Auaunaga Faapaeonia—Pe e mo Oe?

¹ “E matuā ou lē mafaufauina lava le faia o se isi mea. O le mea moni ou te lē o mafaufauina lava se isi mea e ono aumaia lea olioli.” O ai na faia lea faamatalaga? O se tasi o le faitau selau afe o Molimau a Ieova o ē ua avea le faiva faataimi atoa ma a latou galuega fiafia o le olaga. Po ua e iloiloina ea faatasi ma le tatalo po o le auaunaga faapaeonia e mo oe? O lo tatou faia o se tuuina atu atoatoa o i tatou lava ia Ieova, ua matuā tatau ai ona tatou iloiloina pe e lē onomea ona fai so tatou sao atoatoa i le faasalalauina atu o le tala lelei o le Malo. I le mafaufauina o lena sini, faamolemole iloilo nisi o fesili ua fesiligia e le toatele e faatatau i le auaunaga faapaeonia.

FESILI 1: “Ua fai mai nisi o le paeonia e lē mo tagata uma. E faapefea ona ou iloa pe e mo aʻu?”

² O le tali e faalagolago i ou tulaga ma matafaioi faale-Tusi Paia. E toatele ē e lē o mafai ona faatagaina i latou e lo latou soifua maloloina po o tulaga o loo tutupu pea i le olaga ina ia faaaluina ai le 90 itula i le masina i le faiva. Pei o se faaaoaoga le toatele o tuafāfine faamaoni o loo avea ma avā ma tinā Kerisiano. O loo faia so latou sao i le faiva i avanoa uma e mafai ona latou maua i le tele o loo faatagaina ai i latou e o latou tulaga. Pe a talafeagai ma avanoa ua maua, ona latou paeonia lagolago lea i se masina po o le sili atu i tausaga taitasi, ma seleseleina le olioli e maua mai le faalauteleina o lo latou sao i le auaunaga. (Kala. 6:9) E ui lava ina lē mafai ona faatagaina i latou e o latou tulaga e auauna ai o ni paeonia faataimi atoa i le taimi nei, a ua latou faasilisilia le agaga faapaeonia ma avea o se faamanuiaga i le faapotopotoga i le avea o i latou ma tagata talaʻi maelega o le tala lelei.

³ I le isi itu, e toatele uso ma tuafāfine o loo faaleai ni a latou matafaioi o fai ua faaavanoaina i latou mo le auaunaga faapaeonia e ala i le fetuunaia o mea latou te faamuamuaina. Ae faapefea oe? Po o oe ea o se talavou ua iu au aʻoaʻoga faalelalolagi? Po o oe o se avā o loo mafai e lau tane ona saunia mai i se tulaga lava faasoasoa meafaitino mo le aiga? Po o oe o sē faaipoipo e aunoa ma se fanau e tausi? Po ua e litaea mai lau galuega totogi? Ina ia paeonia pe lē paeonia, o le filifiliga lea e ao ona fai e le tagata lava ia mo ia. O le fesili, Pe mafai ona e faaavanoa lou olaga mo le paeonia?

⁴ O loo faaaogā e Satani lana faiga o mea faalelalolagi e faatumu ai o tatou olaga i mea e tosina ese ai ma faaaafia ai i tatou i se ala manatu faapito o le olaga. Afai tatou te maumauai ina ia tumau ona lē avea ma vaega o le lalolagi, o le a fesoasoani mai Ieova ia i tatou ina ia faamuamua pea mea tau le Malo ma aapa atu ia mauaina faaeaga uma o le auaunaga faatiokarate ia e avanoa mai mo i tatou. Afai e mafai ona e fetuunai ou tulaga ina ia auauna o se paeonia, aisea e lē faia ai faapea?

FESILI 2: “E faapefea ona ou mautinoa o le a mafai ona ou faatupeina laʻu auaunaga faataimi atoa?”

