Aua Lava Neʻi Faamaamulu i le Tausinioga mo le Ola!

“Ia tatou taufetuli ma le onosai i le tausinioga ua tuu i o tatou luma.”—EPERU 12:1, NW.

1, 2. O ā mea tutupu mataina ua faagaeetia ai auauna a Ieova i nei aso e gata ai?

O LOO tatou ola i ni taimi fiafia ae o ni taimi foi o luʻitau. I le silia ma le 80 tausaga ua tuanai, i le 1914, sa faanofotupuina ai Iesu e avea ma Tupu o le Malo faalelagi o le Atua. Ona amata ai lea o “le aso o le Alii” ma “ona po o le iuga” o lenei faiga o mea. (Faaaliga 1:10; Tanielu 12:9) Talu mai lena taimi, ua atili ai ona faanatinati le tausinioga a se Kerisiano mo le ola. Ua matuā naunautai ma le maelega auauna a le Atua ina ia ogatusa ma le kariota faalelagi a Ieova, o lana faalapotopotoga faalelagi, lea o loo agaʻi atu ma le lē mataofia ina ia faataunuu fuafuaga a Ieova.—Esekielu 1:4-28; 1 Korinito 9:24.

² Po ua maua ea e tagata o le Atua le olioli a o latou ‘taufetuli i le tausinioga’ i le ola e faavavau? Ioe, o le mea mautinoa lena! Ua faagaeetia i latou e vaaia le aoaoina o le vaega totoe o uso o Iesu, ma ua latou olioli e iloa ua toetoe lava ona faamaeʻaina lea o le faamaufaailogaina faaiu o ē o totoe o le 144,000. (Faaaliga 7:3, 4) E lē gata i lea, ua latou fiafia e iloa ua faaoo mai nei e le Tupu tofia a Ieova lana selesaito ina ia seleseleina ai “le saito o le lalolagi.” (Faaaliga 14:15, 16) Ma e maeu se seleselega! (Mataio 9:37) E oo mai i le taimi nei, ua silia i le lima miliona tagata ua aoaoina i totonu—o se “motu o tagata e toatele mai atu nuu uma, ma aiga, ma nuu, ma gagana eseese, e le ma faitaulia e se tasi.” (Faaaliga 7:9) E leai se tasi e mafai ona ia taʻu maia po o le ā le toatele o le a iu atu i ai lena motu o tagata, talu ai e leai se tagata na te mafaia ona faitauina.

3. O ā toʻatugā e tusa lava pe iai, ae tatau pea ona tatou taumafai e atiina ae se agaga olioli?

³ E moni, o loo taumafai Satani e faavaatuia i tatou pe faagesegeseina a tatou gaoioiga a o tatou gaoioi faanatinati atu i le tausinioga. (Faaaliga 12:17) Ma e lē o se mea faigofie ona tumau i le tausinioga a o iai foi taua, o oge, o faamaʻi, ma isi faigata uma o loo faailogaina ai le taimi o le iuga. (Mataio 24:3-9; Luka 21:11; 2 Timoteo 3:1-5) E ui i lea, o loo faagaeetia pea o tatou loto i le olioli a o latalata mai le iuga o le tausinio-ga. Tatou te taumafai e faaatagia atu le agaga lea na uunaia e Paulo ona uso Kerisiano i ona taimi ina ia latou mauaina: “Ia outou olioli i le Alii e le aunoa; ou te toe fai atu, ia outou olioli.”—Filipi 4:4.

