Le Mea Moni e Faatatau i le Pepelo

“O LOU pepelo ia!” Pe ua lafo atu ea na upu tiga ia te oe? Afai o lea, e lē masalomia lou iloa o le faatiga loto o na upu.

E pei ona taʻe o se mea tuu teu tāua pe a paʻū i le simā, e faapea foi ona faaleagaina o se faiga uo faapelepeleina i le pepelo. E moni e mafai ona e toe faaleleia le mea na faaletonu i se taimi mulimuli ane, ae atonu o le a lē toe foi le faiā i le tulaga sa iai muamua.

Ua faapea mai le tusi Lying—Moral Choice in Public and Private Life: “O i latou ua iloa na pelogia i latou, latou te faaeteete i taumafaiga a lē na pepelo ina ia toe faaleleia le faiga uō. Ma latou toe manatunatu i o latou talitonuga ma mea na fai i taimi ua tuanai, e tusa ai ma nei pepelo ua aliae.” Pe a aliae le pepelo na faia, e ono suia ai se faiā sa solosolo manuia faatasi ai ma fesootaiga lelei ma le maufaatuatuaina, i se tulaga e tumu i masalosaloga ma le lē mautonu.

Ona o le tele o nei lagona lē lelei e fesootai ma le pepelo, e tatau ai la ona tatou fesili, ‘Na faapefea ona amataina lenei faiga faaʻoleʻole?’

Le Uluai Pepelo

Ina ua faia e Ieova le Atua uluai tagata o Atamu ma Eva, na ia tuua i laua i se faatoaga matagofie lea na avea ma o la nofoaga. Na leai lava se faiga faaʻoleʻole po o se taufaasese i lo la aiga. Na avea moni lava o se parataiso!

Ae ina ua mavae sina taimi talu ona foafoaina o Eva, na alu atu i ai Satani le Tiapolo ma se ofo tau faaʻoleʻole. Na taʻu atu ia Eva faapea e lē oti o ia e pei ona taʻua e le Atua, pe afai na te ʻaia “le fua o le laau,” lea ua faasaina e le Atua. Nai lo lea, o le a pei o ia o se “atua o loo iloa le lelei ma le leaga.” (Kenese 2:17; 3:1-5) Na talitonu Eva ia Satani. Na ia tago atu i le fua ma ʻai, ma tuu atu i lana tane. Ae nai lo le pei o le Atua e pei ona sa folafolaina e Satani, na avea Atamu ma Eva o ni tagata agasala lē usiusitai, o pologa o le amioleaga. (2 Peteru 2:19) Ma i le faia o lena uluai pepelo, na avea ai Satani o “le tamā o pepelo uma.” (Ioane 8:44, Today’s English Version) Mulimuli ane na aʻoaʻoina e Satani, Atamu ma Eva e faapea, e lē manuia se tagata pepelo faatasi ai ma sē e talitonu atu i le pepelo.

O Āuga o le Oti

Na finagalo Ieova ina ia iloaina uma e ana foafoaga—i le lagi ma le lalolagi—e faapea o le lē usitai ma le loto i ai, e faasalaina. Na ia vave gaoioi ina ia lē toe faataga le meafaiola agaga tetee e auai i totonu o le faalapotopotoga paia a le Atua i lona olaga atoa. E sili atu i lea, o le a faamautinoa e le Atua ua faaumatia atoatoa Satani i se taimi mulimuli. E faatinoina lenei mea pe a tuʻimomomoina le ulu, e le “fanau” lea na folafolaina e le Atua na te saunia.—Kenese 3:14, 15; Kalatia 3:16.

Na aveesea Atamu ma Eva mai le faatoaga o Etena ona o le mea sa la faia. Na faasalaina e le Atua Atamu i lona tulei atu i ai e faapea: “E te ʻai foi au mea e ʻai ma le afu o ou mata, seia e toe foi atu i le eleele; auā na faiina aʻi lava oe; auā o le efuefu oe, e te toe foi atu lava i le efuefu.” Na iu ina feoti i laua ma Eva, e pei ona folafola e le Atua.—Kenese 3:19.

Ona na tupuga mai ia Atamu le aiga uma faaletagata, o lea ua “faatauina atu . . . e fai ma tagata o le agasala.” Ua tuufaasolo uma i tagata le lē lelei atoatoa lea e iʻu i le oti. (Roma 5:12; 6:23; 7:14) Pagā le matautia o āuga o lena uluai pepelo!—Roma 8:22.