⁵ O le tulaga moni i le tele o atunuu ua faateleina i le gasologa o tausaga itula manaomia i galuega totogi i vaiaso taitasi, ina ia maua ai mea manaomia masani o le olaga. E ui i lea, e toatele ua paeonia mo le faitau sefulu o tausaga, a ua faaauau ona tausia i latou e Ieova. Ina ia faamanuiaina i le avea o se paeonia, e manaomia ai le faatuatua ma le agaga o le faataulagaina totino. (Mata. 17:20) Ua tatou maua le faamautinoaga i le Salamo 34:10 e faapea “e leai se mea lelei e mativa ai i latou o e saili ia Ieova.” So o se tasi e ulu atu i le auaunaga faapaeonia e tatau ona faia faapea ma le mautinoa atoatoa o le a saunia mai e Ieova mea mo ia. O loo faia lava faapea e Ieova mo paeonia faamaoni i so o se mea! (Sala. 37:25) O le mea moni, ina ia ogatusa ma mataupu silisili o loo i le 2 Tesalonia 3:8, 10, ma le 1 Timoteo 5:8, e lē faatalitalia e paeonia isi ina ia lagolagoina i latou i le tulaga tau tupe.

⁶ So o se tasi o loo mafaufauina le auaunaga paeonia e tatau ona faia e pei ona taʻua e Iesu: “Muai nofo i lalo e faitau tupe e totogi aʻi.” (Luka 14:28) O le faia faapea e faaalia ai le atamai aogā. Talanoa atu ia i latou ua faamanuiaina i le paeonia mo le tele o tausaga. Fesili i ai i le auala ua faatumauina ai i latou e Ieova. O la outou ovasia o le matagaluega o se paeonia tomai o lē o le a fiafia e ofoina atu ni fautuaga i le auala e taulau manuia ai i le faiva faataimi atoa.

⁷ E lē mafai ona oo atoatoa i se tagata le faataunuuga moni o le folafolaga a Iesu i le Mataio 6:33 seiloga e na te tuuina atu ia lava i aao o Ieova. Ua taʻua mai e se tuafafine paeonia faamaoni e faapea: “Ina ua ma taunuu ma laʻu paga paeonia i lo ma tofiga fou, sa na o ni nai fualaau ʻaina a ma mea na iai, o se tamai pata, ma sa leai se ma tupe. Na ma faaumaina meaʻai ia i la ma ʻaiga i le afiafi ma faapea, ‘Ia o lea la ua leai sa ta meaʻai mo taeao.’ Na ma tatalo e faatatau i le leai o sa ma meaʻai ona ma momoe loa lea. I le taeao po o le aso na sosoo ai, na asiasi mai ai se tuafafine Molimau o le faapotopotoga lea ma faafeiloai mai ia lava, ma fai mai, ‘Na ou tatalo ia auina mai e Ieova ni paeonia. O le taimi nei la e mafai ai ona tatou galulue ma oulua i le asō, ae ona ou te nofo i tuā, o le a tatou ʻaai ai la ma oulua i le aoauli nei, auā o lea na ou aumaia le meaʻai lea mo tatou uma.’ O se fasipovi telē lava ma fualaau ʻaina.” E lētioa ona faamautinoa mai i tatou e Iesu e faapea e mafai ona ‘aua neʻi tatou popole i o tatou ola’! Ona ia faaopoopo mai lea: “O ai ea so outou na te mafaia i lona popole ona faasiliina lona umi i se aga e tasi?”—Mata. 6:25, 27.

⁸ O le lalolagi o siomia ai i tatou ua faasolo ina faateleina pea le naunau i meafaitino. Ua tele ai omiga e aumai ina ia faaaafia atu ai i tatou. E ui i lea, o le talisapaia ma le lotomaulalo o le faiva faataimi atoa e mafai ona faamalieina ai i tatou i nai meafaitino o maua. (1 Timo. 6:8) O paeonia o loo faafaigofieina pea o latou olaga ma maopoopo lelei ua tele taimi o faaaluina mo le auaunaga ma maua ai le olioli e sili atu ma le malosi faaleagaga mai le aʻoaʻoina o isi i le upu moni. E ui lava e lē o taumafai e ola i se olaga e faafitia ai faalogona totino, ae o lo latou manatu paleni i lo latou tulaga tau tamaoaiga ua mafai ai ona latou olioli i faamanuiaga o le paeonia.