4. O le ā le ituaiga o agaga sa faaalia e Kerisiano i Filipi?

⁴ E leai se masalomia, o Kerisiano ia na tusi atu i ai e Paulo nei upu sa latou olioli i lo latou faatuatua, auā na faapea atu Paulo ia i latou: “Ia faaauau ona outou olioli i le Alii.” (Filipi 3:1, NW ) O uso i Filipi sa avea o se faapotopotoga e limafoai, ma alolofa, o ē na auauna ma le maelega ma le aasa. (Filipi 1:3-5; 4:10, 14-20) Peitai sa lē o Kerisiano uma o le uluai senituri na iai lena agaga. Mo se faaaoaoga, e iai nisi Kerisiano Iutaia o ē na tusi atu i ai e Paulo le tusi o Eperu, sa avea i latou ma mafuaaga o popolega.

‘Ia Naunau Atu Atili’

5. (a) O le ā le agaga sa iai i Kerisiano Eperu ina ua faavae le uluai faapotopotoga Kerisiano? (e) Faamatala mai le agaga sa iai i nisi Kerisiano Eperu i le tusa o le 60 T.A.

⁵ O le uluai faapotopotoga Kerisiano i le talafaasolopito o le lalolagi sa faia aʻe i tagata Iutaia faaletino ma tagata liulotu ma sa faavaeina i Ierusalema i le 33 T.A. O le ā le ituaiga o agaga sa iai i lena faapotopotoga? O le faitauina e se tasi o mataupu amata o le tusi o Galuega e mafai ai ona ia iloa le agaga aasa ma le olioli, e ui lava ina fesagai ma sauāga. (Galuega 2:44-47; 4:32-34; 5:41; 6:7) Peitai, a o faagasolo atu le faitau sefulu o tausaga, na suia le tulaga o mea, ma e toatele Kerisiano Iutaia e foliga mai na tau faavaivai i le tausinioga mo le ola. O le faamatalaga lenei a se tasi tusi e tusa ai ma lo latou tulaga a o iai i le tusa o le 60 T.A.: “Sa iai le tulaga o le faapaiē ma le lē lavavā, le lē faataunuuina o mea sa faatalitalia, o faamoemoega ua lē taunuu, le lē taulau ma le leai o se faatuatua i mataupufai o le olaga i aso taitasi. O i latou o ni Kerisiano ae sa itiiti lo latou talisapaia o le mamalu o lo latou valaauina.” Na faapefea ona oo atu Kerisiano faauuina i lena tulaga? O le talanoaina o vaega o le tusi a Paulo i uso i Eperu (na tusia i le tusa o le 61 T.A.) e fesoasoani lea ia i tatou ina ia taliina ai lena fesili. O lena talanoaga o le a fesoasoani ia i tatou uma i aso nei e alofia ai le paʻū atu i lena lava tulaga vaivai faaleagaga.

6. O ā nisi o eseesega sa iai i le va o le tapuaiga sa usitai i ai i le Tulafono Faa-Mose ma le tapuaiga sa faavae aʻe i le faatuatua ia Iesu Keriso?

⁶ Sa ō ese Kerisiano Eperu mai le faiga o mea faa-Iutaia lea na faapea mai o loo latou usitaia le Tulafono na tauaaoina mai e Ieova e ala ia Mose. O lena Tulafono e foliga sa faaauau pea ona tosina i ai le toatele o Kerisiano Iutaia, atonu pe ona o le tele o senituri sa na o le pau lea o le auala na latou faalatalata atu ai ia Ieova, ma o se faiga mataina foi sa faaaogā mo le tapuaiga, faatasi ai ma ositaulaga, o taulaga sa faia e lē aunoa, ma se malumalu taʻutaʻua sa iai i Ierusalema. E ese mai ai le Faa-Kerisiano. E manaomia se vaaiga faaleagaga, e pei o le vaaiga sa iai ia Mose, o lē “sa faanaunau o ia i le taui [o i le lumanai]” ma ‘na faamalosi pea e pei o sē o loo ia iloa atu Lē e lē o vaaia.’ (Eperu 11:26, 27) E toatele Kerisiano Iutaia e foliga mai sa lē ia i latou lena vaaiga faaleagaga. Sa latou tausetusetu solo nai lo le tamomoe punouai ma se uiga o loo tumu i faamoemoega.

