E Mafai Ona Tatou Faia Galuega e Sili Atu
1 O galuega mataina sa faailogaina ai le faiva a Iesu Keriso. Sa ia fafaga faavavega le faitau afe o tagata, faamālōlō maʻi e tele, ma toe faatutū nisi mai le oti. (Mata. 8:1-17; 14:14-21; Ioa. 11:38-44) O lana galuega na tosina atu i ai mafaufau o se atunuu atoa. Peitai, o le po mulimuli lava a o lei maliu o ia, na ia taʻu atu ai i ona soo faamaoni e faapea: “O lē faatuatua mai ia te au, e faia lava e ia o galuega ou te faia; e fai foi e ia mea e sili i ia mea.” (Ioa. 14:12) E mafai faapefea ona tatou faia galuega e ‘sili atu’?
2 E Ala i le Galueaiina o Nisi Atu Oganuu: O le oganuu sa galueaiina e Iesu na faagata mai i Palesitina, ae peitai, sa ia poloaiina ona uluai soo ina ia molimau atu “e oo lava i le tuluʻiga o le lalolagi,” e sili mamao atu na i lo le oganuu sa talaʻi ai Iesu. (Galu. 1:8) O le galuega talaʻi lea na ia amataina ua soo ai nei le lalolagi, ua aofia ai atunuu e sili atu i le 232. (Mata. 24:14) Po o e faia ai ea se sao atoatoa i le galueaiina o le oganuu ua tofia atu i lau faapotopotoga?
3 E Ala i le Oo Atu i Nisi Tagata e Toatele: E matuā toaitiiti lava soo na tuua e Iesu e faaauauina le galuega talaʻi. Ae peitai, o le iuga o la latou molimau atu ma le maelega i le Penetekoso 33 T.A., na oo atu ai i le tolu afe tagata na talia le upu moni ma papatisoina i lena aso. (Galu. 2:1-11, 37-41) O le aoaoina o i latou o ‘ē ua saunia mo le ola e faavavau’ o loo faaauau pea e oo mai i o tatou taimi, lea o loo tatou papatisoina ai se faatatauga e sili atu i le 1,000 tagata i le aso e tasi. (Galu. 13:48) Po o e faia mea uma e te mafaia ina ia oo atu ai i tagata loto faamaoni i so o se mea lava e mafai ona maua i ai, ma toe asia i latou i se vave e mafai ai pe afai na faaalia se naunau?
4 E Ala i le Talaʻi Atu mo se Taimi e Sili Atu Ona Umi: Sa na o le tolu ma le ʻafa tausaga na faia ai le faiva faalelalolagi a Iesu. O le toatele o i tatou e umi atu se taimi na talaʻi ai na i lo lena taimi. E tusa lava po o le ā le umi o le a mafai ona tatou faaauau ai lenei galuega, ae tatou te matuā talisapaia le fesoasoani atu i soo fou taitoatasi ina ia amata ona ui i le ala i le ola. (Mata. 7:14) Po o tele ea ni au mea e fai i masina uma i le galuega a le Alii?—1 Kori. 15:58.
5 E mafai ona faatumauina lo tatou mautinoa e faapea i le lagolagoina e Iesu o la tatou galuega, o le a tatou faia ai galuega e sili atu i le avea ma ona soo moni.—Mata. 28:19, 20.