⁹ Afai e te manatu moni o lea ua tatou ola i aso mulimuli ma ua puupuu le taimi mo lenei lalolagi amioleaga, o le a uunaia la oe faaleagaga e faia ni faataulagaina o loo manaomia ina ia talaʻia ai le tala lelei i avanoa uma. E ala i le toe tilofaia o lou tulaga tau tamaoaiga ma tuu atu le mataupu i aao o Ieova, o le a e iloa ai e mafai ona e auauna ia te ia faataimi atoa. E tusa lava pe tatau ai ona e faamatuu ese atu ni manaoga patino faaletino ina ia mafai ona e paeonia, o le a e olioli lava i faamanuiaga faaoaina a Ieova.—Sala. 145:16.

FESILI 3: “I le avea o se talavou, aisea e tatau ai ona ou iloiloina le auaunaga faapaeonia e fai ma aʻu galuega?”

¹⁰ A o faamaeʻaina ou tausaga mulimuli i le aʻoga, e masani lava e te mafaufau i le lumanai. E te manao ina ia mautu lou lumanai, ia fiafia ma taunuu faamoemoega. E ono taumafai faufautua o le aʻoga e uunai oe i se galuega e tele le tamaoaiga e maua ai e manaomia ai nisi tausaga o aʻoaʻoga i iunivesite. E taʻu atu e lou loto fuatiaifo faa-Kerisiano ua aʻoaʻoina lelei e faapea, e tatau ona e sauni e te auauna ia Ieova i se tulaga atoatoa e te mafaia. (Fai. 12:1) E te ono mafaufau foi i le faasolo ina faaipoipo ma faia se aiga. O le ā o le a e faia?

¹¹ O faaiuga e te faia i le taimi lenei o lou olaga e mafai ona iloa atu ai lou lumanai atoa. Afai ua uma ona e tuuina atu, o se Molimau papatisoina a Ieova, ua e tuuina atu la oe lava ma le loto atoa ia Ieova. (Epe. 10:7) O se avanoa muamua lava e te maua, ia faataitai loa ona e paeonia lagolago mo le tasi le masina po o le sili atu foi. O le faia faapea o le a e tofo ai i le olioli ma tiute tauave e ō mai faatasi ma le paeonia faifai pea, ma o le a mautinoa le matuā manino o lau vaai i mea e ao ona e faia i lou olaga. Mulimuli ane, nai lo le faatumu o ia gaoioiga i se galuega totogi soloatoa pe a maeʻa aʻoaʻoga, aisea e lē amata ai loa le paeonia sauatoa? O nisi o ē na faatali seʻi oo i se taimi mulimuli ane i le olaga ona faatoʻā auai lea i le auaunaga faapaeonia, na toe faanoanoa ona sa lei vave ona latou amataina.

¹² I le avea o se talavou, ia faatāua avanoa ua e maua e tausisia ai le olaga nofofua, ma olioli i faamanuiaga e te mafai ona maua mai i le galuega talaʻi faataimi atoa. Afai o lou faanaunauga ia faaipoipo i se aso, e leai se faavae e sili atu ona lelei e mafai ona faataatia mo le faaipoipoga nai lo le auauna muamua i le galuega o le paeonia sauatoa. A o e tupu aʻe o se tagata taʻumatuaina ma faaleagaga, e te ono filifili ai e faia le paeonia o sau galuega faatasi ma sau paaga faaipoipo o loo manatu foi faapea. O nisi ulugalii sa paeonia faatasi ua avea nei ma ovasia o le matagaluega po o le auauna faamisionare. O se auala moni e faamalieina ai o le olaga!