7. Ua faapefea i le faiga o mea ua tatou sao ese mai ai ona aafia ai le ala o loo tatou taufetuli ai i le tausinioga mo le ola?

⁷ Po o iai se tulaga faapena i aso nei? E lē natia le mea moni, ua lē o toe tutusa lelei le tulaga o mea i aso nei. Peitai, o loo sao ese mai pea Kerisiano mai lena faiga o mea fia matamuamua. Ua ofoina mai e le lalolagi ni avanoa mataina, peitai i le taimi lava e tasi, o loo latou faaeeina atu avega mamafa i tagata. E lē gata i lea, o le toatele o i tatou o loo alaala i vaipanoa e taatele ai le uiga o le faatalitonugata, ma vaipanoa o loo iai uiga manatu faapito ma uiga fia muamua o tagata e faatatau i mea. Pe afai tatou te faatagaina i tatou e taaʻina e lena faiga o mea, e faigofie ai lava ona faanenefuina ‘mata o o tatou loto.’ (Efeso 1:18) O le a faapefea ona tatou tamomoe lelei i le tausinioga mo le ola pe afai ua lē o toe manino la tatou vaai po o fea o tatou agaʻi atu i ai?

8. O ā nisi o vala ua sili atu ai le Faa-Kerisiano nai lo le tapuaiga lea sa faia e tusa i le Tulafono?

⁸ Ina ia faagaee aʻe le naunau fiafia o Kerisiano Iutaia, sa faamanatu ai e Paulo ia i latou le silisili atu o le faiga o mea faa-Kerisiano nai lo le Tulafono Faa-Mose. E moni, a o avea le nuu o Isaraelu faaletino ma nuu o Ieova e usitaia le Tulafono, sa fetalai atu i ai Ieova e ala i ni perofeta sa faagaeeina. Peitai, ua faapea mai Paulo, i aso nei ua ia fetalai ai “e ala mai i le Alo, o le ua tofia e ia e fai mea uma lava mona tofi, na ia faia foi mea uma e ala ia te ia.” (Eperu 1:2) E lē gata i lea, e silisili atu Iesu nai lo tupu uma i le gafa o Tavita, o ‘ē na faatasi’ ma ia. E silisili atu foi o ia nai lo agelu.—Eperu 1:5, 6, 9.

9. Aisea e manaomia ai e i tatou, e pei foi o Kerisiano Iutaia i aso o Paulo, ‘ia atili ona naunau atu’ i mea o loo fetalai mai ai Ieova?

⁹ O lea la, na fautuaina ai e Paulo Kerisiano Iutaia e faapea: “E tatau ona atili ai ona tatou naunau i mea ua tatou faalogologo i ai, neʻi teʻa ese i tatou ma ia mea.” (Eperu 2:1) E ui o se faamanuiaga matagofie le aʻoaʻoina o mea e uiga ia Keriso, ae tele atu nisi mea sa manaomia ai. Sa manaomia ona latou matuā uaʻi atu i le Afioga a le Atua ina ia aveesea ai taaʻiga a le faiga o mea faa-Iutaia sa siomia ai i latou. Tatou te manaomia foi ona ‘ia atili ona naunau atu’ i mea o loo fetalai mai ai Ieova pe a vaai atu i le salalau o manatu ma malamalamaga faifai pea o loo tatou fesagaia mai lenei lalolagi. O le uiga o lenei mea ia atiina ae ni uiga lelei o le suesue ma ia tausisia se faasologa lelei o le faitauina o le Tusi Paia. E pei ona taʻua e Paulo mulimuli ane i lana tusi atu i uso Eperu, e faatatau foi i le auai e lē aunoa i sauniga ma i le folafolaina atu o lo tatou faatuatuaga i isi. (Eperu 10:23-25) O gaoioiga na o le a fesoasoani ia i tatou e tutumau ai i le mataala faaleagaga ina ia lē galo ia i tatou lo tatou faamoemoe pupula. Pe afai tatou te faatumuina o tatou mafaufau i le finagalo o Ieova, ona lē lofituina lea pe lē iloa ai lo tatou paleni i so o se mea e mafai ona faia e lenei lalolagi ia i tatou.—Salamo 1:1-3; Faataoto 3:1-6.

