O Fea e Mafai Ona Maua ai le Fiafiaga Moni?

UA MANATU le toatele o tagata faapea o le fiafiaga e mafai ona iai i le mauaina o mea faitino. Ae faapefea oe? E ui e mafai ona maua se vaega o lo tatou fiafiaga mai oa faitino, ae e lē mafai e na mea ona faamautinoaina ai; pe e lē mafai foi e mea e sologa lelei ai faaletino ona atiina ae le faatuatua po o le faamalieina o manaoga faaleagaga.

I lana Lauga i luga o le Mauga, na fetalai ai Iesu Keriso e faapea: “E fiafia i latou e mataala i o latou manaoga faaleagaga; auā e o latou le malo o le lagi.” (Mataio 5:3, NW) Na fetalai atili foi Iesu e faapea: “Ia outou, ia leoleo outou ia te outou auā le matapeapea; auā e le ola se tasi i le tele o ana mea ua ia te ia.”—Luka 12:15.

E toatele ua sailia le fiafiaga e ala i le auai atu i feusuaiga lē tatau faapea ma isi “galuega a le tino.” (Kalatia 5:19-21) Peitai ane, o le lolo atu i faafiafiaga faaletino e lē aumaia ai se fiafiaga moni ma le tumau. O le mea moni, o ē faia na mea o le a lē fai le malo o le Atua mo o latou tofi.—1 Korinito 6:9, 10.

O nisi ua manatu ifo ia i latou lava mo le mauaina o le fiafiaga e ala i le taumafai e atiae o latou lava uiga e tauleleia ai. Ua faatumulia faletusi ma fale e faatau ai tusi i tusi e maua ai fesoasoani mo le lelei o le tagata lava ia, ae o na lomiga ua lē o aumaia ai se fiafiaga tumau mo tagata. O lea la, o fea e mafai ona tatou maua ai le fiafiaga moni?

Ina ia fiafia moni, e tatau ona tatou iloaina o tatou lava manaoga faaleagaga na ola aʻe ma i tatou. Na fetalai Iesu: “E fiafia i latou e mataala i o latou manaoga faaleagaga.” O le mea moni, e leai se aogā o le malamalama i lenei manaoga ae lē taulau ona gaoioi e tusa ai. Ina ia faataitaia: O le ā e tupu i se tagata tamoe o se malafoni o lē e uma ane le tuuga ae ua lē taulau ona ia faamalieina le manaoga o lona tino lea ua matuā galala mo se vai? Pe o le a lē oo ai ea ia te ia faafitauli ona o le leai o se vai i le tino ma isi iuga matuia faapena? O lea la, afai e lē taulau ona tatou tali atu i lo tatou manaoga mo le fafagaina faaleagaga, o le a oo ina tatou mamae ai faaleagaga. O le a taitaiina atu lenei mea i le leai o se olioli ma se fiafiaga.

Na matuā silafia lelei e Iesu ona manaoga faaleagaga, i le suesue e lē aunoa ma le manatunatu loloto i le Afioga a le Atua. Na faigofie ona ia suʻeina ma faitau vaega o le Tusi Paia ma le iloa lelei, ma na ia aʻoaʻo atu i isi ia faapea foi ona faia. (Luka 4:16-21; faatusatusa i le Efeso 4:20, 21) Na faatusa foi e Iesu le faia o le finagalo o lona Tama faalelagi i se mea e ʻai. O le faia o le finagalo o le Atua na aumaia ai ia te ia se fiafiaga tele.—Ioane 4:34.

Ioe, o le fiafiaga moni e lē mafai ona maua i mea faitino; e lē o le faamalieina foi i tuinanauga o le tino agasala e iu ai i se fiafiaga. O le fiafiaga moni, o se tulaga i le loto, e faavae mai le faatuatua ma se faiā lelei ma Ieova le Atua. Ua talafeagai ai la le pese na usuina e le faisalamo o Tavita: “Amuia le nuu e fai Ieova mo latou Atua.”—Salamo 144:15e.

[Ata i le itulau 23]

O le faatuatua ma se faiā lelei ma le Atua o le a aumaia ai ia te oe le fiafiaga moni