O se Faiga ua Mauaa

Talu ai e lei faaumatiaina Satani ma agelu ia na ʻau atu ia te ia i le tetee faasaga i le Atua, e lē tatau ai ona tatou ofo i lo latou faaosofia o tagata ina ia “tala pepelo.” (1 Timoteo 4:1-3) O le iuga, ua mauaa le tala pepelo i le sosaiete o tagata. Ua taʻua e le Los Angeles Times: “Ua matuā mauaa le pepelo, lea ua tele ina lē toe popole i ai le sosaiete o tagata.” O le toatele i aso nei e iai le vaaiga faapea e miomio faatasi faiga faapolotiki, o tagata e faia upu o malo ma le pepelo, ae pe e te iloa ea o taʻitaʻi lotu o ni tagata e pito i sili ona lauiloa i le pepelo?

O tagata lotu na tetee atu ia Iesu na latou faalauiloaina tala pepelo e faatatau ia te ia a o faia lana faiva i le lalolagi. (Ioane 8:48, 54, 55) Na ia taʻusalaina i latou i luma o le lautele, i le faapea atu: “O outou nai lo outou tamā le tiapolo, tou te fia faia foi mea e tuʻinanau i ai lo outou tamā. . . . a tautala ia i le tala pepelo, o lana lava lea e tautala aʻi, auā o le pepelo ia, ma le tamā o le pepelo.”—Ioane 8:44.

Pe e te manatuaina le pepelo lea na faatupuina ina ua maua atu le tuugamau o Iesu ua gaogao ina ua mavae lona toe tu? Ua faapea mai le Tusi Paia na avatu e ositaulaga sili “tupe e tele i le ʻau, ua faapea atu, ‘Ia outou taʻutaʻu atu, Na o mai ona soo i le po ua gaoi ia te ia, a o matou momoe.’” Na matuā lauiloa lenei pepelo, ma e toatele na faaseseina ai. Pagā le amioleaga sa iai i na taʻitaʻi lotu!—Mataio 28:11-15.

Le Pepelo a Lotu i Aso Nei

Po o le ā se pepelo taatele o faia e taʻitaʻi lotu i aso nei? E tai tutusa lava ma le pepelo lea na taʻu atu e Satani ia Eva: “Lua te le oti lava.” (Kenese 3:4) Ae na oti lava Eva, ma na toe foi atu i le eleele, i le efuefu lea na fai mai ai o ia.

Ae peitai, pe na tau ina foliga mai ua oti ae o le mea moni na faaauau pea ona ola i se isi tino? Faamata o le oti e tatala ai le avanoa e ulu atu ai i se isi olaga? E lē o faailoa mai lava e le Tusi Paia se vaega o Eva e mafai ona iloa ni mea na faaauau pea ona ola. Sa lei ola pea lona solu. Ona o le lē usiusitai i le Atua, ua agasala ai, ma ua faapea mai le Tusi Paia: “O le tagata [“solu,” NW] agasala e oti ia.” (Esekielu 18:4) Na pei Eva o lana tane na foafoaina o se tagata po o se solu ola, ma na iu ina oti. (Kenese 2:7) Ua faapea mai le Tusi Paia e faatatau i le tulaga o ē ua oti: “A o e ua oti, latou te le iloa se mea.” (Failauga 9:5) Ae, po o le ā ua tele ina aʻoaʻoina e lotu?

E masani ona aʻoaʻoina e lotu e faapea o tagata e iai o latou solu e lē mafai ona oti, ma o le oti e faasaoloto ai loa lea solu ina ia oo atu ai i se isi olaga—a lē o le fiafia ia po o le faapuapuagatia. Mo se faataitaiga, ua faapea mai le Catholic Encyclopedia: “Ua matuā aʻoaʻoina e le Lotu e faapea o le faavavau o puapuaga i seoli ua avea ma se mea moni i aʻoaʻoga faavae a le lotu, lea e lē mafai ona maua ni faamaoniga e teena pe fesiligia ai e se tasi.”—Tusi 7, itulau e 209, faaopoopoga o le 1913.

Maeu le ese o lena aʻoaʻoga mai le mea o faamatala manino mai e le Tusi Paia! Ua aʻoaʻoina e le Tusi Paia a oti le tagata, “e foi atu i le eleele na i ai o ia; e faaumatia i lea lava aso ona manatunatu.” (Salamo 146:4) O lea, e tusa ai ma le Tusi Paia, e lē mafai e se tagata oti ona lagona se puapuaga, talu ai latou te lē o malamalama lava i se mea e tasi. O lea la, ua faalaeiau mai le Tusi Paia: “O mea uma ua e iloa e faia e ou lima, ina faia ia ma lou malosi; auā e leai se galuega, po o se mafaufau, po o se iloa, po o se poto i le tuugamau [Seoli], o loo e alu atu i ai.”—Failauga 9:10.