“Ia Outou Fefaamafanafanai”

10. (a) O le ā e mafai ona tupu i se tasi o lē e lē matuā uaʻi atu i le Afioga a Ieova? (e) E mafai faapefea ona tatou “fefaamafanafanai” pea?

¹⁰ Pe afai tatou te lē matuā uaʻi atu i mea faaleagaga, atonu o le a foliga mai ai e lē moni folafolaga a le Atua. Na tupu foi lenei mea i le uluai senituri ina o faia aʻe atoa faapotopotoga i Kerisiano faauuina ma o loo soifua pea nisi o le au aposetolo. Na lapataia e Paulo uso i Eperu: “Le au uso e, ia outou, neʻi i ai i so outou le loto leaga ma le le faatuatua, tou te o ese ai i le Atua soifua. A ia outou fefaamafanafanai i lea aso ma lea aso, manū o taʻua o le aso nei, ina neʻi loto maaa so outou i le pepelo o le agasala.” (Eperu 3:12, 13) O le faaupuga a Paulo “ia outou” pe ‘ia faaeteete’ ua faamamafa ai le manaoga ia mataala. Ua faamataʻu mai le lamatiaga! O le leai o se faatuatua—“le agasala”—e ono tuputupu aʻe i o tatou loto, ma tatou ō ese ai mai le Atua nai lo le faalatalata atu ia te ia. (Iakopo 4:8) Ua faamanatu mai e Paulo ia i tatou ina ia “fefaamafanafanai” pea. Tatou te manaomia le mafana o le aufaatasiga faaleuso. “O le ua vavae ese, ua saili o ia i lona manao; e finau o ia i le poto uma lava.” (Faataoto 18:1) O le manaoga mo lena auaufaatasiga ua uunaia ai Kerisiano i aso nei ina ia auai e lē aunoa i sauniga a le faapotopotoga, fonotaga, ma tauaofiaga.

11, 12. Aisea e lē tatau ai ona faamalieina i tatou i le iloa tau o aʻoaʻoga faavae faa-Kerisiano?

¹¹ I se vaega mulimuli ane o lana tusi, ua avatu ai e Paulo lenei fautuaga atili e sili ona tāua: “Ana fai outou ma aʻoaʻo po ua tatau ai ina ua leva, a e ao ina toe aʻoaʻoina outou e se tasi i mataupu muamua o le afioga a le Atua; ua avea foi outou ma e o tusa i ai le suāsusu, a e le o mea aano. . . . O mea aano, mā e matutua ia, o i latou ua masani ona lagona ina ua aʻoaʻosooina e iloa ai le lelei ma le leaga.” (Eperu 5:12-14) E aliali mai, na lē taulau e nisi Kerisiano Iutaia ona faalauteleina atu lo latou tomai faalemafaufau. Sa faatuatuai ona latou taliaina le malamalama faateleina e faatatau i le Tulafono ma le peritomeina. (Galuega 15:27-29; Kalatia 2:11-14; 6:12, 13) E iai nisi atonu sa latou faamamaluina pea na tū masani e pei o le Sapati faalevaiaso ma le faamanatuga paia faaletausaga o le Aso o le Togisala.—Kolose 2:16, 17; Eperu 9:1-14.

