Pāʻia o Loto e Ala i le Tomai o le Faatauanau

E TOATELE tagata e masalosalo pe a manatu i le upu “faatauanau.” E ono mafaufau ai se tasi i se tagata faatauoloa e iai uiga tauanau faamalosi, po o se faasalalauga faatosina o ni oloa ua fuafua e faasee pe faavalea ai le tagata faatau. E oo lava i le Tusi Paia, o le manatu o le faatauanau e iai ni ona faauigaga lē lelei i nisi o taimi, e faaalia mai ai se mea leaga po o se taitaiga sese. Mo se faaaoaoga, na tusi atu le aposetolo Kerisiano o Paulo i uso i Kalatia: “Sa outou taufetuli lelei; po o ai ea ua faafelavei ia te outou, ia outou le anaana i le upu moni? E le mai le na valaauina outou lenei faaoleole [faatauanau].” (Kalatia 5:7, 8) Na lapataia foi e Paulo uso i Kolose ina ia leai se tasi e ‘faaseseina i latou i upu faaoleole [“faatauanau,” NW].’ (Kolose 2:4) O lena faatauanau e faalagolago atu i upu atamai ua fafau aʻe i ni faavae sese.

Peitai, i lana tusi lona lua ia Timoteo, na faaaogā ai e le aposetolo o Paulo le manatu o le faatauanau i se uiga e ese mai. Na ia tusi: “Ia e tumau i mea ua aʻoaʻoina ai oe, ma ua mautinoa ia te oe [“faatauanau e talitonu i ai,” NW], ina ua e iloa o ia na aʻoaʻo atu ai ia te oe.” (2 Timoteo 3:14) I le “faatauanau e talitonu i ai,” sa lē faavaleaina ai Timoteo e lona tinā ma le tinā o lona tinā, o ē na ia aʻoaʻoina mai ai upu moni o le Tusi Paia.—2 Timoteo 1:5.a

A o saisaitia i se fale i Roma, na molimau maeʻaeʻa atu ai Paulo i le toatele o tagata, “ma pulunaunau [“faatauanau,” NW] atu ia te i latou i mea ia Iesu, mai le tulafono a Mose atoa ma le au perofeta, e afua i le taeao e oo i le afiafi.” (Galuega 28:23) Pe na faasee ea e Paulo lana aofia? E leai lava! E manino mai la, o le faatauanau e lē faapea e sese i taimi uma.

I le faaaogaina i se uiga mautinoa, o le upu autū faa-Eleni ua faaliliuina i le “faatauanau” o lona uiga ia faatalitonu, ia faia se suiga o le mafaufau e ala i ni fefulisaiga o manatu e lelei ma aogā. E mafai ai la e se faiaʻoga ona fafau aʻe manatu i luga o se faavae faale-Tusi Paia, i le faaaogā o le faatauanau e totō ai i isi se talitonuga maumaututū i upu moni o le Tusi Paia. (2 Timoteo 2:15) O le mea moni, o le faailoga lenei o le faiva a Paulo. E oo lava ia Temetiu le fai mea ario, o lē sa manatu e sese aʻoaʻoga faa-Kerisiano, na ia faapea mai: “E le gata i Efeso, a ua tāli soo Asia uma lava, ona faaliliueseina ai e lena Paulo le vao tagata e toatele i lona ole [“faatauanau,” NW], ua faapea atu, e le ni atua e ua faia e lima.”—Galuega 19:26.

Faaaogaina o le Faatauanau i le Faiva

Na faatonuina e Iesu Keriso ona soo: “O lenei, ia outou o atu e fai nuu uma lava ma soo, ma papatiso atu ia te i latou i le suafa o le Tamā, ma le Atalii, ma le Agaga Paia; ia outou aʻoaʻo atu ia te i latou ia tausi i mea uma ua ou fai atu ai ia te outou; faauta foi, ou te ia te outou i aso uma lava, e oo lava i le gataaga o le lalolagi.” (Mataio 28:19, 20) I le silia ma le 230 atunuu, o loo usitai ai Molimau a Ieova i lenei poloaiga. I masina taitasi a o faagasolo la latou tausaga faaleauaunaga o le 1997, na latou faia ai se faatatauga e 4,552,589 suesuega faale-Tusi Paia i aiga i le lalolagi aoao.

