Fesili Mai le Au Faitau
Aisea na lē faasalaina ai i le oti fitafita a Sauro ina ua latou ʻaina le aano o manu o iai le toto, auā o le faasalaga lena na tuuina mai i le Tulafono a le Atua?
Na solia e nei tane le tulafono a le Atua i le toto, peitai, atonu na faaalia i ai le alofa mutimutivale ia i latou ona sa latou faaaloalo mo le toto, e ui lava sa tatau ona matuā sili atu lo latou maelega i le faaalia o lena ituaiga o faaaloalo.
Seʻi manatunatu i le tulaga. Sa taitaia e le tupu o Sauro ma lona atalii o Ionatana tagata Isaraelu i le taimi o le taua faasaga ia Filisitia. I le taimi “sa tigaina tagata Isaraelu i lea aso” i le taua, na faanatinati ai le faia e Sauro o se tautoga i ona tagata ina ia aua neʻi ʻaai seia faatoilaloina le fili. (1 Samuelu 14:24) E leʻi umi ae amataina e lana tautoga se faafitauli.
Sa manumalo ona tagata i se taua faigata, ae sa iai se iuga leaga i taumafaiga fita. Sa matuā fia ʻaai ma vaivai tele i latou. O le ā na latou faia i lena tulaga faigata tele? “Ua feosofi le nuu i mea a le itu taua; ua pupue i mamoe, ma povi, ma tamai povi, ua latou fafasi ai i luga o le eleele; ona aai ai lea e le nuu ma le toto.”—1 Samuelu 14:32.
Sa solia i lena mea le tulafono a le Atua e uiga i le toto, e pei ona sa taʻu atu e nisi o tagata o Sauro ia te ia e faapea: “Faauta, ua agasala le nuu ia Ieova ina ua latou aai ma le toto.” (1 Samuelu 14:33) Ioe, na fai mai le tulafono, pe a fasia ni manu, e ao ona faamasaa le toto a o leʻi ʻaina. Sa leʻi faatonu mai e le Atua e faaalia se maelega valea i ala e faamamāina ai le toto. E ala i le faia o ni laasaga talafeagai mo le faamamāina o le toto, ua faaalia ai e ana auauna le faaaloalo i le paia o le toto. (Teuteronome 12:15, 16, 21-25) E mafai ona faaaogā toto o manu i se auala faaletaulaga i luga o le fata faitaulaga, ae lē mo le ʻaina. O le solia ma le loto i ai, sa faasalaina i le oti, auā na taʻu atu i tagata o le Atua e faapea: “Aua tou te aai i le toto o se mea ola; auā o le ola o mea uma o lo latou toto lava lea; ai se ʻai ai e vavaeeseina o ia.”—Levitiko 17:10-14.
Pe na solia ma le loto i ai e fitafita a le tupu o Sauro le Tulafono? Pe sa latou matuā faaalia le leai o se faaaloalo mo le tulafono a le Atua e uiga i le toto?—Faatusatusa i le Numera 15:30.
E lē manaomia ona faapena la tatou faaiuga. Ua faapea mai le faamaumauga tusia, sa latou fasia manu i luga o le eleele ma ʻaai faatasi ma le toto.’ O lea, atonu sa latou faia ni taumafaiga e faamasaa le toto. (Teuteronome 15:23) Peitai, ona o lo latou vaivai tele, le matelaina i le fia ʻaai, sa latou lē faatautauina ai tino o manu na fasia ina ia lava ai le taimi tatau mo le faamasaaina o le toto e pei ona masani ai. Sa latou fasia mamoe ma povi “i luga o le eleele,” lea sa ono mafai ona faaitiitia ai le faamasaaina o le toto. Ma sa vave ona latou vaevaeina aano mai tino o nei manu atonu sa taatitia i luga o le toto. O lea la, e ui ina sa latou mafaufau e usiusitai i le tulafono a le Atua, ae sa latou lē mulimuli atoatoa i ai i se auala talafeagai, e faapena foi i le umi sa tatau ai ona iai.
O le iuga, “ona aai ai lea e le nuu ma le toto,” sa o se agasala. Sa iloa lelei e Sauro lenei mea, ma faatonuina ai ina ia fulifuli ane se maa tele ia te ia. Na ia faatonuina fitafita: “Ia taitasi ma au mai ia te au lana povi po o lana mamoe, ma outou fafasi ai i le mea nei, ma aai ai; aua le agasala ia Ieova i le ʻai ma le toto.” (1 Samuelu 14:33, 34) Na usiusitai fitafita na agasala, ma “ua faia e Sauro le fata faitaulaga ia Ieova.”—1 Samuelu 14:35.
O le fasia o manu i luga o le maa atonu sa lelei lena mo le faamasaaina o le toto. O aano mai manu o le a ese le mea e ʻai ai mai le mea sa fasia ai. Atonu sa faaaogāina e Sauro sina vaega o le toto lea na faamasaaina i luga o le fata faitaulaga, i le sailia o le alofa mutimutivale o le Atua mo i latou na agasala. Sa faaoo atu e Ieova le alofa mutimutivale, e foliga mai talu ai na ia silafia taumafaiga a fitafita na faia e ui lava sa matuā vaivai i latou ma fia aai. Atonu foi sa manatu le Atua i le tautoga faanatinati a Sauro lea na uunaia ai ona tagata i lena tulaga matautia.
Ua mafai ona faaalia mai i lenei tala le leai o se faamolemolega, mo le lē amanaiaina o le tulafono a le Atua ona o se faalavelave tupu faafuasei. E tatau foi ona fesoasoani ia i tatou ia iloa ai le manaomia ona manatunatu ma le faaeteete a o leʻi faia se tautoga, auā o se tautoga faanatinati e mafai ona mafua ai faafitauli mo i tatou lava atoa ma isi.—Failauga 5:4-6.