¹³ E tusa lava po o le ā le umi e faaauau ona e paeonia ai, o le a faateleina pea lou iloa aʻoaʻoina ma maua toleniga lē mafaatusalia e lē mafai lava e se isi galuega i le lalolagi ona aumaia. E aʻoaʻoina ai i le paeonia le puleaina, faamaopoopoina totino, le auala e feagai ai ma tagata, le faalagolago atu ia Ieova, ma le auala e ati ae ai le onosai ma le agalelei—o uiga o le a faaauupegaina ai oe ina ia faia isi tiute tauave e sili atu.

¹⁴ E lei iai lava se taimi ua faalemautinoa mai ai le olaga mo le fanau a tagata. O loo tumau lava nisi o mea, e ese ai mai mea ua folafola mai e Ieova. Talu ai o loo matuā avanoa mai pea lou lumanai, o le ā la se isi taimi e sili atu ona lelei nai lo le taimi nei, e mafai ona manatunatu loloto ai i le mea o le a e faia i lou olaga i tausaga o sau? Ia iloilo ma le faaeteete le faaeaga o le paeonia. O le a e lē faanoanoa ai lava i le filifilia o le auaunaga faapaeonia e avea ma au galuega.

FESILI 4: “Pe e lē o se omiga faifai pea ea le sailia o itula manaomia? Ae faapefea pe a ou lē ausia oʻu taimi?”

¹⁵ Pe a e faatumuina le pepa talosaga mo le paeonia sauatoa, e tatau ona e taliina le fesili faapea: “Po ua e faamaopoopoina ea au meafai totino ina ia mafai ai ona e fuafua ma le faamoemoe e ausia le 1,000 itula manaomia mo le tausaga?” Ina ia ausia, e manaomia ona e faia se faatatauga o le tusa ma le tolu itula i le aso i le auaunaga. O le mea moni lava, e manaomia e lenei mea se faasologa lelei ma le pulea totino. O le toatele o paeonia latou te amataina se faasologa e aogā, ma e mafai ona galueaiina, i totonu o ni nai masina.

¹⁶ E ui i lea, e moni le faapea mai o le Failauga 9:11, ‘O le tausaga ma le mea e tupu ai e oo ia i tatou uma lava.’ O maʻi matuia po o isi tulaga lē maalofia e mafai ona faapogaia ai se paeonia e faatuatuai i ona itula. Afai o le faafitauli e lē tumau mo se taimi umi ma ua tupu i le amataga lava o le tausaga faaleauaunaga, o se faasologa faavavevave atu la atonu e manaomia ina ia toe maua ai taimi ia ua lē maua. Peitai e faapefea pe afai e mapuna aʻe se faafitauli matuia i ni nai masina lava o totoe o le tausaga faaleauaunaga ma lē mafai ai e le paeonia ona ausia taimi manaomia?

¹⁷ Afai e na ona e gasegase mo ni nai masina po o nisi foi mafuaaga faavavevave e lē mafai ona e pulea ua lē mafai ai ona maua itula manaomia, e mafai ona e faalatalata atu i se sui o le Komiti o le Auaunaga a le Faapotopotoga ma faamatala i ai le faafitauli. Afai e manatu nei toeaina e mafai ona fautuaina le faatagaina o oe e faaauau i le auaunaga paeonia e aunoa ma le popole i le toe suʻeina mai o taimi ua lē maua, e mafai ona latou faia lena faaiuga. O le a faailoga e le failautusi le pepa o Faamaumauga a le Tagata Talaʻi o le Faapotopotoga e faailoa ai e lē manaomia ona e toe suʻeina mai taimi ua lē maua. E lē o se faatagaga o lou lē ausia o itula ae o le amanaiaina faapitoa o ou tulaga.—Tagai i le faaopoopoga o La Tatou Faiva o le Malo o Aokuso 1986, palakalafa 18.

