata. Na tatala ai e lenei mea le avanoa e avatu ai se molimau i nisi o ē sa taumamafa ai i le fale.
14 Amioga e Viia ai Ieova: Ua tatou iloa o a tatou amio faa-Kerisiano e mafai ona aafia ai le auala e vaai ai isi i le tapuaiga moni. O lea la, tatou te mananao ai ina ia tatou amioai i taimi uma lava i le auala e tatau ma le tala lelei ma e aumaia ai le viiga ia Ieova.—Fili. 1:27.
15 I le tausaga ua mavae, sa faia ai se tauaofiaga itumalo mo le uluai taimi i le itu i mātū o Angola. I le aso lona lua o le tauaofiaga, na auina atu ai i le nofoaga ni leoleo o le malo se toalua ina ia faamautinoa o tausia lelei le filemu o ē na auai. Na la nonofo ai i le aso atoa. I le iuga o le aso, na la faamatalaina ai o la lagona mataina i mea na la faalogo ai ma amioga pulea lelei na la matauina. Na faapea mai le tasi o i laʻua: “Aisea na auina mai ai i maʻua iinei? E ma te iloa e tausia e Molimau a Ieova le filemu i a latou faatasitasiga.”
16 Na sola atu se sui o se vaega faapolotiki a se atunuu Aferika i Europa ina ua fasiotia uma isi sui o lana vaega. Na oo o ia i le tele o faafitauli totino ma sa matuā faavaivai ai lava. Ae na oo ina ia taliaina se suesuega faale-Tusi Paia. A o auai i lana uluai tauaofiaga itumalo, na maofa o ia i tagata mai ituaiga eseese na faatasitasi faatasi ai i le filemu ma le autasi. Na ia talitonu ai ua ia mauaina le upu moni, ma a o faia lena tauaofiaga na ia filifili ai e motusia ana fesootaiga uma faapolotiki. Na ia papatiso mulimuli ane, ma i le taimi nei o loo auauna ai o ia ma lana fanau ia Ieova.
17 O le a faapefea i la tatou amio i tauaofiaga o lenei tausaga ona aafia ai i latou atonu o le a faatoʻā auai atu? Po o le a latou matauina ea le agaga o le feoeoeai e atagia atu pe a tatou galulue faatasi o ni ē tauofo? Po o le a fiafia ea i latou i le mamā o lo tatou siomaga ma le vaaia o i tatou ma a tatou fanau o taalaoina so o se otaota lava e ono taatia i tafatafa o o tatou nofoa, a o lei tuua le nofoaga? Po o le a latou matauina ea la tatou amio lelei a o tatou faimalaga atu pe foi mai i o tatou api ma le nofoaga o le tauaofiaga? Po o le a latou matauina ea i tatou mātua, o loo tatou vaavaaia lelei a tatou fanau i taimi uma? Seʻi o tatou faamautinoa ua tatou faia mea e sili tatou te mafaia e faafiafia ai i latou uma e matauina mai i tatou.
18 Totogiina o Tupe Faaalu o le Tauaofiaga: Ua taugata i le lalolagi i aso nei pepa ulufale mo se nofoa i se taaloga po o isi faaaliga i se malae taalo po o se maota fono. E tau faatatau atu lea i le taugata o pili mo le faaaogaina o nofoaga o loo i vaipanoa o aai. Ua masani lava ona iai faatulagaga o “nofoa maua fua, e leai ni aogatupe” a le Sosaiete i tauaofiaga. O le a faapefea la, ona totogiina pili mo le faaaogaina o fale ma isi tupe faaalu o le tauaofiaga? E ala i foai o le agalelei a i latou o loo auai. E matou te mautinoa o le a outou faaalia le agaga o le limafoai lea e pei ona sa faaalia e auauna a le Atua i le taimi ua mavae i le faataitai atu ia Ieova le Atua ma Iesu Keriso. (2 Kori. 8:7) O loo faia se faaeteetega tele ina ia faamautinoa o loo malupuipuia, ma faamaumauina foai tauofo uma, ma faaaogā mo le fuafuaga na ala ai ona fai.
19 Nofoa: O taiala ua avatua pea mo le tele o tausaga o le a faaauau pea ona faatatauina, e faapea, O NOFOA E TAOFIA E MO NA O TAGATA O LOU LAVA AIGA MA SO O SE TASI ATONU NA TOU MALAGA FAATASI MAI I LAU TAAVALE. Ua lelei tele le vaaia o le faaleleiga i lenei mataupu, ma ua faamalosia ai le siomaga fealofani o loo faaalia i tauaofiaga. I le tele o nofoaga, o nisi nofoa e sili atu ona faigofie ona oo i ai. Faamolemole ia faaali le magafagafa, ma tuu ia nofoa mo tagata matutua ma isi o loo manaomia e o latou tulaga nofoa ia. Manatua o le ‘alofa e le sailia e ia ana lava mea.’—1 Kori. 13:4, 5; Fili. 2:4.
