Taumafai ia E Iloa Ou Uso
1 Ua faamatalaina e le Tusi Paia se uo moni e faapea, o se tagata e sili ona pipii mai i lo le uso, o lē e maumauai lona alofa ma e faamaoni, ma e fesoasoani i lana uo i le taimi o puapuaga. (Faata. 17:17; 18:24) O le a lē aunoa i tatou ma ni uo faapena i le faapotopotoga pe afai e tatou te faia se taumafaiga ina ia iloa i latou ma ia tatou fealofani.—Ioa. 13:35.
2 O avanoa lelei e faamasani lelei ai ma o tatou uso, o le taimi lea a o lei amataina ma pe a uma foi sauniga. Aisea e lē vave ō atu ai, ma faatuatuai ona ō ese pe a uma le sauniga ina ia mafai ai ona olioli i feofoofoaiga mafana ma le olaola ma uso? Vaavaai mo ni uso eseese e talanoa i ai, e aofia ai ē matutua ua iai le tomai, o ē talavou po o i latou e matamumuli.
3 Ia Faamaite ni Talanoaga: Ia fai se talanoaga mafana na i lo o le tau ina fai atu i lou uso, talofa. E mafai ona e amataina se talanoaga i le faamatala atu o se mea na tupu i le faiva i le fanua, se manatu manaia i se mekasini fou, po o se faamatalaga e uiga i le sauniga lea faatoʻā uma. E mafai ona e iloa ni mea se tele e uiga i ou uso e ala i lou faalogologo lelei, ia faalaeiau i latou ina ia talatalanoa e uiga i ni mea na tutupu ia i latou ma mea ua latou aʻoaʻoina. O le tau lava ina fesili atu i le auala na iloa ai e se tasi Ieova, e mafai ona faaalia ai ni mea se tele. O nisi atonu na iai ni mea na tutupu i o latou olaga e faamalosia ai le faatuatua, a o isi o loo tauivi e onosaia ni tulaga o loo iai atonu e faigata i le toatele o tagata ona mafaufau i ai. O le iloaina o lenei mea o le a fesoasoani ia i tatou ina ia iloa lelei ai ma tali atu i manaoga o isi, o ni uo moni.
4 Ia Faauo le Tasi i le Isi: Ina ua mavae le maliu o lana tama, na faigata ai lava i se tuafafine ona usuina pese o le Malo ia e taʻua ai le toetu. Fai mai a ia: “I se tasi taimi, na vaai mai ai se tuafafine sa nofo i le isi itu i loʻu tagi. Na sau o ia ma fusi atu aʻu, ona ma usuina faatasi lea o isi fuaiupu o le pese. Sa ou lagona le matuā alofa i uso ma tuafāfine, ma le matuā fiafia ona sa matou ō atu i sauniga, i le iloaina e faapea, o le Maota o le Malo o loo maua ai le fesoasoani mo i matou.” E tatau ona tatou faaleuo atu i o tatou uso e ala i le ofoina atu o faamafanafanaga ia i latou pe a manaomia, ma ni faalaeiauga i taimi uma lava.—Epe. 10:24, 25.
5 A o agaʻi ina sili atu ona tetee mai lenei lalolagi tuai, seʻi o tatou taumafai ina ia iloa lelei o tatou uso. O lenei feofoofoaiga o faalaeiauga moni o le a avea lava o se faamanuiaga mo tagata uma.—Roma 1:11, 12.