¹⁸ O paeonia tomai ua latou faasilia ni itula i le amataga lava o le tausaga faaleauaunaga. Ua faamuamua la latou auaunaga faapaeonia, o lea i nisi taimi latou te manatu ai e faataatia ese ni galuega lē tāua. Afai ua lē maua itula o se paeonia ona o le lē lelei o le faasologa po o le leai o se puleaina totino e pipii atu i ai, e ao ona ia lagona o lana avega tauave lea o le suʻeina mai o taimi ua lē maua ae lē faatalitalia se fuafuaga faapitoa mo ia.

¹⁹ E iai taimi e oo ai i se paeonia suiga lē maalofia i ona tulaga. E ono oo o ia i se tulaga ua lē mafai ona faafetaiaia itula manaomia mo se vaitaimi umi lava ona o se faafitauli faifai pea tau soifua maloloina, o tiute tauave faateleina o le aiga, ma isi mea faapena. I lenei itu, o le ala atamai le toe foi i le avea ma se tasi o tagata talaʻi ma auai i so o se taimi e mafai ai i le auaunaga faapaeonia lagolago. E leai se sauniuniga o iai faapea e faataga ai se tasi e tumau i le lisi o paeonia pe afai ua lē faatagaina e ona tulaga o ia e faafetaiaia itula manaomia.

²⁰ Matou te faamoemoe o le sauniuniga o le avatua o iloiloga faapitoa ia i latou e agavaa o le a faalaeiauina ai le toatele e auai i le auaunaga faapaeonia e aunoa ma le popole fua i isi itu. E tatau foi ona faalaeiauina ai i latou ua iai i le auaunaga faataimi atoa ina ia faaauau ai pea i le paeonia. Matou te mananao i paeonia ina ia taulau manuia i la latou auaunaga faataimi atoa.

FESILI 5: “Ou te manao ia faataunuuina se mea ma fiafia ai i le faia faapea. Po o le a faamalieina ea aʻu i le auaunaga faapaeonia?”

²¹ E tele ina foliga mai o le fiafiaga moni e faalagolago i le iai o se faiā mafana, totino ma Ieova ma faamautinoaga o loo tatou auauna ia te ia ma le faamaoni. Na onosai Iesu i le laau faaoosala “ona o le olioli sa tuu i ona luma.” (Epe. 12:2) Na maua mai lona fiafiaga i le faia o le finagalo o le Atua. (Sala. 40:8) I lenei faiga o mea, e mafai ona tatou olioli ai i le fiafiaga moni pe afai o le tele o gaoioiga o lo tatou olaga o loo fesootai atu i la tatou tapuaiga ia Ieova. O sini faaleagaga e aumaia ai ia i tatou se faamoemoe ona i o tatou loto ua tatou iloa ai o loo tatou faia le mea saʻo. E maua le fiafiaga i le foai atu, ma ua tatou iloa e leai lava se isi auala sili e foai atu ai i tatou nai lo le aʻoaʻoina o isi i le auala e maua ai le ola e faavavau i le lalolagi fou a le Atua.—Galu. 20:35.

²² O le paeonia na taʻua i le palakalafa muamua na faamatala maia lea tulaga e faapea: “E mafai ea ona iai se isi olioli e sili atu nai lo le olioli i le vaai atu i se tasi na lua suesue ua avea o sē e vivii atu ma le maelega ia Ieova? O se fiafiaga ma e faamalosia ai le faatuatua le vaaia o le malosi o le Afioga a le Atua i le uunaia o tagata e faia ni suiga i o latou olaga ina ia faafiafia i le finagalo o Ieova.” (Tagai i Le Olomatamata o Oketopa 15, 1997, itulau 18-23.) O le ā la o avatua ia te oe le fiafia? Afai o loo e faatāuaina naunautaiga aogā ma tumau nai lo le olioli lē tumau o loo ofoina mai e le lalolagi, o le a avatua ai la e le paeonia ia te oe se faamalieina ona o le faataulauina lea o le a e fiafia moni ai lava.

FESILI 6: “Afai e lē o manaomia mo le ola e faavavau, pe lē o laʻu faitalia ea lea pe ou te paeonia pe leai?”