20 O Mea Pueata, Masini Puevitiō, ma Laau Pueleo: O mea pueata ma masini pueleo e mafai ona faaaogā i tauaofiaga. Ae peitai, o lou faaaogaina o ia mea ia lē faalavelave ai i isi. O le feoai solo e tapue ni ata a o faagasolo le polokalame o le a faalavelave ai i isi o loo taumafai e uaʻi atu i le polokalame. E lē tatau ona sulu atu so o se ituaiga o mea pueleo i uaea eletise ma masini e faaaogaina mo le faiga e faaleotele ai le leo, e lē tatau foi ona poloka e ia masini le auala e fesavaliai ai tagata, pe punitia ai le vaai a isi.
21 Fesoasoani Muamua: O le Matagaluega o le Fesoasoani Muamua e mo na o faalavelave faafuasei. Faamolemole ia aumai ni a outou lava fualaau asipulini, vai manava, mea faapipii, pine faamau napekini, ma mea faapena, ona o mea na e lē maua i le tauaofiaga. So o se tasi e iloa e aafia i se maʻi oso faafuasei, maʻi suka, maʻi fatu, ma isi lava maʻi, e ao lava ona tapena mai ma i latou mea latou te manaomia. E tatau ona iai ma i latou i taimi uma se tasi o le aiga po o se tasi o le faapotopotoga e malamalama i o latou tulaga ma e mafai ona saunia se fesoasoani vave manaomia, pe afai e tupu mai. Sa tutupu faafitauli i tauaofiaga i le tuua na o ē e iai faafitauli tumau tau i le soifua maloloina ma ē mamaʻi. Afai e iai nisi o iai ni o latou manaoga faapitoa tau le soifua maloloina ae lē o iai nisi o lona aiga e mafai ona fesoasoani ia i latou, o toeaina o la latou faapotopotoga o le a manaomia ona logoina i lea tulaga ma faia i ai ni fuafuaga talafeagai e fesoasoani ai. E lē mafai ona faia ni sauniuniga i tauaofiaga mo ni potu faapitoa e āpi ai i latou ua maua i ni gasegase e aafia i tulaga o le siomaga po o ni mea e ilitata ai le tino.
22 Meataumafa i le Tauaofiaga: E tatau i tagata taitoatasi uma e auai ona aumai sana lava meatausami nai lo le tuua o le nofoaga o le fono i le taimi o le malologa puupuu i le aoauli ina ia faatau mai se mea i fafo atu. O sina ʻaiga māmā e faamalieina ai ma faigofie ona feaveai o le a lava ma totoe. Ua aumaia i le faaopoopoga o La Tatou Faiva o le Malo o Iulai 1995, palakalafa e 26 nisi manatu i mea e aumai. O mea mataʻetaʻe ma ʻava malosi e lē faatagaina i nofoaga o le tauaofiaga. O pusa (cooler) po o taga meaʻai e tatau ona fetaui le laiti ina ia ofi i lalo o lou nofoa. O nisi o le aofia ua matauina le tausasami a o faagasolo le polokalame. E faaalia e lenei mea le lē faaaloalo mo le sauniga.
23 Maeu so tatou fiafia i le iloaina e lē o toe mamao ona amataina lea o le Tauaofiaga o le 1998, o “Le Ala a le Atua i le Ola”! Po ua uma ea ona faia au fuafuaga ina ia e auai? Tau ina ia saogalemu lau faimalaga atu ma ia toe foi i le aiga ua faafouina, ma maumauai e agaʻi i luma i le auaunaga tāua a Ieova ma tumau ona sailia le ala a le Atua i le ola mo lou manuia e faavavau.
[Pusa i le itulau 6]
Mea e Faamanatu mo le Tauaofiaga
▪ Papatisoga: O i latou o le a papatiso e ao ona alala i nofoa i le vaega ua faatulagaina a o lei amataina le polokalame i le taeao o le Aso Toonai. O se ofu taele onomea ma se solo e ao ona aumaia e le tagata o loo fuafua e papatiso. I le taimi ua teʻa sa laeiina ai e nisi ofu e lē talafeagai ma taʻufaatauvaaina ai lea sauniga. O toeaina o loo autaluina fesili i le tamai tusi o Aʻoaʻoga Faavae faatasi ma tagata papatiso e ao ona faamautinoaina ua malamalama tagata taitoatasi i manatu tāua nei. O le papatisoga e faailoga ai le tuuina atu o se tasi, o se mataupu totino i le tagata lava ia i lo la va ma Ieova. O lea la, e lē talafeagai ai mo ni tagata e papatiso ona fusi e le tasi le isi pe uulima a o papatisoina.