Pe afai ua e maua le faaeaga e faia ai se suesuega faale-Tusi Paia i se aiga, atonu e mafai ona e faatalitalia luʻi na o le a manaomia ai ona faaaogā le tomai o le faatauanau. Mo se faaaoaoga, seʻi faapea i le isi au suesuega o le a fai, o le a lāgā ai se fesili e faatatau i le Tolutasi. E faapefea pe afai e te iloa e talitonu lau tagata suesue i lenei talitonuga? E mafai ona e avatu ia te ia se lomiga o loo talanoaina ai lena mataupu. Pe a maeʻa ona ia faitauina, atonu e te iloa ai ua faatauanauina o ia e iloa e lē tutusa le Atua ma Iesu. Ae pe afai o loo totoe pea nisi fesili, e mafai la faapefea ona e faaauauina?

Faalogologo lelei. O le auala lenei o le a fesoasoani ai ia te oe e iloa lelei ai mea ua uma ona talitonu i ai lau tagata suesue e faatatau i se mataupu o loo folasia. Mo se faaaoaoga, pe a faapea mai lau tagata suesue, “Ou te talitonu i le Tasitolu,” e vave lava ona e faia se talanoaga faale-Tusi Paia e faamaonia ai le sese o lenei talitonuga. Peitai e iai talitonuga eseese e faatatau i le Tolutasi. Atonu e talitonu lau tagata suesue i se mea e ese mai le mea o loo e manatu o le talitonuga lena i le Tolutasi. Atonu o le tulaga foi lena i isi talitonuga, e pei o le toe ola mai i se isi tino, le lē mafai ona oti o le solu, ma le faaolataga. O lea, ia faalogologo lelei a o e lei tautala atu. Aua e te faia se faaiuga taumate i mea e talitonu i ai le tagata suesue.—Faataoto 18:13.

Fai fesili. Atonu o fesili nei e aofia ai: ‘Po o lou talitonuga lava lea sa iai o le Tolutasi? Pe na e faia ea se iloiloga maeʻaeʻa o mea ua fai mai ai le Tusi Paia e faatatau i lenei mataupu? Pe afai o le Atua o se vaega o le tolutasi, po ua lē taʻu saʻo mai ea la e lana Afioga, le Tusi Paia, ia i tatou lena mea?’ A o aʻoaʻoina le tagata suesue, fai ma fesili atu ni fesili faapenei: ‘Po ua talafeagai ia te oe mea ia ua uma ona ta talanoaina?’ ‘Pe e te ioeina lenei faamalamalamaga?’ O lou tomai i le faaaogaina o fesili, e te faaaofiaina ai le tagata suesue i le faagasologa o lona aʻoaʻoina o mea. E lē tatau ona na ona ia faalogologo mai ia te oe a o e faamatalaina atoa le mataupu.

Faaaogā fefulisaiga aogā o manatu. Mo se faaaoaoga, a o talanoaina le talitonuga o le Tolutasi, e mafai ona e faapea atu i lau tagata suesue: ‘Ina ua papatisoina Iesu, na lagonaina ai se leo mai le lagi, ua faapea mai: “O loʻu Atalii pele oe, ua ou fiafia lava ia te oe.” Pe ana fai o le Atua lea sa iai moni i le lalolagi ma papatisoina, po o le a ia fuafuaina ea lona leo ia alu i luga i le lagi ma toe foi mai ina ia mafai ai ona lagonaina na upu i luga o le lalolagi? Pe lē o se taufaasese ea lena mea? Po o le a faia ea e le Atua, o lē “e le mafai ona tala pepelo,” se mea taufaasee faapena?’—Luka 3:21, 22; Tito 1:1, 2.

