Po o Oe o se Tagata e Matamuli?
1 E lē o se mea e tatou te ofo ai pe a tatou vaaia se tamaitiiti laʻitiiti o autilo mai ia i tatou i tua o lona tinā po o lona tamā. O le matamuli o se uiga masani lava lea i tamaiti laiti. E oo lava ina ua avea ma tagata matutua, e toʻatele e pei o lo latou lava lea uiga masani e matamumuli. Afai e aafia lou auai i le faiva ona o le matamuli, o le ā e mafai ona e faia?
2 Feagai ai ma le Matamuli: E tāua le uaʻi totoʻa atu i “le tagata lilo o le loto.” (1 Pete. 3:4) Ia faamalosia lou alofa mo Ieova ma ou tuaoi. Ia mautinoa atoatoa o le faataunuuina o le tofiga e talaʻi o se tasi lea o auala aupito sili e faaalia ai le alofa faataulagaina totino. Ia faaauau ona avea o se masaniga lelei le faia o suʻesuʻega totino ma auai i sauniga. Ia tatalo e lē aunoa ma ia faapatino mo le fesoasoani a Ieova. O le faatuatua malosi ma faalagolago ia te ia o le a ati aʻe ai le mautinoa ma atili ai “ona [e] faamalosi e tautala i le upu [a le Atua] ma le le mataʻu.”—Fili. 1:14.
3 Ia tetee atu i faalogona o le lē agavaa. E foliga mai sa faia e Timoteo lenei mea. Na faalaeiau e Paulo ia Timoteo ina ia “aua neʻi ʻinoʻino se tasi i [lona] taulealea,” i le faamanatu atu ia te ia e faapea “ua le foaiina mai e le Atua ia te i tatou le agaga e mataʻu ai, a o le agaga e faamalosi ai.” (1 Timo. 4:12; 2 Timo. 1:7) Sa faaaogā atoatoa e Ieova Timoteo, o lē o le a ia faaaogā foʻi oe pe afai e te agaʻi i luma ma le mautinoa atoatoa ia te Ia.—Sala. 56:11.
4 O le manatunatu i se mau o le Tusi Paia, e pei o lea e i le Mataio 10:37, na fesoasoani ai i se tuafafine o lē o lona matamuli na fefe ai o ia i lana tane tetee. A o ia finafinau, na oo ai ina faigofie ia te ia le faiva, ma iʻu ai ina talia uma e lana tane, lona tinā, ma ona tuagane le upu moni!
5 E Tāua Sauniuniga: O le a atili faateleina lou mautinoa pe a e sauniuni lelei mo le faiva. Fili se taulimaga faigofie mai le tusi Reasoning po o lomiga ua mavae o La Tatou Faiva o le Malo, suʻesuʻe lelei i ai, ma faataʻitaʻi. Na i lo o le fatufatuaʻi o le popolevale, ia mafaufau lelei. Ia maua le lototele e ala i le galulue vavalalata ma isi. Ia manatua e faapea, o le toʻatele o tagata o le a e feiloaʻi atu i ai i fale, e matamumuli foʻi i latou e pei lava o oe. E manaʻomia e tagata uma le feʻau o le Malo.
6 Afai o oe o se tagata matamuli, aua neʻi faavaivai. A o e faia taumafaiga i lea tulaga, o le a fesoasoani Ieova ia te oe ina ia avea o se tagata talaʻi uigā o le tala lelei. Ona e maua ai lea o le olioli i lau faiva.—Faata. 10:22.