¹² O lea, ua faapea atu ai Paulo: “Ina tatou tuua ai ia o aʻoaʻoga muamua a Keriso, a ia tatou faaoo atu i le faaatoatoaga [“taʻumatuaina,” NW ].” (Eperu 6:1) O se tagata tamoe i se marafoni o lē na te tausisia lelei ana meaʻai tatau, e mafai foi ona ia onosaia se tuuga umi ma le faigata. I se tulaga talitutusa, o se Kerisiano o lē na te tausisia lelei meaʻai faaleagaga e tatau ona ia faaaogaina—e lē taotasi lava i na o meaʻai masani, ‘aʻoaʻoga faavae’—o le a mafai foi ona lelei lona onosaia o le tausinioga ma faamaeʻaina. (Faatusatusa i le 2 Timoteo 4:7.) O lona uiga ia faatupu aʻe se naunau fiafia i “le lautele, ma le umi, ma le loloto, ma le maualuga” o le upu moni, ma agaigai atu ai i le taʻumatuaina.—Efeso 3:18.

“Ua Aoga ia te Outou le Onosai”

13. Sa faapefea ona faataitaia mai e Kerisiano Eperu lo latou faatuatua i aso ua mavae?

¹³ I le vaitaimi ina ua faatoʻā mavae lava le Penetekoso o le 33 T.A., sa maumauai ai pea Kerisiano Iutaia e ui lava i teteega ogaoga. (Galuega 8:1) Atonu o le mea lena sa mafaufau i ai Paulo ina ua ia tusi atu: “Ia outou manatu i aso anamua, ina o faamalamalamaina outou, na outou onosai ai i le taua tele o tiga.” (Eperu 10:32) O lena onosai faamaoni na faataitaia mai ai lo latou alofa i le Atua ma avatu ai ia i latou le saʻo-lotoga e tāutala atu ai ma le lē fefefe i ona luma. (1 Ioane 4:17) Sa timai atu Paulo ia i latou ina ia aua neʻi lafoai lena saʻolotoga ona o le leai o so latou faatuatua. Ua ia augani atu ia i latou: “Ua aoga ia te outou le onosai, ina ia maua e outou le mea na folafolaina, pe a uma ona faia e outou le finagalo o le Atua. Auā e toe itiiti itiiti lava, ona oo mai ai lea o lē maliu mai, e le faatuai mai lava.”—Eperu 10:35-37.

14. O ā mea moni e tatau ona fesoasoani ia i tatou e onosai ai e tusa lava po ua mavae le tele o tausaga o auauna atu ia Ieova?

¹⁴ Ae faapefea i tatou i aso nei? O le toatele o i tatou sa maelega lava ina ua faatoʻā tatou iloa le upu moni faa-Kerisiano. Po o iai lava lo tatou maelega lena? Po ua tatou ‘tuua le uluai alofa sa ia i tatou’? (Faaaliga 2:4) Po ua tatou fāifai mālie ifo ea, atonu ua tau iai se gaulēmalie po ua lē lavavā foi i le faatalitalia o Amaketo? Peitai, seʻi nofo ma toe mafaufau. E lē o faaitiitia lava le ofoofogia o le upu moni talu mai taimi ua mavae. O loo avea pea Iesu ma o tatou Tupu faalelagi. O loo tatou faamoemoe pea mo le ola e faavavau i luga o le lalolagi parataiso, ma o loo iai pea la tatou faiā ma Ieova. Ma ia aua lava neʻi galo: “Ona oo mai ai lea o lē maliu mai, e le faatuai mai lava.”