O fefulisaiga aogā o manatu e faia i se uiga faautauta e masani lava ona aogā. Seʻi manatu mo se faaaoaoga i se fafine o le a tatou faaigoaina o Barbara. I lona lava olaga atoa, sa ia talitonu o Iesu o le Atua lava lea, ma o se vaega o le tolutasi e aofia ai ma le agaga paia. Peitai na taʻu atu e se Molimau a Ieova ia te ia e faapea, o le Atua ma Iesu o ni peresona mavaevae se toalua, ma na faasino atu foi e le Molimau i le fafine ni mau e lagolagoina ai lana faamatalaga.b Sa lē faafitia e Barbara le moni o le Tusi Paia. I le taimi foi lava lea, sa lē fiafia o ia. Ae maise ai, o le talitonuga i le Tolutasi sa matuā pele lava i lona loto.

Sa fefulisai pea ma le onosai e le Molimau manatu ma Barbara. Na fesili atu le Molimau: “Pe ana fai o loo e taumafai e aʻoaʻo mai ia te au faapea e toalua ni peresona e tutusapau, o le ā le faiā faaleaiga o le a e faaaogā e faataitai mai ai?” Sa mafaufau le fafine mo sina taimi ona tali mai lea: “Atonu ou te faaaogā se auuso e toalua.” “O le mea tonu lava lena,” na tali atu ai le Molimau. “Atonu foi o se masaga e tutusapau. Peitai i le aʻoaʻoina mai o i tatou ina ia manatu i le Atua faapea o le Tamā ma o ia lava foi o le Alo, o le ā le feau lena sa faaoo mai e Iesu?” “Lea la ua ou māua atu,” o le tali lea a Barbara, ma ua matuā faatoʻatoʻa mai lana pupula. “O loo ia faamatala mai e iai le tasi e matua atu ma e iai le pule e sili atu.”

“Ioe,” o le tali lea a le Molimau, “ma o le au faalogologo Iutaia sa faalogologo ia Iesu sa ola i se sosaiete o augatamā anamua, e mautinoa lava o la latou tali foi lena.” I le toe faamamafaina o lona manatu, na faaiu i le faapea o upu a le Molimau: “Pe afai tatou te faaaogaina lena faataitaiga fetaui—e faatatau i se auuso po o se masaga e tutusapau e aʻoaʻo atu ai le tulaga tutusa—e mautinoa la o Iesu, le Faiaʻoga Sili, e mafai foi ona ia faia faapena. Nai lo lea, sa ia faaaogā taʻu ‘tamā’ ma le ‘alo’ e faamatala ai le faiā i le va o ia lava ma le Atua.”

Na iu ina malamalama lelei Barbara i le manatu, ma ia taliaina loa. Na pāʻia lona loto ona o le tomai o le faatauanau.

Faatautaia o Lagona Ootia

O talitonuga faalotu ua leva ona iai e masani lava ona aofia ai se vala o lagona ootia. Seʻi manatu ia Edna, o se Katoliko aʻiaʻi. Sa faasino atu ia te ia e le fanau tama talavou e toalua a lana tama teine, faamaoniga manino faale-Tusi Paia e faapea, o le Atua ma Iesu e lē o se peresona e tasi. Na malamalama Edna i mea na ia faalogologo i ai. E ui i lea, sa ia faapea atu i se uiga agalelei ae maumauai: “Ou te talitonu lava aʻu i le Tolutasi paia.”