²³ E moni, o le filifili ina ia paeonia o oe e faia. E na o Ieova e mafai ona faamasinoina ou tulaga totino o le olaga. (Roma 14:4) Ua ia faatalitalia maia oe ma le tonu ina ia e auauna atu ia te ia ma lou loto atoa, tagata atoa, mafaufau atoa, ma le malosi atoa. (Mare. 12:30; Kala. 6:4, 5) E alofa o ia i lē e foai ma le agaga fiafia, o lē o loo auauna ia te ia ma le olioli, e lē fai ma le tiga pe faatauanauina. (2 Kori. 9:7; Kolo. 3:23) E tatau ona avea lou alofa ia Ieova ma tagata i le oganuu ma mafuaaga e te auauna ai faataimi atoa. (Mata. 9:36-38; Mare. 12:30, 31) Afai o le tulaga lea o e lagona ai, e aogā ai la ona matuā faia sau iloiloga mo le auaunaga faapaeonia.

²⁴ Matou te faamoemoe o mea ua faatulaga atu iinei o le a fesoasoani ia te oe e fuafua ai ou faamoemoega mo se paeonia. Pe mafai ona e fetuunai ou tulaga ina ia paeonia sauatoa ai? Ua lomia atu i lalo se kalena ua faaulutalaina “O Laʻu Faasologa Faalevaiaso o le Auaunaga Faapaeonia.” Vaai pe mafai ona e faatumuina se faasologa e mafai ona aogā mo oe lava lea o le a mafai ai ona e maua se faatatauga o le pe tusa o le 23 itula i vaiaso taitasi i le faiva. Ona tuu atu lea o lou faatuatua atoatoa ma lou talitonuga ia Ieova. O lana fesoasoani e mafai ona e taulau manuia ai! Ua ia folafola mai: “Ou te . . . sasaa atu le manuia mo outou, ina seia silisili ona tele.”—Mala. 3:10.

²⁵ O lea la matou te fesili atu, “Auaunaga faapaeonia—pe e mo oe?” Afai e mafai ona e faapea mai “Ioe,” ona faatulaga lea o se aso e amata vave ai ona e paeonia sauatoa ma ia mautinoa o le a faamanuiaina oe e Ieova i se olaga tumu i le olioli!

[Siata i le itulau 6]

(Tagaʻi i le lomiga mo le ata atoa)

O Laʻu Faasologa Faalevaiaso o le Auaunaga Faapaeonia

ASO LUA: Taeao auaunaga i le fanua

ASO LULU: Taeao auaunaga i le fanua

ASO TOFI: Taeao auaunaga i le fanua

ASO FARAILE: Taeao auaunaga i le fanua

ASO TOONAI: Taeao auaunaga i le fanua

ASO SA: Taeao auaunaga i le fanua

ASO GAFUA: Aoauli auaunaga i le fanua

ASO LUA: Aoauli auaunaga i le fanua

ASO LULU: Aoauli auaunaga i le fanua

ASO TOFI: Aoauli auaunaga i le fanua

ASO FARAILE: Aoauli auaunaga i le fanua

ASO TOONAI: Aoauli auaunaga i le fanua

ASO SA: Aoauli auaunaga i le fanua

ASO GAFUA: Afiafi auaunaga i le fanua

ASO LUA: Afiafi auaunaga i le fanua

ASO LULU: Afiafi auaunaga i le fanua

ASO TOFI: Afiafi auaunaga i le fanua

ASO FARAILE: Afiafi auaunaga i le fanua

ASO TOONAI: Afiafi auaunaga i le fanua

ASO SA: Afiafi auaunaga i le fanua

Faaaogā se penitala e faamaumau ai lau faasologa mo aso taitasi o le vaiaso.

Faatulaga se aofaiga pe tusa e 23 itula i vaiaso taitasi i le auaunaga i le fanua.

Faasologa o le aofaiga o itula i le vaiaso____________________