E Manaomia Ona Mataala

E pei ona toatele tagata na taʻitaʻiseseina e pepelo a ositaulaga i aso o Iesu, o loo iai foi le lamatiaga o le faaseseina ona o aʻoaʻoga sese a taʻitaʻi lotu i aso nei. O nei tagata ua latou “fesuiai le upu moni i le Atua ma le upu pepelo,” ma latou te faaauiluma na aʻoaʻoga sese e pei o le lē mafai ona oti o le solu o le tagata, ma le manatu faapea e faapuapuagatiaina solu o tagata i se afi i seoli.—Roma 1:25.

E faaopoopo atu i lea, ua tele ina faatutusa e lotu i aso nei upu tuu ma filosofia faaletagata ma upu moni o le Tusi Paia. (Kolose 2:8) O lea, o tulafono a le Atua e faatatau i amioga tatau—e aofia ai tulafono i le faamaoni ma amioga faaleituaiga—ua vaai atu i ai ua na o se mea talafeagai, ae lē o se mea e ao ona faia. O le iuga la e pei ona faamatalaina mai e le mekasini lea o le Time: “E olaola le pepelo i lagona lē mautonu o le sosaiete, pe afai e lē toe malamalama pe malilie faatasi tagata, e faatatau i tulafono o loo puleaina a latou amio i le vafeagai ai ma le tasi.”—Faatusatusa i le Isaia 59:14, 15; Ieremia 9:5.

O le ola i se siomaga e vaai maulalo i le faamaoni e faafaigata ai ona utagia le fautuaga a le Atua ina ia aua le pepelo. Po o le ā o le a fesoasoani ia i tatou ina ia faamaoni ai i taimi uma lava?

Ia Tu Maumauai mo le Upu Moni

O lo tatou faanaunauga e viia Lē na Faia i tatou ua aumaia e lea mea ia i tatou se uunaiga e aupito sili ona lelei ina ia ati ae ai le faamaoni i a tatou upu. Ua tāua ai le taʻuaina o ia e le Tusi Paia, o “le Atua faamaoni.” (Salamo 31:5) O lea, afai o lo tatou faanaunauga ina ia faamalie Lē na Faia i tatou, o lē e ʻinoʻino i le “laulaufaiva pepelo,” o le a avea lea ma uunaiga ina ia tatou faataitai atu ia te ia. (Faataoto 6:17) E mafai faapefea ona tatou faia faapea?

E mafai e le suesueina ma le maelega o le Afioga a le Atua ona faamalosia i tatou ina ia ‘tautala faamaoni ai ma lē lua te tuaoi.’ (Efeso 4:25) Ae peitai, e lē lava le na o le iloa o mea o loo manaomia e le Atua mai ia i tatou. Afai na avea ma a tatou masani le tautala ma le lē faamaoni e pei o le toatele o tagata i le lalolagi i aso nei, e tatau la ona matuā faia ni a tatou taumafaiga ina ia faamaoni. E ono manaomia ai lo tatou mulimuli atu i le faataitaiga a le aposetolo o Paulo ina ia matuā pulea i tatou lava. Na tusia e Paulo faapea: “A ou te faatoilaloina loʻu nei tino, ma aʻu fai ai ma pologa.”—1 Korinito 9:27.

O se isi fesoasoani i le tauiviga ina ia taʻu le mea saʻo i taimi uma, o le tatalo. O le tauanau atu ia Ieova mo lana fesoasoani, e mafai ai ona tatou maua le “tele o le mana.” (2 Korinito 4:7) O le mea moni, o le maumauai i “laugutu faamaoni” ae aveese “le laulaufaiva pepelo,” e ono avea ma se tauiviga faigata. (Faataoto 12:19) Ae faatasi ma le fesoasoani a Ieova, e mafai ona taulau manuia ai.—Filipi 4:13.

Ia manatua pea, o Satani le Tiapolo o loo ia faafoliga mai le pepelo o se mea ua masani ai. Na ia faaseseina le uluai fafine o Eva, i le matuā pepelo atu ia te ia. Ae peitai, ua tatou matuā iloa lelei āuga matautia o ala pepelo a Satani. Ua oo le anoanoai o puapuaga i le aiga faaletagata ona o le pepelo e tasi manatu faapito, atoa ma le toatolu manatu faapito—o Atamu, Eva, ma Satani.

Ioe, o le mea moni e faatatau i le pepelo, e mafai ona faatusatusa atu i se vai oona e iʻu ai i le oti. Ae ma le faafetai lava, e iai le mea e mafai ona tatou faia. E mafai ona tatou taofia lenei masani o le pepelo ma olioli ai e faavavau i le tali lelei mai a Ieova, o se Atua e “tele le alofa ma le faamaoni.”—Esoto 34:6.

[Faamatalaga faaopoopo i le itulau 16]

E pei le tala pepelo o se vai oona e iʻu ai i le oti

[Ata i le itulau 14]

O āuga o le pepelo e pei o le taʻe o se mea tuu teu