Atonu na oo foi ia te oe se mea faapena. E toatele e manatu i le talitonuga a lo latou lotu e peiseai o nei mea o se vaega ua mataulia ai i latou. Ina ia faatauanau na tagata suesue o le Tusi Paia, e iai ma isi mea e manaomia nai lo na o ni faamaoniga e tuusaʻo atu pe na o se solo o mau e faamaonia ai le sese o le manatu o le tagata. O tulaga faapena e lelei ona taulimaina pe a faapaleni le tomai o le faatauanau ma uiga agaalofa. (Faatusatusa i le Roma 12:15; Kolose 3:12.) E mautinoa lava, o se faiaʻoga e uigā e tatau ona iai ni ona manatu mautinoa e malolosi. Mo se faaaoaoga, na faaaogā e Paulo fuaitau e pei o le “ua ou mautinoa” ma le “ua ou iloa ma ou mautinoa i le Alii o Iesu.” (Roma 8:38; 14:14) Peitai ane, i le faailoaina atu o o tatou manatu mautinoa, e lē tatau ona tatou faia i se leo fia tautalatasi, faafiaamiotonu, e lē tatau foi ona pei tatou te faaamuamu pe vaai maulalo a o tatou folasia atu upu moni o le Tusi Paia. E mautinoa tatou te lē mananao e faatiga pe faalumaina se tagata suesue.—Faataoto 12:18.

E sili atu ona uigā pe a faaaloalo i talitonuga o le tagata suesue ma amanaia lana aiā tatau e talitonu ai i na talitonuga. O le lotomaulalo le ki. O se faiaʻoga e lotomaulalo e leai ni ona lagona faapea e sili atu o ia nai lo lana tagata suesue. (Luka 18:9-14; Filipi 2:3, 4) O le faatauanau faale-Atua e aofia ai le lotomaulalo lea, e faapea atu ai: ‘Ua fesoasoani mai ma le alofa mutimutivale Ieova ia te au ina ia ou iloa lenei mea. Seʻi oʻu tufaina atu ia te oe.’

Na tusi atu Paulo i ona uso Kerisiano i Korinito: “O auupega a lo matou nei taua e le faaletino ia, a e faamalolosia e le Atua e lepetia ai ʻolo; o loo lepeti i lalo masalosaloga, ma mea maualuluga uma ua faasiasia i le iloa o le Atua, o loo faatoilaloina manatu uma ia anaana ia Keriso.” (2 Korinito 10:4, 5) I aso nei, o loo faaaogā ai e Molimau a Ieova le Afioga a le Atua e lepetia ai talitonuga sese ua leva ona iai, faapea ma faiga masani ua matuā saisaitia ai ma uiga e lē fiafia i ai lona finagalo. (1 Korinito 6:9-11) I le faia o lenei mea, e manatua ai e Molimau e faapea, o loo onosai ma le alofa mai pea Ieova ia i latou. Maeu so latou fiafia i le mauaina o lana Afioga, le Tusi Paia, ma faaaogā lenei meafaigaluega malosi i le liaieseina o aʻoaʻoga sese ma pāʻia ai loto e ala i le tomai o le faatauanau!

[Faaopoopoga i lalo]

[Pusa i le itulau 23]

Pāʻia le Loto o Lau Tagata Suesue

◻ Tatalo mo le taitaiga a Ieova i le pāʻiaina o le loto o le tagata suesue o le Tusi Paia.—Neemia 2:4, 5; Isaia 50:4.

◻ Ia iloa le mea o talitonu i ai le tagata suesue ma le mafuaaga e fiafia ai o ia i se talitonuga e sese.—Galuega 17:22, 23.

◻ I se uiga agalelei, ma onosai, ia fafau aʻe se talanoaga e aogā ma faale-Tusi Paia, a o tausisia pea tulaga sololelei.—Galuega 17:24-34.

◻ Pe afai e mafai, ia faamausalīina upu moni o le Tusi Paia e ala i ni faataitaiga e uigā.—Mareko 4:33, 34.

◻ Faaali i le tagata suesue aogā e maua pe a taliaina le poto saʻo mai le Tusi Paia.—1 Timoteo 2:3, 4; 2 Timoteo 3:14, 15.