15. I le pei o Iesu, ua faapefea ona onosaia e nisi Kerisiano sauāga matuitui?

¹⁵ O lea la, ua matuā talafeagai lava upu a Paulo o loo faamauina i le Eperu 12:1, 2 (NW), e faapea: “Ina tatou tuu ese ia foi o mea mamafa uma, atoa ma le agasala [le leai o se faatuatua] e faalavelavegofie ai i tatou, ma ia tatou taufetuli ma le onosai i le tausinioga o i o tatou luma, a o tatou vaavaai atu ma le naunautai ia Iesu, o Lē na te Taʻitaʻiina ma Lē na te Faaatoatoaina lo tatou faatuatua. Na ia onosai i le satauro, na faatauvaa ia te ia le mā, ona o le olioli sa tuu i ona luma, ma ua nofo ai o ia i le itu taumatau o le nofoālii o le Atua.” E tele mea o loo onosaia e auauna a le Atua i nei aso e gata ai. I le pei o Iesu, o lē na oo atu lava lona faamaoni i se maliu tiga, ua faapena foi i nisi o o tatou uso ma tuafāfine ona latou onosaia ma le faamaoni sauāga matuitui—le faafalepuipuiina, o faiga faataugā, le tosoina faamalosi o fafine, e oo lava i le oti. (1 Peteru 2:21) Pe e lē faatumulia ai ea o tatou loto i le alofa mo i latou a o tatou mafaufau atu i lo latou faamaoni?

16, 17. (a) O ā luʻi o lo latou faatuatua o loo tau fesagaia e le toatele o Kerisiano? (e) O le manatuaina o le ā o le a fesoasoani ia i tatou e taufetuli ai pea i le tausinioga mo le ola?

¹⁶ Peitai, o le toatele lava o Kerisiano e faatatau atu i ai isi upu atili a Paulo: “Ua oo i nei ona po, ua outou le tetee atu e oo i le faasasaaina o outou toto, i lo outou tetee atu i le agasala.” (Eperu 12:4) E ui i lea, e lē o faigofie mo so o se tasi o i tatou le ala o le upu moni i lenei faiga o mea. Ua faalotovaivaia nisi i ‘faamatalaga faatuiese a tagata agasala’ i nofoaga o galuega pe i aʻoga, a o tau onosaia ai taufaifaiga po o le teteeina o omiga ina ia faia le agasala. (Eperu 12:3) O tofotofoga mamafa ua tafiesea ai le filifiliga maumauai sa faia e nisi ina ia tausisia tapulaa maualuluga a le Atua. (Eperu 13:4, 5) Ua faaaafia e aposetate le tulaga paleni faaleagaga o nisi o ē faalogologo atu i a latou faamatalaga ma manatu oona. (Eperu 13:9) O feeseeseaiga totino ua aveesea ai le olioli o isi. O le soona faamamafaina o faafiafiaga ma gaoioiga e faapasi ai le taimi ua faavaivaia ai nisi Kerisiano. Ma ua omia le toatele ona o faafitauli o le ola ai i lenei faiga o mea.

¹⁷ O le mea moni, e leai se tasi o nei tulaga ua tatau ai ‘ona tetee atu e oo i le masaa moni ai o le toto.’ Ma o nisi o nei tulaga e māfua mai ona o ni filifiliga sese na faia lava e i tatou. Peitai o na tulaga uma ua avea o se luʻi i lo tatou faatuatua. O le pogai lena e tatau ai ona taulai atu la tatou vaai i le faaaoaoga mataina o le onosai o Iesu. Seʻi aua lava neʻi o tatou faagaloina le ofoofogia o lo tatou faamoemoe. Seʻi aua lava neʻi mou atu lo tatou talitonuga maumauai e faapea o Ieova “o ia foi na te tauia mai o e matuā saili ia te ia.” (Eperu 11:6) Ona tatou maua ai lea o le malosi faaleagaga e taufetuli ai pea i le tausinioga mo le ola.

E Mafai Ona Tatou Onosaia

18, 19. O ā mea i le talafaasolopito ua taʻu mai ai sa utagia e Kerisiano Eperu i Ierusalema le fautuaga faagaeeina a Paulo?