▪ Pine Fatafata: Faamolemole ia laeiina le pine fatafata o le 1998 i taimi uma a o iai i le aai o le tauaofiaga ma pe a faimalaga atu pe toe foi mai i le nofoaga o le tauaofiaga. E masani ona maua ai ni avanoa mo i tatou e faia ai se molimau lelei. O pine ma faavaa e tatau ona maua mai i la outou faapotopotoga auā o le a lē maua i le tauaofiaga. Aua e te faatali seʻi toe o ni nai aso oo i le tauaofiaga ona e faatoʻā fesili lea mo ni pine fatafata mo oe ma lou aiga. Ia manatua e ave lau pepa fou o Faatonuga ua Muai Saunia mo Fomaʻi ma Tuusaʻoloto Ai (Advance Medical Directive/Release).
▪ Āpi: O le toatele o i latou e auai i tauaofiaga i atunuu o loo vaaia e le tatou lālā e mafai ona nonofo i aiga po o le faia lava foi o a latou lava fuafuaga mo ni āpi. Ae peitai, pe afai e te manaomia se āpi, tusi se tusi e faamatala ai mea o loo manaomia ma tuuina atu i le failautusi o la outou faapotopotoga e lafo i le matagaluega o āpi o le tauaofiaga.
▪ Taavale Toso Pepe ma Nofoa e Mafai Ona Faamoe: I le tele o nofoaga, e lē faaaogaina ai taavale toso pepe i nofoaga o faatasiga i le lautele. E lē faatagaina e aiaiga o tulaga tau tinei mu le iai o nei mea i faapaologa o fale po o va o laina nofoa. Talu ai o le tumutumu o tagata e ono feomai ai, e mautinoa la le matautia o taavale toso pepe e lē gata i le pepe, ae faapena foi i se isi e ono lāvea ai. O lea, faamolemole aua neʻi aumaia taavale toso pepe i le nofoaga o le tauaofiaga. E faatagaina nofoa mo tamaiti e faaaogā i totonu o taavale, auā e mafai ona ofi i tala ane o nofoa o o latou mātua. Faamolemole aua neʻi aumaia ni nofoa e mafai ona faamoe. E lamatia ai ma e lē faatagaina i nofoaga faitele. E tāua ma e talisapaia la outou lagolagosua.
▪ Auaunaga Tauofo: Pe e mafai ona e faataatia ese se taimi o le tauaofiaga e te fesoasoani ai i se tasi o matagaluega? O le auauna i ou uso, e tusa lava pe na o ni nai itula, o le a matuā aogā ma aumaia ai le matuā faamalieina totino. Pe afai e mafai ona e fesoasoani, faamolemole ia lipoti atu i le Matagaluega o Auaunaga Tauofo a le tauaofiaga. O fanau e i lalo ifo o le 16 tausaga le matutua e mafai foi ona faia se fesoasoani aogā e ala i le galulue i lalo o le taitaiga a se matua po o se isi tagata matua e maufaatuatuaina.
▪ Lapataiga: Ia mautinoa ua loka lau taavale i taimi uma, ma aua neʻi tuua se mea e iloagofie atu ma faaosoosoina ai se tasi e osofaia. O le au gāoi ma le au seʻi ato e latou te tulimataia lava faatasitasiga tetele. E lē o se mea poto le tuu o ni mea tāua i lou nofoa. E lē mafai ona e mautinoa po o tagata uma i ou autafa o ni Kerisiano. Aisea e ofoina atu se tofotofoga? Ua maua mai ni lipoti o taumafaiga a tagata o le lalolagi e faatogafiti ona taitaieseina tamaiti. IA E ILOA LE MEA O IAI LAU FANAU I TAIMI UMA.
O televise ma vitiō o loo iai i le tele o faletalimalo e masani ona faaali ai ata matagā o faiga lē mamā faaleituaiga. Aua neʻi faatagaina le fanau e matamata faasoloatoa i le televise i le potu e aunoa ma le puleaina. E ono malilie mātua e puipuia le la fanau mai le matamata atu i le “TV totogi” i o latou potu e ala i le talosagaina o le faletalimalo e tapē lea mea i le taimi o lo latou nonofo ai.
Faamolemole ia aua neʻi telefoni pe tusi atu i ē o vaaia le fale e fai ai le tauaofiaga e saili mai ai ni faamatalaga e uiga i so o se mataupu mo le tauaofiaga. Afai e lē maua ni faamatalaga manaomia mai toeaina, e mafai ona e tusi atu i le tuatusi o se tauaofiaga patino, lea e maua i tua o le pepa o Talosaga mo Manaoga Faapitoa o Āpi.