¹⁸ Sa faapeī le tali atu a Kerisiano Iutaia i le tusi a Paulo? I ni tausaga se ono talu ona mavae le tusi atu i Kerisiano Eperu, na tauina ai se taua i Iutaia. Na siomia Ierusalema e autau a Roma i le 66 T.A., ua faataunuu ai fetalaiga a Iesu: “A iloa e outou ua siosiomia Ierusalema i ʻau o le taua, ia outou iloa i lea aso ua latalata lona faatafunaina.” (Luka 21:20) Peitai, mo se manuia o Kerisiano o le a iai i Ierusalema i lena taimi, na fetalai ai Iesu: “O lea aso, o e ua i Iutaia ia latou sosola i mauga; o e ua i totonu o lea aai, ia latou o ese; o e ua i le vao foi, aua neʻi latou o atu i totonu o le aai.” (Luka 21:21) O lea, o le taua ma Roma na faapogaia ai se tofotofoga: Po o le a lafoai ea e na Kerisiano Iutaia Ierusalema, o le ogatotonu o le tapuaiga faa-Iutaia ma o le nofoaga o loo iai le malumalu matagofie?

¹⁹ Sa faafuasei lava, ma e lē mailoa le mafuaaga, na toe tuumuli ese ai autau a Roma. E foliga mai, sa manatu tagata Iutaia mapolotu i lena mea faapea o se faamaoniga o le puipuia e le Atua o lo latou aai paia. Ae faapefea Kerisiano? Ua taʻu mai e talafaasolopito ia i tatou e faapea sa latou sosola ese. Ma i le 70 T.A., na toe foi mai ai autau a Roma ma faatamaia atoatoa loa Ierusalema ma na tele ni ola na fasiotia ai. O le “aso o Ieova” lea na valoia mai e Ioelu ua oo ane i Ierusalema. Peitai sa lē o toe iai Kerisiano faatuatua iina. ‘Sa sao ese i latou.’—Ioelu 2:30-32; Galuega 2:16-21.

20. O le iloaina o le latalata mai o le “aso o Ieova” e tatau ona uunaia ai i tatou i ā auala?

²⁰ I aso nei, ua tatou iloa ua lē o toe mamao ona aafia lea o lenei faiga atoa o mea i le isi ‘aso tele o Ieova.’ (Ioelu 3:12-14) Tatou te lē iloa po o afea e oo mai ai lena aso. Ae ua faamautinoa mai e le Afioga a le Atua ia i tatou e faapea o le a oo moni mai lava! Ua fetalai Ieova o le a lē faatuai mai. (Sapakuka 2:3; 2 Peteru 3:9, 10) O lea, seʻi “atili [ia] ona tatou naunau i mea ua tatou faalogologo i ai.” Ia alofia le leai o se faatuatua, o “le agasala e faalavelavegofie ai i tatou.” Ia maumauai e onosai po o le ā lava le umi e manaomia ai. Manatua, o loo agaʻi pea i luma le faalapotopotoga faalelagi e pei o se kariota a Ieova. O le a faataunuuina lana fuafuaga. O lea, tau ina ia tatou taufetuli pea ma ia lē faavaivai i le tausinioga mo le ola!

E te Manatua?

◻ O le utagiaina o le ā le timaiga a Paulo i uso i Filipi o le a fesoasoani ia i tatou e onosaia le tausinioga mo le ola?

◻ O le ā o le a fesoasoani ia i tatou ina ia teena le faanaunauga o lenei lalolagi e faalavelaveina i tatou?

◻ E mafai faapefea ona tatou fesoasoani le tasi i le isi ina ia onosai i le tausinioga?

◻ O ā nisi o mea e mafai ona faavaivaia ai se Kerisiano?

◻ E mafai faapefea e le faaaoaoga a Iesu ona fesoasoani ia i tatou ina ia onosai?

[Ata i le itulau 8, 9]

O Kerisiano, i le pei o tagata tamomoe, e lē tatau lava ona latou faataga so o se mea e faatosina ese ai i latou

[Ata i le itulau 10]

E leai se mea e mafai ona taofia le kariota sili faalelagi a Ieova mai le faataunuuina o le fuafuaga a le Atua